Kwagga Trust / Oud-Kwaggas

🎾 Padelbane NOU OOP!

Kom speel op Hoërskool Outeniqua se splinternuwe padelbane! 💜💛

📲 Alle besprekings moet op Playtomic gedoen word.

👨‍👩‍👧‍👦 Amal is welkom – leerders, ouers, alumni en die wyer gemeenskap.

💳 Geen kontantfasiliteite nie,alle betalings geskied digitaal via Playtomic.

🏓Padels en b***e word gratis voorsien.

Nog ’n oud-Kwagga prestasie om te vier! 💜

Baie geluk aan ons oud-leerder, dr. Katrien Smuts, met die suksesvolle voltooiing van haar PhD aan die Universiteit Stellenbosch.

Haar proefskrif, ”’n Evaluering van verskeie inligtingskanale wat inflasieverwagtinge in Suid-Afrika beïnvloed”, getuig van akademiese uitnemendheid en jare se toegewyde navorsing.

Baie geluk, dr. Smuts!

🏆 Oud-Kwagga maak wêreldwyd naam!

Baie geluk aan ons oud-leerder, Rudi Scholtz, wat saam met sy projekvennoot, Ruan Smith, die eerste plek behaal het tydens die internasionale Saint-Gobain Architecture Student Contest in Belgrado, Serwië.

As Honneurs-argitektuurstudente aan die Nelson Mandela Universiteit het hulle teen 1 445 deelnemers van 239 universiteite uit 34 lande meegeding en die wêreldtitel vir Suid-Afrika huis toe gebring, ’n uitsonderlike prestasie!

Ons is ongelooflik trots op Rudi se harde werk, deursettingsvermoë en internasionale sukses. Mag hierdie prestasie net die begin wees van ’n blink toekoms.

Baie geluk, Rudi! Die Kwagga-familie vier hierdie wonderlike prestasie saam met jou. 💜💛

𝗗𝗶𝗲 𝘄𝗲𝗱𝘀𝘁𝗿𝘆𝗱 𝗶𝘀 𝘃𝗲𝗿𝗯𝘆, 𝗺𝗮𝗮𝗿 𝗱𝗶𝗲 𝗲𝗲𝗿 𝗯𝗹𝘆 𝘃𝗶𝗿 𝗮𝗹𝘁𝘆𝗱.

Vir enige rugbyspeler is 'n uitnodiging om vir die Barbarians uit te draf veel meer as net nog 'n wedstryd. Dit is wêreldwyd een van die grootste erkennings wat 'n speler kan ontvang.

Hoërskool Outeniqua is ongelooflik trots op twee oud-Kwaggas, wat die afgelope naweek die geleentheid gehad het om die beroemde swart-en-wit trui teen die Springbokke aan te trek.

Wat hierdie prestasie nóg meer besonders maak, is dat hulle saam in 2013 in matriek was, saam vir die Kwaggas se 1ste span uitgedraf het, en nou saam op een van rugby se grootste verhoogde gespeel het.

Baie geluk Warrick & Duhan met 'n besonderse mylpaal.🖤

📸 Fotokrediet: Warrick Gelant (Facebook)

Warrick Gelant van der Merwe

Oud-Kwagga maak sy merk op die wêreldverhoog! 🎓

Hoërskool Outeniqua is ongelooflik trots op Rudi Scholtz, oud-Kwagga (2018–2022), wat reeds groot hoogtes bereik op akademiese vlak.

Ná skool het Rudi sy studies in Argitektuur aan die Nelson Mandela Universiteit aangepak en het reeds sy kwalifikasie voltooi. Hy is tans besig met sy Honneursgraad en sal volgende jaar sy Meestersgraad aanpak.

Rudi en sy mede-student, Ruan, is gekies om Nelson Mandela Universiteit te verteenwoordig in die gesogte Saint-Gobain Student Project-kompetisie. Hulle het meegeding teen van die beste studentespanne van universiteite regoor Suid-Afrika en Afrika.

