Hoërskool Randburg

Gisteraand het ons ons Matriek Toppresteerdersfunksie by Paputzi’s gehou.

Baie geluk aan elkeen van ons toppresteerders! Ons is ongelooflik trots op julle harde werk, toewyding en deursettingsvermoë.

Dankie vir al julle harde werk deur die jaar. Ons hou nou duim vas vir die rekord- en eindeksamen – mag julle harde werk beloon word!

’n Spesiale dankie aan Paputzi’s vir die pragtige funksie, heerlike atmosfeer en uitstekende diens. Ons waardeer julle gasvryheid!

Ons is trots op julle, Randjies!❤️💙

Paputzis

Ons Pa & Seun-dag is om die draai! 🏉💙

Kom geniet 'n dag vol lag, lekker kuier en kwaliteit tyd saam. Dit is die perfekte geleentheid om herinneringe te maak wat 'n leeftyd sal hou. Ons sien uit daarna om julle daar te verwelkom.💙❤️

Die Randjie-dansers skitter oor die langnaweek!

Die afgelope langnaweek het Kara Behrens (graad 10) en Ané Birkenstock (graad 9) behoorlik met hulle danspassies uitgeblink. Albei hierdie Randjies het aan verskeie nasionale danskompetisies deelgeneem waar hulle albei gekwalifiseer het om Suid-Afrika later hierdie jaar te verteenwoording in Sloewenië (Kara) en Pole (Ané).

Baie geluk julle twee, ons is so trots op julle! 🕺🏻💙

Ons het julle nodig, Randjies!
Kies Hoërskool Randburg as jou “Cause” op die Woolies App! 🛒💙❤️

Dit is maklik, dit kos jou niks ekstra nie, maar elke bydrae help ons skool om ’n verskil te maak!

Volg die stappe, kies Hoërskool Randburg en help ons om terug te gee aan ons Randburg-gemeenskap.💙❤️

Ons is baie trots op ons A Cappella-groep: Sterrenade, wat gisteraand tydens die Sentraal Gauteng Eisteddfod 'n A+ vir hulle kompetisieprogram gekry het. Hulle het komplimente vir hul energie, groepsdinamika en uitsonderlike verwerkings ontvang. Mooi so, Randjies en baie sterkte met julle kompetisie op Vrydag, 21 Augustus. Ons staan "nootvas" agter julle.❤️💙

Nasionale Verkennerberaad | 6–10 Augustus 2026

Die afgelope langnaweek het vier Randburg Voortrekkers – Linda vd Walt, Stefan vd Walt, Chanita Kruger en Lize-Marie Raubenheimer – deelgeneem aan die Nasionale Verkenner Voortrekkerberaad.

Wat ’n ongelooflike paar dae! Die beraad het op die dak van die Voortrekkermonument afgeskop en was gevul met geskiedenis, avontuur, leer en nuwe herinneringe.
Van die Voortrekkermonument, Melrose Huis en Fort Schanskop tot die Apartheidsmuseum, Sharpeville en Vegkop – elke besoek het ons geskiedenis op ’n besondere manier laat leef.

By Doornkloof het die Verkenners ook aan die Jeugberaad deelgeneem en hul stem oor belangrike jeugaangeleenthede laat hoor.
’n Naweek vol vriendskap, avontuur, geskiedenis en groei wat nog lank onthou sal word!💙❤️

Ons koor het gisteraand aan die MMS Sentraal Gauteng Eisteddfod deelgeneem, met Elana Neethling as beoordelaar.
Die koor het in twee kategorieë deelgeneem en in beide afdelings ’n A++-diploma behaal!

Ons is ongelooflik trots op elke koorlid én hul ouers wat die ysige koue getrotseer het om hulle te ondersteun. Julle toewyding en harde werk is werklik vir ons skool ’n riem onder die hart.
Knap gedaan, Randjies! Julle laat ons harte sing! 💙❤️

Hokkie Groot Noordvaal A - Afdeling.

