Unioni Studentor Shqiptar

23/04/2026

23 Prilli – Dita Botërore e Librit

Në një shoqëri që synon zhvillim të qëndrueshëm dhe përparim të vazhdueshëm, libri mbetet një nga burimet më të fuqishme të dijes, edukimit dhe formimit intelektual. Nëpërmjet leximit, ne zgjerojmë horizontet tona, forcojmë mendimin kritik dhe ndërtojmë një të ardhme më të qëndrueshme.
Leximi nuk është vetëm një proces individual, por një përgjegjësi kolektive që ndikon drejtpërdrejt në ndërtimin e një shoqërie të vetëdijshme dhe të avancuar. Dita Botërore e Librit na rikujton rëndësinë e kultivimit të mendimit kritik, të nxitjes së dialogut dhe të promovimit të vlerave përmes dijes.
Në këtë ditë të veçantë, rikujtojmë rolin e pazëvendësueshëm që libri ka në formimin e individit dhe në përparimin e shoqërisë. Një shoqëri që lexon është një shoqëri që ecën përpara me vetëbesim dhe vizion. Investimi në lexim është investim në të ardhmen.
Le të vazhdojmë të promovojmë kulturën e leximit, të ndajmë dije dhe të frymëzojmë njëri-tjetrin drejt zhvillimit dhe ndryshimit pozitiv.

Unioni Studentor Shqiptar

17/04/2026

Aplikoni në linkun më poshtë dhe bëhuni pjesë e zërit të studentit!

Ky është momenti yt për të mos qenë thjesht një vëzhgues, por një kontribues aktiv në ndryshimin që duam të shohim. Çdo student, çdo anëtar sjell një vlerë të veçantë dhe një perspektivë unike në përmirësimin e të drejtave studentore dhe fuqizimin e komunitetit tonë.

Ne besojmë në potencialin e çdo individi për të bërë diferencë. Së bashku mund të ndërtojmë një union më të fortë, më të bashkuar dhe më përfaqësues — një zë që dëgjohet dhe respektohet.

Sill energjinë tënde, idetë e tua dhe vullnetin për të vepruar. Ky është fillimi i diçkaje më të madhe!

Mos e humb këtë mundësi — apliko tani dhe bëhu pjesë e një rrugëtimi që sjell ndryshim real!

Ju mirëpresim me respekt,
Kryesia e Unionit Studentor Shqiptar

https://docs.google.com/forms/d/e/1FAIpQLSdB4LBFVpQsfDasXphlIUOL6BbgpsCiZ4QDxFrfl8feolgQUQ/viewform?fbclid=IwdGRleARPBHpjbGNrAytw_WV4dG4DYWVtAjExAAEexXifTQMr6qcf9Ejk_D1sJrQsqEx9TOXXbwPFSEw_EimTzIAsHy24YZqeGiU_aem_IkNz3bVhoxlfmUoMcplGkA

15/04/2026

Më 14.04.2026, Unioni Studentor Shqiptar organizoi ceremoninë solemne të prezantimit të kryesisë së re, duke shënuar kështu fillimin e një mandati të ri në funksion të përfaqësimit dhe avancimit të interesave studentore.

Ceremonia u hap me moton:
“Që e keqja të mbisundojë në shoqëri, mjafton që njerëzit e mirë të mos bëjnë asgjë”, duke përcjellë një mesazh të fortë mbi rëndësinë e përgjegjësisë dhe angazhimit qytetar e studentor.

Programi u moderua nga Elif Dava dhe Ilajda Abdullai, të cilat udhëhoqën me profesionalizëm rrjedhën e kësaj ceremonie.

Gjatë kësaj ngjarjeje u bë prezantimi zyrtar i përbërjes së re të kryesisë, si në vijim:
Kryetar: Agron Amiti
Nënkryetare: Melika Rustemi
Sekretare: Erza Rustemi
Anëtare e kryesisë: Eliza Mejdini dhe Halim Mejdini

Në kuadër të ceremonisë, fjalime motivuese mbajtën profesori universitar Ariton Rama dhe psikologia Edlira Destani, të cilët theksuan rëndësinë e angazhimit studentor dhe rolin e të rinjve në zhvillimin e shoqërisë.

Njëkohësisht, në shenjë mirënjohjeje dhe falënderimi, u nda mirënjohje për Komunën e Çairit dhe kryetarin e saj, si partnerë të rëndësishëm që kanë mbështetur vazhdimisht aktivitetet e Unionit Studentor Shqiptar.

Fjalë rasti mbajti edhe kryetari i Këshillit të Komunës së Çairit, z. Muhamed Murtezi, ndërsa në emër të ish kryesive, fjalë rasti kishte ish Kryetarja e Unionit Studentor Shqiptar, Nermine Hamidi. Pas saj, fjalë rasti mbajti edhe ish kryetarja Hava Feta, e cila ndau përvojën dhe eksperiencën e saj gjatë angazhimit në Unionin Studentor Shqiptar, duke theksuar sfidat dhe arritjet përgjatë këtij rrugëtimi.

