Qendra e Kompetencës "11 Marsi" -Prizren

Gjatë kësaj jave u mbajt trajnimi me maturantët për procesin e aplikimit në Testin e Maturës Shtetërore. Nxënësit u njoftuan me procedurat e aplikimit, afatet e rëndësishme, dokumentacionin e nevojshëm dhe mënyrën e plotësimit të të dhënave në platformën përkatëse.
Trajnimi kishte për qëllim ofrimin e informacionit dhe mbështetjes së nevojshme për maturantët, në mënyrë që procesi i aplikimit të zhvillohet me sukses dhe pa vështirësi. Iu urojmë të gjithë maturantëve suksese në Testin e Maturës dhe në rrugëtimin e tyre të mëtejmë akademik. 🎓📖

📚🤝 Mirëpritëm nxënësit dhe mësimdhënësit e ShFMU “Avni Rustemi” nga Kukësi!

Sot, Qendra e Kompetencës “11 Marsi” në Prizren pati kënaqësinë të mirëpresë një grup nxënësish dhe mësimdhënësish nga shkolla “Avni Rustemi” në Kukës, në kuadër të aktiviteteve të orientimit në karrierë dhe njohjes me arsimin profesional.
Gjatë vizitës, mysafirët patën mundësinë të njihen nga afër me programet tona mësimore, profilet profesionale, kushtet e mësimit dhe punës praktike, si dhe me aktivitetet e shumta që zhvillohen në institucionin tonë. Nxënësit vizituan të gjitha kabinetet profesionale, laboratorët dhe hapësirat mësimore, ku u informuan për mundësitë që ofron arsimi profesional në ndërtimin e një karriere të suksesshme.
Me kënaqësi të veçantë vërejtëm interesimin e madh të nxënësve për drejtimet që ofron QK “11 Marsi”. Një numër i konsiderueshëm prej tyre shprehën dëshirën që studimet e tyre të mesme t’i vazhdojnë në institucionin tonë gjatë vitit të ardhshëm shkollor, gjë që për ne paraqet një vlerësim të madh dhe një tregues të besimit në cilësinë e arsimit që ofrojmë.
Kjo vizitë përbën një histori suksesi të bashkëpunimit ndërshkollor dhe dëshmon rëndësinë e orientimit të hershëm në karrierë për të rinjtë tanë.
Falënderojmë përzemërsisht drejtorinë, stafin dhe nxënësit e shkollës “Avni Rustemi” për vizitën, interesimin dhe atmosferën e ngrohtë që krijuan gjatë qëndrimit të tyre në shkollën tonë.

Ju mirëpresim gjithmonë në Qendrën e Kompetencës “11 Marsi” – Prizren! 🌟

𝐕𝐈𝐙𝐈𝐓𝐄̈ 𝐕𝐄̈𝐋𝐋𝐀𝐙𝐄̈𝐑𝐎𝐑𝐄 𝐃𝐇𝐄 𝐁𝐀𝐒𝐇𝐊𝐄̈𝐏𝐔𝐍𝐈𝐌 𝐈 𝐅𝐎𝐑𝐓𝐄̈ 𝐌𝐄𝐒 𝐐𝐊 “11 𝐌𝐀𝐑𝐒𝐈” 𝐃𝐇𝐄 𝐒𝐇𝐊𝐎𝐋𝐋𝐄̈𝐒 𝐕𝐄̈𝐋𝐋𝐀𝐙𝐄̈𝐑𝐎𝐑𝐄 𝐍𝐄̈ 𝐎𝐑𝐇𝐀𝐍𝐆𝐀𝐙𝐈 – 𝐓𝐔𝐑𝐐𝐈 🇽🇰🤝🇹🇷
Para disa ditësh, delegacioni i Qendrës së Kompetencës “11 Marsi” – Prizren pati kënaqësinë dhe nderin të realizojë një vizitë zyrtare në shkollën tonë vëllazërore në qytetin e Orhangazit, Turqi.
Gjatë qëndrimit tonë tre ditor përjetuam një pritje jashtëzakonisht të ngrohtë, vëllazërore dhe plot respekt, duke dëshmuar edhe një herë lidhjet e fuqishme miqësore dhe bashkëpunimin e sinqertë ndërmjet institucioneve tona.
Vizita rezultoi tejet frytdhënëse në aspektin arsimor, kulturor dhe institucional. Gjatë takimeve dhe aktiviteteve të zhvilluara, nikoqirët tanë shprehën gatishmëri të plotë që, në përputhje me mundësitë e tyre, të mbështesin dhe ndihmojnë shkollën tonë në projekte dhe bashkëpunime të ardhshme.
Një falënderim i veçantë dhe shumë i sinqertë shkon për:
🔹 Drejtorin e Shkollës së Mesme Profesionale dhe Teknike Anadolu “Orhangazi”, të nderuarin Salih Ağrak
🔹 Kryetarin e Bashkisë së Orhangazit, të nderuarin Bekir Aydın
🔹 Nënprefektin e rrethit të Orhangazit, të nderuarin Zafer Karamehmetoğlu
🔹 Drejtorin e Arsimit Kombëtar për rrethin e Orhangazit, Erol Şanlıtürk dhe Ndihmësdrejtorin Murat Taşan
🔹 Zëvendëskryetarin e Bashkisë së Madhe të Bursës, të nderuarin Şahin Biba
🔹 Shoqatën e Kosovarëve të Orhangazit dhe z. Niyazi Muslu
🔹 Anëtarët e Këshillit Bashkiak, z. Adnan Atilla dhe z. Sayim Yeşil
🔹 Stafin drejtues, mësimdhënësit dhe gjithë komunitetin e shkollës sonë vëllazërore për mikpritjen, respektin dhe përkujdesjen e treguar ndaj delegacionit tonë.
Kjo vizitë ishte dëshmi se bashkëpunimi ndërmjet dy shkollave tona tashmë ka kaluar kufijtë e një partneriteti formal dhe është shndërruar në një lidhje të vërtetë vëllazërore, të ndërtuar mbi respektin, solidaritetin, shkëmbimin kulturor dhe vlerat e përbashkëta njerëzore.
Jemi të bindur se kjo urë bashkëpunimi do të vazhdojë të forcohet edhe më tej dhe do të krijojë mundësi të reja për nxënësit, mësimdhënësit dhe brezat që vijnë.
Faleminderit nga zemra për mikpritjen tuaj të paharrueshme! ❤️

