Murad Alhamwi - مراد الحموي

التأمين ضد النورس المشاكس بباوند واحد بس لو في حالة نتشلك صحن البطاطا بسمك وانت مالك دريان بيطلعلك صحن جديد ببلاش 🤣

حالياً ب Isle of Man
BBQ

علواه كان موجود ببرايتون لما طار صحن البطاطا تبعي

BBQ

فرصة عمل بين تلات دول (البرتغال - تايلاند - بالي) (مهم تقرأ الشروط)
المدرس لازم يكون ببريطانيا مع اقامة عمل سارية .... لو مهتم او بتعرف حدا فيك تتواصل معي مباشرةٍ

بالتوفيق جميعاً ❤

A new long-term overseas placement role from September 2024 - September 2025.
This role is very unique and the family are looking for the right person to fit in with their dynamic.
If you know anyone who might be interested in discussing this role, please feel free to forward them this email.
The key details are:
* Homeschool a 6-year-old student on a long-term overseas placement.
* SEND: mild visual impairment
* Location will be in Portugal (Sept 24 - Dec 25), Thailand and Bali from 2025
* Accommodation will be covered - for Portugal, an apartment will be available separate to the family
* Candidates will have extensive experience tutoring primary aged students or hold a primary PGCE qualification
* The family are very active, enjoy meditation, yoga, surfing and being in nature
* The role requires candidates to be very flexible and shared similar interests will be an advantage
* Very competitive salary, based on experience.

على مدى سنين كتيرة ولحد الآن من عملي كمرشد اكاديمي إما ضمن مشاريع اكاديمية تعليمية او بشكل مستقل شخصي ... من اهم الامور اللي بتقدر تلاحظها بوضوح انو نسبة منيحة من طلابك مارح يكون بدن اكتر من دفشة او دحمة كتف عقولة لعيبة الطابة ...

طالبك اللي انت عم ترشده لازم يكون بمثابة الصديق (مؤقت او دائم) وهاد الصديق هو بالعادة بكون محتاج منك دايماً طرف الخيط من كل قصة ليقدر يكون الصورة الخاصة فيه هو

طبعاً نحن هون عم نحكي عن الوضع المثالي للطالب اللي بيحتاج الارشاد وبكون جاهز لمرحلة التنفيذ يعني معو كل الادوات المساعدة للسفر والدراسة ولكن في ثغرات بطريقة استخدامو الها ...

بأغلب الحالات الطالب رح يكون محتاج للدفعة النفسية قبل ما يحتاج اي شي تاني و تكثر الامثلة عن طلاب تعاملت معن بملفات شخصية واكاديمية رائعة بس الشك اللي جواتن منعن يكملوا خطوة خوفاً من الفشل وبغياب الدعم والتحبيط المستمر من باب اي بلا سفر بلا بطيخ وحاج مسخرة ومن باب قعود اشتغل متل الناس وبلا حكي فاضي ...

هون بيجي دورك انت كمرشد اكاديمي واللي بكون اكتر عبارة عن دعم نفسي من انو يكون عم تقلو كتوب هيك وعمول هيك
الطالب الجيد او الجاهز (المتخمر متل مابسميه) مابيحتاج ابداً النصح المتكرر وانما الدعم المتكرر ...

اغلب الطلاب اللي تعاملت معن كان للاسف محيط الدعم تبعن ضعيف .... كلمة "رائع" و"شغل حلو" و"هون امورك تمام" و"هيك عال العال يامعلم" مارح تنقص ابداً من قيمتك كمرشد ...

برأيي من الاستحالة الابقاء على حالة الاحترافية الجامدة بوسط الارشاد الاكاديمي ... لو انت بدك تأثر بشخص من المستحيل وضرب من الخيال انو الشخص يكون مجرد ملف ورقم عندك وعم تجتمع معو ساعتين بالشهر وبتقول على حالك مرشد بل وتنسب النجاح ان تم لحضرتك... لا بهالحالة انت مو مرشد انت موظف استشارة اكاديمي والفرق لو تعلمون عظيم ...