Në përmbyllje të ceremonisë, fjalën e mori Kryetari i ri i Unionit Studentor Shqiptar, Agron Amiti, i cili falënderoi të pranishmit për besimin dhe mbështetjen, duke theksuar angazhimin për një përfaqësim sa më dinjitoz të studentëve.

Kryesia e re do të angazhohet në mënyrë të përkushtuar për fuqizimin e rolit të studentëve në jetën akademike dhe shoqërore, si dhe për përmirësimin e kushteve të studimit dhe jetesës studentore.

Ceremonia u zhvillua në një atmosferë dinjitoze, me pjesëmarrjen e përfaqësuesve institucionalë, studentëve dhe të ftuarve të shumtë, të cilët shprehën mbështetjen e tyre për këtë fillim të ri.

Unioni Studentor Shqiptar mbetet i përkushtuar për të qenë një zë i fuqishëm dhe përfaqësues i denjë i studentëve, duke kontribuar në avancimin e të drejtave dhe interesave të tyre.

12/04/2026

Ftesë për promovimin e kryesisë së re të Unionit Studentor Shqiptar

Kemi nderin të ju ftojmë në promovimin e kryesisë së re të Unionit Studentor Shqiptar me datë 14.04.2026 në sallën e këshillit komunal në komunën e Çairit me fillim në ora 19:00
Ky aktivitet i yni dëshmon se rrugëtimi i kësaj organizate studentore vazhdon pa ndalur tani më 14 vite të përkushtuar në projektet e arsimit të lartë, kulturës dhe të rinjëve.

Pjesëmarja juaj do ta shton vlerën e këtij aktiviteti.
Ju mirëpresim!

31/03/2026

Më datë 30.03.2026 u mbajt mbledhja e parë me kuvendarët, pas përfundimit të procesit zgjedhor dhe konstituimit të kryesisë së re të Unionit Studentor Shqiptar. Ky takim shënoi fillimin e një faze të re në organizimin, funksionimin dhe përfaqësimin institucional të studentëve.

Gjatë mbledhjes u shqyrtuan dhe u diskutuan disa çështje me rëndësi për vijimësinë e punës së Unionit Studentor Shqiptar, ndër të cilat:
- Përgatitja e ceremonisë formale të pranimit-dorëzimit të mandatit, me qëllim realizimin e një organizimi dinjitoz, përfaqësues dhe institucional;
- Vazhdimësia e projekteve studentore, me fokus në iniciativa konkrete, inovative dhe në funksion të interesit të studentëve;
- Planifikimi i aktiviteteve të ardhshme, të orientuara drejt adresimit të sfidave, kërkesave dhe nevojave të komunitetit studentor;
- Çështja e protestës lidhur me provimin e jurisprudencës, si një moment me rëndësi për artikulimin e qëndrimeve studentore dhe mbrojtjen e të drejtave të studentëve.

Kjo mbledhje dëshmoi përkushtimin, seriozitetin dhe përgjegjësinë e kryesisë së re dhe të kuvendarëve për ndërtimin e një përfaqësimi të qëndrueshëm, aktiv dhe të denjë, në shërbim të studentëve shqiptarë.

Me bashkëpunim, përgjegjësi dhe vizion të përbashkët, drejt realizimit të objektivave tona.

20/03/2026

Urime Fitër Bajramin!

Me shpresë se çdo lutje e juaj dhe çdo lloj adhurimi është pranuar tek Zoti, duke ju dëshiruar çaste të këndshme festive me familjen dhe të afërmit tuaj.

Përzemërsisht,
Unioni Studentor Shqiptar

19/03/2026

Anëtarët e Unionit Studentor Shqiptar në takim me studentët e juridikut të iniciativës studentore për çështjen e provimit të jurisprudencës

Disa anëtarë të kryesisë dhe kuvendit të Unionit Studentor Shqiptar iu përgjigjën ftesës për takim me studentin e UEJL-së Mevlan Ademi me qëllim prezantimin e kërkesave dhe qëllimeve të nismës të studentëve të juridikut në lidhje me provimin e jurisprudencës, të realizohet në gjuhën shqipe.

Si çdoherë, ne si organizatë tani më për të 14-tin vit me radhë, vazhdimisht në ciklet e projekteve, aktiviteteve, takimeve tona, kërkojmë që të zbatohen të drejtat dhe obligimet reciproke në sistemin e arsimit të lartë, përfshirë këtu edhe kur studentëve ju mohohet një e drejtë që duhet garantuar me ligj dhe duhet zbatuar e njejta.

