Universiteti i Tetovës - UT

Festojmë së bashku 250-vjetorin e Shteteve të Bashkuara të Amerikës

Panairi Amerikan në Universitetin e Tetovës

Të nderuar,
Ejani ta përjetoni atmosferën amerikane si kurrë më parë! Më 20 qershor 2026, Panairi Shtetëror Amerikan (American State Fair) vjen në Universitetin e Tetovës, duke sjellë një nga traditat më të dashura amerikane në Maqedoninë e Veriut, si pjesë e festimeve Freedom 250, që shënojnë 250-vjetorin e Shteteve të Bashkuara të Amerikës.

Ngjarja do të mbahet në parkun e Universitetit të Tetovës, ditën e shtunë më 20 qershor 2026, prej 17:00 deri 22:00 dhe është konceptuar si një festë e madhe ku të gjithë janë të mirëpritur të marrin pjesë së bashku me familjarët dhe miqtë e tyre.
Vizitorët e të gjitha moshave do të kenë mundësinë të shijojnë një mbrëmje plot argëtim, lojëra, kreativitet, muzikë dhe aktivitete interaktive. Fëmijët, të rinjtë dhe të rriturit do të gjejnë aktivitete të përshtatura për grup-moshat e tyre, duke e bërë këtë një ngjarje ideale për të kaluar kohë cilësore me të gjithë anëtarët e familjes.
Programi do të hapet nga Ambasadorja amerikane në detyrë dhe Rektori i UT-së. Parashihet të ketë muzikë, aktivitete edukative dhe kreative, lojëra dhe gara argëtuese, teknologji moderne si printimi 3D dhe realiteti virtual (VR), rodeo mekanike, kënd fotografik me tematikë kaubojësh, si dhe ushqime tradicionale të panaireve amerikane.
Vizitorët do të kenë mundësinë të provojnë shije autentike amerikane dhe të përjetojnë atmosferën e panaireve tradicionale amerikane.
Ngjarja do të prezantojë kulturën, inovacionin, arsimin dhe frymën komunitare amerikane përmes aktiviteteve të organizuara nga American Corners, Education USA, alumni të programeve të shkëmbimit dhe partnerë lokalë.

Gjatë gjithë mbrëmjes do të ketë program të pasur artistik me DJ, muzikë country, grupe rock dhe artistë të tjerë, përfshirë edhe performancën e grupit amerikan Free Groove.
Nëse dëshironi të njihni më nga afër kulturën amerikane ose thjesht të kaloni një mbrëmje të bukur verore me familjen, fëmijët dhe miqtë tuaj, Panairi Amerikan në Universitetin e Tetovës, është vendi ku duhet të jeni.

Hyrja është falas!

Ju mirëpresim!

Prof. Ord. Nora Halimi e përfaqësoi Universitetin e Tetovës në Konferencën Ndërkombëtare ICAE 2026

Prof. Ord. Nora Halimi, profesoreshë e rregullt në Fakultetin e Arteve të Universitetit të Tetovës, mori pjesë në Konferencën e Dytë Ndërkombëtare mbi Artet dhe Edukimin – ICAE 2026, me temë “Krijimtaria, trashëgimia dhe edukimi artistik në epokën e teknologjisë”, e cila u zhvillua më 11–12 qershor 2026 në Universitetin e Arteve në Tiranë.
Në këtë veprimtari shkencore ndërkombëtare morën pjesë studiues, pedagogë, artistë dhe doktorantë nga vende të ndryshme të rajonit dhe Evropës, përfshirë Shqipërinë, Kosovën, Maqedoninë e Veriut, Malin e Zi, Italinë dhe Greqinë. Konferenca shërbeu si një forum i rëndësishëm akademik për diskutimin e sfidave dhe zhvillimeve bashkëkohore në fushën e arteve, trashëgimisë kulturore dhe edukimit artistik, duke nxitur dialogun ndërdisiplinor dhe bashkëpunimin ndërinstitucional.
Në kuadër të programit shkencor të konferencës, Prof. Ord. Nora Halimi e prezantoi punimin e saj me titull “Roli i rrëfimit në edukimin e dizajnit grafik: Fuqia e narrativës”, i cili trajton narrativën si një komponent thelbësor në procesin e mësimdhënies së dizajnit grafik. Punimi vë në pah ndikimin e rrëfimit në zhvillimin e mendimit kritik dhe krijues, në ndërtimin e identitetit vizual, si dhe në përforcimin e aftësive komunikuese të studentëve përmes gjuhës së dizajnit.
Përveç prezantimit të punimit, Prof. Ord. Nora Halimi u angazhua edhe në cilësinë e moderatores së sesionit të parë në fushën e arteve pamore, ku drejtoi diskutimet shkencore dhe koordinoi shkëmbimin e ideve ndërmjet pjesëmarrësve nga institucione të ndryshme artistike. Roli i saj kontribuoi në krijimin e një dialogu konstruktiv mbi qasjet bashkëkohore të kërkimit dhe praktikës artistike.
Pjesëmarrja e saj në ICAE 2026 përfaqëson një kontribut të rëndësishëm në promovimin e kërkimit shkencor dhe artistik, si dhe në forcimin e bashkëpunimit akademik në nivel rajonal dhe ndërkombëtar.

