Die Gereformeerde Laerskool Bellville

22/09/2026

Juffrou Christine verjaar die vakansie, maar dit is nie 'n verskoning om nié haar verjaarsdag te vier nie!

So, dit was vandag 'n feesdag in die graad 1-klas (ag en sommer vir die hele skool met 'n langer pouse).

Ons is oneindig dankbaar vir alles wat die Here vir ons gee deur ons liewe juffrou. En ons bid dat Hy, die een op wie sy ook volkome vertrou, haar in die nuwe lewensjaar sal seën, naby wees en spaar.

Lekker verjaar juffrou Christine!

18/09/2026

🥳🇿🇦Rom-tom-tom
Slaan die drom
Tralalalala
Suid-Afrika 🇿🇦🥳

Wat 'n onvergeetlike dag is dit nie!

Ons Olyfboompies vier SA-dag. Nie net omdat dit binnekort Erfenisdag is nie, maar ook omdat Suid-Afrika met al haar nasionale ikone 'n fees verdien! Saam met springbokke, proteas, bloukraanvoëls en die galjoen, is daar koeksisters, droë wors, boerewors, melktert, beskuit, pannekoek, tameltjie, droë vrugte, mielies en nog soveel meer waarvan ons Suid-Afrikaners kan geniet. En hoor hoe speel die heerlike boeremusiek met die trekklavier wat ons dag opkikker.

Dankie Olyfboompies, ons het (dalk op 'n afstand) saam met julle geniet van hierdie goue-sterretjie-dag!

16/09/2026

Ons Rugga Roots oefeninge het weer tot 'n einde gekom vir die kwartaal. Die manne het hard geoefen en is beloon met hul eie "kicking tee". Dankie aan coach Alex!

Hard oefen die vakansie, né manne!

15/09/2026

Donderdag 10 September - goue-sterretjie-dag by die Olyfboompies! Want dit was tyd vir die jaar se glansgeleentheid: Die Olyfboomtee.

Van oulike muurversierings, tot keurig gedekte tafels en opgewekte, opgewonde gaste... tot ... die sterre van die oggend:

Vrolike sangers, oulike "mamma-en-dogters", dapper brandweermanne en flukse dansers!

Baie geluk, Olyfboommaats, julle was fantasties, oulik, hartverwarmend en dierbaar! Dankie en baie geluk ook aan ons liewe juffrou Risella Botha .

15/09/2026

Onthou julle ons geheime projek? Die een wat ons vir ons maats by Paarl-skool/Paarl School gemaak het?

Vandag was die dag wat ons dit kon oorhandig. Saam met die toiletware wat ons ingesamel het en die bewys van die mooi bedrag wat ons deur Loslitdagplakkers te verkoop, bymekaar gemaak het.

Om te gee is soveel beter as om net te wil ontvang.

09/09/2026

Dis moeilik om te kies tussen al die baie oulike foto's, want elkeen vertel 'n deel van die storie: die wonderlike, spesiale geleentheid en ervaring om ons leerders akwarium toe te neem.

Ons het weer soveel geleer oor God se skepping en diep onder die indruk gekom van sy almag en wysheid, sigbaar in hoe alles so besonders gemaak is.

Dankie juffrouens en mammas wat gereël en gery het. Dankie vir die besonderse lessies en leergeleenthede.

07/09/2026

Ons is hard besig met beplanning en voorbereiding vir ons 50ste verjaarsdagvierings DV 2027.

Neem gerus deel aan ons Feeshempkompetisie. Navrae aan [email protected]

07/09/2026

07/09/2026

Ons het hierdie kwartaal se gemeenskapsprojek laat saamloop met Loslitdag. Ons het nie net meer as R1000 ingesamel vir Paarl-skool/Paarl School nie, ons het ook 'n geskenkie gemaak vir elke klas: we all stand together (n.a.v. die 2026 slagspreuk: Beat as one).

Met liefde.

03/09/2026

Sien, die rede vir die vroegoggend gewerskaf aan die geheime projek, is dat ons maats 'n besige dag van plantjies-plant gereël het. En met vandag se goeie plantjies-plant-weer, was dit noodsaaklik om genoeg tyd te hê om al die werk te kan afhandel! Lente kom!