SHFMU “Rudolf Walther” Dejnë/Dobidol

NJOFTIM PËR SEMIMATURANTËT

Të dashur nxënës të klasave të nënta,
Ju njoftojmë se nesër, më 26.06.2026, do të mbahet Testi i Arritshmërisë.
Nxënësit duhet të jenë të pranishëm në lokacionin e shkollës në Dejnë jo më vonë se ora 08:20, nga ku do të udhëtojnë së bashku dhe në mënyrë të organizuar drejt qendrës së testimit me autobusin e kompanisë Destani Trans.
Testi do të mbahet në SHFMU “Isa Boletini” – Rahovec, Qendra 3 (Objekti i Vjetër).
Luteni që të vini të përgatitur sipas udhëzimeve të dhëna nga kujdestarët e klasave dhe të respektoni me përpikëri orarin e nisjes.
Ju urojmë mbarësi, sukses dhe rezultate sa më të mira në Testin e Arritshmërisë!
Drejtoria e SHFMU “Rudolf Walther” – Dejnë/Dobidol

Përmbyllëm me sukses vitin shkollor 2025/2026

Sot, me mbledhjen e Këshillit të Mësimdhënësve, përmbyllëm zyrtarisht një vit shkollor të mbushur me punë, përkushtim dhe arritje të shumta.
Gjatë këtij viti, nxënësit tanë kanë treguar rezultate të shkëlqyera në procesin mësimor, në garat e dijes dhe në aktivitetet e ndryshme arsimore e kulturore, duke përfaqësuar me dinjitet shkollën tonë.
Pas mbledhjes, në një atmosferë të ngrohtë kolegiale, kaluam disa çaste të këndshme së bashku, duke reflektuar mbi sukseset e vitit që lamë pas dhe duke uruar njëri-tjetrin për pushime të mbara verore.
Faleminderit nxënësve, mësimdhënësve, prindërve dhe të gjithë bashkëpunëtorëve për kontributin dhe mbështetjen gjatë këtij viti shkollor.
Pushime të mbara dhe suksese të reja në vitin e ardhshëm!
SHFMU “Rudolf Walther” – Dejnë/Dobidol

NJOFTIM

Të nderuar prindër, nxënës dhe mësimdhënës,
Ju njoftojmë se sot, në të dy lokacionet e SHFMU “Rudolf Walther” – Dejnë dhe në Paralelen e Ndarë në Dobidol, është realizuar me sukses Testi i Arritshmërisë për shkallët kurrikulare I, II dhe III, përkatësisht për klasat e dyta, të pesta dhe të shtata.
Procesi i testimit është administruar nga mësimdhënësit e shkollës sonë në përputhje me udhëzimet dhe procedurat e parapara. Nesër do të realizohet kontrollimi i testeve nga komisionet përkatëse të emëruara për këtë qëllim.
Falënderojmë të gjithë nxënësit për angazhimin dhe seriozitetin e treguar gjatë testimit, si dhe mësimdhënësit për përkushtimin e tyre në organizimin dhe mbarëvajtjen e këtij procesi.
Me respekt,
Drejtori i shkollës
Xhevdet Morina
SHFMU “Rudolf Walther” – Dejnë dhe Dobidol
18.06.2026