CEREMONIA E ABSOLVENTËVE TË UNIVERSITETIT TË TETOVËS

Data: 27 qershor 2026
Koha: 09:00
Vendi: Sheshi i Rektoratit-UT

Urime të gjithë absolventëve 🎓
Ju urojmë shumë suksese në të ardhmen!

www.unite.edu.mk

Në Universitetin e Tetovës sot kanë filluar punimet e trajnimit tre-ditor “Digital Transformation & Cybersecurity in the Western Balkans”, i organizuar nga Universiteti i Tetovës në bashkëpunim me organizatën Europe+.

Në këtë aktivitet po marrin pjesë përfaqësues dhe profesionistë nga vendet e Ballkanit Perëndimor, të cilët gjatë tri ditëve do të kenë mundësinë të shkëmbejnë përvoja dhe njohuri mbi sfidat dhe mundësitë që sjell transformimi digjital dhe siguria kibernetike në rajon.

Trajnimin e hapi Prorektori për Shkencë i Universitetit të Tetovës, Prof. Dr. Vullnet Ameti, i cili theksoi nevojën e padiskutueshme për organizimin e trajnimeve të tilla, duke pasur parasysh se Maqedonia e Veriut shpeshherë ka qenë pre sulmeve kibernetike. Ai nënvizoi gjithashtu se Universiteti i Tetovës është ndër institucionet më të digjitalizuara në rajon, duke dëshmuar përkushtimin e tij ndaj inovacionit dhe zhvillimit teknologjik.

Në përmbyllje të ceremonisë së hapjes, Prof. Dr. Vullnet Ameti ndau dhurata simbolike, logon e Universitetit të Tetovës për znj. Majlinda Bregu si ligjëruesja e parë e këtij trajnimi, si dhe portretin e Nënës Terezë për drejtoreshën ekzekutive të organizatës Europe+, znj. Jorida Shytaj, në shenjë mirënjohjeje për kontributin dhe bashkëpunimin e tyre në realizimin e këtij aktiviteti të rëndësishëm.

Rektori i Universitetit të Tetovës mori pjesë në Konferencën e Sigurisë në Shkup

Rektori i Universitetit të Tetovës Prof. Dr. Jusuf Zejneli, mori pjesë në Konferencën e Sigurisë të organizuar në Shkup në bashkëpunim ndërmjet Universitetit të Tetovës dhe Universitetit “Shën Klimenti i Ohrit” – Manastir.
Në këtë konferencë morën pjesë përfaqësues të institucioneve shtetërore, ambasadorë e diplomatë, profesorë universitarë, studiues, ekspertë të sigurisë, si dhe studentë, me qëllim të trajtimit të sfidave bashkëkohore të sigurisë në nivel kombëtar, rajonal dhe ndërkombëtar.
Në fjalën e tij përshëndetëse, Rektori i Universitetit të Tetovës Prof. Dr. Jusuf Zejneli, theksoi rëndësinë e organizimit të platformave të përbashkëta akademike për diskutimin e çështjeve të sigurisë, në një periudhë kur mjedisi ndërkombëtar karakterizohet nga pasiguri në rritje, rivalitete gjeopolitike, konflikte të vazhdueshme, kërcënime hibride, sulme kibernetike, migrime masive dhe sfida të reja ndaj rendit ndërkombëtar.
Ai potencoi se siguria sot nuk është më vetëm një çështje institucionale apo akademike, por një dimension thelbësor i zhvillimit, stabilitetit dhe prosperitetit të shoqërive moderne. Gjithashtu, ai nënvizoi rëndësinë e bashkëpunimit ndëruniversitar dhe ndërinstitucional për ndërtimin e mekanizmave të sigurisë.
Në kuadër të konferencës u theksua edhe rëndësia e bashkëpunimit ndërmjet dy universiteteve publike të vendit, Universitetit të Tetovës dhe Universitetit “Shën Klimenti i Ohrit” – Manastir, si dëshmi e përkushtimit të institucioneve akademike për të kontribuar në avancimin e dijes dhe promovimin e kulturës së dialogut, mirëkuptimit dhe sigurisë.
Gjatë punimeve të konferencës, pjesëmarrësit zhvilluan prezantime dhe diskutime profesionale lidhur me sfidat e reja të sigurisë, duke shkëmbyer ide, analiza dhe rekomandime konkrete për forcimin e sigurisë kombëtare, rajonale dhe evropiane.
Konferenca u vlerësua si një mundësi e rëndësishme për ndërtimin e urave të bashkëpunimit ndërmjet akademisë, institucioneve dhe komunitetit të ekspertëve, me synim adresimin e sfidave komplekse të sigurisë së shekullit XXI.

