IAAP "Ymer Prizreni" Prizren

02/09/2026

💧 Drejtoresha e shkollës znj M.Gavazaj sot takoi kryetarin e lagjës z.Pelivan Pulaj, ku biseduan për zgjidhjen e problemit me furnizimin me ujë në shkollat e lagjës.

Bashkërisht diskutuam për vështirësitë e krijuara dhe mundësitë për ndërhyrje, në mënyrë që dy shkollat të kenë furnizim të rregullt dhe të qëndrueshëm me ujë.

Falënderojmë komunitetin e lagjes për bashkëpunimin, mirëkuptimin dhe gatishmërinë për të kontribuar në zgjidhjen e këtij problemi.

Ne do të vazhdojmë të angazhohemi dhe të bashkëpunojmë me të gjitha palët relevante, sepse sigurimi i kushteve të përshtatshme për nxënësit dhe stafin është përgjegjësi dhe prioritet i përbashkët.

💧 Bashkë për një shkollë më të mirë dhe kushte më të sigurta për të gjithë!

Me respekt,
Drejtoresha e shkollës
MSc Myvedete Gavazaj

01/09/2026

Të nderuar nxënës,mësimdhënës, bashkëpunëtorë dhe staf i shkollës,

Sot drejtoresha e shkollës ju uroj mirëseardhjen në fillimin e një viti të ri shkollor dhe ju dëshiroj shëndet, mbarësi, energji dhe suksese në vitin shkollor 2026/2027.

Një vit i ri shkollor është gjithmonë një fillim i ri, me sfida, përgjegjësi, por edhe me mundësi të reja për të arritur rezultate sa më të mira. Puna jonë nuk është vetëm përcjellja e njohurive, por edhe edukimi, përkrahja dhe motivimi i nxënësve tanë. Prandaj, besoj se edhe këtë vit do të punojmë me përkushtim, profesionalizëm dhe në frymën e bashkëpunimit.

Dua të theksoj rëndësinë e komunikimit dhe bashkëpunimit ndërmjet nesh. Vetëm si një ekip i bashkuar mund të krijojmë një ambient të sigurt, të rregullt dhe të përshtatshëm për të gjithë nxënësit dhe stafin e shkollës.

Sa i përket fillimit të procesit mësimor dhe dokumentacionit pedagogjik, ju njoftoj se deri në momentin kur të pajisemi me ditarët zyrtarë, është e nevojshme që puna të vazhdojë pa pengesa. Për këtë periudhë kalimtare, kem bërë improvizimin e ditarëve, duke evidentuar rregullisht orët mësimore, temat e zhvilluara, mungesat dhe të gjitha të dhënat e nevojshme, në mënyrë që puna jonë të jetë e organizuar dhe e dokumentuar.

Ju lutem që gjatë kësaj periudhe të tregojmë kujdes dhe korrektësi në mbajtjen e evidencës, në mënyrë që, pas marrjes së ditarëve zyrtarë, të kemi mundësi ta sistemojmë dhe ta bartim dokumentacionin në mënyrë të rregullt.

Besoj në profesionalizmin dhe përgjegjësinë tuaj dhe jam e bindur se, me bashkëpunim dhe mirëkuptim, do ta tejkalojmë edhe këtë fazë të përkohshme pa vështirësi.

Në fund, ju uroj një vit të mbarë, të suksesshëm dhe të mbushur me rezultate të mira. Uroj që çdo ditë e këtij viti shkollor të jetë një mundësi e re për të bërë më të mirën për nxënësit tanë dhe për shkollën tonë.

Suksese të gjithëve dhe një vit të mbarë shkollor!

Ju faleminderit për përkushtimin dhe bashkëpunimin tuaj.

Me respekt,
Drejtoresha e shkollës,
MSc Myvedete Gavazaj

28/08/2026

Mbledhja e Këshillit të Mësimdhënësve për fillimin e vitit shkollor 2026/2027

Sot u mbajt mbledhja e Këshillit të Mësimdhënësve të IAAP “Ymer Prizreni” – Prizren, me qëllim të organizimit, koordinimit dhe planifikimit të punës për fillimin e vitit të ri shkollor.

Mbledhjen e udhëhoqi drejtoresha e shkollës, znj. Myvedete Gavazaj, e cila i informoi mësimdhënësit për përgatitjet e bëra për fillimin e vitit shkollor 2026/2027.

Gjatë mbledhjes u diskutuan çështje të rëndësishme organizative dhe pedagogjike, ndër të tjera: ndarja e orëve mësimore nga aktivet profesionale, caktimi i kujdestarëve të klasave të X-ta, si dhe organizimi i kujdestarive ditore.

Me bashkëpunim, përkushtim dhe përgjegjësi të përbashkët, synojmë që viti i ri shkollor të fillojë mbarë dhe të jetë i suksesshëm për të gjithë.

Ju urojmë të gjithë mësimdhënësve dhe nxënësve një vit shkollor të mbarë, të suksesshëm dhe plot arritje!

18/08/2026

Dita e dytë për regjistrimin e nxënësëve në klasën e dhjetë (X-të).
Suksese!

18/08/2026

14/08/2026

Viti shkollor 2026/2027 /klasët e X-ta

Të dashur nxënës, të nderuar prindër,

Zgjidhni profesionin, ndërtoni të ardhmen!

Regjistrohuni në shkollën profesionale dhe përfitoni nga mundësitë e Arsimit Dual – më shumë praktikë, më shumë përvojë, më shumë mundësi për punësim.

