ORCA Organizata për Rritjen e Cilësisë në Arsim

22/07/2026

📣 APLIKIMET PËR BURSËN “LULËZOJNË” JANË HAPUR

📚 Apliko për Bursën “LULËZOJNË” 2026/27, një mundësi që mbështet rrugëtimin tënd akademik, profesional dhe personal!

👉 Kush mund të aplikojë?
🔹 Të rinj 18+ nga e gjithë Kosova të grupeve të margjinalizuara si vajza, të rinj nga zona rurale, me të ardhura të ulëta, studentë të brezit të parë, etj.
🔹 Të regjistruar në Bachelor
🔹 Me sukses të kënaqshëm, me notë mesatare mbi 8.0
🔹 Me angazhim të dëshmuar në komunitet, dhe të motivuar për kontribut komunitar në të ardhmen

💶 TOKA ofron mbështetje deri në 1,000€ (duke përfshirë taksat e të ardhurave personale) për:
📌 Pagesa semestrale
📌 Qera, ushqim, transport
📌 Libra, teknologji
📌 Kujdes shëndetësor

🗓 Afati: 2 gusht 2026, ora 23:59
🔗 Apliko këtu: https://toka-ks.org/koha-qe-te-lulezosh-ka-ardhur-serish-apliko-per-bursen-lulezojne-2026-27/

01/07/2026

A PO I PËRGATISIM TË RINJTË PËR VENDET E PUNËS TË SË ARDHMES?

ORCA dje organizoi STARforum Kosova ku studentë dhe të sapodiplomuar, përfaqësues rinorë, institucione publike, biznese dhe organizata të shoqërisë civile diskutuan për lidhjen ndërmjet arsimit, aftësive dhe punësimit të të rinjve.

Në panelin e diskutimit morën pjesë Milot Hasangjekaj nga Agjencia e Kosovës për Akreditim - Kosovo Accreditation Agency, Flatra Thaqi nga BONEVET Prishtina dhe Adriatik Llugiqi nga United Youth Task Force. Gjatë forumit u prezantuan edhe platformat dhe mundësitë e iniciativës STAR nga Erita Kollqaku, gjetjet e raportit të Open Society Foundations “Democracy Pulse: Gen Z in the Western Balkans” nga Lura Pollozhani, si dhe prezantimi i ORCA-s “Konfuzioni i Madh”, mbi mospërputhjen ndërmjet veprimtarisë së institucioneve të arsimit të lartë dhe nevojave të tregut të punës.

Diskutimet nxorën në pah nevojën për zvogëlimin e hendekut ndërmjet përgatitjes arsimore dhe aftësive që kërkon tregu i punës, përmes bashkëpunimit më të strukturuar ndërmjet institucioneve arsimore, bizneseve, institucioneve publike, organizatave dhe vetë të rinjve.

Të rinjtë duhet të përfshihen drejtpërdrejt në vendimmarrjen për politikat dhe programet që ndikojnë në arsimin, zhvillimin e karrierës dhe punësimin e tyre. Njëkohësisht, institucionet dhe punëdhënësit duhet të përgatiten për ndikimin e inteligjencës artificiale dhe ndryshimet e shpejta që po ndodhin në profesionet dhe vendet e punës.

Në pjesën punuese, pjesëmarrësit diskutuan dhe propozuan zgjidhje konkrete për inteligjencën artificiale dhe aftësitë e së ardhmes, ndërmarrësinë e të rinjve dhe vetëpunësimin, si dhe praktikat profesionale dhe përvojën e parë të punës.

Forumi është pjesë e iniciativës rajonale STAR.study, e mbështetur nga Open Society Foundations Western Balkans. Ky aktivitet përkrahet nga programi i Fondacionit Kosovar për Shoqëri Civile (KCSF) ‘EJA Kosovë’, bashkëfinancuar nga Agjencia Zvicerane për Zhvillim dhe Bashkëpunim (SDC) dhe Suedia.