Ekspozita vjetore e studentëve shënoi përmbylljen e vitit akademik në Fakultetin e Arteve

Fakulteti i Arteve i Universitetit të Tetovës, më 10 qershor 2026, e ka përmbyllur vitin akademik me organizimin tradicional të ekspozitës vjetore të studentëve. Në ambientet e këtij fakulteti janë prezantuar punime të shumta që dëshmojnë talentin, kreativitetin dhe përkushtimin e studentëve në mentorimin e profesorëve të tyre.
Në hapjen solemne të këtij aktiviteti, të pranishmëve me fjalë rasti iu drejtua dekani i Fakultetit të Arteve, Prof. Ord. Senad Abduli. Ai i vlerësoi arritjet artistike të studentëve dhe i përgëzoi ata për punën e palodhshme që po e demonstrojnë përmes këtyre veprave. "Sot, në këtë ditë të bukur të përmbylljes së vitit akademik, ndihem jashtëzakonisht i lumtur që në muret e fakultetit tonë janë ekspozuar punimet tuaja. Këto vepra përfaqësojnë jo vetëm talentin dhe kreativitetin tuaj, por edhe mundin, përkushtimin dhe sakrificën që keni bërë gjatë gjithë procesit të studimeve, së bashku me profesorët e lëndëve përkatëse. Ndihem krenar për rezultatet e shkëlqyera që po i demonstroni dhe për nivelin artistik që po e dëshmoni përmes këtyre punimeve. Me këtë rast, kam edhe një lajm shumë të mirë për ju. Me ndihmën e një fotografi të mirënjohur, me mbështetjen e Universitetit të Tetovës dhe falë donacionit të pjesshëm të z. Isa Fazliu (Marmofix), kemi siguruar një pjesë të mjeteve të nevojshme për formimin e laboratorit të fotografisë në fakultetin tonë. Ky është një hap i rëndësishëm drejt përmirësimit të kushteve të studimit dhe krijimit, duke u ofruar studentëve mundësi më të mira për zhvillimin e aftësive të tyre profesionale dhe artistike. Absolventëve u uroj shumë suksese në rrugëtimin e tyre të ardhshëm profesional dhe artistik. Jam i bindur se dijet dhe përvojat e fituara gjatë studimeve do t’ju shërbejnë si bazë e fortë për sfidat dhe arritjet që ju presin. Ndërsa ju, studentë të dashur që vazhdoni studimet, ju inkurajoj të vazhdoni të mësoni, të krijoni dhe të përfitoni sa më shumë nga dijet dhe përvoja e profesorëve tanë të mrekullueshëm.
Themelimi i laboratorit të ri të fotografisë vlerësohet si një investim strategjik që do t’u mundësojë brezave të rinj qasje në teknologjinë bashkëkohore dhe kushte moderne për realizimin e projekteve të tyre vizuale. Përveç ekspozimit të punimeve artistike, ky aktivitet shërbeu edhe si një moment vlerësimi për rrugëtimin akademik të studentëve. Në shenjë mirënjohjeje për përkushtimin e treguar përgjatë studimeve, u ndanë mirënjohje për studentët më të dalluar.

Profesorë të Universitetit të Tetovës ndër 10 shkencëtarët më të cituar në shkencat humane në Maqedoninë e Veriut