شوف الطالب كحدا بيهمك أمرو ... امشي منشانو خطوات بدون حتى مايسألك ... الطالب دايما بالحالة الافتراضية رح يخجل منك وكتير يتحفظ على اسئلو ... انت دورك هون تكسر الحاجز هاد وتوصل الو ... حاول تفكر بأربع او خمس خطوات لقدام بناءاً على خبرتك لتوقف اي شي سيء بيعترض طريقو او لتحصلوا اي شي كويس ممكن يفوتو ... وبالاغلب يمكن تعملن بالخفى حتى ماتطير ثقة الطالب بنفسو ومن الابداع المطلق انو تقدر تعمل كل هالقصص لتبين انو صارت بشكل طبيعي بعيد عن اي تدخل منك ...

لو عم تبلش شغل بالمجال هاد من جديد تذكر منيح انو الارشاد الاكاديمي (برأيي ويمكن كون غلطان) هو عبارة عن دعم بشتى الانواع من مادي وعاطفي ومعنوي واكاديمي الطرف وبيوصل حتى للدفاع المستميت عن الطالب اللي عم ترشده لانو هاد الشخص صار مهم عندك لاخر يوم بحياتك
المرشد الاكاديمي والارشاد يعتبر من اكثر المهن استنزافاً للموارد بس الاكثر بإنو يعطيك احساس الانجاز والتأثير ... وبآخر الحكي لو مالك قدها ماتفوتها من الاساس (عادي تختار المهن الانسب الك وتعرف عواقبها)

صورة بشاركها دايماً مع طلابي بالارشاد الاكاديمي .... بلا ناقصة وبلا نص طريق يا خاي ...

كتير بسمع طلاب بتقلي والله بلشت بالطلب للمنحة الفلانية بس تكاسلت لما وصلت لاخر مقالة ... درست لغة لوقت ماوصلت لمرحلة متوسطة بس بعدها وقفت لما جيت على المستوى المتقدم (الاكتساب اللغوي عفكرة بقلك انو هالشي طبيعي ... حاول تقرأ عن شي اسمو B2 Plateau) ...
.. والله جاوبت عكل شي بس في سؤالين خلص حسيت بملل فما كملت الكتابة ... حصلت علامة منيحة لما عم اتدرب للكتابة بالايلتس بس ماتابعت لانو مليت وبعدها خبصت بالامتحان الحقيقي ... وعدّ ومدّ على نفس هالجمل اللي منسمعها او منقولها لحالنا لحتى نوصل لقناعة انو هاد كل شي عندنا مو اكتر ...

بس بضل السؤال الأساسي ليش بلشت بالأساس واستثمرت هالوقت كلو لو رح توقف على اخر كم قصة ؟ وتأكد انو بكل شي اسمو منح دراسية او غيرو من الشغل انت مارح يتم تقييمك على الجزء اللي كاتبو بشكل رائع و مخمخ فيو ... رح يتم تقييمك على الجزء اللي كتبت فيو شو ماكان ... القصة كلها متل لما كان عندك مادة رحت درستا كلها الا صفحتين ... يقوم يجي الامتحان كلو من هالصفحتين ..

زبدة الحكي لو بدك تختصر على حالك المشوار بلاه نص المشوار ... نص فعل بساوي صفر ... حتى لو عم تحاول تقنع حالك العكس لهلأ

اخر موعد للتقدم 15 آذار بالتوفيق جميعاً ❤️❤️

مبادرة EduBridge هي مبادرة مصممة من قبل السوريين للسوريين تضم خبراء في مجال الإرشاد الأكاديمي والمنح الدراسية ومعلمين متخصصين في اختبارات اللغة، تتميز هذه المبادرة بتركيبة فريدة؛ مشاركو اليوم هم مرشدو الغد، نسعى لأن تكون هذه المبادرة منارة أمل مستدامة.

يهدف البرنامج إلى دعم الطلاب السوريين المقيمين في سوريا في سعيهم للحصول على المنح الدراسية. نحن نتصور مستقبلاً حيث لا يُعرف الشباب السوري بقيود ظروفهم، بل بطموحاتهم وعزيمتهم. نهدف إلى سد الفجوة بين الطموح والإنجاز، مما يمكّن مشاركينا من أن يصبحوا مساهمين في المجتمع السوري وغيره من المجتمعات.

