РЦСОО Ѓорѓи Наумов - Битола

03/06/2026

Интерен конкурс за упис во I година, учебна 2026/2027!!!
Пријавувањето на учениците ќе се врши електронски преку порталот Uslugi.gov.mk со посебна најава за ученици преку сопствените кориснички сметки на schools.mk
 ЈУНСКИ УПИСЕН РОК:
* Првото електронско пријавување на учениците ќе се врши од 00:00 часот на 12 јуни до 23:59 часот на 15 јуни 2026 година.
- Доставувањето на потребната документација до училиштата е на 16 јуни 2026 година од 08.00 часот до 19.00 часот и 17 јуни 2026 година од 08.00 часот до 15.00 часот.
- Конечната ранг листа со резултатите од запишувањето и слободните места, секое училиште ја објавува на 18 јуни 2026 година, најдоцна до 12.00 часот, на јавно место во училиштето и/или на училишната интернет страница.
- Квалификациско тестирање ќе се организира во училиштата за средно образование на 22 јуни 2026 година, а конечните ранг листи со резултатите ќе се објават истиот ден, на јавно место во училиштето и/или на училишната интернет страница.
* Второто електронско пријавување на учениците ќе се врши на 23 јуни 2026 година од 00:00 часот до 23:59 часот.
- Доставувањето на потребната документација до училиштата е на 24 јуни 2026 година од 08.00 до 15.00 часот.
- Конечната ранг листа со резултатите од запишувањето и слободните места, секое училиште ја објавува на 25 јуни 2026 година, најдоцна до 12.00часот, на јавно место во училиштето и/или на училишната интернет страница.
Табела за пресметување на поени https://gorginaumov.edu.mk/wp-content/uploads/2026/06/Tabela-za-presmetuvanje-na-poeni-za-upis-2026.xls

22/05/2026

На 8 и 9 мај 2026 година се одржаа XLIII државни натпревари за електротехничка, машинска и сообраќајна струка во СОУ „Киро Спаџов“ — Брко, Кавадарци, организирани од ЗЕМСУ. На натпреварот од машинскиот сектор учествуваа двајца ученици. Илија Мушовски освои I место на образовниот профил Машински техничар под менторство на професорите Георги Ташковски, Снежана Досевска и Маја Марковска, а ученикот Андреј Талевски од профилот Машински техничар за моторни возила доби пофалница под менторство на професорите Билјана Лумбуровска, Георги Ташковски и Катерина Трајчевска.Честитки на учениците и нивните ментори!

18/05/2026

15/05/2026

Горди сме на успехот на нашиот ученик Христијан Атанасовски од III-6, кој освои второ место на литературниот конкурс „Холокаустот низ призмата на детските очи“, организиран од Фондот на холокаустот на Евреите од Македонија и Меморијалниот центар на холокаустот на Евреите од Македонија.
Неговата литературна творба „Пепел во џебовите на детството“ беше препознаена и наградена од стручната жири-комисија меѓу голем број пристигнати творби од основни и средни училишта од целата држава.
Ментор на ученикот е проф. Наташа Младеновска-Лазаревска.
Свеченото доделување на наградите ќе се одржи на 26.5.2026 година во Меморијалниот центар на холокаустот на Евреите од Македонија, каде на најдобрите ученици-автори ќе им бидат врачени признанијата и наградите.
Честитки за Христијан за исклучителната креативност, зрелост и емпатија преточени во литературен текст со силна порака. Му посакуваме уште многу успеси и инспиративни творечки достигнувања.

14/05/2026

На Електромашинијадата, државен натпревар што се одржа во СОУ „Киро Спанџов – Брко“ во Кавадарци, нашите ученици успешно учествуваа со свои изработени трудови:

Игор Поповски од I-8
Ментор: Евгенија Дивитарова
Андреј Наумовски и Филор Лумани од III-8
Ментор: Владо Тасевски

Училиштето достојно беше претставено и во дисциплините теорија и практични вежби, за што дополнително ќе следуваат фотографии и информации.

Им честитаме на учениците и менторите за вложениот труд, креативноста и успешното претставување на нашето училиште.

13/05/2026

Голем успех за ученикот Мартин Вељаноски од III-3, образовен профил Машински техничар за моторни возила!
Самото пласирање во финалето на Националниот натпревар за вештини, како единствен претставник од нашето училиште, претставува значајно достигнување, но Мартин го потврди својот квалитет освојувајќи трето место и бронзен медал.
Овој тип натпревари, организирани по примерот на европските EUROSKILLS- натпревари, годинава за првпат се реализираа во нашата држава, на иницијатива на Асоцијацијата на мали и средни претпријатија на Македонија-АМПЕРСАНД и Занаетчиската комора-Скопје.
На општинско и регионално ниво учествуваа повеќе од 300 ученици од 15 стручни образовни профили, а пласман во финалето, кое се одржа на 11 и 12 мај во Скопје, обезбедија 64 ученици.
Покрај иницијаторите, натпреварите беа организирани и поддржани од Здружението на електротехнички, машински и сообраќајни училишта-ЗЕМСУ, Министерството за образование и наука, Центарот за развој на стручното образование, Министерството за економија и труд, Стопанската комора и Европската Унија.
Финалето на Националниот натпревар за вештини го отвори Неговата екселенција. Михалис Рокас, амбасадор на Европската Унија, а свои обраќања имаа и проф. д-р Весна Јаневска, министерка за образование и наука; Орце Ѓорѓиевски, градоначалник на Град Скопје и Бесник Зендели, директор на Центарот за развој на стручното образование.
Паралелно со натпреварите се одвиваа презентации и интерактивна панел-дискусија со претставници од министерствата, занаетчиските и стопанските комори, како и средби со истакнати работодавачи, членови на коморите.
Стручната комисија, при оценувањето на реалната натпреварувачка задача, на нашиот Мартин му додели дури 89% од вкупниот број бодови, што јасно говори за силната конкуренција и високиот квалитет на натпреварот.
На Мартин му посакуваме уште многу успеси, нови достигнувања и професионален развој.
Менторот Ѓеорги Ташковски упатува посебна благодарност до компанијата во која ученикот реализира учење преку работа, автосервисот ДАН МАР ПЛУС ДООЕЛ-Битола.

