Solidariteit Helpende Hand Ons Plek - Kemptonpark

24/09/2026

Ons vier vandag ons mooi erfenis!

My erfenis is vir my mooi.

My taal. My geloof. My volkshelde. Die stories van oorwinning en oorlewing. Ek koester dit, want ek weet ons kom nie uit geslagte wat sommer gaan lê het nie.

Maar erfenis is nie net dit wat ons ontvang nie – dit is ook dit wat ons nalaat.

Mag ons die geloofsfakkel aan ons kinders oorgee en die aflosstokkie van hoop met trots aan die volgende geslag oorhandig.

Ons kan monumente van klip bou, maar mag ons groter monumente bou van waardes, integriteit, karakter en trots in wie ons is.

Want uiteindelik is ons grootste erfenis nie wat agter ons staan nie, maar wat deur ons voortleef.

«“Die meetsnoere het vir my in lieflike plekke geval; ja, my erfenis is vir my mooi.”
— Psalm 16:6»

Ons Plek – waar ons nie net kinders grootmaak nie, maar aan ’n erfenis bou.

- Suzette Oosthuizen

23/09/2026

Ons Plek vier Erfenisdag!

By Ons Plek Kempton Park is ons nie net ’n kleuterskool en naskool nie – ons is ook ’n kultuurskool, en daarom is Erfenis vir ons besonder belangrik. ❤️

Ons kinders se identiteit word gevorm deur die mense, waardes, taal, kultuur en tradisies waarmee hulle grootword. Wie ons as Afrikaners is, is daarom ’n belangrike deel van ons kinders se vormende identiteit. Ons wil hê hulle moet met trots weet waar hulle vandaan kom, terwyl hulle met liefde en respek hul eie unieke plek in die wêreld inneem.

Daarom het ons Erfenisdag gevier met alles wat vir ons eie Afrikaanse kultuur mooi en kosbaar is!

Van boeresport en FAK-liedjies, tot ons kleuters wat iets tipies van die Afrikanerkultuur aangetrek het. En natuurlik was daar ’n heerlike worsbraai met pap en sous – want wat is ’n Afrikaanse kuier sonder ’n braai? 😄

En dan natuurlik die kersie op die koek… of moet ons sê die melktert op die tafel! 🤭❤️
Die heerlike melktert is deur Tannie Ella vir ons geskenk en was ’n besondere bederf vir die kinders.

Die kinders het die dag verskriklik geniet – daar is gespeel, gesing, gelag, geëet en sommer net lekker saam gekuier. 🥰

’n Groot dankie aan elke personeellid, ouer en vrywilliger wat gehelp het om hierdie besondere dag moontlik te maak. Dit is deur ’n gemeenskap wat saamstaan dat ons vir ons kinders ’n plek kan skep waar hulle kan leer, groei, behoort en met trots hul erfenis kan leer ken. ❤️

Ons taal. Ons kultuur. Ons erfenis. Ons kinders. Ons Plek. 🇿🇦❤️

22/09/2026

11/09/2026

🌿💚 Gryses & Groentjies 💚🌿

Vandag het iets besonders by Ons Plek gebeur…

Die gryses en die groentjies het bymekaar gekom. 👵🏻👴🏻🌱👧🏻👦🏻

En wat ’n kosbare oggend was dit nie! ❤️

Daar was saam gesing, saam gelag, saam ingekleur en sommer net saam wees. Die kinders se helder stemmetjies en die oupas en oumas se glimlagte het vir ’n oomblik twee generasies in een ruimte laat saamvloei.

Dit was die klein oomblikke wat die mooiste was…
’n Handjie wat ’n ouma se hand vashou.
’n Groot glimlag wanneer iemand saam sing.
’n Oupa wat saam met die kinders lag.
’n Prentjie wat met trots gewys word.
En daardie eenvoudige vreugde wanneer oud en jonk ontdek dat hulle eintlik baie meer in gemeen het as wat hulle d**k. 🥹❤️

Ons is dankbaar vir elke oupa en ouma wat vandag deel was van hierdie besondere dag, en vir elke persoon wat gehelp het om dit moontlik te maak.

Want vandag het ons weer gesien:

Wanneer grys en groen bymekaar kom, gebeur iets mooi. 🌿
Herinneringe word gemaak.
Har­te word geraak.
En ’n nuwe generasie leer dat liefde, wysheid en tyd een van die mooiste geskenke is wat ons aan mekaar kan gee.

