SHF Ismail Qemali - Nerasht faqja zyrtare

Arsimtarja e shkollës sonë, Selvije Shemshiu, është emëruar Arsimtare-Mentore nga MASH.

Ky vlerësim është dëshmi e përkushtimit, profesionalizmit dhe punës së saj të palodhur në edukimin e nxënësve. Njëkohësisht, ky emërim paraqet një vlerë dhe krenari të veçantë edhe për shkollën tonë.

I urojmë arsimtares sonë shumë suksese, shëndet dhe arritje të reja në rrugëtimin e saj profesional.

Arsimtarja e shkollës sonë, Hasime Jashari, mori pjesë në Festivalin Evropian Science on Stage 2026, i mbajtur në Klaipėda, Lituani, ku shërbeu si udhëheqëse e delegacionit që përfaqësoi vendin tonë në këtë ngjarje të rëndësishme ndërkombëtare në fushën e arsimit STEM.
Festivali mblodhi mbi 500 mësimdhënës nga 34 shtete evropiane, duke ofruar një platformë të çmuar për shkëmbimin e përvojave profesionale, metodave inovative të mësimdhënies dhe ideve kreative që kontribuojnë në zhvillimin e arsimit bashkëkohor.
Pjesëmarrja e saj në këtë festival përbën një arritje të rëndësishme jo vetëm personale, por edhe institucionale, duke sjellë përvoja dhe praktika të reja që do të ndikojnë pozitivisht në përmirësimin e cilësisë së mësimdhënies dhe në zhvillimin e kompetencave të nxënësve.

Shkolla jonë mbetet e përkushtuar ndaj pjesëmarrjes në nisma ndërkombëtare që promovojnë inovacionin, bashkëpunimin dhe cilësinë në arsim.

Koncert Festiv për Fundvitin Shkollor dhe 1 Qershorin – Ditën Ndërkombëtare të Fëmijëve 🎶

Me rastin e përfundimit të vitit shkollor dhe shënimit të 1 Qershorit – Ditës Ndërkombëtare të Fëmijëve, në shkollën tonë u organizua një koncert festiv i mbushur me gëzim, këngë, valle dhe buzëqeshje fëmijësh.
Nxënësit tanë, së bashku me mysafirët e veçantë – nxënësit e shkollës nga Jazhinca si dhe fëmijët e çerdhes, sollën para publikut një program të larmishëm artistik, duke dëshmuar talentin, kreativitetin dhe frymën e bashkëpunimit mes shkollave tona.
Falënderojmë të gjithë nxënësit, mësimdhënësit, prindërit dhe mysafirët që kontribuan në realizimin e këtij koncerti të mrekullueshëm.

1 Qershori është dita më e bukur për çdo fëmijë, një ditë e mbushur me buzëqeshje, gëzim dhe kujtime të paharrueshme.
Sot, së bashku me nxënësit tanë, festuam këtë ditë të veçantë me shumë dashuri dhe entuziazëm. Atmosfera në shkollë ishte plot hare, ngjyra dhe energji pozitive. Nxënësit kënduan këngë të bukura, morën pjesë në aktivitete të ndryshme, zhvilluan lojëra argëtuese dhe shijuan çdo moment së bashku me shokët dhe mësimdhënësit e tyre.
Gëzuar 1 Qershorin të gjithë fëmijëve! Urojmë që zemrat e tyre të mbeten gjithmonë plot lumturi, dashuri dhe ëndrra të bukura.

Me energji sportive, në shkollën tonë u realizuan me sukses garat në vrapim “Kros 2026”, ku nxënësit tanë treguan shpirt gare, disiplinë dhe talent të veçantë në atletikë.
Këto gara sollën emocione, motivim dhe një atmosferë të bukur sportive mes nxënësve, duke dëshmuar rëndësinë e aktivitetit fizik dhe jetës së shëndetshme në zhvillimin e tyre.
Levdata për nxënësit fitues, të cilët me mundin dhe angazhimin e tyre arritën rezultate të shkëlqyera.
Njëkohësisht falënderojmë të gjithë nxënësit pjesëmarrës dhe arsimtarët për organizimin e këtij aktiviteti sportiv.
Falënderim i veçantë për MPB Tearcë, e cila u kujdes për rregullimin dhe sigurinë e komunikacionit gjatë zhvillimit të aktivitetit, duke kontribuar në mbarëvajtjen dhe sigurinë e garave.

Një sukses i veçantë që na bën krenarë si shkollë!

Me respekt dhe kënaqësi të madhe, urojmë arsimtaren tonë të nderuar Hasime Jashari me rastin e mbrojtjes me sukses të disertacionit të doktoraturës:
“Diversiteti i llojeve dhe ekologjia e makromiceteve në ekosistemet halore të Malit Sharr” në FSHM -Instituti i Biologjisë në Shkup.

