Gjimnazi "Jeta e Re" - Suharekë

Podkasti “Pas Ziles” – Episodi i fundit për këtë vit shkollor!

Klubi i Teknikëve të Rinj sjell episodin përmbyllës të podkastit “Pas Ziles”, me një të ftuar të veçantë: Dr. Arianit Bytyçin, specialist infektolog dhe ish-nxënës i gjimnazit tonë.

Në këtë bisedë frymëzuese, ai rrëfen përvojën e tij si gjimnazist, përgatitjen që mori gjatë viteve të shkollimit dhe rolin vendimtar që pati gjimnazi në rrugëtimin e tij drejt studimeve universitare dhe profesionit që ushtron sot me sukses.

Historia e tij është dëshmi se gjimnazi ynë u ofron nxënësve një bazë të fortë akademike dhe i përgatit ata për sfidat e universitetit dhe të jetës profesionale. Për të gjithë të rinjtë që po mendojnë të vazhdojnë shkollimin e mesëm, ky episod tregon se suksesi fillon me zgjedhjen e duhur.

Ndiqni episodin e fundit të “Pas Ziles” dhe dëgjoni një histori që frymëzon, motivon dhe dëshmon vlerat e gjimnazit tonë. 📚✨

Rruga drejt suksesit (Episodi 4) Në këtë episod të "PAS ZILES PODCAST" flasim për orientimin në karr...

Vizitë edukativo-kulturore me nxënësit e klasave të dhjeta

Sot, nxënësit e klasave të dhjeta realizuan një vizitë edukativo-kulturore në disa prej institucioneve dhe lokaliteteve me rëndësi të veçantë shkencore, historike dhe kombëtare.

Vizita filloi në Muzeun/Laboratorin e Natyrës dhe Biodiversitetit në Universitetin “Ukshin Hoti” në Prizren, ku nxënësit patën mundësinë të njihen nga afër me pasuritë natyrore, biodiversitetin dhe rëndësinë e ruajtjes së mjedisit. Më pas, ata vizituan Kompleksin Monumental të Lidhjes Shqiptare të Prizrenit, duke mësuar më shumë për një nga ngjarjet më të rëndësishme në historinë kombëtare shqiptare dhe për figurat që kontribuuan në organizimin politik e kombëtar të shqiptarëve.

Në vazhdim, nxënësit vizituan Kompleksin Memorial “Adem Jashari” në Prekaz, përfshirë kullat e familjes Jashari dhe Varrezat Memoriale të Familjes Jashari, ku u njohën nga afër me historinë e rezistencës, sakrificës dhe heroizmit që u bënë simbol i luftës për lirinë e Kosovës. Në këtë vend të shenjtë të kujtesës kombëtare, ata nderuan veprën dhe flijimin e familjes Jashari dhe të gjithë atyre që dhanë jetën për lirinë e vendit.

Kjo vizitë u mundësoi nxënësve të pasurojnë njohuritë e tyre shkencore, kulturore dhe historike, duke i afruar më shumë me vlerat e trashëgimisë sonë kombëtare dhe me rëndësinë e ruajtjes së tyre për brezat e ardhshëm.

🎙️ Në episodin e radhës të podkastit të shkollës sonë, “Pas Ziles”, të ftuar ishin artistët e shkollës, përfaqësues nga Klubi i Muzikës dhe profesori i tyre, Hektor Kryeziu.

Bashkohuni me ne për të dëgjuar bisedën, përvojat dhe pasionin e tyre për muzikën dhe artin.

Ju ftojmë ta ndiqni! 🎶✨

Ritmi dhe akordet (Episodi 3) Bisedë rreth ritmit muzikor dhe akordimi i instrumenteve të grupit të nxënësve të Gjimnazit ,,Jeta e re"

Sot në orën e matematikës, nxënësit prezantuan punimet e tyre kreative nga gjeometria, të realizuara me shumë përkushtim dhe imagjinatë. Përmes modeleve prej kartoni të kubit, piramidës, cilindrit, konit dhe trupave të tjerë gjeometrikë, ata patën mundësinë t’i shohin figurat dhe trupat gjeometrikë jo vetëm në teori, por edhe në formë konkrete dhe praktike. 📐✨
Gjatë punës dhe prezantimeve, nxënësit kuptuan edhe lidhjen që gjeometria ka me jetën e përditshme. Shumë objekte që përdorim çdo ditë kanë forma gjeometrike — ndërtesat, kutitë, gotat, topat, konet e akullores dhe shumë materiale të tjera rreth nesh. Kjo i ndihmon nxënësit ta shohin matematikën si pjesë të botës reale dhe jo vetëm si lëndë shkollore.
Këto projekte treguan gjithashtu lidhjen e matematikës me lëndë të tjera si fizika, kimia, astronomia dhe teknologjia. Trupat gjeometrikë përdoren në ndërtim, në studimin e planetëve dhe orbitave, në forma molekulare në kimi dhe në shumë dukuri fizike që na rrethojnë. Përmes punës praktike, nxënësit zhvilluan kreativitetin, bashkëpunimin dhe mënyrën logjike të të menduarit. 👏🌍🔭

Aktivitet nga Klubi i Psikologëve

Klubi i Psikologëve realizoi një aktivitet inspirues dhe kreativ për nxënësit e gjimnazit. Aktiviteti përfshiu letra motivuese me mesazhe pozitive dhe inkurajuese, të cilat synonin të përhapnin motivim, vetëbesim dhe energji pozitive tek të gjithë.