ما الذي سنقدمه؟

الإرشاد والتوجيه: سيتلقى المشاركون إرشادًا شخصيًا من شهر نيسان إلى آب، يربطهم بمرشدين ذوي خبرة يقدمون رؤى ثمينة ونصائح ودعمًا للتغلب على التحديات الأكاديمية والتخطيط للمستقبل الوظيفي.

الدعم المالي: نقدم مساعدة مالية لرسوم امتحانات IELTS أو TOEFL للمرشحين المستحقين، يعتمد هذا الدعم على تقييم من قبل الخبراء، لضمان توجيه المساعدة حيث يمكن أن تحدث أكبر تأثير.

عدد المستفيدين:

- 11 مستفيد أربع منهم سيتم تمويل رسوم امتحان اللغة لهم (عدد الأشخاص الذين سيتم تمويلهم قابل للزيادة).

معايير الأهلية:

- أن تكون سورياً أو فلسطينياً سورياً أو لديك وثيقة سفر سورية (الأولوية للطلاب المقيمين في سوريا)
- حاصل على درجة البكالوريوس أو الماجستير أو ستتخرج بحلول سبتمبر 2024.
- مستوى الإنجليزية B1كحد أدنى.
- سجل أكاديمي جيد (يفضل أن يكون أعلى من 70%، النشر في حالة الراغبين بالتقدم لمنح دراسية لمرحلة الدكتوراه).

المستندات المطلوبة: (في ملف PDF واحد لا يتجاوز حجمه 3 ميغابايت)

- السيرة الذاتية.
- كشف العلامات الجامعي.
- شهادة إثبات مستوى اللغة الإنجليزية (إن وجدت).
- رسالة حافز (500 كلمة باللغة الإنجليزية).
- خطاب توصية واحد.

المزيد من التفاصيل تم توضيحها في رابط التقدم للبرنامج (قد يحتاج الى كاسر بروكسي VPN):

https://airtable.com/appHWl27jPAfqhP6x/pagHfvGeUlbkGXavx/form


نتمنى منكم مشاركة البوست لتعم الفائدة والخير والإشارة لأصدقائكم المهتمين.

2013-2023
بين خططنا وخطة رب العالمين ❤

خططنا المحدودة البصيرة : تخرج ومعيدية واوائل ومعهد ظريف وبيت رايق

خطة رب العالمين : تسافر لمكان أصل اللغة ودراستك وتستلم ادارة وتدريس وتعليم اهل البلد نفسن ...

عشر سنين عرفت فين (ك خريج ادب انكليزي) منيح انو الشهادات والمية من مية وترتيبك الجامعي وكل شي الو علاقة بالمقارنات وضغط انو لازم تكون الاول عمدرستك وكل شي بعدها ... رح تعرف منيح بعدها انو مو مهمين على قد مايكون عندك خبرة ومعلومة تطلع فيها بعد تخرجك ...

- انو نحن بالوضع الطبيعي في جواتنا حاجة للانجاز الفاضي مع عدم الفهم الكامل ليش بس المهم نلم شهادات ... ولما تسافر رح تكتشف انو فيك تلف فلافل بكل شي ورق وشهادات جمعتها

- انو تخرجنا بشهادة ادب انكليزي محكوم عليه اما تكون مدرس او مترجم بأحسن حال لآخر يوم بعمرك بس ... أما برا ..... فهي كمان مالها قيمة ولا طعمة بس بنفس الوقت رح تكون مجرد مفتاح لبواب كتيرة اول مايفتحو معك رح تنسى انو في كان بالاساس مفتاح

- انو ماحدا سائل اذا بتعرف كل الروايات اللي درسناها والاشعار اللي اكل عليها الدهر وشرب وانما رح تنسأل ورح تنعرف بقوتك العلمية وخبرتك العملية ومدى تأقلمك مع الوقائع والظروف المحيطة ...

