31/08/2026
Citrusdal: 'n Kreatiewe Gemeenskap – dankie, Citrusdal! 🎨🎶📖
Wat 'n aand was dit nie!
Donderdagaand, 27 Augustus, was die NG Kerksaal vol musiek, gedigte, kuns en gemeenskapsgees. Gaste het die aand deurgebring deur na optredes te luister, kunswerke van naby te bekyk en gedurende die pouse met die kunstenaars self te gesels – presies die soort aand waarvoor ons gehoop het. Dankie aan almal wat kom kyk en luister het.
Aan elke kunstenaar en musikant wat uitgestal en opgetree het, baie dankie. Ons eie leerders, plaaslike kunstenaars en gaste van heinde en verre het skilderye, illustrasies, fotografie, gedigte en selfs opvoedkundige speelgoed vir babas met ons gedeel. Elkeen het iets spesiaal tot die aand bygevoeg.
'n Besondere hoogtepunt van die aand was 'n onderhoud op die verhoog tussen ons hoofdogter, Alicia Visser (self 'n voornemende fotograaf), en Merie Langner. Merie is onlangs met 'n gesogte internasionale fotografie-toekenning vereer – die eerste skoolleerder ooit om hierdie prys te ontvang. Wat 'n voorreg om haar storie uit haar eie mond te hoor.
Willie Jacobs het op sy b***t met ons oor sy skilderproses gesels en ons weer eens geïnspireer met sy boodskap: gaan uit, probeer nuwe dinge, en maak al die foute wat daar is om te maak – want dis hoe jy leer.
Dankie aan Willie en Merie wat onderskeidelik van die Weskus en Pretoria af gereis het om by ons te wees.
Baie dankie ook aan ons borge! Soveel van die aand se sukses was danksy julle.
Dankie ook aan mev Salome Benade, wie se pragtige dekor die saal in 'n warm, gesellige ruimte omskep het.
En aan mev Desiré Smit en ons hoof, mnr Johann Jordaan – hierdie aand was julle gesamentlike visie, en sonder julle sou dit nie moontlik gewees het nie. Dankie dat julle kuns by Pomario laat leef.
✨ Citrusdal, julle kreatiwiteit is iets besonders! ✨️
📸 Foto's: Chris Cosnett en die Pomario Redaksiespan