19/06/2026

🎓 THIRRJE PËR STUDENTË DHE TË SAPODIPLOMUAR

ORCA fton studentët aktivë dhe të diplomuarit në dy vitet e fundit të aplikojnë për pjesëmarrje në STARforum Kosova: Nga studimet në punë, i cili do të mbahet më 30 qershor në Prishtinë.

Forumi do të mbledhë studentë, të sapodiplomuar, përfaqësues të institucioneve publike, komunitetit të biznesit dhe organizatave të shoqërisë civile për të diskutuar sfidat dhe mundësitë e kalimit nga studimet në tregun e punës.

Pjesëmarrësit do të kenë mundësi të kontribuojnë në diskutime dhe grupe punuese për tema si orientimi në karrierë, inteligjenca artificiale dhe aftësitë e së ardhmes, praktikat dhe përvoja e parë e punës, gatishmëria e punëdhënësve për Gjeneratën Z, sipërmarrja dhe cilësia e punësimit të të rinjve.

📍 Prishtinë
📅 30 qershor
🔗 Apliko këtu: https://forms.gle/MStrJag2EukFc8wx8
⏳ Afati për aplikim: 25 qershor 2026

Forumi është pjesë e iniciativës rajonale STAR, e mbështetur nga Open Society Foundations Western Balkans. Ky aktivitet përkrahet nga programi i Fondacionit Kosovar për Shoqëri Civile (KCSF) ‘EJA Kosovë’, bashkëfinancuar nga Agjencia Zvicerane për Zhvillim dhe Bashkëpunim (SDC) dhe Suedia.

ORCA hap thirrjen për studentët aktivë dhe të sapodiplomuarit që dëshirojnë të marrin pjesë në STARforum Kosova: Nga studimet në punë. Forumi do të mbahet me datë 30 qershor dhe do të mbledhë studentë, të sapodiplomuar, institucione, biznese dhe organizata për të diskutuar sfidat...

21/05/2026

REAGIM PUBLIK I ROSCAP MBI RASTIN E RAPORTUAR NË GJAKOVË

Rrjeti i OSHC-ve të Arsimit Parauniversitar - ROSCAP, shpreh shqetësim të thellë në lidhje me pamjet e raportuara mbi sjelljet e papranueshme të drejtorit të shkollës në Demjan, Komuna e Gjakovës.

Rasti i raportuar ndaj drejtorit të shkollës në Demjan të Komunës së Gjakovës është alarm serioz për sigurinë, mbrojtjen dhe dinjitetin e fëmijëve në institucionet shkollore apo jashtë tyre.

Çdo sjellje që e cenon integritetin fizik, emocional apo seksual të fëmijëve apo nxënësve është e papranueshme dhe duhet të trajtohet me urgjencë, seriozitet dhe përgjegjësi të plotë institucionale. Po ashtu, drejtorët e shkollave kanë përgjegjësi të drejtpërdrejtë për sigurinë, mirëqenien dhe mbrojtjen e fëmijëve, dhe çdo dyshim për sjellje që nuk përkojnë me këto duhet të trajtohet me urgjencë dhe seriozitet maksimal.

ROSCAP mirëpret largimin e menjëhershëm nga puna të drejtorit nga Komuna e Gjakovës dhe aktivizimin e Policisë së Kosovës dhe Prokurorisë.

Po ashtu, ky rast nuk duhet të trajtohet si incident i izoluar por duhet të shërbejë si thirrje urgjente për forcimin e mekanizmave të mbrojtjes së fëmijëve sidomos vajzave në raportimin e ngacmimeve seksuale nga drejtorët ose stafi i shkollës.

ROSCAP do të vazhdojë të avokojë për një sistem arsimor ku siguria, dinjiteti dhe mirëqenia e fëmijëve janë të panegociueshme.

20/05/2026

💼A ËSHTË GATI TREGU I PUNËS PËR GJENERATËN Z?🤳

ORCA organizoi dje mëngjesin e punës me komunitetin e biznesit mbi Gjeneratën Z dhe tregun e punës, me pjesëmarrjen e përfaqësuesve të asociacioneve, odave, rrjeteve dhe organizimeve të biznesit në Kosovë.