10/05/2026

На 07.05.2026 година во Америчкото катче од Битола, Никол Варнс, вршител на должноста амбасадор во Амбасадата на САД, им додели сертификати за успешно завршена обука во програмата „ Software Development Life Cycle “, организирана во партнерство со IWConnect на учениците од РЦСОО „Ѓорѓи Наумов“ - Битола:
Јован Најдановски IV4
Матеј Ѓуровски III 4
Владо Хаџиев III 4
Дарко Бабиќ III 4
Андреј Настески III 5
Јована Кирјаковска III 5
Теона Василевска III 5
Мануела Спасевска III 5
Горазд Наумов III 6
Благој Запаренко IV4
Програмата ги собра студентите - амбициозни претприемачи и иноватори кои сакаат да ги зајакнат своите вештини во развојот на софтвер и иновациите. За време на нејзината посета, г-ѓа Варнс се вклучи во дискусија со фасилитаторите и учесниците на програмата, истакнувајќи ја важната улога на американската наука и технологија во водењето на глобалните иновации и јакнењето на идните лидери во технолошката индустрија.
Настанот ја прослави посветеноста и достигнувањата на учесниците, истовремено зајакнувајќи ја вредноста на образованието, меѓународната соработка, соработката со приватниот сектор и иновациите во создавањето нови можности за младите луѓе.
Честитки за нашите ученици и нивниот ментор Ацевски Илче!

08/05/2026

Нашето училиште беше дел од UPSHIFT-програмата, организирана од LEAD – Leaders for Education, Activism and Development.
На натпреварот учествувавме со четири ученички тима, кои преку своите идеи покажаа креативност, тимска работа, посветеност и искрена желба за позитивни промени во локалната заедница. Секој тим презентираше уникатно и квалитетно решение и достојно го претстави нашето училиште.
За победнички тим од нашето училиште беше избран тимот од II-4 "OTWogether“, кој ќе продолжи понатаму со менторска и финансиска поддршка за реализација на својата идеја.
Тимот го сочинуваат учениците:
Јован Тасевски
Предраг Киров
Василијан Здравковски
Мартин Наумовски
Огнен Кецеџи
Ментор на тимот е проф. Викторија Спасевска.
Искрени честитки до сите ученици за вложениот труд, одличните презентации и ентузијазмот што го покажаа. Ви посакуваме многу успех, нови искуства и уште поголеми достигнувања на претстојниот Саем за социјални иновации во Струмица!

07/05/2026

Во рамки на програмата за ученички компании, која деветта година по ред ја организира Џуниор Ачивмент Македонија, учениците од средните училишта преку тимска работа стекнуваат практично искуство за водење бизнис, финансиска писменост, подготвеност за работа и развој на претприемачки вештини.

Искрени честитки до Мануела Спасевска (III-5), Дарко Бабиќ (III-4), Владо Хаџиев (III-4), Милена Дамчевска (III-5), Михаил Петровски (III-5), Горазд Наумов (III-6), Теона Василевска (III-5) и Јована Кирјаковска (III-5), кои под менторство на професорот Илче Ацевски добија можност преку својот штанд да ја претстават својата бизнис-идеја на национално ниво, пред претставници од бизнис-секторот.

Со своето учество, учениците ги претставија не само своите идеи, туку и вештините за јавно презентирање, тимска работа, комуникација и професионален настап — компетенции што се од особено значење за интервју за работа, упис на курс или факултет, но и за понатамошниот личен и професионален развој.

05/05/2026

Христијан Захарчев – студент на прв циклус студии по компјутерски науки и математика на Универзитетот во Љубљана

Отсекогаш се гледав во полето на техничките науки, па уписот во Средното техничкоучилиште во Битола беше природен избор. Во СОТУ ,,Ѓорѓи Наумов", училиште кое денес стана Регионален центар за стручно образование и обука, имав можност да ги научам основите на компјутерските науки и техниката. Низ современ пристап кон науката, се стекнав со знаења од теоријата, а преку практичната настава добив вештини кои се потребни за работа во индустријата. Имајќи ги предвид модерните барања на пазарот на трудот, би рекол дека од најголемо значење ми беше интердисциплинарноста која е темел на техничкото образование. За време на моето средно образование имав прилика да стекнам вештини од многу различни области преку воннаставни активности и натпревари. Од натпревари во претприемачки вештини, до натпревари по математика, програмирање и економија, Техничкото училиште активно ме поддржуваше и поттикнуваше во освојување на нови цели.
Благодарение на поддршката, успеав да освојам бронзен медал на Осмата меѓународна економска олимпијада во Баку, Азербејџан, како и бројни награди на државните натпревари по математика и информатика.
Денес, како студент по компјутерски науки, знаењето стекнато за време на средното образование ми е од клучно значење. Логиката, начинот на размислување и процесот на решавање на комплексни проблеми и развивање алгоритми се вештини кои јас веќе ги имав стекнато кога дојдов на факултет, а сега само дополнително ги развивам. Би им препорачал на сите основци, на кои интересот за компјутерските науки и програмирањето им е голем, да се запишат токму тука.