Dankie dat julle vandag saam met ons gelag, gespeel en geskep het.
Ons Plek was vandag ’n bietjie voller van liefde. ❤️

🌱❤️

01/09/2026

🌸🌼 Dis heerlike lente, die winter is verby... 🎶☀️

En by Solidariteit Helpende Hand Ons Plek Kempton Park het ons vandag behoorlik die nuwe seisoen verwelkom! 💚🌸

Elke kleuter het vanoggend met ’n vrug by die skool opgedaag en ons vrugtemandjies was sommer vinnig propvol kleur! 🍎🍐🍌🍊🍍🍓🫐 Daar was pere, appels, piesangs, lemoene, nartjies, pynappel, aarbeie en selfs bloubessies!

Alles is saamgevoeg om die héérlikste vrugteslaai te maak en natuurlik saam met roomys bedien. 🍨😋 Lekkerder kry ’n mens mos nie!

Maar ons het nie net geëet en pret gehad nie... 🌱👩‍🌾 Ons handjies het ook lekker vuil geword toe ons saam aan ons groentetuin begin werk het. Die grond is voorberei, die saadjies is geplant en nou wag ons in groot afwagting vir ons eie klein tuintjie om te begin groei. Binnekort eet Ons Plek dalk ’n ete uit ons eie groentetuin! 🥕🥬🍅

Natuurlik was daar ook genoeg tyd vir foto pret 📸, gesigverf 🎨, laggies en vrolike lente-oomblikke!

Wat ’n heerlike manier om ’n nuwe seisoen te begin. 🌼

By Ons Plek glo ons mos: waar klein handjies saadjies plant, kan groot drome groei. 💚🌱

🌸 Welkom Lente! Ons is reg vir nuwe groei, nuwe hoop en nuwe avonture! 🌸

🌱💚🌼

16/08/2026

Ons het gehoor toe hulle roep.
Ons het geluister toe hulle vra.
Ons het opgestaan.
En ons het begin bou.

Vandag het Solidariteit Helpende Hand nege Ons Plek-strukture landswyd opgerig – veilige ruimtes waar kinders elke dag beskerm, versorg en bemagtig word.

Ons het kleuterskole en naskoolsentrums geskep waar meer as 400 kinders daagliks kwaliteit onderrig, liefde, veiligheid en ondersteuning ontvang. Hier kry hulle kos wanneer hulle honger is, Afrikaanse onderrig wat hulle identiteit versterk, en mense wat in hulle glo.

Vir baie van hierdie kinders is Ons Plek veel meer as net 'n skool of 'n naskoolsentrum.
Dit is 'n plek waar hulle veilig voel.
Waar hulle gesien word.
Waar hulle kan droom.
Waar hulle die geleentheid kry om die armoedesiklus te verbreek en met hoop die toekoms tegemoet te stap.

Maar die werk is nog nie klaar nie.

Daar is steeds kinders wat wag vir dieselfde geleentheid.
Kinders wat wag vir iemand om in hulle toekoms te belê.

Miskien woon jy vandag in Amerika, Australië, Engeland, Nieu-Seeland of êrens anders in die wêreld.
Jy is ver van Suid-Afrika af.
Maar ek glo jou hart klop steeds hier.

Daarom het ons die "Ons Het Jou Broodnodig"-projek begin.

Hierdie projek gee Suid-Afrikaners regoor die wêreld die geleentheid om steeds 'n verskil by die huis te maak.

Jy hoef nie terug te trek Suid-Afrika toe om hoop te bring nie.
Jy kan dit doen van waar jy ook al woon.

Met jou bydrae help jy om vir 'n kind 'n veilige plek te skep waar hy of sy kan leer, speel, groei en droom.
'n Plek waar die volgende hoofstuk van hulle lewe anders kan lyk.

Wanneer jy deel word van hierdie projek, stuur jy simbolies 'n brood huistoe.

Want brood beteken soveel meer as kos.
Brood beteken huis.
Brood beteken omgee.
Brood beteken familie.

Hulle en ons, het jou broodnodig.

