Huppelland Kaapstad

Kleurvolle vuurtorings is verlede week deur ons Gr R Bytjies geskep. Hulle het begin deur die sonsondergang te maak deur pienk, oranje en geel met ‘n spons op die papier te meng. Daarna het hulle ‘n bladsy blou geverf wat hulle later opgeskeur het om die see te vorm. Toe het hulle die lighuis geteken en geverf. Daarna het hulle die vuurtorings self uitgeknip en bo-op die helderkleurige agtergronde geplak. Gaan loer gerus na die treffende werke teen hul klaskamermuur. Welgedaan, Bytjies! 🌅❤️

Ons deel vandag die Skapieklas se treffende sebra-kunswerke wat hulle hierdie week vir hul tema ‘wilde diere’ voltooi het. Die agtergrond is eers met helder kleure geverf. Toe het hulle met swart posterverf hulle sebras geteken en met patrone versier. Heel laaste moes hulle die sebras uitsny en bo-op hulle gekleurde agtergronde plak. Mooi so, Skapies! 🦓🦓❤️❤️

Gisteroggend het ons derde, talentvolle kunstenaar Michael Taylor by ons Gr 00 Huppellanders kom kuier. Die kleuters het met groot oë aan Michael se lippe gehang terwyl hy een van sy meesterstukke vir hulle gewys het. Geduldig het hy vir hulle vertel hoe sy werke amper soos drome kan lyk en hoe belangrik die regte kleurgebruik vir hom is. ‘n Onvergeetlike oggend vir ons kleuters en vir baie was dit die eerste keer dat hulle ‘n ware kunstenaar kon ontmoet. Nogmaals dankie aan Michael Taylor vir jou tyd en die gemaklike aanslag wat jy met ons kleuters gehad het. Dankie ook weereens aan Tina le Cordeur van Source Artistry wat ons met hierdie spesiale ontmoeting moontlik gemaak het. Ons kan nie wag om te sien wat hierdie groep Huppellanders vir ons gaan optower nie! 👩🏻‍🎨🧑🏽‍🎨👨🏾‍🎨🖼️🖌️🎨

Die eerste week van die kwartaal het die Bokkies van die waterkringloop geleer en ‘n oulike aktiwiteit voltooi. Hulle het papierborde geverf en toe met pastelle ‘n berg en sneeu geteken. Daarna het hulle gekleurde papier geskeur om die see en die son te plak. Die wolke is toe met watte geplak en heel laaste is die blinker-druppels geplak. ‘n Leersame aktiwiteit wat hulle baie geniet het. Kyk net hoe mooi lyk hulle finale kringlope!💦💧

Die Beertjieklas het verlede week oor die tema ‘Winter’ geleer en spesifiek gepraat oor die tipe klere wat ‘n mens in die winter dra wanneer dit koud is.

Meer oor die oulike projek wat hulle aangepak het. Elke kleuter het eers ‘n mussie met waterverf geverf. Daarna het hulle met pastelle op die mussie geteken. Elke kleuter moes toe hul gesiggies in ‘n spieël bestudeer en toe stap vir stap met swart khoki-penne hulself byteken. Die agtergronde is heel laaste met ink geverf en gekleurde pom-poms is as versiering geplak. Spoggerige winter-geïnspireerde kunswerke! 🥶❄️☃️🧤🧣

Sondagoggend-inspirasie uit juffrou Lana se klas. Die Vissies het verlede week die kleurvolste ‘Tier’ kunswerke gemaak. Wat ‘n treffende collage van helder kleurgebruik en unieke observasie. Ons is mal oor julle helder, oranje tiere 🐯🐅🐯🐅

Vanoggend het ons tweede kunstenaar, Michael Amery, wat ons Gr R kleuters se kuns vir die uitstalling gaan inspireer, by ons kom kuier. Hy het begin deur baie mooi vir hulle te verduidelik hoe sy kreatiewe proses werk en waar sy inspirasie vandaan kom. Die natuur inspireer sy werke en vir hom is die meng van sy kleure voor hy begin verf die belangrikste deel van sy kunswerke. Hy is ook gaande daaroor om te skets en het tot vir die kinders self gewys hoe hy blitsvinnig met houtskool ‘n landskap kan optower deur observasie. ‘n Baie spesiale oggend met ‘n uiters talentvolle kunstenaar wat ons Gr R kleuters nie gou sal vergeet nie. Ons sien uit na die meesterstukke wat geskep gaan word! 🎨🧑🏽‍🎨👩🏻‍🎨👨🏾‍🎨

Nogmaals dankie Michael Amery vir jou tyd en moeite. Dankie ook aan Tina van Source Artistry vir al die reëlings! ♥️

Vanoggend het Lara Frances wat hierdie jaar ons Gr 0 kleuters se kunswerke vir die kunsuitstalling op 22 Okt gaan inspireer, by ons kleuters kom kuier. Sy het heerlik met hulle gesels oor hoe sy begin skilder het, wat haar werke inspireer en hoe sy steeds haar liefde v sang uitleef. Verder het sy ook BAIE vrae van ons nuuskierige kleuters geduldig beantwoord. Sy het ook ‘n paar van haar eie werke saamgebring en die kleuters selfs toegelaat om oor haar werke te streel sodat hulle die tekstuur van haar dik olieverf kon voel. Wat ‘n unieke en kosbare ervaring vir ons kleuters. Ons onderwysers het na die tyd heerlik met haar gesit en saam besluite geneem oor die tipe papier wat aangekoop moet word, die soort verf wat die beste sal werk en hoe hulle die proses vir die kleuters nog meer relevant kan maak. Ons kan nie wag om te sien wat hulle gaan optower nie! ‘n Spesiale dankie aan Tina le Cordeur (Retief) 🌈🌈🌈 van Source Artistry wat die kunstenaars vir ons help identifiseer en reël het❤️🎨🖼️🖌️👨🏾‍🎨👩🏻‍🎨🧑🏽‍🎨

Juffrou Liza se Gr R Hondjies het hierdie week die ongelooflikste Jagluiperd kunswerke gemaak. Hulle het eers die Jagluiperde met swart pastel geteken en daarna met waterverf die fyner detail en agtergrond ingeverf. Ons is gaande oor die kreatiewe werke. Welgedaan aan ons kunstige Hondjies, elke kunswerk kort nou net ‘n raam! 🐆🐆