Gjatë takimit u prezantuan të dhëna nga hulumtimi rajonal i platformës STAR mbi karakteristikat, pritjet dhe sfidat e Gjeneratës Z në tregun e punës, si dhe u diskutua për raportin mes arsimit, të rinjve dhe nevojave të sektorit privat.

Diskutimi u fokusua në ndryshimet që po ndodhin në mënyrën e punës, komunikimit dhe zhvillimit profesional të të rinjve, si dhe në nevojën për bashkëpunim më të madh ndërmjet bizneseve, institucioneve dhe shoqërisë civile. Po ashtu, u diskutua edhe hendeku ndërmjet studimeve dhe shkathtësive që kërkohen në tregun e punës.

Takimi u organizua në kuadër të platformës rajonale STAR.study, e mbështetur nga Open Society Foundations Western Balkans, e cila synon të fuqizojë bashkëpunimin rajonal rreth punësimit të të rinjve dhe tranzicionit të tyre drejt tregut të punës.

ORCA falënderon të gjithë pjesëmarrësit për diskutimin e hapur, shkëmbimin e përvojave dhe gatishmërinë për bashkëpunim në fuqizimin dhe integrimin e të rinjve në tregun e punës. Oda Ekonomike e Kosovës, Dhoma Ekonomike e Grave te Kosoves - G7, Nordic Chamber of Commerce in Prishtina, EAC Slovenian Business Club Kosovo, Byroja Kosovare e Sigurimeve, Unioni i Turizmit të Kosovës - UTK, Shoqata Farmaceutike E Kosoves, Shoqata e Përpunuesve të Drurit të Kosovës

05/05/2026

🎓 ORCA përgëzon Agjencinë e Kosovës për Akreditim për avancimin e saj drejt njohjes ndërkombëtare në Shtetet e Bashkuara të Amerikës.

Ky është një hap i rëndësishëm për kredibilitetin e sistemit të arsimit të lartë në Kosovë, pasi njohja nga mekanizma ndërkombëtarë rrit besimin publik, forcon standardet dhe e pozicionon vendin në rrjete globale të sigurimit të cilësisë. Një zhvillim i tillë nuk është i rastësishëm, por rezultat i punës profesionale dhe përmbushjes së standardeve të larta ndërkombëtare.

Rezultate të tilla vijnë vetëm kur institucionet mbeten të pavarura dhe të mbrojtura nga ndikimet politike. Çdo përpjekje për t’i kontrolluar apo instrumentalizuar ato e dëmton drejtpërdrejt kredibilitetin e tyre dhe e rrezikon pozitën ndërkombëtare të Kosovës.

29/04/2026

UNIVERSITETI I PRISHTINËS REFUZON PRESIONET DHE MBRON STANDARDET

ORCA përgëzon rektorin Arben Hajrullahu dhe menaxhmentin e Universitetit të Prishtinës për qëndrimin e tyre në mbrojtje të standardeve akademike dhe respektimit të procedurave institucionale. Në mbledhjen e sotme të Senatit, ku u trajtuan kërkesa për hapjen e një numri të konsiderueshëm pozitash të reja akademike, veçanërisht nga Fakulteti i Mjekësisë, menaxhmenti ka treguar vendosmëri për të mos proceduar me vendime që nuk mbështeten në analiza reale të nevojave akademike. Propozimi fillestar, i propozuar nga Fakulteti i Mjekësisë, ka qenë për 33 profesorë dhe 38 asistentë, ndërsa vendimi i sotëm i Senatit e ka reduktuar këtë numër në 11 profesorë dhe 23 asistentë, duke reflektuar një qasje më të balancuar.