Tydens die nasionale rondte in Johannesburg is hul projek as die algehele Suid-Afrikaanse wenner aangewys! 🥇

Hierdie prestasie beteken dat Rudi in Junie na Belgrado, Serwië, sal reis om Suid-Afrika op die internasionale verhoog te verteenwoordig teen studente van 16 lande van regoor die wêreld.

Baie geluk, Rudi! Kwaggaland is ongelooflik trots op jou en ons wens jou alle sterkte toe vir die internasionale kompetisie en sal met trots jou vordering volg.

𝟭𝟵𝟳𝟲 𝗞𝘄𝗮𝗴𝗴𝗮𝘀 – 𝟱𝟬 𝗝𝗮𝗮𝗿 𝗥𝗲𝘂̈𝗻𝗶𝗲
15–17 Mei 2026

Die naweek van 15 tot 17 Mei 2026 sal vir altyd ‘n spesiale plekkie in die Klas van 1976 se harte hê. Dit was die naweek waar hulle hul 50 jaar reünie gevier het.

Hulle skop die Vrydag af met ‘n heerlike kuier by Elvis Brew waar hulle herinneringe oor ‘n koppie koffie gedeel het en ou bande weer gesmee is. Daarna het hulle die pragtige Heroldsbaai besoek en tyd gehad om weer saam te wees en die see en mekaar se geselskap te waardeer.

Saterdagoggend het met ‘n gesellige ontbyt by Kafé Serefé begin. Die skaterlag en stories het weergalm. Die hoogtepunt van die naweek was beslis die Saterdagaand waar hulle 'n 5-ster ervaring by die Hawthorn Boutique Hotel geniet het. Dit was besonders om hulle metgeselle saam met hulle te hê, en om weer kontak te maak met twee van ons geliefde oud-onderwysers, mnr Flip de Swardt en sy vrou Rina de Swardt, asook mnr Koos van Tonder. Hulle het die naweek met ‘n kerkdiens by die NG Moedergemeente afgesluit.

Hierdie reünie was nie net ‘n bymekaarkoms nie maar ‘n emosionele, opregte en onvergeetlike ervaring. ‘n Naweek vol herinneringe, vreugde, ‘n tikkie nostalgie en dankbaarheid vir die pad wat hulle 50 jaar gelede saam begin stap het.

Die Klas van 1976 ...

𝟭𝟵𝟳𝟭 𝗠𝗮𝘁𝗿𝗶𝗲𝗸 𝗞𝗹𝗮𝘀: 𝟱𝟱-𝗷𝗮𝗮𝗿 𝗥𝗲𝘂̈𝗻𝗶𝗲

Namens Hoërskool Outeniqua en die Kwagga Trust, ons opregte dank aan elkeen van ons 1971 reüniegangers wat hul klas se 55 jaar reünie bygewoon het. Die spesiale geleentheid het op 8 en 9 Mei 2026 by die King George Protea Hotel plaasgevind.

Die naweek het afgeskop met ’n heerlike “Meet & Greet” op Vrydagaand, waar ou herinneringe en hartlike samesyn gedeel is.

Op Saterdagoggend is die verrigtinge met ‘n geestelike boodskap deur ons emerituspredikant en oud Kwagga, dr. Koos van der Vyver, geopen. Gaste het daarna ’n heerlike warm buffet-ete geniet en tot laat gesellig saam verkeer.

Dit was ‘n gehegte groepie van 10 oud Kwaggas, wat met 3 gades vergesel is. Die hoofseun, Raymond (“Kat”) van Rensburg, hoofdogter, Ottilie (Serfontein) de K**k, en onderhoofseun, Koos van der Vyver was ook onder die gaste.

Dit was ‘n spesiale naweek waar ou herinneringe weer saam herleef is.