Aktivitet sportiv në kuadër të ekskursionit 🇦🇱🏖️

Gjatë ditës së sotme, në kuadër të ekskursionit në Shqipëri, nxënësit e QK “11 Marsi” – Prizren zhvilluan një aktivitet sportiv garues në plazh, i cili u karakterizua nga energji, entuziazëm dhe frymë e lartë bashkëpunimi.
Nxënësit morën pjesë aktive në garat e organizuara, duke treguar shpirt sportiv dhe përkushtim. Më të dalluarit u vlerësuan me lëvdata dhe medalje, si shenjë motivimi dhe mirënjohjeje për angazhimin e tyre.

Urojmë dhe falënderojmë nxënësit për pjesëmarrjen dhe sjelljen shembullore, si dhe përgëzojmë mësimdhënësit për organizimin shumë të mirë të këtij aktiviteti.
👏 Atmosferë e shkëlqyer dhe një ditë plot energji pozitive!

Ekskursioni i maturantëve – Shqipëri 2026 🇦🇱

Nxënësit e klasave të XII të QK “11 Marsi” – Prizren, nga data 24 deri më 28 prill 2026, janë duke realizuar me sukses ekskursionin e tyre në Shqipëri.
Gjatë qëndrimit në Hotel Bonita – Durrës, nxënësit po përjetojnë një organizim të shkëlqyer, me një program të pasur aktivitetesh dhe vizitash kulturore, historike dhe rekreative, të planifikuara sipas agjendës ditore.
Atmosfera gjatë këtyre ditëve është jashtëzakonisht e mirë, me energji pozitive, bashkëpunim dhe sjellje shembullore nga nxënësit tanë. Ky ekskursion po shërben jo vetëm si një përvojë argëtuese, por edhe si një mundësi e mirë për socializim, edukim dhe krijim të kujtimeve të paharrueshme.

Në emër të Drejtorisë së shkollës, shprehim falënderim të veçantë për Kompaninë Turistike “Shpejtimi”, si kompani fituese e tenderit për organizimin e këtij ekskursioni, për:
përkushtimin,
korrektësinë,
përpikmërinë dhe
profesionalizmin e lartë gjatë gjithë organizimit dhe realizimit të këtij udhëtimi.
Urime nxënësve për sjelljen dhe përfaqësimin dinjitoz të shkollës sonë! 👏

🎨 SUKSES I SHKËLQYER I NXËNËSEVE TONA NË GARAT E PIKTURËS 🏆

Me krenari të veçantë ndajmë me ju suksesin e nxënëseve tona, të cilat në garat e pikturës të organizuara së fundmi, arritën rezultate të jashtëzakonshme duke zënë tri vendet e para:

🥇 Fatjona Kryeziu – Vendi i parë
🥈 Ilma Merdiu – Vendi i dytë
🥉 Ledjona Krasniqi – Vendi i tretë

Ky rezultat është dëshmi e talentit, kreativitetit dhe përkushtimit të tyre të vazhdueshëm. Orët e shumta të punës në kabinetin e Atelies kanë dhënë frytet e merituara, duke treguar se puna dhe angazhimi gjithmonë shpërblehen.
👏 Shprehim urimet më të përzemërta për nxënëset tona për këtë arritje të shkëlqyer, duke u dëshiruar suksese të reja në të ardhmen.
🙏 Një falënderim i veçantë shkon për profesorin Bajram Gërdellaj, për përkushtimin, profesionalizmin dhe punën e palodhshme që po bën në zhvillimin dhe mbështetjen e talenteve të reja artistike në shkollën tonë.
🌟 Suksese të tilla janë motivim për të gjithë nxënësit dhe dëshmi e cilësisë së punës në institucionin tonë.