Universiteti i Tetovës ka shënuar një arritje të rëndësishme akademike, duke konfirmuar edhe një herë rolin e tij si një nga qendrat kryesore të kërkimit shkencor dhe arsimit të lartë në vend. Sipas renditjes së publikuar nga Academic Ranking of Balkan Universities (ARBU), katër profesorë të Universitetit të Tetovës janë përfshirë në mesin e dhjetë shkencëtarëve më të cituar në fushën e shkencave humane në Maqedoninë e Veriut.
Në këtë listë të studiuesve me ndikimin më të madh akademik renditen: Prof. Dr. Isa Spahiu, Prof. Dr. Rabije Murati, Prof. Dr. Arburim Iseni dhe Prof. Dr. Ardita Ceka. Kjo arritje reflekton punën e tyre shumëvjeçare në kërkimin shkencor, angazhimin në projekte akademike, si dhe kontributin e vazhdueshëm në prodhimin dhe promovimin e dijes shkencore.
Citueshmëria shkencore konsiderohet një nga indikatorët më të rëndësishëm për matjen e ndikimit të studiuesve në komunitetin akademik. Prania e katër profesorëve të Universitetit të Tetovës në mesin e dhjetë më të cituarve në vend, dëshmon jo vetëm cilësinë e punës së tyre kërkimore, por edhe reputacionin në rritje të universitetit në hapësirën akademike kombëtare dhe ndërkombëtare.
Ky rezultat është vlerësim i drejtpërdrejtë për përkushtimin e Universitetit të Tetovës ndaj zhvillimit të kërkimit shkencor, mbështetjes së stafit akademik dhe promovimit të standardeve të larta në arsim dhe shkencë. Njëkohësisht, ai dëshmon se investimi në kërkim, publikime dhe bashkëpunim akademik vazhdon të japë rezultate konkrete dhe të matshme.
Arritja e profesorëve të Universitetit të Tetovës është motiv shtesë për brezat e rinj të studiuesve dhe dëshmi se puna e palodhur, profesionalizmi dhe përkushtimi ndaj shkencës vlerësohen në nivelin më të lartë akademik.
Me këtë sukses, Universiteti i Tetovës forcon më tej pozitën e tij si institucion lider në arsimin e lartë shqip dhe si një qendër e rëndësishme e dijes në rajon.

Rektori i UT-së Prof. Dr. Jusuf Zejneli mori pjesë në konferencën shkencore të organizuar nga Akademia e Shkencave dhe Arteve e Kosovës

Me ftesë të Akademisë së Shkencave dhe Arteve të Kosovës (ASHAK), Rektori i Universitetit të Tetovës Prof. Dr. Jusuf Zejneli, mori pjesë në konferencën shkencore me temë: “Ndryshimet gjeopolitike dhe sfidat për shtetin e Kosovës”, e cila u mbajt në Prishtinë.
Në konferencë ishin të pranishëm personalitete të shquara akademike, studiues dhe ekspertë nga rajoni, të cilët trajtuan zhvillimet aktuale gjeopolitike dhe ndikimin e tyre në perspektivën shtetërore, politike dhe shoqërore të Kosovës.
Gjatë qëndrimit në Prishtinë, Rektori i UT-së, zhvilloi një takim pune me Kryetaren e ASHAK-ut, Akad. Justina Shiroka-Pula. Në këtë takim u diskutua për mundësitë e zgjerimit dhe thellimit të bashkëpunimit ndërinstitucional në fushën e arsimit të lartë, kërkimit shkencor dhe projekteve të përbashkëta akademike.
Në konferencë morën pjesë edhe personalitete të njohura të jetës akademike dhe publike, ndër të cilët Prof. Dr. Arsim Bajrami, Prof. Dr. Hajredin Kuçi, Akad. Isa Mustafa, Prof. Dr. Migena Gorenca, Prof. Dr. Gjyljeta Mushkolaj, Akad. Frashër Demaj, si dhe studiues e ekspertë të tjerë të shquar.
Përmes pjesëmarrjes në aktivitete të tilla shkencore, Universiteti i Tetovës vazhdon të forcojë rolin e tij si institucion i rëndësishëm akademik në hapësirën shqiptare, duke mbështetur iniciativat që nxisin mendimin kritik, bashkëpunimin ndërinstitucional dhe avancimin e dijes.

Siguria dhe etika digjitale

Sot u përmbyll me sukses projekti “Siguria dhe etika digjitale”, i realizuar në kuadër të Fakultetit Pedagogjik të Universitetit të Tetovës, me mbështetjen e Qendrës Maqedonase për Edukim Qytetar (QMEQ).

Në kuadër të aktiviteteve përmbyllëse, studentëve të Fakultetit Pedagogjik të cilët morën pjesë në trajnimet dhe aktivitetet e projektit iu shpërndanë certifikata pjesëmarrjeje.
Projekti përfshiu trajnime dhe aktivitete me nxënës dhe studentë, me fokus në promovimin e përdorimit të sigurt, etik dhe të përgjegjshëm të teknologjisë dhe internetit.

Në fund të aktivitetit u realizua edhe një fotografi e përbashkët me studentët pjesëmarrës, trajnuesit e projektit Prof. Dr. Kushtrim Ahmeti dhe Prof. Dr. Florim Idrizi, si dhe udhëheqësin e projektit Doc. Dr. Agron Iljazi, si kujtim i një angazhimi të përbashkët dhe i një përvoje me vlerë në promovimin e sigurisë dhe etikës digjitale.

EKSPOZITË VJETORE E STUDENTËVE TË ARTIT FIGURATIV

Data: 10 qershor 2026
Koha: 17:00
Vendi: Fakulteti i Arteve - UT

Ju mirëpresim!