𝗕𝗲𝘆𝗲𝗿𝘀 𝗧𝗲𝗵𝘂𝗶𝘀 – 𝗚𝗼𝘂𝗲 𝗢𝘂𝗲𝘀 𝗡𝗮𝘄𝗲𝗲𝗸
8–9 Mei 2026

Oud-BTH koshuisgangers van Hoërskool Outeniqua het die naweek bymekaargekom om die Goue Oues Feesvieringe van Beyers Tehuis te vier.

Reeds met die aanvang van die naweek was dit duidelik: sommige bande breek nooit nie. Die manne het ’n heerlike spitbraai saam geniet, terwyl stories, grappies en herinneringe vrylik gevloei het, elke lag ’n eggo uit die verlede, elke storie ’n stukkie van wie hulle was en steeds is.

Vir ’n paar feesgangers was die ervaring nog meer spesiaal toe hulle weer in die koshuis kon slaap, amper asof tyd vir ’n oomblik teruggedraai het na daardie jong dae vol drome, kameraadskap en onbreekbare broederskap.

Saterdagoggend het die oudleerders weer saam om die ontbyttafel gesit. Gesprekke het voortgeduur en daar was ’n stille waardering vir elkeen se lewensreis, en die rol wat Beyers Tehuis in daardie reis gespeel het.

Hierdie naweek was nie net ’n reünie nie, dit was ’n viering van vriendskap, herinneringe en ’n hoofstuk uit elkeen se geskiedenis.

Spesiale dank aan mnr. Smook, mnr. en me. de Swardt asook mnr. en me. Hattingh wat saam met ons die geleentheid geniet het.

Beyers Tehuis bly meer as net ’n gebou, dit bly na ‘n 100 jaar, steeds ’n tuiste.

🎉 𝗕𝗲𝘆𝗲𝗿𝘀 𝗧𝗲𝗵𝘂𝗶𝘀 𝟭𝟬𝟬 𝗝𝗮𝗮𝗿 – 𝗔𝗳𝘀𝗸𝗼𝗽𝗻𝗮𝘄𝗲𝗲𝗸!

Die groot oomblik is hier, ons BTH Eeufees Afskopnaweek vind plaas op 10–11 April 2026. ’n Naweek vol herinneringe, kameraadskap en trots wag op elke oud-BTH inwoner.

Kom herleef die koshuisgees, kuier saam met ou vriende en vier saam met ons ’n ongelooflike mylpaal.

Besprekings nou oop 👉 https://www.outeniqua.co.za/bth-eeufees-afskopnaweek/

📅 RSVP teen 3 April 2026 op die aanlynskakel👆 of by Berneen Müller (reunie@outeniqua | 083 309 4437). Moenie hierdie spesiale geleentheid misloop nie!

Ons is uiters trots op drie van ons oud leerders wat vanjaar die uitdagende Absa Cape Epic 2026 aangepak en uitstekende uitslae behaal het. Die Cape Epic, bekend as een van die wêreld se mees veeleisende bergfietswedrenne, behels ’n agt dae, meerdaagse aflosren oor tegniese roetes, skerp klimme en uiterste uithouvermoë ... net vir die dapperstes!

Uitslae van ons oud leerders:
• Elite Men – 1ste plek: Tristan Nortje saam met spanmaat Matt Beers
• Open Men – 2de plek: Cronje Beukes saam met spanmaat Jean Pierre du Plessis
• Grand Masters Women – 3de plek: Hannele Steyn saam met spanmaat Lisa Czepek

Hierdie jaar was veral besonders vir Hannele Steyn, vir wie dit haar 22ste Cape Epic was. Sy is die enigste vrou wat al 22 Cape Epic's suksesvol voltooi het, wat haar tereg die bynaam “The Last Lioness” besorg het. Hierdie is ’n merkwaardige nalatenskap van deursettingsvermoë en karakter.

Baie geluk aan hierdie uitmuntende atlete. Julle deursettingsvermoë, sportmanskap en harde werk dien as ’n inspirasie vir al ons huidige leerders. Ons vier julle ongelooflike prestasies!

nortje
steyn
beukes