SHFMU “Rudolf Walther” – Dejnë, fituese e Kuizit Final Komunal të Diturisë 2026

Sot, nën organizimin e Drejtorisë Komunale për Arsim në Rahovec, në ambientet e SHFMU "Sadedin Hajda" u mbajt finalja e Kuizit Komunal të Diturisë, ku morën pjesë 26 shkolla të komunës së Rahovecit.
Pas një gare të fortë dhe mjaft konkurruese mes pesë shkollave finaliste, vendin e parë dhe titullin e fituesit e fitoi SHFMU Rudolf Walther.
Shkollën tonë me sukses e përfaqësuan nxënësit:
🔹 Jona Berisha – klasa VI
🔹 Yll Sopjani – klasa VII
🔹 Alem Hoti – klasa VIII
🔹 Denis Morina – klasa IX
Përveç suksesit të arritur në kuiz, nxënësit tanë u nderuan me Mirënjohje nga Drejtoria Komunale për Arsim në Rahovec, si vlerësim për angazhimin, përkushtimin dhe rezultatet e tyre të shkëlqyera.
Një falënderim dhe mirënjohje e veçantë i takon donatorit z. Agron Berisha, i cili për këtë sukses të nxënësve tanë dhuroi katër tableta të rinj, nga një për secilin nxënës fitues. Ky gjest fisnik është një motivim i madh për nxënësit dhe një mbështetje e çmuar për promovimin e dijes dhe të arritjeve në arsim.
Drejtoria e shkollës shpreh falënderim të sinqertë për Drejtorinë Komunale për Arsim për organizimin e shkëlqyer të këtij aktiviteti, si dhe për Radio Televizioni i Kosovës për mbështetjen mediatike dhe promovimin e këtij aktiviteti.
Falënderime të veçanta u drejtohen edhe mësimdhënësve të lëndëve Gjuhë Shqipe, Matematikë, Biologji, Kimi, Histori, Gjeografi, Gjuhë Angleze dhe Teknologji, të cilët me profesionalizëm dhe përkushtim kanë kontribuar në përgatitjen e nxënësve për këtë garë.
Ky sukses është rezultat i punës së vazhdueshme, bashkëpunimit dhe përkushtimit të nxënësve, mësimdhënësve, prindërve dhe gjithë komunitetit shkollor.
Urime nxënësve tanë për këtë arritje të jashtëzakonshme! Jemi krenarë me ju!

Ekskursion edukativo-arsimor me nxënësit e klasave IX-1 dhe IX-2

Dje, shkolla jonë organizoi një ekskursion me karakter edukativo-arsimor për nxënësit e klasave IX-1 dhe IX-2, me qëllim zgjerimin e njohurive kulturore, historike dhe natyrore të nxënësve tanë.

Vizita e parë u realizua në Burimin e Drinit të Bardhë, ku nxënësit patën mundësinë të shijojnë bukuritë natyrore dhe të mësojnë më shumë për rëndësinë e këtij lokaliteti të veçantë natyror për vendin tonë.

Më pas, ekskursioni vazhdoi në Memorialin Adem Jashari, një nga vendet më të rëndësishme historike të Kosovës. Nxënësit dëgjuan me vëmendje rrëfimin e ciceronit për historinë e lavdishme dhe sakrificën heroike të familjes Jashari për lirinë e vendit. Kjo vizitë ishte një përvojë e veçantë edukative dhe patriotike, e cila la mbresa të thella tek të gjithë pjesëmarrësit.

Në vazhdim, nxënësit vizituan edhe Prizrenin, qytetin e kulturës, historisë dhe trashëgimisë sonë kombëtare. Gjatë qëndrimit në Prizren, ata patën rastin të njihen nga afër me bukuritë, monumentet dhe vlerat kulturore e historike të këtij qyteti të bukur.

Ky ekskursion shërbeu si një mundësi shumë e mirë për mësim praktik, socializim dhe pasurim të njohurive të nxënësve jashtë ambienteve shkollore. Përmes aktiviteteve të tilla, shkolla jonë synon të nxisë zhvillimin edukativ, kulturor dhe qytetar të nxënësve, duke i afruar ata më shumë me historinë, natyrën dhe trashëgiminë kombëtare.

Një falënderim i veçantë shkon për mësimdhënëset kujdestare Arbenita Hoti dhe Arbnore Latifi për përkushtimin, kujdesin dhe përgjegjësinë e treguar gjatë gjithë ekskursionit. Me angazhimin dhe bashkëpunimin e tyre, ky aktivitet u realizua me sukses, në mënyrë të rregullt, të sigurt dhe sa më të këndshme për të gjithë nxënësit pjesëmarrës.

VENDI I PARË NË KUIZIN E DITURISË 2026

Një sukses i madh dhe krenari për shkollën tonë!
Sot, ka zënë vendin e parë në “Kuizin e Diturisë 2026”, të organizuar nga DKA-Rahovec.
Në këtë garë morën pjesë 26 shkolla të komunës së Rahovecit, të ndara në 5 regjione, ndërsa shkolla jonë u përfaqësua me sukses nga nxënësit:
• Jona Berisha
• Yll Sopjani
• Alem Hoti
• Denis Morina
Me këtë fitore, shkolla jonë ka siguruar pjesëmarrjen në garën finale, ku do të garojë me shkollat:
• "Skender Kastrati" Malësie vogël
• "Faik Konica" Celinë
• "Sadedin Hajda" Rahovec
• "Vëllezërit Frashëri" Drenoc
Suksesi nuk vjen rastësisht — ai është rezultat i dijes, punës dhe përkushtimit. Nxënësit tanë edhe një herë dëshmuan se me angazhim dhe bashkëpunim arrihen rezultate të mëdha.
Urime ekipit tonë për vendin e parë dhe shumë suksese në finalen e madhe!

