Tuys Leersentrum

18/05/2026

10/04/2026

Die begin van ’n nuwe kwartaal dra altyd iets besonders in hom. ’n Stil uitnodiging om weer te begin, om weer te probeer, om weer met vars oë na die pad vorentoe te kyk. By die leersentrum is dit vir my belangrik dat ons nie net akademies reg begin nie, maar ook geestelik. Dat ons, as onderwysers en kinders, doelbewus vir God nooi om saam met ons elke uitdaging van hierdie kwartaal aan te pak.

Ons het die tweede kwartaal begin met iets eenvoudig — potlode en donuts. Maar agter die eenvoud lê daar soveel betekenis.

Die lewe is nie altyd sag nie. Nie vir ons nie, en ook nie vir ons kinders nie. Hulle dra soms swaar dinge in klein harte, ervaar uitdagings en sosiale struikelblokke wat vir ons dalk al bekend geraak het. Daarom het elkeen ’n donut ontvang — ’n klein herinnering dat, ten spyte van alles wat moeilik is, daar steeds soetheid in die lewe is. Dat die uitdagings hulle nie hoef te oorweldig nie, maar eerder kan vorm, kan slyp, en wysheid kan bring vir die pad vorentoe.

Elke kind het ook ’n grys potlood ontvang. Want ons is, elkeen van ons, die skrywers van ons eie lewensverhaal. Elke oggend staan ons op en skryf ons verder — soms met trots, ander dae met spyt. Maar die mooi van ’n potlood is dat dit kan uitvee. Niks is permanent nie. Geen fout, geen verkeerde keuse, geen oomblik van swakheid hoef die einde van die storie te wees nie.

Ons dien ’n genadige God. ’n God van tweede kanse, van oorbegin, van liefde wat nie ophou nie. En dit is ons roeping om ons kinders daagliks daaraan te herinner — dat wanneer hulle voel hulle storie is besig om skeef te loop, hulle altyd kan terugdraai, kan bid, kan vra vir vergifnis, en kan vertrou dat Hy hulle weer sal lei.

Mag hierdie kwartaal een wees waar elke kind nie net groei in kennis nie, maar ook in geloof. Waar hulle leer dat hulle stories waarde het — en dat, saam met God, dit stories kan wees wat nie net vandag saak maak nie, maar vir ewig betekenis dra.

31/01/2026

Drie jaar.
Drie jaar se sade wat in geloof geplant is, lank voordat ek kon sien hoe die wortels begin vat. Drie jaar van opdaag, selfs op dae wanneer moed skaars was en die las swaar gevoel het.

Vandag kyk ek terug met ’n hart vol dankbaarheid. Dankbaar dat ek al vir die derde jaar mag doen waarvoor ek lief is. Dankbaar dat ek elke dag mag werk met betekenis, met doel, met mense en drome wat my eie hart vorm en slyp.

Dit was nie altyd maklik nie. Daar was dae van twyfel, dae van moegheid, dae waar ek gewonder het of ek sterk genoeg is vir die pad wat ek gekies het. Maar niks wat werklik die moeite werd is, kom ooit sonder stryd nie. Groei vra opoffering. Roeping vra volharding.

Keer op keer moes ek leer om my eie verstaan los te laat en eenvoudig te vertrou. Te vertrou op God se Woord wanneer die uitkoms onseker was. Te glo dat Sy planne — selfs wanneer ek dit nie kon sien nie — altyd groter en beter is as enigiets wat ek self kon uitdink. Hy het deure oopgemaak wat ek nie eens geweet het bestaan nie, en my gedra wanneer my eie krag nie meer genoeg was nie.

Hierdie leersentrum is meer as net ’n plek. Dit is ’n bewys van genade, van gehoorsaamheid, van geloof wat aanhou loop al bewe die bene. Dit is ’n herinnering dat wanneer ons ja sê vir God, Hy altyd meer doen as wat ons vra of verwag.

Drie jaar later staan ek steeds hier — nie volmaak nie, maar getrou. Nie sonder vrees nie, maar vol geloof. En met ’n hart wat weet: dit is net die begin.

05/08/2025

🌈 🍏 ✏️

03/06/2025

ń Brief vanaf Juffrou se tafel.

29/01/2025

Drome is soveel mooier wanneer God dit bewaarheid. 🌈

19/01/2025

Ek weet wat Ek vir julle beplan, sê die Here: voorspoed en nie teenspoed nie; Ek wil vir julle 'n toekoms gee, 'n verwagting! - Jeremia 29:11

4 jaar terug het ek ten volle begin vertrou dat God my as ń onderwyseres wil gebruik. Dit was nie maklik om my eie planne en drome so oor te gee nie. Veral nie wanneer ek soveel kastele in my kop begin bou het oor my ideale lewe nie.

Maar God het wel vir my kom wys terwyl ons kastele bou, Hy koninkryke kan bou. Terwyl ons droom oor vandag, droom Hy oor ń ewigheid. Daar waar God die middelpunt is gebeur onbeskryflike dinge, Heilige en Goddelike dinge.

My klein droom vir ń ideale lewe het God kom verander in ń GROOT plan vir ń ewigheid saam Hom.

Net soos ek gedroom het oor Tuys Leersentrum het my dierbare man saam met my gedroom. Ons heel eerste sketse vir die tafels is nou vir ewig geraam en op my klas se muur. En daardie idee op die skets staan vandag gereed om soveel kinders te help, leer en lei. Hierdie skets verteenwoordig Jeremia 29:11.

Jeremia 29:11 sal vir my en die kinders elke dag herinner dat ons ń God het wat ons wil seën met ń toekoms om na uit te sien. En hoe wonderlik is dit om elke dag met daardie gedagte skool te gaan.