- انو كل شي خبرة عندك جايبها معك فيك تحطها باقرب سلة سواء درست روضة او درست جامعة ... بدك تبلش من الصفر هون متل كل محل

- انو مافي داعي تجقم حنكك الف مرة وتصرع سمانا لتبين انك رائع بل بكفي انك توصل رسالتك بلغة صحيحة ورصينة ونضيفة ومافيها تلوث سمعي ...

- انو لو بدك تكون مدرس او غيرو لازم تضل تدرس طول عمرك ومالازم توقف تطور ومعرفة بكل شي جديد بحقل التدريس واكتساب اللغة وغيرها من المسارات الموجودة ...

- وأخيراً انو خطة رب العالمين رح تكون قطعاً احلى من الف خطة ببالك بدك تعملها ولذلك اسعى وتركها على الله ...

الحمد لله ❤

الدنيا مانجه وكوكتيل وكلو مستبشر خير
موقع الهجرة الكندية بدون سبب : لا مش عايز ياعم قلق مش عايز فقرا يعيدوا مهارة اننننننن

بتتذكروا البوست اللي عملتو من شهرين وشوي تقريباً ؟

اي اليوم تأكد الخبر ومتل ماتوقعت بالبوست السابق

الاختبار لمهارة واحدة رح يبلش من استراليا - كمبوديا - الفيليبين - الهند ...

رح تبلش المراكز حالياً بتسجيل حالها اولاً كمركز معتمد لاعادة المهارة الوحدة ومن بعدها بصير المركز المسجل قادر يعمل اعادة اختبار للطلاب

الاسئلة اللي بتخطرلنا ... شو بالنسبة للجامعات ... هي النقطة لساتا قيد الدراسة وبتحتاج كمان اعتراف الجامعة بهاد النوع من الاعادة ... معناها لحد هلأ ماحدا من الجامعات ماصرح رسمياً انو رح يقبلوا فيه او يرفضوه ... مافي الزام قانوني للجامعات بالقبول طبعاً

كيف رح تطلع الشهادة ؟ بصير عندي شهادتين ... اي نعم بس وحدة منن رح ينكتب عليها اعادة وينحط معها علاماتك السابقة ويتم الاشارة بشكل صريح و واضح انو هالطالب عاد وحدة من هالمهارات ...

كل الشهادات الصاردة رح يكون الها رقم تحقق ومن ضمنها شهادات الاعادة لتعطي معلومة للجامعة او مكان توظيفك انو الطالب عندو اصلية واعادة وبالتاريخ المحدد اللي قدمت فيو ....

موفقين يارب

خبر منتصف اسبوع لذيذ

- مابعد التقدم والمقابلات وكل القصص لهل السنة بتجي مرحلة #الملمة
برأيي هالفترة مو بس للي ماحالفوا الحظ بالمنح والسفر لهل السنة كمان هي فترة الملمة للي انقبل لحتى يخلص كل شي قدامو من اجراءات واوراق وامور (فعلياً لساتك ماسافرت حاول تتصرف عهالاساس ودير بالك من اي مفاجاة او اجراء ممكن ياخد وقت) فترة الملمة كمان بتشمل اللي ماقدم ولا دخل بالموضوع كل عبعضو من اولتو بسبب خوف من الرفض او لانو كان مو متأكد من كتير قصص بحياتو وماكان عرفان الطريق ...

أما الفئة الأولى ...
الملمة لكل شي عديت فيو ولكل الخسارات والمكاسب الصغيرة ... حققت كتير بمجرد قررت تدخل هالطريق واكبر دليل انو تعلمت كتير قصص ماكنت بتعرف شو هي من فترة ومو بس هيك بجوز وصلت لاخر المراحل والمقابلة وهاد لحالو انجاز ضمن عينة طلاب تقدر بالالاف ! ومع هيك عيد تقييم اختياراتك والقصص اللي خلت الموضوع مايكمل وهل ياترى فعلاً بريطانيا هي الاختيار الاساسي فعلاً بسبب منطقي ام هل هي مجرد شي تم اقناعك فيو بضغوط المجتمع وقصص السوشال ميديا الفاضية ؟

