Departamenti i Gazetarisë - UP

U mbajt punëtoria e dytë në kuadër të projektit "Edukimi mbi Inteligjencën Artificiale për qëndrueshmëri demokratike", e organizuar nga Instituti i Medias, në kuadër të Departamentit të Gazetarisë. Punëtoria e udhëhequr nga profesorët Muhamet Jahiri dhe Gëzim Qerimi, mblodhi pjesëmarrës të rinj nga qytete të ndryshme për të diskutuar rolin e inteligjencës artificiale në shoqëri demokratike. Profesorët diskutuan për rolin e inteligjencës artificiale në procese demokratike duke theksuar rolin e qytetarisë aktive dhe fenomenet që sfidojnë demokracinë në vendin tonë. Njëkohësisht theks i veçanrë u vë në domosdoshmërinë që të ketë edukim mbi inteligjencën artificiale për përgatitje sa më të mirë të shoqërisë për epokën e tashme. Ky projekt mbështetet përmes skemës së granteve Digital Spark, si pjesë e projektit EECA të Mekanizmit Rajonal të Mbështetjes, të zbatuar nga Metamorphosis Foundation dhe TechSoup / Hive Mind në partneritet me CIVICUS dhe në kuadër të Iniciativës për Demokraci Digjitale (DDI) që mbulon Jugun Global.

U mbajt punëtoria e parë në kuadër të projektit “Edukimi mbi Inteligjencën Artificiale për qëndrueshmëri demokratike”, e organizuar nga Instituti i Medias, në kuadër të Departamentit të Gazetarisë.

Punëtoria e udhëhequr nga profesori Alban Zeneli, mblodhi pjesëmarrës të rinj nga qytete të ndryshme për të diskutuar rolin e inteligjencës artificiale në forcimin e vlerave demokratike. Profesori Zeneli udhëhoqi diskutimin drejt dimensioneve etike të inteligjencës artificiale, duke theksuar se si teknologjia mund të shfrytëzohet në mënyrë të përgjegjshme për veprim qytetar.

Gjatë punëtorisë, pjesëmarrësit i inkurajuan të reflektojnë mbi mundësitë dhe sfidat që paraqet inteligjenca artificiale në shoqëritë demokratike, duke theksuar rëndësinë e të menduarit kritik, transparencës dhe llogaridhënies në përdorimin e saj.

Ky projekt mbështetet përmes skemës së granteve Digital Spark, si pjesë e projektit EECA të Mekanizmit Rajonal të Mbështetjes, të zbatuar nga Metamorphosis Foundation dhe TechSoup / Hive Mind në partneritet me CIVICUS dhe në kuadër të Iniciativës për Demokraci Digjitale (DDI) që mbulon Jugun Global.

Tjetër bashkëpunim në kuadër të Erasmus+, për mobilitetin e studentëve dhe profesorëve të Departamentit të Gazetarisë në Universitetin e Veliko Tarnovos 🇽🇰🤝🇧🇬

Departamenti ynë dhe Departamenti i Gazetarisë i Universitetit “St. Cyril and St. Methodius” të Veliko Tarnovos në Bullgari kanë formalizuar një marrëveshje ndërinstitucionale në kuadër të programit Erasmus+ për periudhën 2023–2027. Qëllimi kryesor i marrëveshjes është mundësimi i mobilitetit të studentëve për studime, si dhe i stafit akademik për mësimdhënie dhe trajnim.

Ky bashkëpunim synon të kontribuojë në ndërkombëtarizimin e arsimit të lartë dhe në forcimin e lidhjeve akademike ndërmjet Kosovës dhe Bullgarisë, në përputhje me objektivat e Hapësirës Evropiane të Arsimit të Lartë ((EHEA). 👩‍🎓🧑‍🎓

Vazhdon bashkëpunimi ndërmjet Departamentit të Gazetarisë në Universitetin e Prishtinës dhe Departamentit të Gazetarisë në NLA University në Norvegji 🇽🇰🤝🇳🇴

Me kënaqësi njoftojmë se projekti ynë i përbashkët në kuadër të programit Erasmus+ është mbështetur sërish me financim, duke siguruar vazhdimin e shkëmbimeve akademike për tri vitet e ardhshme.