Do të jemi përkrah kolegëve tanë jo vetëm për këtë iniciativë, por proaktiv në çdo temë me qëllim që të kemi progres në zhvillimet e arsimit dhe edukimit.

07/03/2026

02/03/2026

Në emër të Unionit Studentor Shqiptar, sonte e ndjemë edhe një herë sa e vlefshme është të jemi bashkë.

Kjo ishte një mbrëmje e mbushur me respekt, biseda të sinqerta dhe ndjenjë afërsie mes studentëve dhe profesorëve. Në një tryezë të përbashkët u bashkuam jo vetëm për të çelur agjërimin, por për të forcuar lidhjen që na mban si komunitet - lidhjen e dijes, bashkëpunimit dhe mbështetjes reciproke.

Gjatë këtij rrugëtimi kemi mësuar shumë nga njëri-tjetri dhe kemi kuptuar se forca jonë qëndron pikërisht tek uniteti dhe përkushtimi i përbashkët. Për këtë arsye, jemi thellësisht mirënjohës për secilin që ishte pranë nesh.

Na vjen keq që në këto fotografi nuk janë të gjithë pjesëmarrësit e kësaj mbrëmjeje të bukur, por secili prej jush ka qenë pjesë e rëndësishme e këtij momenti!

Faleminderit për praninë, mbështetjen dhe respektin tuaj.

27/02/2026

REAGIM

Unioni Studentor Shqiptar ka ndjekur me vëmendje dhe përgjegjësi debatet publike të zhvilluara në universitete lidhur me Propozim-Ligjin për Arsimin e Lartë.

Nga diskutimet e hapura në universitete janë evidentuar shqetësime serioze në lidhje me:

- kufizimin e studimeve me kohë të pjesshme;
- ristrukturimin e programeve studimore;
- ndikimin e dispozitave të reja në autonominë universitare;
- mungesën e garancive të qarta për përfshirjen e studentëve në procesin vendimmarrës.

Këto çështje nuk janë teknike. Prekin drejtpërdrejt qasjen në arsim, barazinë sociale dhe të ardhmen akademike të studentëve.

Si Union Studentor Shqiptar, konsiderojmë se çdo reformë që prek arsimin e lartë duhet të:

- garantojë të drejtën për studime me kohë të pjesshme për studentët që punojnë;
- mbrojë realisht autonominë universitare, jo vetëm në parim, por edhe në formulimin konkret të dispozitave;
- institucionalizojë përfaqësimin studentor në çdo fazë të hartimit dhe miratimit të ligjit;
-publikojë në mënyrë transparente të gjitha vërejtjet dhe arsyetimet mbi pranimin ose refuzimin e tyre.

Ne besojmë se reforma e arsimit të lartë duhet të ndërtohet mbi konsensus akademik dhe përfshirje të plotë të studentëve - jo si proces formal konsultimi, por si partneritet real.

🎓 Arsimi i lartë është përgjegjësi - dhe studentët janë palë e barabartë në këtë proces.

27/12/2025

Në kuadër të aktiviteteve akademike të Unionit Studentor Shqiptar për vitin akademik 2024/2025, u mbajt ligjërata letrare me temën “Historiografia e letërsisë së Rilindjes”, e ligjëruar nga Zejni Mazllami, e cila njëkohësisht shënoi edhe përmbylljen e ciklit të ligjëratave për këtë semestër.

Ligjërata solli në fokus mendimin politik, filozofik dhe shoqëror të Rilindjes Kombëtare Shqiptare, të pasqyruar përmes veprës së figurave si Hafiz Ali Korça, Hafiz Ibrahim Dalliu, Hafiz Ali Kraja, Gjergj Fishta, Fan Noli dhe Migjeni. U theksua se këta personalitete nuk ishin vetëm shkrimtarë, por ideologë të ndërgjegjes kombëtare, të cilët përmes letërsisë dhe publicistikës kontribuuan në ndërtimin e identitetit shqiptar.

Në veprat e tyre, gjuha shqipe, atdheu dhe uniteti kombëtar u vendosën mbi ndarjet fetare dhe krahinore, ndërsa letërsia u shndërrua në mjet rezistence, ndërgjegjësimi dhe formimi shoqëror. Mesazhet e Rilindjes u vlerësuan si aktuale edhe sot, duke nënvizuar rëndësinë e dijes, arsimit dhe vetëdijes kombëtare për përparimin shoqëror.

"Historia nuk përsëritet; njerëzit i përsërisin gabimet."

Falënderojmë ligjëruesin, historianin Zejni Mazllami për kontributin e tij akademik dhe qasjen profesionale, si dhe të gjithë pjesëmarrësit për interesimin, diskutimet dhe pjesëmarrjen aktive.

Unioni Studentor Shqiptar do të vazhdojë të organizojë aktivitete që promovojnë dijen, kulturën dhe reflektimin kritik.