DF Alumni

Volgende week is Interskoleweek! En soos altyd is daar 'n propvol program, met, vir sommige oud-Dee-Effers, heeltemal nuwe aktiwiteite. Daar is 'n spelathon, en daar is e-sport(s) en daar is 'n kookkompetisie. Alles in goeie gees. 'n Hoogtepunt is natuurlik altyd die strawwe kompetisie by die 'Old Girls-netbal' en 'Old Boys'-rugby. Dit vind plaas op Woensdag, 12 Augustus op Bellville se velde. Sien die program hieronder. Sien julle daar! Kyk sommer of julle van die gesigte hieronder herken. 🩵💙💛

Klas van 1966, julle sestigjaar-reünie is op hande. Hier 'n boodskap van julle organiseerder van die reünie:
Die matrieks van 1966 hou vanjaar ons 60-jaar reunie - ja, SESTIG jaar! Ons kon 32 klasmaats opspoor, van wie ongeveer 20 laat weet het dat hulle ons reunie op 8 Oktober vanjaar in Durbanville wil bywoon, maar ons sal graag meer klasmaats daar wil hê. Indien iemand wat hier lees, weet van mense wat in die klas van '66 was (die jaar toe Riaan Kruger en Constantia Kemp hoofseun en -meisie was), vra hulle asseblief om dringend 'n epos te stuur aan [email protected], want ons kan nog tot middel September getalle aanpas om meer mense te akkommodeer.
So, Sestigers, deel asseblief die boodskap!

DF se gemengde koor, onder die inspirasionele, charismatiese leierskap van alombeminde mnr. Jade Paige het as wenners uit die stryd getree by die ATKV Applous kompetisie...en ons is mateloos opgewonde! Ons onderbreek die wenstreep van 9 jaar van die Hoërskool Menlopark. Julle was gedugte teenstanders, Menlopark! Daar word vertel dat dit die eerste maal in 34 jaar is dat die gemengde koor die eer te b***t val. Nou vra ek van die oud-Dee-Ef koorsangers, kan julle die feit vir ons rugsteun? Laat weet as jy dalk lid was van die DF gemengde koor toe hulle 'n vorige keer die prestige kompetisie gewen het. Ek plaas die amptelike opname van die koorsang sodra ons dit ontvang. Hier deel ek net die vreugde van die oomblik.

Klas van 2016-reünie in klaskamer nr. 8!
Hier sê die klas "Cheers" op 'n ikoniese leerkrag, mnr. Visser. Dankie, Klas van 2016, dit was 'n heerlike samekoms. Ons is trots op die groep vir al die waarde wat hulle toevoeg tot die samelewing. Ons is bly julle kom terug. Dit is seker een van die groepe wat die meeste hulle lewensmaats by DF ontmoet het. Laaste tel, sowat 8 paartjies van die Klas van 2016 getroud met mekaar. Dan sowat 4 wat getroud is met ander oud-Dee-Effers. Sien julle oor 10 jaar!

Oud-Dee-Effer verteenwoordig Suid-Afrika by die Statebondspele 2026, te Glasgow, Skotland!
Chris (Christoff) Reeders, Klas van 2008.
Chris Reeders is lid van die Suid-Afrikaanse gewigoptel-span van nege atlete wat Suid-Afrika verteenwoordig het by die 2026 Statebondspele. Na 4 dae van strawwe en uitmergelende mededinging het Chris in die superswaargewigte Span Suid-Afrika se poging baie suksesvol afgesluit.
Chris, wat teen die ware reuse van die sport in die mans-super-swaargewigafdeling (+110kg) meegeding het, het die laaste hoop van die Suid-Afrikaanse span van nege atlete op sy skouers gedra. En dit het hy gedoen met 'n bestendige en beheerde vertoning om die Spele af te sluit. Hy het die "snatch"-fase suksesvol met 135 kg begin en die gewig stelselmatig verhoog tot hy 'n hyspoging van 140 kg suksesvol uitgevoer het. In die "clean & jerk"-fase, het Reeders geweldige krag getoon en 163 kg met sy eerste poging suksesvol opgelig. Sy pogings het 'n totaal van 303 kg opgelewer, wat vir hom 'n AGSTE plek in 'n reuse-eindstryd besorg het. Veels geluk, Christoff, DF is geweldig trots op jou deursettingsvermoë en vasbyt. Knap gedaan! Ons kweek hulle geestelik sterk hier by DF!