Ky sukses paraqet një arritje të rëndësishme akademike dhe profesionale, e cila dëshmon përkushtimin, punën dhe dashurinë ndaj dijes dhe shkencës.

Jemi të privilegjuar që në shkollën tonë kemi arsimtarë të tillë, të cilët me profesionalizëm, dije dhe përkushtim ndikojnë drejtpërdrejt në edukimin dhe formimin e nxënësve tanë, duke qenë frymëzim për brezat e rinj.

I urojmë shëndet, suksese dhe arritje edhe më të mëdha në rrugëtimin e saj akademik dhe profesional!

Një grup nxënësish të shkollës sonë ( nga klasa e VIII dhe IX ) morën pjesë në PANAIRIN MATEMATIKË- FIZIKË që u mbajtë në SHFK "Shemshova " - Shemshovë.
Nxënësit paraqitën idetEë dhe aftësitë e tyre duke zgjedhur vet temën dhe mënyrën e realizimit.
MATEMATIKA NUK ËSHTË VETËM NUMRA, ËSHTË MËNYRA SI E KUPTOJMË BOTËN!
Këtë na e dëshmuan nxënësit e shkollës sonë me punën e tyre të palodhur

Nën patronazhin e komunës së Tearcës, në ambientet e SHFK “Ismail Qemali” – Nerasht u realizua me sukses Turneu në Futboll të vogël 5+1, ku morën pjesë nxënës nga shkollat e komunës sonë.

Në këtë aktivitet sportiv morën pjesë ekipet e shkollave:
🏫 SHFK “Eqrem Çabej” – Sllatinë
🏫 SHFK “Kiril Pejçinoviq” – Tearcë
🏫 SHFK “Asdreni” – Gllogjë
🏫 SHFK “Faik Konica” – Dobrosht
🏫 dhe nikoqirët SHFK “Ismail Qemali” – Nerasht.

Turneu u zhvillua në frymë sportive, me qëllim të promovimit të shoqërisë, bashkëpunimit, respektit reciprok dhe jetës së shëndetshme tek nxënësit përmes sportit.
Aktivitetin e nderoi me praninë e tij edhe kryetari i komunës, duke përkrahur iniciativat sportive dhe edukative të të rinjve.

🏆 Ekipet fituese të turneut:
🥇 Vendi i parë – SHFK “Asdreni”
🥈 Vendi i dytë – SHFK “Ismail Qemali”
🥉 Vendi i tretë – SHFK “Eqrem Çabej”

Gjithashtu, u ndanë mirënjohje për pjesëmarrje për të gjitha shkollat pjesëmarrëse, si shenjë respekti dhe vlerësimi për angazhimin dhe sportivitetin e treguar gjatë turneut.

Një falënderim i veçantë shkon për organizatorët, arsimtarët, trajnerët dhe të gjithë ata që kontribuan në realizimin me sukses të këtij aktiviteti sportiv. 👏⚽️

9 Maji – Dita e eTwinning!
Sot, nxënësit tanë u bënë bashkë në fushën e shkollës për të festuar fuqinë e bashkëpunimit dhe miqësisë evropiane. Përmes projekteve tona, ne thyejmë kufijtë dhe ndërtojmë ura komunikimi me bashkëmoshatarët tanë në mbarë Evropën. Gëzuar ditëlindjen eTwinning!
​
May 9th – eTwinning Day! 🌍✨
Today, our students gathered on the school field to celebrate the power of collaboration and European friendship. Through our projects, we break boundaries and build bridges of communication with peers all across Europe. Happy Birthday, eTwinning!

Në kuadër të planprogramit të klasave të 8-ta në Komunitetin e Bashkësisë, u realizua tema “Letër Kryetarit të Komunës”, ku secili nxënës pati mundësinë të shkruajë një letër duke shprehur kërkesat, idetë dhe mendimet e tyre drejtuar kryetarit të komunës.

Në vazhdën e këtij aktiviteti, nxënësve iu dha mundësia ta vizitojnë edhe nga afër komunën. Gjatë kësaj vizite ata u njohën me kryetarin dhe stafin e komunës, si dhe mësuan më shumë rreth punës dhe përgjegjësive të institucionit komunal. Nxënësit patën mundësi t’i parashtrojnë pyetje kryetarit dhe t’ia dorëzojnë personalisht letrat e tyre me shkrim.

Kryetari i komunës u shpreh se do t’i shqyrtojë me kujdes kërkesat dhe idetë e nxënësve dhe se do t’u kthejë përgjigje atyre.

Falënderojmë kryetarin e komunës për mikpritjen, kohën e ndarë dhe gatishmërinë për t’i dëgjuar kërkesat dhe idetë e nxënësve tanë.