SHFMU "Andon Zako Çajupi" Vushtrri

Një kapitull i rëndësishëm përmbyllet sot me nderim dhe mirënjohje.

Pas shumë vitesh pune, përkushtimi dhe sakrifice në shërbim të arsimit, kolegu ynë Hasan Gashnjani po e përmbyll rrugëtimin profesional duke kaluar në pension.

Me punën e palodhshme, urtësinë dhe përkushtimin ndaj edukimit të brezave të rinj, ai ka lënë gjurmë të pashlyeshme në shkollën tonë dhe në zemrat e shumë nxënësve e kolegëve.

Në emër të kolektivit të shkollës, shprehim falënderimet më të sinqerta për kontributin e çmuar ndër vite dhe i urojmë shëndet, lumturi, qetësi dhe shumë momente të bukura në këtë etapë të re të jetës.

Faleminderit për gjithçka që keni dhënë për arsimin dhe edukimin e brezave!

Pensionim të mbarë dhe jetë të gjatë e të lumtur!

🎓❤️ Sot përmbyllëm me shumë emocione, gëzim dhe krenari një kapitull të veçantë me Grupin e Dytë të parashkollorëve tanë. Këto çaste të bukura do të mbeten gjithmonë në kujtesën tonë, ndërsa fëmijët tanë të dashur nisin një rrugëtim të ri drejt bankave shkollore.

Ju urojmë secilit prej jush shumë suksese, ditë të mbushura me buzëqeshje, miqësi të sinqerta dhe ëndrra të realizuara. Qoftë shkolla një vend ku do të mësoni, do të rriteni dhe do të shkëlqeni!

Një falënderim i veçantë shkon për prindërit, për besimin, bashkëpunimin dhe mbështetjen e vazhdueshme gjatë gjithë këtij viti. Faleminderit që na besuat thesarin tuaj më të çmuar, fëmijët dhe që ish*t pranë nesh në çdo hap të këtij rrugëtimi të bukur.

Me dashuri, përkushtim dhe mirënjohje, ju urojmë një verë të mbarë dhe suksese të pafundme në rrugën që ju pret!

Edukatoret:
🌷 Ilmije Jonuzi-Feka
🌷 Florentina Sadiku

Momente të veçanta nga përfundimi i vitit parashkollor – Grupi i Parë

Me shumë gëzim, buzëqeshje dhe emocione, u shënua përfundimi i rrugëtimit parashkollor të fëmijëve tanë të mrekullueshëm. Në një atmosferë festive u bë edhe shpërndarja e certifikatave, duke kurorëzuar një vit të mbushur me mësim, lojë, miqësi dhe kujtime të paharrueshme.

Falënderojmë edukatoret e përkushtuara, Ardita Terstena dhe Myzafere Gogolli, si dhe asistenten Erblina Fetahu, për dashurinë, kujdesin dhe punën e palodhur me fëmijët tanë gjatë gjithë këtij rrugëtimi.

Të dashur vogëlushë, ju urojmë suksese në hapin tuaj të radhës drejt klasës së parë! Vazhdoni të ëndërroni, të mësoni dhe të shkëlqeni kudo që të jeni.

Urime përfundimin e parashkollorit!

Video nga ushtrimi praktik për reagim në situata emergjente, i realizuar sot në SHFMU “Andon Zako Çajupi”- Vushtrri

Në këtë aktivitet morën pjesë nxënësit, mësimdhënësit, Kryqi i Kuq i Kosovës, Policia e Kosovës, njësitë e zjarrfikjes dhe shpëtimit, shërbimet emergjente shëndetësore, Drejtoria për Mbrojtje dhe Shpëtim, Komuna e Vushtrrisë dhe akterë të tjerë relevantë, duke demonstruar bashkëpunimin dhe koordinimin në situata emergjente.

Përgatitja, bashkëpunimi dhe reagimi i shpejtë janë çelësi i sigurisë së komunitetit tonë.

Sot, në SHFMU “Andon Zako Çajupi” në Vushtrri, u realizua me sukses ushtrimi praktik për reagim në situata emergjente, i organizuar nga Kryqi i Kuq i Kosovës në bashkëpunim me Komunën e Vushtrrisë, Agjencinë e Menaxhimit Emergjent dhe institucionet tjera relevante.

Aktiviteti kishte për qëllim testimin e procedurave të reagimit, koordinimit dhe evakuimit në raste emergjente, si dhe ngritjen e vetëdijes së nxënësve, stafit shkollor dhe komunitetit për rëndësinë e përgatitjes ndaj fatkeqësive natyrore dhe emergjencave të ndryshme.

Në kuadër të ushtrimit u simulua një situatë emergjente, ku morën pjesë nxënësit, mësimdhënësit, Policia e Kosovës, njësitë e zjarrfikjes dhe shpëtimit, shërbimet emergjente shëndetësore, Drejtoria për Mbrojtje dhe Shpëtim, vullnetarët e Kryqit të Kuq dhe akterë të tjerë relevantë.

Përmes këtij aktiviteti u demonstruan procedurat e evakuimit, ofrimit të ndihmës së parë, menaxhimit të situatave emergjente dhe bashkërendimit ndërinstitucional, duke dëshmuar rëndësinë e gatishmërisë, bashkëpunimit dhe reagimit të shpejtë në mbrojtje të jetës dhe sigurisë së qytetarëve.