الفئة التانية ...
متل ما الصورة الموجودة بهالبوست ... هي الخربطة اللي رح تكون بشكل عام بالمرحلة الجاية ... حتى لو كان الشخص لغتو رائعة وعندو كتير معرفة من عدة ناس سبقوه بدو يضل في شي ناقص ورح يكمل بتجربتك اول ماتوصل ع بريطانيا بشهر 9 ... رح تمر بكتير قصص تبين عليك لليسار وهي يمين والعكس صحيح ورح تكتشف انو قد ما كنت متحضر رح يطلع قصص جديدة لانو هي مغامرتك الك وباسمك الك وبس (لاتنسى تترك بصمتك الحلوة فيها) ... بلش من اول يوم بالبلد عالنضيف ولاتفكر وتقول عادي وبتمشي وماحدا بيحس .... تعاب من اول يوم كانك رح تضل بالبلد الف سنة ... كل شي تراكمي هون ... وكل التوفيق الك بهالرحلة القادمة ❤

الفئة التالتة ...
انت فيك قصص كتيرة عظيمة والناس كلها لاحظتا الا انت شاكك فيها ... الخوف من الرفض رح يتحول لقبول عجيب اول ماتبلش .. مارح تعرف كل شي من اول خطوة ... رح تتعلم وانت عالطريق ورح تعرف انو منيح بلشت لانو الشي اللي كامن فيك حرام يضل مدفون ... ❤

اما انا بحياتي ماطلعت عالكلمات هدول عالطريق خلال 7 سنين لانو مارح ينفعو يغيرو رايي انو السيارة رح تجي من اليسار اكيد وتضربني 🤣🤣🤣

واليوم بقفل صفحة السنة الدراسية 2023. باكتمال كل النتائج وبيانات هالسنة ... بعد شغل الشهرين ومنن شهر رمضان بكل السهر و جلسات قبل السحور وبعد الافطار صار فيني قول انو مقابل تعبي وصلني هلا ... صار فيني قول بكل رياحة انو وقت الحصاد بلش فعلياً مع أول مقابلة

Proud 2023 album is done.

The day you plant the seeds is INDEED the day you eat

والعكس مو صحيح ابداً
- ✅منحة تشيفنينغ 🇬🇧
- ✅منحة سعيد 🇬🇧
- ✅ منح الجامعات البريطانية المستقلة والمنح الخاصة بالسوريين 🇬🇧
- ✅ المنحة الهنغارية 🇭🇺
- ✅منح دول شرق اوروبا 🇪🇺🇲🇰🇸🇰🇸🇮🇷🇴🇮🇩
- ✅منح بعض دول اسيا وكندا 🇨🇦🇦🇺🇮🇳 🇰🇷🇦🇪🇶🇦

لاول سنة وبشكل استثنائي مابكون معكن بشكل كامل من اول مراحل التقدم وانما بس بمرحلة المقابلات ... ومع هيك كنت ممنون لكل لحظة شاركتوني فيها ... للثقة اللي حطيتوها فيني ... ولكل القصص اللي تعلمتها منكن واهمها انو فعلاً صبركن وطريقكن الطويل هو رواية بحد ذاتها وخلتني حس انو كل شي عاملو بحياتي ولا شي مقارنة بكل العذاب والصعوبات اللي عم تمروا فيها ...

شكراً انو سمحتولي اكمل الحلم معكن للسنة السادسة ... شكراً انو عطيتوني امل باللي جاي ... شكراً انو خليتوني جزء من هالطريق ولو كان بسيط كتير هالسنة ... شكراً انو سمحتولي عيش سعادة القبول بكل مرة توصلني رسالة وحس انو انا انقبلت بالمنحة ... واخر شي شكراً انو خليتوني حس بكل فخر انو انا بعرف ناس متلكن وقول انا رفيقكن من كل قلبي لكل شخص بعرفو ....
اكتر من 284 رسالة بهالسنة لحد الان ... كلن خلوني حس بسعادة كبيرة وخاصة الرسايل اللي حاططتن بهالمنشور ... شكراً لكل كلمة لطيفة حكيتوها.

انا مارح انسى حتى لو انتو نسيتوا ! ❤

إلى لقاء قريب بإذنه تعالى مع بداية السنة الدراسية القادمة

اللهم إني اعطيت ما استبقيت ❤️