Gjithashtu, u prezantua edhe një video kreative me temën “Pse duhet të vini në gjimnaz?”, ku u theksua atmosfera pozitive, mbështetja dhe ambienti i shëndetshëm që ofron gjimnazi, sidomos në aspektin psikologjik dhe emocional të nxënësve.

Përmes këtij aktiviteti, nxënësit patën mundësinë të shprehin kreativitetin, bashkëpunimin dhe idetë e tyre në një mënyrë inspiruese dhe domethënëse.

​Me mbështetjen e profesoreshës Donjetë Bytyçi, klubi ka krijuar një ambient pozitiv dhe motivues për nxënësit.

Një shkollë që kujdeset jo vetëm për dijen, por edhe për mirëqenien emocionale të nxënësve.

Klubi “Inovatorët Digjital” i gjimnazit “Jeta e re” vazhdon të dëshmojë se pasioni, kreativiteti dhe puna në ekip sjellin rezultate të jashtëzakonshme. Me përkushtim dhe ide inovative, nxënësit kanë realizuar një punë të shkëlqyer, duke treguar aftësi të larta në përdorimin e teknologjisë dhe zgjidhjen e problemeve në mënyrë kreative, nën udhëheqjen e profesoreshës Bahrije Elshani. Ky sukses është dëshmi e potencialit të tyre dhe një frymëzim për gjithë komunitetin shkollor.
Aktiviteti u prezantua me rastin e Ditës së Shkollës.
Urime për arritjet dhe suksese të tjera në të ardhmen!

Aktivitet shkencor nga Klubi i Shkencave - Lënda FIZIKË dhe KIMI

Në kuadër të Ditës së Shkollës, nxënësit e Klubit të Shkencave organizuan aktivitete interesante me eksperimente dhe demonstrime nga lënda e Fizikës dhe Kimisë. Para nxënësve, prindërve dhe vizitorëve, ata prezantuan punën dhe njohuritë e tyre në mënyrë praktike dhe shumë interesante.

Gjatë aktivitetit u prezantuan:

* Kafazi i Faradeit
* Thyerja e dritës
* Precesioni
* Qarku elektrik
* Lavjerrësi matematik
* ⁠Shtypja atmosferike

*Aktivitet me glicerinë dhe KMnO4
*Aktivitet me Sulfur
*Aktivitet me kushte shtëpie CO2, Sodë bikarboni dhe shampo

Përmes këtyre eksperimenteve, të pranishmit patën mundësi të shohin nga afër se si funksionojnë disa dukuri fizike në jetën e përditshme. Aktiviteti u përcoll me shumë interes dhe tregoi përkushtimin, kreativitetin dhe talentin e nxënësve tanë.

Falënderojmë nxënësit dhe mësimdhënësit që kontribuan në realizimin e këtij aktiviteti të bukur shkencor.

🎙️📚 Klubi i Teknikëve të Rinj sjell episodin e radhës të PodKastit “Pas Ziles”, këtë herë me një temë të veçantë kushtuar librit, leximit dhe krijimtarisë letrare.

Të ftuar në studio ishin përfaqësues të tri gjeneratave krijuese: profesori veteran dhe krijuesi i njohur prof. Mehdi Lezi, përfaqësuesi i brezit të mesëm prof. Sedat Gashi, si dhe krijueset e reja gjimnaziste Flonita Avdyli dhe Leonida Maliqi.

🎤 Nën moderimin e nxënëses Ledisa Gashi, biseda solli përvoja të ndryshme mbi librin, rrugëtimin në krijimtari, sfidat e të shkruarit dhe rëndësinë që ka leximi në formimin kulturor e intelektual të të rinjve.

Një takim mes përvojës, pasionit dhe talentit të ri, që dëshmon se dashuria për librin vazhdon të jetojë në çdo brez.

Ju ftojmë ta ndiqni episodin e radhës të PodKastit “Pas Ziles”!

Prozë dhe Poezi të Brezave (Episodi 2) Kushtuar ,,Ditës së librit" , shkrimtarëve dhe bibliotekës së shkollës

Brenda një periudhe njëmujore, Gjimnazi “Jeta e re” në Suharekë përcolli në pension dy profesorë të çmuar të institucionit tonë, prof. Hedije Krasniqi dhe prof. Mehdi Lezi, të cilët për vite me radhë dhanë kontribut të jashtëzakonshëm në arsimimin dhe edukimin e shumë brezave të rinj.

Në ceremonitë e organizuara me këtë rast, në prani të familjarëve, kolegëve, përfaqësuesve të DKA-së dhe Kryetarit të Komunës, profesorëve iu ndanë mirënjohje nga shkolla jonë dhe Drejtoria Komunale e Arsimit, si shenjë respekti dhe falënderimi për punën, përkushtimin dhe profesionalizmin e treguar ndër vite.

Prof. Hedije Krasniqi dhe prof. Mehdi Lezi do të mbeten gjithmonë pjesë e historisë së Gjimnazit “Jeta e re”, si figura të respektuara që lanë gjurmë të pashlyeshme në edukimin e gjeneratave të tëra.

Në emër të kolektivit të shkollës, ju urojmë shëndet, lumturi dhe ditë të qeta e të mbushura me gëzim pranë familjeve të tyre. Faleminderit për gjithçka që i dhatë arsimit dhe shkollës sonë!