Sa i përket antroponimit të emrit të fshatit Billushë, supozohet se vjen nga antroponimi mesjetar Bil të cilin atëherë e mbante banori shqiptar. Kështu “Ka gjasë që bazën antroponimike Bil ta kemi edhe në emrin e fshatit të sotëm Billushë. Në fakt studiuesi Dr. Skënder Gashi, në punimin „Rreth emërtimeve Kosova, Metohia, Dardania“ e sjell një dëshmi të gjetur në një dokument të hartuar midis viteve 1309 -1313, ku përmendet Billusha përkatësisht vendbanimi Billushë. Në Prizren Kishën e Shmitrit me të gjitha pronat e me njerëzit e saj bashkë me Manastirin e Shmitrit në Billushë bashkë me lagjet e tij dhe me të gjitha të drejtat e tij. Këtu autori (S.G.), duke cituar burimin, shpreh paqartësinë dhe shkruan se „Mua nuk më është e qartë nëse këtu kemi të bëjmë me një përsëritje të padëshirueshme apo me dy manastire: njëri në qytetin e Prizrenit e tjetri në Billushë. Situatë e ngjashme me antroponimine 9 fshatrave, mbretëronte edhe nëfshatin Billushë të Prizrenit. Sipas regjistrimeve kadastrale osmane të sanxhakut të Dukagjinit të viteve 1571 dhe 1591, bënte pjesë në trevën e Opojës që i përkiste këtij sanxhaku, që formonte një njësi administrative-teritoriale më vehte. Të dhënat e të dy regjistrimeve dëshmojnë se në trevën e Opojës, kishin gjetur një zbatim të plotë normat e sistemit të timarit. Me ardhjen e pushtetit osman, në fshat zhvillohet sistemi feudal (i fshatarëve). Në këtë kohë toka konsiderohej si pasuri e shtetit dhe shteti merrte të dhjetat nga rendimentet e korrjeve. Një zbatim më të thellë e më intensiv se në trevat e tjera të përfshira në këtë sanxhak. Sipas regjistrimeve në fjalë, në vitin 1571 në 23 fshatra të trevës së Opojës ekzistonin 18 fshatra kurse në vitin 1591, 13 fshatra. Përjashtim bënte fshati Billushë-Kushtrim, i cili më 1571 përfshihej në pushtimin e Mustafait, mirallaj i sanxhakut të Dukagjinit, kurse më 1591 në ziametin e Sulejmanit, të birit të Mehmet beut. Sipas një liste me të dhënat e hollësishme statistikore për çdo fshat të nxjerrë nga defterët e sanxhakut të Dukagjinit të viteve 1571 dhe 1591, lidhur me popullsinë, me dinamikën e procesit të islamizimit dhe me raportin e përafërt midis antroponimisë shqipe dhe asaj sllave që mbanin kryefamiljarët dhe beqarët e fshatrave të Opojës, shihet se në mesin e 25 fshatrave, ndodhen edhe fshatrat Billushë-Kushtrim dhe L*z, të cilët i përkasin trevës së Vërrinit. Sipas këtyre dokumenteve, në vitin 1571, Billusha, kishte 39 shtëpi e 6 beqarë dhe në vitin 1591, kishte 42 shtëpi e 4 beqarë popullsia e krishterë. Fshati Billushë-Kushtrim, kishte 3300 akçe të ardhura dhe fshati Laz 1421 akçe. Po në këtë dokument Billusha-Kushtrimi është e regjistruar në trevën e Opojës si: Fshati Billushë -Kushtrim varet nga Opoja, nga Ziameti i Mustafait, Mirallai i sanxhakut të Dukagjinit. Shtëpi 39, beqarë 6. Të ardhura: ispenxhe -1125, grurë- barrë 12 (600); elb- barrë 7 (210); thekër-barrë 5 (200); mel-barrë 1 (40); musht-medre 65 (650); taksa e govatës-40; taksa e kullotës-195; taksa e perimeve-78; e dhjeta e bletëve-50; e dhjeta e lakrave-25; bidati i derrave-15; vlera e kashtës-30; nijabeti, taksa e martesës (taksa) e tapisë së tokës dhe të tjera-42. Shuma 3300 (akçe). Gjurmët e lokalitetit të vjetër të fshatit Billushë-Kushtrim, siç rrëfehet edhe sot, gjenden në vendin ku aktualisht është objekti i shkollës së fshatit. Aty janë gjetur mbeturina të varrezave, tulla, tjegulla, gelqere etj. Po ashtu thuhet se aty ka qenë një kishë e vjetër. Sipas traditës, banorët e parë kanë jetuar në Lagjen (Mahallën) e Gropës (familja e sotme Shala), thuhet për 7 shtëpi, kurse më vonë këtu vijnë banorët e fshatrave të braktisura Gradçanicë (fshat pran rrugës Prizren-Dragash, vetëm 3 kilometra larg fshatit Billushë, 3,8 kilometra larg fshatit Poslisht, 4, 3 kilometra larg fshatit Hoçë e Qytetit, 4,6 kilometra larg fshatit Brezne, 4,8 kilometra larg fshatit Brrut etj., ku aktualisht ndodhet toponimi me të njejtin emër Gradçanicë, Kryezitë e sotëm, në afërsi të Çeshmes së Hajdutit dhe nga fshati Pondevica Berishët e sotëm, vendbanim jo larg rrugës për në Dragash, afër Çeshmes së Hajdutit, vetëm 0,8 kilometra larg vendbanimit Gradçanicë, 3 kilometra larg fshatit Billushë-Kushtrim, 3,6 kilometra larg fshatit Poslisht, 4, 7 kilometra larg fshatit Brezne, 5,7 kilometra larg fshatit Brut etj., ku aktualisht ndodhet toponimi me të njëjtin emër Pondevica. Në këtë vendanim Billusha, gjatë sundimit osman, pronat e veta i kishte Qibrit Qaushi. Ndërkaq, emrin e ri të fshatit Billushë, emrin Kushtrim, e lindi lufta e fundit për çlirimin e Kosovës, sepse aty u zhvillua edhe beteja e parë e UÇK-së kundër armikut, në rrethin e Prizrenit, që ishte edhe kushtrimi për mobilizim kundër Serbisë. Gjithashtu, është për tu theksuar se në të gjitha fshatrat e Vërrinit, si më parë dhe tani, nuk ekziston asnjë fis që të ketë emër sllav, por vetëm emrat shqip dhe në disa raste muslimane. Për të qartësuar këtë çështje, po japim disa emra fisesh të fshatrave të Vërrinit siç janë:
Në Billushë: Lagjet-Familjet: Lagjja (Mahalla) e Gurit, Berisha, Gashi, Bytyçi dhe Kryeziu; Lagjja (Mahalla) e Gropës, Shala, Berisha dhe Kryeziu; Lagjja (Mahalla) e Jovkallarëve, Shala, Muslijaj, Murselaj, Shashivari, Islamaj dhe Osmanaj; Lagjja (Mahalla) e Borit, Dervishaj, Berisha, Gashi dhe Bytyçi dhe Lagjja (Mahalla) e Shakiqit, Gashi, Berisha, Shala, Krasniqi Isakaj, Seranaj etj.