Afati i aplikimit: Me 17, 18 dhe 19 gusht 2026
Orari:
08:00 – 16:00
Vendi i aplikimit: IAAP “Ymer Prizreni – Prizren

Dokumentet e nevojshme:
* Fletëparaqitjen, e cila merret në shkollë
* Dëftesën origjinale për përfundimin e arsimit të mesëm të ulët (klasat VI–IX)
* Çertifikatën e lindjes
Ju urojmë suksese dhe mirë se vini në IAAP “Ymer Prizreni” – Prizren!

Me respekt,
Drejtoresha e shkollës
MscMyvedete Gavazaj

22/07/2026

TELEGRAM NGUSHËLLIMI!

Me pikëllim të thellë morëm lajmin për ndarjen e parakohshme nga jeta të ish-nxënësit të shkollës sonë dhe pjesëtarit të Policisë së Kosovës, Shaban Hajdari.

Në emër të Drejtorisë, stafit dhe gjithë kolektivit të IAAP “Ymer Prizreni” – Prizren, shprehim ngushëllimet tona më të sinqerta familjes Hajdari, kolegëve të Policisë së Kosovës, miqve dhe të gjithë atyre që e njohën dhe e vlerësuan.

Do ta kujtojmë gjithmonë me respekt si ish-nxënës të shkollës sonë. Lutemi që i ndjeri të prehet në paqe, ndërsa familjes, kolegëve dhe të afërmve u dëshirojmë forcë, durim dhe ngushëllim për ta përballuar këtë humbje të rëndë.

Me respekt,

Drejtoria dhe kolektivi i IAAP “Ymer Prizreni” – Prizren

09/07/2026

Afati i parë i regjistrimit!

Për vitin shkollor - 2026/27

Dita e tretë : 09.07.2026

Edhe sot në ditën e tretë të procesit të regjistrimit të nxënësve në klasat e X-ta, patëm kënaqësinë të mirëpresim në vizitë zyrtarët e Komunës së Prizrenit, të udhëhequr nga nënkryetari i komunës, z.Furkan Bütüç.

Vizita e tyre dëshmoi përkushtimin dhe mbështetjen institucionale ndaj arsimit dhe procesit të regjistrimit të nxënësve. I falënderojmë për vizitën dhe interesimin e treguar për shkollën tonë.

06/07/2026

Ju njoftojmë se ka filluar procesi i regjistrimit të nxënësve në klasën e X-të në IAAP “Ymer Prizreni” – Prizren, për vitin shkollor 2026/2027.

IAAP “Ymer Prizreni” – Prizren është institucion publik i Arsimit dhe Aftësimit Profesional, i përkushtuar në ofrimin e arsimit cilësor, zhvillimin e kompetencave profesionale dhe përgatitjen e nxënësve për tregun e punës dhe vazhdimin e studimeve në arsimin e lartë.
Misioni i IAAP “Ymer Prizreni” është të përgatisë profesionistë kompetentë, të përgjegjshëm dhe konkurrues, të aftë për t’iu përgjigjur kërkesave të tregut të punës dhe sfidave të zhvillimit ekonomik e shoqëror.
Me traditën, përkushtimin dhe rezultatet e arritura ndër vite, IAAP “Ymer Prizreni” – Prizren vazhdon të jetë një nga institucionet lider të Arsimit dhe Aftësimit Profesional në Republikën e Kosovës, duke ofruar mundësi të barabarta, edukim cilësor dhe perspektivë të sigurt për të rinjtë e të gjitha komuniteteve.
Programet
Institucioni ofron arsim dhe aftësim profesional në pesë fusha:
● Ekonomi
● Juridik
● Agrobiznes
● Hoteleri
● Teknologji Ushqimore
Një nga veçoritë dalluese të shkollës është se procesi mësimor zhvillohet në tri gjuhë: shqip, turqisht dhe boshnjakisht, duke promovuar arsimin gjithëpërfshirës dhe mundësi të barabarta për të gjitha komunitetet.
Në gjuhën turke, mësimi zhvillohet në drejtimin Ekonomi dhe Juridik ndërsa në gjuhën boshnjake zhvillohet në drejtimet Ekonomi ,Kuzhinjer dhe Asistent i Mikpritjes Hoteliere.
Programet mësimore realizohen sipas kurrikulave bashkëkohore, duke ndërthurur njohuritë teorike me mësimin praktik.
Mësimi dual
Një nga përparësitë e institucionit është zbatimi i mësimit dual, i cili u mundëson nxënësve të fitojnë përvojë praktike të drejtpërdrejtë në biznese dhe institucione partnere.
Në drejtimin Hoteleri, mësimi dual zhvillohet në profilet Asistent i Mikpritjes Hoteliere dhe Kuzhinë, ndërsa në drejtimin Ekonomi në profilin Tregti me Pakicë dhe Shumicë, duke krijuar lidhje të qëndrueshme ndërmjet shkollës dhe tregut të punës.
Infrastrukturë
IAAP “Ymer Prizreni” disponon kabinete profesionale, laboratorë, kabinet të Teknologjisë Informative dhe Komunikimit (TIK), klasa të pajisura me teknologji bashkëkohore dhe ambiente të përshtatshme për zhvillimin e procesit mësimor, praktikës profesionale dhe aktiviteteve edukative.
Stafi
Institucioni udhëhiqet nga një menaxhment i përkushtuar dhe profesionist, ndërsa procesi edukativo-arsimor realizohet nga një staf i kualifikuar, me përvojë dhe angazhim të vazhdueshëm për ngritjen e cilësisë në mësimdhënie dhe mësimnxënie.

Përmes bashkëpunimit me bizneset, institucionet publike dhe partnerët vendorë e ndërkombëtarë, shkolla krijon mundësi të vazhdueshme për zhvillimin profesional të nxënësve.

Me respekt,
Drejtoreaha e ahkollës:
MSc Myvedete Gavazaj