Këto kërkesa, të arsyetuara si emergjente, në thelb kanë reflektuar përpjekje për zgjerim të pajustifikuar të pozitave dhe akomodim të interesave të caktuara. Qëndrimi i rektorit Hajrullahu dhe menaxhmentit për respektimin e standardeve dhe rregulloreve tregon përkushtim ndaj integritetit institucional. Vendimmarrja e bazuar në meritë dhe ligjshmëri është thelbësore për ruajtjen e cilësisë në arsimin e lartë dhe për mbrojtjen e besimit publik në universitet. ORCA, me përkushtim të plotë, do të vazhdojë të monitorojë procese të kësaj natyre me qëllim të ruajtjes së standardeve akademike dhe integritetit të institucioneve të arsimit të lartë.

Ky aktivitet përkrahet nga programi i Fondacionit Kosovar për Shoqëri Civile (KCSF) ‘EJA Kosovë’, bashkëfinancuar nga Agjencia Zvicerane për Zhvillim dhe Bashkëpunim (SDC) dhe Suedia.

27/04/2026

KUVENDI TË MOS VOTOJË NJË PROCES TË KOMPROMETUAR – TË RUHET PAVARËSIA E AGJENCISË SË AKREDITIMIT

Më 7 prill 2026, Ministria e Arsimit shpalli thirrjen publike për nominimin e tre anëtarëve vendorë në Këshillin Shtetëror të Cilësisë, me afat aplikimi prej 8 ditësh. Për këtë thirrje aplikuan gjithsej 10 kandidatë. Më 20 prill, komisioni vlerësues u mblodh për shqyrtimin e aplikimeve dhe brenda rreth 48 orëve përfundoi vlerësimin e të gjithë kandidatëve, duke hartuar listën e rekomandimeve, të cilën ia dorëzoi Ministrit Hajrullah Çeku. Në fushën e Mjekësisë u rekomandua Driton Vela.

Raporti i komisionit është proceduar në Qeveri në mënyrë urgjente, pa qartësi nëse është nënshkruar nga të gjithë anëtarët, ndërsa kandidatët e refuzuar nuk kanë marrë njoftime zyrtare dhe nuk është respektuar afati ligjor për ankimim. Kjo mënyrë e procedimit ngre dyshime serioze për integritetin e gjithë procesit.

Një nga arsyet kryesore të përdorura për të justifikuar këtë procedurë është pretendimi për mungesë kuorumi në Këshillin Shtetëror të Cilësisë. Megjithatë, përbërja aktuale e këtij organi garanton funksionimin e tij edhe për një periudhë të konsiderueshme kohore. Rrjedhimisht, nuk ekziston asnjë bazë faktike apo ligjore për të krijuar urgjencë për ndërhyrje në përbërjen e tij.

Në këtë proces është rikthyer edhe emri i Driton Velës, ish kandidat për deputet nga radhët e Lëvizjes Vetëvendosje në zgjedhjet parlamentare të vitit 2019. Driton Vela në vitin 2023 ishte diskualifikuar nga një proces i ngjashëm për shkak të deklarimeve të pasakta në aplikim, konkretisht për pretendimin se kishte rol akademik si bartës i programi në Universitetin e Prishtinës dhe për paraqitje të pasakta të përvojës së tij akademike.

Në tetor të vitit 2025, ai u përfshi në një incident publik me sjellje joakademike gjatë një mbledhjeje të Këshillit të Fakultetit të Mjekësisë, ndërsa në shkurt të vitit 2026 i është shqiptuar vërejtje me shkrim nga Universiteti i Prishtinës për cenim të imazhit institucional. Pavarësisht këtij historiku, ai është rekomanduar sërish për një pozitë vendimmarrëse në këtë institucion.

Katërmbëdhjetë organizata të shoqërisë civile dhe rrjeti ROSCAP kanë kërkuar ndalimin e procesit dhe refuzimin e listës, duke paralajmëruar për pasoja në kredibilitetin e Agjencisë dhe në pozicionin e saj në mekanizmat ndërkombëtarë të sigurimit të cilësisë.

Ky rast tregon qartë se si një proces që duhet të bazohet në meritë dhe transparencë mund të shndërrohet në një procedurë të përshpejtuar, ku standardet relativizohen dhe kriteret anashkalohen. Nëse kjo logjikë pranohet, atëherë përzgjedhja e anëtarëve të një institucioni të pavarur pushon së qeni proces profesional dhe shndërrohet në vendimmarrje të orientuar nga interesa të tjera.