Ons Onder 15-dogterspan is die eerste span van Hoërskool Randburg wat ooit vir die Noordvaal Groot A-toernooi gekwalifiseer het!

Al het die uitslae nie hierdie keer ons kant toe geval nie, het die dogters elke wedstryd kliphard geveg, nooit opgegee nie en met trots vir die Randburg-kenteken gespeel.

Hierdie toernooi was meer as net uitslae — dit was nog ’n belangrike stap vorentoe vir Randburg Hokkie.

Ons is baie trots op die span👏🏽!

Die Graad 12-leerders wat Drama, Musiek en Visuele Kuns as vakke neem, het verlede Dinsdagaand, as deel van die jaarlikse Kriewelfees, hulle besonderse talente tydens die Matriekspogaand ten toon gestel.

Vir sommige van hierdie leerders was dit ’n eerste ervaring op die verhoog. Tot nou toe het hulle hoofsaaklik net voor eksaminatore opgetree, en hierdie geleentheid het hulle die kans gegee om die unieke opwinding te ervaar wanneer ’n gehoor hul optrede geniet en met applous beloon.

En dan was daar natuurlik ook die “ou hande” – ons ervare kunstenaars wat gewys het waarom hulle so gemaklik op die verhoog is!

Alexia van der Walt het onder andere ’n splinternuwe komposisie deur Ruan Visser gesing, met Ruan self op die klavier.

Die dramaleerders se items het gewissel van Shakespeare se Macbeth en ’n reeksmoordenaar tot ’n paar skreeusnaakse komedies wat die gehoor behoorlik laat lag het.

Die aand is afgerond met ’n indrukwekkende uitstalling van die Visuele Kuns-leerders se werke, wat die gehoor die geleentheid gegee het om ook hul kreatiwiteit en artistieke talent te bewonder.

Ons is ongelooflik trots op elkeen van hierdie leerders en glo dat hulle nou slaggereed is vir hul praktiese eindeksamens!

Die dramaleerders lê reeds hierdie Vrydag hul praktiese eksamen af – baie sterkte, Randjies! Ons weet julle gaan dit uitstekend doen! ❤️💙

‘n Randjie-vrou

Sy dra die Randjie nie net op haar bors nie,
maar diep binne-in haar hart.
Met trots in haar tree
en ’n ster in haar oog,
weet sy – hier is sy deel van iets besonders.

’n Randjie-vrou staan sterk,
maar sy weet ook wanneer om sag te wees.

Sy droom groot,
sy gee om,
sy lig ander op
en sy laat ’n spoor van goedheid waar sy gaan.
Sy is ’n dogter wat haar ouers trots maak,
’n vriendin wat altyd daar is,
’n leerder wat aanhou probeer,
’n vrou wat haar plek ken
en nooit bang is om haar stem te gebruik nie.

Sy dra die kleure met trots,
sy leef met Slaggereed in haar hart,
want ’n Randjie gaan nie maklik lê nie.

Wanneer die lewe haar toets,
staan sy op –
sterker as voorheen.

Want ’n Randjie-vrou is meer as net ’n uniform,
meer as net ’n naam op ’n register.

Sy is deel van ’n familie,
deel van ’n geskiedenis,
deel van ’n toekoms.

Sy is dapper.
Sy is sterk.
Sy is uniek.
Sy is ’n Randjie.

En waar sy ook al eendag gaan,
sal sy altyd iets van Randburg saam met haar dra –
die vriendskappe, die herinneringe,
die lesse en die liefde.
Want ’n Randjie gaan lê nooit nie.

Aan elke Randjie-dogter en -vrou:
Mag jy altyd onthou wie jy is,
hoe ver jy gekom het
en hoeveel jy vir ander beteken.
Ons is trots op jou.
Ons vier jou.
Ons sien jou.
Ons glo in jou.

Gelukkige vrouedag!💙❤️