Thirrje për regjistrimin e fëmijëve në klasën parafillore dhe klasën e parë në SHFMU “Rudolf Walther” – Dejnë dhe në paralelen e ndarë në Dobidol për vitin shkollor 2026/2027

SHFMU “Rudolf Walther” – Dejnë shpallet fituese në turneun e volejbollit në kuadër të “Javës së Dëshmorëve”

Në kuadër të “Javës së Dëshmorëve”, sot u zhvillua aktiviteti sportiv në volejboll me pjesëmarrjen e mësimdhënëseve nga tri shkolla, në një atmosferë miqësore dhe plot energji pozitive.

Pas ndeshjeve të zhvilluara, SHFMU “Rudolf Walther” – Dejnë u shpall fituese e turneut.
Urime për suksesin dhe lojën korrekte!

Ky aktivitet kishte për qëllim forcimin e bashkëpunimit ndërmjet shkollave, krijimin e shoqërisë mes mësimdhënëseve, si dhe shkëmbimin e përvojave në frymën e respektit, unitetit dhe sportit.

Falënderojmë Drejtorinë e Kulturës dhe drejtoreshën e shkollës, znj. Valbona Hoti, për mikpritjen.

Kremtimi i 26-vjetorit të Shkollës “Rudolf Walther” në Dejnë

Sot, në ambientet e Shkollës “Rudolf Walther” në Dejnë, u kremtua me solemnitet 26-vjetori i themelimit të shkollës. Në këtë ngjarje të rëndësishme morën pjesë drejtori i DKA-së, Muhamet Morina, drejtori i Financave, Afrim Limani, si dhe një numër i madh prindërish, mësimdhënësish dhe nxënësish.
Në një atmosferë festive dhe plot emocion, nxënësit dhe mësimdhënësit kishin përgatitur një program të pasur kulturo-artistik, i cili u mirëprit dhe u vlerësua lart nga të pranishmit. Përmes këngëve, valleve, recitimeve dhe paraqitjeve të ndryshme artistike, u dëshmua puna, përkushtimi dhe talenti i nxënësve, si dhe angazhimi i vazhdueshëm i stafit arsimor.
Me këtë rast, për të vlerësuar punën dhe arritjet e tyre, u ndanë mirënjohje për nxënësit dhe mësimdhënësit e dalluar, të cilët kanë kontribuar në ngritjen e cilësisë së arsimit dhe në përfaqësimin dinjitoz të shkollës në aktivitete të ndryshme.
Kjo ditë shërbeu jo vetëm për të reflektuar mbi arritjet ndër vite, por edhe për të forcuar bashkëpunimin ndërmjet shkollës, prindërve dhe komunitetit, duke rikonfirmuar rolin e rëndësishëm të shkollës në edukimin dhe formimin e brezave të rinj.

Trajnim për Sigurinë Rrugore nga Policia e Kosovës

Sot, në shkollën tonë, nxënësit e klasave 4 dhe 5 morën pjesë në një trajnim praktik shumë të rëndësishëm, të realizuar nga Policia e Kosovës.
Ky trajnim kishte për qëllim edukimin e nxënësve për sigurinë në rrugë dhe zbatimin e rregullave të trafikut, duke i aftësuar ata me njohuri dhe shkathtësi të nevojshme për të qenë pjesëmarrës të sigurt në komunikacion.
Gjatë aktivitetit, nxënësit:
• Mësuan rregullat bazë të lëvizjes në rrugë
• U njohën me shenjat e trafikut
• Praktikuan situata reale të kalimit të rrugës
• Diskutuan për rëndësinë e kujdesit dhe përgjegjësisë në trafik
Ky trajnim u zhvillua në mënyrë interaktive dhe praktike, duke nxitur pjesëmarrjen aktive të nxënësve dhe duke rritur ndërgjegjësimin e tyre për sigurinë personale.
Fotografitë e bashkëngjitura pasqyrojnë momentet kryesore nga ky aktivitet edukativ.
Shkolla jonë mbetet e përkushtuar në bashkëpunimin me institucionet relevante për të ofruar edukim cilësor dhe të dobishëm për jetën e përditshme të nxënësve.
Me respekt,
Drejtoria e Shkollës