31/08/2026
’n Dag van Verbintenis, Pret en Positiewe Gedrag by Graafwater Spesiale Skool
Op 23 Augustus het Graafwater Spesiale Skool, in samewerking met die Weskus Onderwysdistrik se SLES-span, ’n “Positive Behaviour”-konferensie in die vorm van ’n spesiale Pa-en-Seun-dag aangebied.
Die dag het bestaan uit vier groepe seuns: ons 1ste-jaars, 2de-jaars, 3de- en 4de-jaars, asook ons SID-seuns van Graafwater en die Citrusdal-satellietklas.
Elke seun het die geleentheid gekry om sy pa of ’n ander belangrike volwassene wat ’n onmisbare rol in sy lewe speel, skool toe te bring. Saam het hulle vier verskillende stasies besoek – met baie pret, samewerking, lag en natuurlik ook belangrike lewenslesse!
🥁 Stasie 1 – Drumming Session
Die eerste stasie was ’n energieke drumming session saam met Jil Prins van The Rascal’s Drum Club.
Pa’s en seuns moes saamwerk om ritmiese musiek te maak, mooi na mekaar te luister en sommer lekker saam te lag. Dit was ’n wonderlike geleentheid om as ’n groep saam te werk en die waarde van samehorigheid, luister en spanwerk te ervaar.
🔨 Stasie 2 – Praktiese Werkswinkels
By die tweede stasie het die seuns die geleentheid gekry om hul pa’s en ander familielede na hul praktiese werkswinkels te neem. Daar het hulle saam ’n klein projek voltooi wat deur ons tegniese werkswinkels voorberei is.
Daar was groot pret en breë glimlagte!
Vir baie van die pa’s, ma’s, tannies en ooms was dit die eerste keer dat hulle kon sien wat hul seun bedoel wanneer hy vertel dat hy die dag “in die werkswinkel” was. Hulle kon eerstehands ervaar wat ons leerders daar doen en ook sien waarom dit so belangrik is dat leerders altyd ’n volledige oorpak en die nodige veiligheidsdrag dra wanneer hulle in die werkswinkels werk.
🧠 Stasie 3 – Spaghetti & Marshmallow Challenge
Die derde stasie het by die koshuis se eetsaal plaasgevind.
Hoofsielkundige Carina Mare, Marina Retief, Sanel Vos, Hannari Varene, Sandy Dees en Me. Bianca du Preez het ’n prettige spanaktiwiteit aangebied waarin die spanne moes kyk hoe hoog hulle ’n toring met spaghetti en malvalekkers kon bou.
Hoewel dit aanvanklik na ’n eenvoudige speletjie gelyk het, was daar belangrike lewensvaardighede en lesse om te leer – onder andere kommunikasie, probleemoplossing, samewerking, deursettingsvermoë en om saam as ’n span te werk.
🌭 Stasie 4 – ’n Worsie en ’n Lekker Kuier
Vir die laaste stasie het pa’s en seuns saam ’n worsie gebraai en heerlik saam geëet.
’n Eenvoudige oomblik van saamwees, gesels en lag – maar dalk juis een van die belangrikste dele van die dag.
💙 Dankie!
Ons is baie trots op hierdie besonderse dag en deel graag ’n paar van die hoogtepunte met ons Facebook-gemeenskap.
’n Spesiale dankie aan al ons ouers en belangrike volwassenes wat die dag saam met ons gedeel het. Julle teenwoordigheid het die dag vir ons seuns besonders gemaak.
Ons wil ook graag dankie sê aan:
👏 Mnr. C. Cloete en Oom Charl wat verantwoordelik was vir die vervoer van ons ouers;
👏 Al ons werkswinkelkollegas vir die ekstra tyd, harde werk en voorbereiding wat in die praktiese aktiwiteite ingegaan het;
👏 Die SLES-span van die Weskus Onderwysdistrik vir hul samewerking en ondersteuning;
👏 en natuurlik aan die hele personeel van Graafwater Spesiale Skool wat op verskillende maniere gehelp het om hierdie dag moontlik te maak.
Dankie dat julle saam met ons bou aan positiewe gedrag, sterk verhoudings en jong mans wat weet dat hulle waardevol, bekwaam en geliefd is. 💙
Enjoy the videos and music you love, upload original content, and share it all with friends, family, and the world on YouTube.