Ky projekt do të mundësojë që çdo vit akademik katër profesorë nga Kosova të realizojnë mobilitet akademik në NLA University në Norvegji dhe katër profesorë nga Norvegjia të zhvillojnë mobilitet në Departamentin e Gazetarisë në Kosovë. Gjithashtu, katër studentë nga Departamenti ynë do të përfitojnë mundësinë e shkëmbimit për një semestër studimi ndërmjet dy institucioneve.

Ky është një hap i rëndësishëm në forcimin e bashkëpunimit ndërkombëtar, shkëmbimin e përvojave akademike dhe ngritjen e cilësisë së mësimdhënies dhe studimeve, duke u ofruar studentëve dhe stafit mundësi konkrete për zhvillim profesional dhe kulturor.

Falënderojmë partnerët tanë në NLA University për besimin dhe bashkëpunimin e vazhdueshëm dhe mezi presim realizimin e aktiviteteve të përbashkëta në vitet që vijnë. 👩‍🎓🧑‍🎓

Riakreditohet edhe për pesë vjet programi Bachelor në Departamentin e Gazetarisë 🎉

Sot kemi pranuar vendimin zyrtar për riakreditimin 5-vjeçar të programit “Gazetari”, në studimet bachelor.

Jemi të lumtur të ndajmë këtë lajm suksesi me studentët dhe të rinjtë e interesuar për të nisur studimet në departamentin tonë.

Ky vendim është rikonfirmim i cilësisë së lartë të studimeve në këtë departament, i cili vazhdon të jetë programi lider i krijimit të gjeneratave të reja në fushën e medias dhe komunikimit në vend.

Po ashtu, ju njoftojmë se shpejti do të hapet edhe konkursi për pranim të studentëve të rinj në studime themelore.

Urime studentëve, stafit dhe gjithë atyre që kanë kontribuar në këtë proces! 👩‍🎓🧑‍🎓

Akreditim 3-vjeçar për programin MASTER në Departamentin e Gazetarisë

Me kënaqësi njoftojmë studentët se Departamenti i Gazetarisë ka pranuar vendimin zyrtar për akreditimin e programit të studimeve Master për një periudhë trevjeçare.

Ky vendim konfirmon cilësinë e programit tonë, përkushtimin institucional dhe punën e vazhdueshme të stafit akademik në zhvillimin e arsimit të lartë në fushën e gazetarisë dhe komunikimit.

Akreditimi dëshmon përmbushjen e standardeve të kërkuara për ofrimin e një programi bashkëkohor, i cili synon të përgatisë profesionistë të aftë për t’u përballur me sfidat e medias moderne, komunikimit publik dhe kërkimit shkencor.

Shprehim mirënjohjen tonë për të gjithë ata që kanë kontribuar në këtë proces, stafin akademik, stafin administrativ, studentët, të diplomuarit dhe bashkëpunëtorët tanë, të cilët me angazhimin e tyre kanë ndihmuar në avancimin e vazhdueshëm të Departamentit.

Profesoresha e Departamentit të Gazetarisë, Remzie Shahini-Hoxhaj, mori pjesë në Simpoziumin Ndërkombëtar për Edukimin Medial (IMLRS 2026), i mbajtur në Romë, Itali.

Gjatë simpoziumit, ajo kontribuoi në tri sesione shkencore: prezantoi një studim krahasues mbi edukimin medial në Kosovë dhe Shqipëri, mori pjesë në një panel diskutimi mbi rolin e edukimit medial në adresimin e traumës në shoqëritë pas konfliktit, si dhe prezantoi një hulumtim mbi gjuhën e urrejtjes ndaj gazetarëve dhe ndikimin e saj në lirinë e shprehjes, të realizuar në bashkëpunim me asistenten Blerta Blakaj.

Simpoziumi mblodhi studiues dhe ekspertë nga vende të ndryshme të botës, duke ofruar mundësi për shkëmbim përvojash dhe zhvillim të bashkëpunimeve të reja akademike.