Në QK “11 Marsi” u shënua 23 Prilli – Dita e Komunitetit Turk 🎉

Në Qendrën e Kompetencës “11 Marsi” në Prizren u organizua një aktivitet simbolik me rastin e 23 Prillit – Ditës së Komunitetit Turk, një ditë me rëndësi të veçantë historike që lidhet me themelimin e shtetit modern turk dhe vizionin e Mustafa Kemal Atatürk, i cili këtë festë ia kushtoi fëmijëve si simbol i së ardhmes dhe zhvillimit të shoqërisë.

Në shkollën tonë aktualisht ndjekin mësimin 40 nxënës të komunitetit turk, së bashku me 4 mësimdhënës, duke kontribuar në mënyrë aktive në pasurimin e jetës arsimore dhe kulturore të institucionit tonë.

Ky aktivitet u organizua me pjesëmarrjen e nxënësve, mësimdhënësve dhe mysafirëve të shumtë, me synim promovimin e diversitetit kulturor, bashkëjetesës dhe respektit ndërmjet komuniteteve në vendin tonë. Përmes këtij organizimi u theksua rëndësia e ruajtjes së identitetit kulturor dhe gjuhësor, roli i fëmijëve në shoqëri si dhe forcimi i lidhjeve arsimore dhe kulturore me Turqinë.

Ishte nder i veçantë që pjesë e këtij aktiviteti të jenë personalitete të rëndësishme si:

Fikrim Damka, Zëvendëskryeministër dhe kryetar i Partisë KDTP
Enis Kervan, Zëvendësministër i Mbrojtjes
Veysel Erdem, Këshilltar i Arsimit në Ambasadën e Republikës së Turqisë
Përfaqësues nga shkolla binjake Hızır Reis Ticaret Mesleki ve Teknik Anadolu Lisesi

Po ashtu, aktivitetin e nderoi me pjesëmarrjen e saj edhe Drejtoresha e AAAPARr, znj. Fikrije Zymberi, e cila vlerësoi rolin e shkollës sonë në promovimin e diversitetit kulturor përmes arsimit profesional.

Në kuadër të këtij organizimi, u mbajtën fjalime rasti ku u theksua rëndësia e bashkëpunimit ndërkombëtar, edukimit cilësor dhe ruajtjes së vlerave kulturore si bazë për një shoqëri të qëndrueshme dhe gjithëpërfshirëse. Ndërkaq, nxënësit dhe mësimdhënësit prezantuan punën dhe projektet e tyre, duke dëshmuar përkushtimin drejt arsimit modern evropian dhe përgatitjes për tregun e punës.

Ky aktivitet dëshmoi edhe një herë se QK “11 Marsi” mbetet një institucion i hapur ndaj diversitetit, bashkëpunimit dhe zhvillimit të vazhdueshëm në funksion të të rinjve dhe të ardhmes së vendit tonë.

🙏 Falënderojmë të gjithë pjesëmarrësit dhe kontribuuesit për angazhimin dhe mbështetjen e vazhdueshme!

Mësimdhënësit nga shkolla jonë morren pjesë me krenari në projektin , duke ndjekur trajnim profesional në Sofje, Bullgari.

Ky projekt mbështet tranzicionin e gjelbër dhe digjital në Ballkanin Perëndimor, përmes forcimit të arsimit dhe aftësimit profesional (VET). Përmes kësaj përvoje, mësimdhënësit tanë po avancojnë njohuritë e tyre në fusha kyçe si qëndrueshmëria, energjia e gjelbër dhe transformimi digjital—kompetenca thelbësore për përgatitjen e nxënësve për tregun e punës në të ardhmen.

Projekti gjithashtu promovon inovacionin në mësimdhënie, bashkëpunimin ndërmjet arsimit dhe industrisë, si dhe zhvillimin e kurrikulave moderne të përafruara me standardet evropiane.

Ky aktivitet realizohet në kuadër të projektit GreenBridge, i financuar nga Bashkimi Evropian përmes programit ERASMUS-EDU-2024-CB-VET.