Veels geluk aan Dirk Hagen, hoofseun, Klas van 2024 wat verkies is as die primarius van Vesta 2026/2027. Vesta is ‘n gemeenskap vir studente wat van buite die kampus af pendel (CSC) – uitsluitlik vir mans – aan die Universiteit Stellenbosch, eerder as 'n tradisionele fisiese koshuis met kamers op die kampus. Dit is in 2008 gestig en skakel en ondersteun studente wat daagliks na die kampus pendel. Hulle sal defnitief baat by jou leierskap, Dirk!

En ons bly by die Klas van 2016...waar ’n oudleerder van die klasgroep ’n nasionale ADHD-bewusmaking dryf.
Juané du Randt (BA/BPsych) gebruik vandag haar eie ADHD-storie om 'n verskil te maak in die lewens van kinders en gesinne regoor Suid-Afrika. As geregistreerde berader, operasionele bestuurder van die ‘Goldilocks and the Bear Foundation’, internasionale spreker en ADHD-voorstander, het sy reeds by verskeie nasionale en internasionale kongresse opgetree waar sy ouers, onderwysers en professionele persone oplei oor die vroeë identifisering en ondersteuning van kinders met ADHD. Haar passie is ook persoonlik. Juané is eers in haar twintigerjare met ADHD gediagnoseer.
"Ek was daardie kind wat eers jare later antwoorde gekry het. Vandag werk ek sodat vandag se kinders dit nie hoef deur te maak nie. As ek dit op skool geweet het, sou ek myself soveel beter verstaan het... en ek is nogal seker my arme Wiskunde-juffrou sou 'n paar minder grys hare gehad het!" 😄
Volgens Juané gaan dit nie daaroor dat iemand iets verkeerd gedoen het nie, vir haar gaan dit oor die vroeë herkenning van dié tekens van ADHD, veral by meisies en leerders wat stil sukkel, sodat hulle vroeër gehelp kan word. Hierdie September lei sy die Sea of Yellow-veldtog: 'n nasionale inisiatief waar skole, besighede en gemeenskappe op 11 September, vir ’n bydrae van R10, geel dra om te wys dat kinders met ADHD gesien, verstaan en ondersteun word. So kan die gemeenskap help om die ‘Goldilocks and the Bear Foundation’ se gratis dienste vir kinders in onderbediende gemeenskappe moontlik te maak. Ons is baie trots op ons oudleerders wat soveel waarde toevoeg! Ons wens jou net die beste toe, Juané, vir dié veldtog en jou baie belangrike werk.
Vir meer inligting oor die werk van die ‘Goldilocks and the Bear Foundation’, besoek gerus die webtuiste by www.gb4adhd.co.za of volg hulle op sosiale media.

Dit is trouseisoen vir die Klas van 2016!
Sedert Meimaand is daar 4 lede, waarvan ek bewus is, van die Klas van 2016 wat hulle in die huwelik laat bevestig het. Een van hulle was die hoofmeisie, Thea Booysen. Op 14 Julie is sy getroud met die wêreld se grootste YouTube-ster, Mr Beast, of in die alledaagse lewe, Jimmy Donaldson. Hulle het mekaar in 2022 ontmoet. Thea het ‘n BA-graad in regte en ‘n honneursgraad in Sielkunde van die Universiteit van Stellenbosch. In November 2024 het sy ‘n meestersgraad verwerf in neuropsigologie aan die Universiteit van Edinburg in Skotland. Op Kersdag 2024 het Donaldson die ja-woord gevra en 18 maande later het hulle ‘n weeklange intieme troue gehad op Richard Branson se private Necker-eiland in die Britse Maagde-eilande. Ons beste wense vergesel AL die nuwe paartjies van die Klas van 2016! Mag die huweliksreis een van geluk en vervulling wees. Die Klas van 2016 vier dié naweek hulle 10-jaar-reünie by DF.