Word 'n donateur vir Ons Plek en beskerm 'n kind se toekoms: https://helpendehand.co.za/donasie-aan-ons-plekke-en-sentrums/donasie/

10/08/2026

'n Vrou word nie net gevier nie — sy word raakgesien. 🌸

Vrydag is die dames van Ons Plek Kempton Park op ’n baie besondere manier bederf ter viering van Vrouedag. ❤️

Ons het die voorreg gehad om Bianca du Plooy by Ons Plek te verwelkom. Sy het vir elkeen van ons dames ’n pragtige sakkie vol liefde, betekenis en bederfies gebring. 🎁🌷

Elke sakkie het ’n naam op gehad — want elke vrou is uniek, kosbaar en deur die Here op die naam geroep vir ’n doel. ✨

En soos met alles wat met liefde voorberei is, was daar soveel meer in die sakkies as net mooi goedjies…

🍵 Tee met die herinnering: “Tee-tyd saam met Jesus.”
’n Sagte uitnodiging om stil te word, asem te haal en tyd saam met Hom te maak.

🧺 ’n Waslappie, sorgvuldig om ’n boodskap gehikkel — ’n herinnering dat ons skoon gewas is, en dat ons ons gesig altyd na Hom moet draai. 🙏🏻

En dan die res van die sakkie… sommer net heerlike bederfies, maar elkeen met soveel sorg gekies. Bianca het met besonderse aandag aan elke dame se behoeftes ged**k — ’n ware voorbeeld van ’n hand van liefde en ’n hand van hoop. 🤍

Ons wil uit die diepte van ons harte dankie sê aan Bianca, haar ma en haar sussie wat elke sakkie met soveel liefde en detail saamgestel het. Die boodskap agter elke geskenkie het dit soveel meer spesiaal gemaak. 🌸

Maar die bederf het nie daar geëindig nie! ☕️🥤

Ons ander besonderse vriende van Ons Plek het gesorg vir heerlike skons met bedekkings, koeldrank en koffie, sodat ons dames die dag kon afsluit met lekker kuier, lag en ’n bietjie welverdiende bederf. 🥰

Dit is wat Ons Plek se hart so besonders maak — mense wat met hart gee, mense wat bou, mense wat omgee. ❤️

Aan elke vrou wat deel is van Ons Plek:
Jy is raakgesien. Jy is kosbaar. Jy is geroep. Jy het ’n doel. En jy hoef nooit te vergeet Wie jou geroep het nie. 🌷

“Ek het jou op jou naam geroep; jy is Myne.” — Jesaja 43:1

Dankie aan elke hand wat gehelp het om Vrouedag by Ons Plek ’n dag van liefde, hoop, geborgenheid en bederf te maak. 🌸

Ons vier vroue — met hart, hand van liefde en geloof. ❤️

26/07/2026

🧡 Wanneer harte ontmoet, gebeur daar wonderwerke 🧡

"Elkeen moet gee soos hy hom in sy hart voorgeneem het... want God het 'n blymoedige gewer lief." – 2 Korintiërs 9:7

By Helpende Hand Ons Plek Kempton Park is daar min dinge wat so kosbaar is soos verhoudings wat oor tyd gebou word. Daarom was dit vir ons 'n groot voorreg om VillaCorp weer by Ons Plek te kon verwelkom.

VillaCorp stap reeds 'n besonderse pad saam met ons. Hulle ondersteun ons getrou deur die jaar met ons StartWell-ontbytpap, wat elke oggend help om klein magie vol en gereed vir die dag se leer te maak. Vir baie van ons maats is daardie warm bakkie pap die beste moontlike begin van hul dag.

Met hul onlangse besoek het hulle ons opnuut oorweldig met hul ruimhartigheid. Ons is geseën met vier pragtige houtkaste, 'n bakkievrag vol opvoedkundige skoolbenodigdhede en 'n kontantskenking van R10 000 wat 'n direkte belegging is in ons kinders se toekoms.

Maar die grootste geskenk was nie die items nie...

Dit was die tyd wat hulle gemaak het, die belangstelling wat hulle getoon het en die opregte omgee waarmee hulle ons kinders, personeel en sentrum besoek het. Sulke verhoudings gee ons moed om groter te droom en met nuwe hoop vorentoe te kyk.

Ons sien met opgewondenheid uit na die pad wat nog voorlê en is dankbaar dat VillaCorp kies om saam met ons te bou aan 'n beter toekoms vir elke kind wat deur Ons Plek se deure stap.

Baie dankie, VillaCorp. Dankie dat julle nie net in 'n projek belê nie, maar in kinders, in gesinne en in hoop. Julle maak 'n verskil wat baie verder strek as wat woorde kan beskryf.

🧡 Saam bou ons hoop. Saam bou ons toekoms. Saam gee ons elke kind 'n gelyke kans.