Një falënderim i veçantë u takon nxënësve tanë për disiplinën, seriozitetin dhe pjesëmarrjen aktive gjatë ushtrimit, si dhe mësimdhënësve për përkushtimin, angazhimin dhe kontributin e tyre në organizimin dhe mbarëvajtjen e aktivitetit. Sjellja e përgjegjshme dhe bashkëpunimi i tyre ishin elemente kyçe për realizimin me sukses të këtij ushtrimi.

Falënderojmë gjithashtu të gjithë institucionet partnere, ekipet emergjente dhe vullnetarët që kontribuuan në këtë aktivitet, duke dëshmuar rëndësinë e bashkëpunimit në ndërtimin e një mjedisi më të sigurt për nxënësit dhe komunitetin.

Në një atmosferë festive dhe plot emocione, nxënësit e klasave të para shënuan Festën e Abetares, duke kurorëzuar me sukses rrugëtimin e tyre të parë në botën e leximit dhe shkrimit.

Përmes këngëve dhe aktiviteteve të përgatitura me përkushtim, nxënësit e klasave të para treguan njohuritë dhe talentin e tyre, duke e bërë këtë ditë të paharrueshme për të gjithë.

Falënderojmë mësueset Mimoza Kalludra, Besarta Salihu, Ymrane Gërguri dhe Gylbehare Maxhuni Zasella, për punën dhe përkushtimin e tyre, prindërit për bashkëpunimin dhe mbështetjen e vazhdueshme, si dhe nxënësit tanë të dashur që me buzëqeshjet dhe energjinë e tyre i dhanë hijeshi kësaj feste.

Urime të gjithë nxënësve për këtë arritje të rëndësishme! Le të jetë Abetarja vetëm fillimi i një rrugëtimi të suksesshëm drejt dijes, edukimit dhe ëndrrave të tyre.

DITA BOTËRORE E MJEDISIT – 5 QERSHOR 2026

Me rastin e Ditës Botërore të Mjedisit, nxënësit tanë, nën udhëheqjen e mësimdhënëses Valbona Mulaku, realizuan aktivitete vetëdijësuese me qëllim promovimin e kujdesit ndaj natyrës dhe mbrojtjes së mjedisit.

Përmes diskutimeve, mesazheve edukative dhe aktiviteteve praktike, nxënësit treguan përkushtim dhe përgjegjësi ndaj ruajtjes së ambientit ku jetojmë.

Kjo ditë na rikujton se secili prej nesh ka rol të rëndësishëm në mbrojtjen e mjedisit. Veprimet e vogla të përditshme mund të sjellin ndryshime të mëdha për të ardhmen e planetit tonë.

“Ta mbrojmë mjedisin sot, për një të ardhme më të mirë!”

Sot, Agjencia e Menaxhimit të Emergjencave – Njësia e Zjarrfikësve, Kryqi i Kuq në Vushtrri dhe Policia e Kosovës realizuan një aktivitet edukativ praktik në shkollën tonë, i fokusuar në dhënien e ndihmës së parë në situata të ndryshme emergjente dhe në demonstrimin e mënyrave të fikjes së zjarrit.

Përmes këtij aktiviteti, nxënësit patën mundësinë të fitojnë njohuri dhe aftësi të rëndësishme praktike që lidhen drejtpërdrejt me sigurinë dhe reagimin në raste emergjente, duke rritur vetëdijen për përgjegjësinë individuale dhe kolektive në situata të rrezikut.

Drejtoria e shkollës shpreh mirënjohje dhe falënderim të sinqertë për të gjitha institucionet pjesëmarrëse për bashkëpunimin, profesionalizmin dhe kontributin e dhënë në edukimin e nxënësve tanë.

Me rastin e shënimit të 1 Qershorit – Ditës Ndërkombëtare të Fëmijëve, nxënësit e klasës së nëntë zhvilluan një aktivitet edukativ me fokus në promovimin dhe ndërgjegjësimin mbi të drejtat e fëmijëve.

Aktiviteti filloi me një prezantim të nxënësve, gjatë të cilit ata shprehën mendimet dhe qëndrimet e tyre mbi rëndësinë e respektimit dhe mbrojtjes së të drejtave të çdo fëmije. Më pas, nxënësit paraqitën punimet e tyre kreative në formë vizatimesh, duke ilustruar të drejtat themelore si: e drejta për arsim, lojë, mbrojtje, shëndet dhe barazi.

Në vijim u shfaq një video sensibilizuese, e cila kontribuoi në thellimin e kuptimit të nxënësve mbi rëndësinë e zbatimit praktik të të drejtave të fëmijëve në jetën e përditshme.

Ky aktivitet kontribuoi në zhvillimin e vetëdijes qytetare, shprehjes kreative dhe reflektimit kritik të nxënësve, duke promovuar mesazhin se çdo fëmijë ka të drejta të barabarta dhe duhet të rritet në një mjedis të sigurt dhe mbështetës.

Realizuar nga:
Mësimdhënësja Aferdita Beka Aliu
Psikologia Arlinda Feka Rexhepi