16/10/2026
Meneer, ons het die jaar besef dat ’n goeie hoof nie baie hare op sy kop hoef te hê om ’n goeie hoof te wees nie. Jy moet net genoeg hare op jou tande hê! 😂
En as ons na Meneer se kop kyk, kan ons seker sê dat die hare dalk bietjie min is, maar die durf, deursettingsvermoë en vasbyt is beslis daar!
Maar grappies op ’n stokkie, Meneer. Vandag wil ons as personeel vir meneer dankie sê.
Dankie dat meneer ’n hoof is wat luister voordat meneer oordeel, wat dink voordat meneer optree en wat bereid is om besluite te neem omdat meneer glo dit is die regte ding om te doen. Dankie dat meneer lojaal is teenoor meneer se mense en omgee oor hierdie skool en die mense wat elke dag hier instap.
Om mense se ingesteldheid te verander en om weer daardie gevoel te skep dat ons saam aan iets bou, verg iets meer.
En dit is iets wat meneer reeds hier kom vestig het.
Meneer is nie iemand wat net dinge wil laat aangaan omdat dit nog altyd so gedoen is nie. Meneer wil weet of ons dit beter kan doen, of ons dit reg doen en of ons nie dalk nog ’n bietjie meer uit onsself, ons kinders en ons skool kan kry nie.
Dit is goed om te weet dat ons ’n hoof het wat nie net tevrede is met hoe dinge nog altyd gedoen is nie, maar wat bereid is om te vra: “Hoe kan ons dit beter doen?”
Ek dink een van die belangrikste dinge wat ’n hoof kan doen, is om sy personeel weer te laat voel dat hulle deel is van iets groter as net hulle eie klaskamers en verantwoordelikhede.
Om ons te herinner dat ons nie net individueel ons werk doen nie, maar dat ons saam ’n skool bou. Dat ons deel is van ’n span en dat elkeen van ons ’n rol het om te speel in die toekoms van hierdie skool.
Dankie dat meneer bereid is om moeilike besluite te neem, dat meneer nie bang is vir verandering nie en dat meneer steeds bereid is om te luister en te leer.
Ons weet almal dat ’n hoof se werk nie altyd maklik is nie. Daar is besluite wat nie almal gelukkig maak nie, probleme wat nie op die agenda verskyn nie en sekerlik dae waarop meneer wonder of dit nie dalk makliker sou wees om net ’n gewone onderwyser te wees nie!
Maar vandag wil ons hê meneer moet weet dat meneer se werk raakgesien word.
Ons waardeer die leiding, die moeite en die verskil wat meneer reeds in so ’n kort tyd gemaak het.
Meneer, ons waardeer meneer nie net vir die posisie wat meneer beklee nie, maar vir die mens en leier wat meneer is. Vir meneer se bereidwilligheid om te luister en meneer se strewe om dinge reg en beter te doen.
Ons hoop meneer besef dat die veranderinge wat meneer bring nie net in reëls en prosesse sigbaar is nie, maar ook in die mense wat elke dag saam met meneer aan hierdie skool bou.
Mag meneer in die volgende jaar steeds die wysheid hê om die regte besluite te neem, die geduld om met ons almal saam te werk en die moed om aan te hou bou aan die skool wat ons almal graag wil hê.
Dankie dat meneer ons herinner dat ons nie net kollegas is wat by dieselfde skool werk nie, maar ’n span wat saam ’n verskil kan maak.
Gelukkige Basedag, Meneer de Clerk. 🧡