Për këtë arsye, ORCA kërkon që ky proces të anulohet dhe të iniciohet një procedurë e re, transparente dhe e bazuar në meritë. Çdo vendim që cenon pavarësinë dhe kredibilitetin e Agjencisë së Kosovës për Akreditim rrezikon drejtpërdrejt edhe pozitën ndërkombëtare të sistemit të arsimit të lartë në vend, përfshirë anëtarësimin në mekanizma si EQAR dhe ENQA.

Prandaj, iu bëjmë thirrje deputetëve të Kuvendit të Republikës së Kosovës që, në ushtrimin e mandatit të tyre për të mbrojtur interesin e qytetarëve dhe interesin shtetëror, që përfshin edhe ruajtjen e pavarësisë dhe integritetit të institucioneve të pavarura, të mos i votojnë këta emra në seancën e sotme. Ky proces nuk i plotëson standardet minimale të transparencës, meritës dhe ligjshmërisë dhe si i tillë duhet të refuzohet, duke hapur rrugë për një procedurë të re, të drejtë dhe të besueshme. Në të kundërtën, ata do të bëhen bashkëpjesëmarrës në cenimin e pavarësisë dhe kredibilitetit të Agjencisë së Kosovës për Akreditim.

24/04/2026

KUVENDI TË MOS VOTOJË ANËTARËT E RINJ TË BORDIT TË AGJENCISË SË KOSOVËS PËR AKREDITIM

Rrjeti ROSCAP i bën thirrje Kuvendit të Republikës së Kosovës që të mos votojë listën e propozuar për anëtarët e Bordit të Agjencisë së Kosovës për Akreditim, pasi procesi që ka prodhuar këta emra është i komprometuar në tërësi. Pas kalimit të kësaj liste në Ministri, Qeveri dhe Komision Parlamentar, përgjegjësia përfundimtare tashmë bie mbi Kuvendin si instanca e fundit që mund të ndalë një vendimmarrje që rrezikon drejtpërdrejt pavarësinë e një institucioni kyç për arsimin e lartë në vend.

Në këtë proces është rikthyer edhe emri i Driton Velës, ish kandidat për deputet nga radhët e Lëvizjes Vetëvendosje në zgjedhjet e vitit 2019, i cili në një proces të mëhershëm ishte diskualifikuar për shkak të deklarimeve të pasakta në aplikim.

Situata bëhet edhe më shqetësuese, duke marrë parasysh se i gjithë procesi është zhvilluar nën presion kohor, ndërkohë që sipas informacioneve të disponueshme, një version i raportit të komisionit është proceduar në Qeveri gjatë natës së 21 prillit, pa u respektuar standardet e transparencës dhe procedurat e rregullta. Kandidatët e refuzuar nuk kanë marrë njoftime zyrtare dhe nuk është respektuar afati ligjor për ankimim.

E gjithë kjo është justifikuar me pretendimin se Bordi i Agjencisë rrezikon të mbetet pa kuorum, ndonëse përbërja aktuale garanton funksionimin e tij edhe për të paktën dy vite të tjera. Ky arsyetim nuk qëndron dhe nuk mund të përdoret për të justifikuar një proces të përshpejtuar dhe të dyshimtë.

ROSCAP paralajmëron se votimi i kësaj liste nga Kuvendi do të përbënte ndërhyrje të rëndë në pavarësinë e Agjencisë së Akreditimit dhe do të rrezikonte drejtpërdrejt pozitën e saj në mekanizmat ndërkombëtarë të sigurimit të cilësisë, përfshirë ENQA dhe EQAR. Përvoja e viteve të kaluara ka treguar se ndërhyrjet politike në këtë institucion kanë pasoja të menjëhershme për kredibilitetin ndërkombëtar të arsimit të lartë në Kosovë.

Prandaj, ROSCAP i bën thirrje deputetëve të Kuvendit të Kosovës që të refuzojnë këtë listë dhe të kërkojnë anulimin e këtij procesi, duke hapur rrugë për një procedurë të re, transparente dhe të bazuar në meritë. Mbrojtja e pavarësisë së institucioneve të arsimit të lartë dhe ruajtja e standardeve akademike mbetet përgjegjësi e përbashkët dhe detyrim ndaj publikut.

22/04/2026

TË ANULOHET PROCESI I PËRZGJEDHJES SË ANËTARËVE TË BORDIT TË AGJENCISË SË AKREDITIMIT - NJË PROCES I KOMPROMETUAR NË TËRËSI

ORCA është e shokuar me zhvillimet e fundit në procesin e përzgjedhjes së anëtarëve të Bordit të Agjencisë së Kosovës për Akreditim. Sipas informacioneve të reja të grumbulluara, i gjithë procesi rezulton të jetë i komprometuar nga fillimi deri në fund, duke ngritur dyshime serioze për integritetin e vendimmarrjes në një institucion kyç për arsimin e lartë në vend.

Procesi nisi me shpalljen e thirrjes publike për nominim të tre anëtarëve vendorë në Këshillin Shtetëror të Cilësisë, për fushat: Shkencat Mjekësore, Shkencat Humane dhe një përfaqësues nga radhët e studentëve . Afati për aplikim ishte vetëm tetë ditë kalendarike, një periudhë e shkurtër për një proces të tillë me rëndësi të lartë publike. Megjithatë, ajo që pasoi ishte edhe më shqetësuese. Komisioni vlerësues u mblodh më 20 prill 2026 dhe brenda 48 orëve përfundoi vlerësimin e të gjithë kandidatëve që kishin aplikuar, një ritëm i paprecedentë që ngre dyshime serioze mbi seriozitetin dhe thellësinë e këtij vlerësimi.

Vlerësimet janë bërë pa një metodologji të qartë dhe të standardizuar, duke reflektuar mospërputhje të mëdha në trajtimin e kandidatëve. Në disa raste, kandidatët janë penalizuar për faktin se kanë fituar tituj akademik në institucione private, ndërkohë që kandidatë të tjerë, pa tituj akademikë fare, janë vlerësuar më lart. Po ashtu, një kandidat pothuajse është diskualifikuar për një lëshim të vogël teknik, i cili fare lehtë mund të ishte korrigjuar brenda një kohe shumë të shkurtër nëse do të kërkohej nga komisioni. Kjo qasje selektive dhe e pabarabartë tashmë po shihet si një manovër e qëllimshme për të hapur rrugë për kandidatura të caktuara, përfshirë atë të Driton Velës.

Situata bëhet edhe më e dyshimtë kur merret parasysh mënyra e trajtimit të raportit final të komisionit, raport i cili i dërgohet ministrit të linjës me emrat e të rekomanduarve për përzgjedhje në bord. Nuk është e qartë nëse raporti është nënshkruar nga vetë anëtarët e komisionit, apo nëse ata kanë nënshkruar vetëm një dokument përcjellës. Për më tepër, përfaqësues të ministrisë dyshohet se kanë marrë përsipër hartimin e raportit dhe dërgimin e tij në Qeveri në mënyrë urgjente, gjatë natës së 21 prillit 2026, rreth orës 23:00, për të përshpejtuar procedimin e tij në komisionet parlamentare dhe më pas në Kuvend.

E gjithë kjo urgjencë është justifikuar me pretendimin e pavërtetë se Bordi i Agjencisë rrezikon të mbetet pa kuorum për vendimmarrje në muajt në vijim. Në fakt, përbërja aktuale e Bordit garanton funksionimin normal të tij edhe për të paktën dy vite të tjera, duke e bërë këtë arsyetim të pabazuar dhe të qëllimshëm për të shtyrë përpara një proces të dyshimtë.

Tutje, kjo situatë rrezikon drejtpërdrejt anëtarësimin e Agjencisë së Kosovës për Akreditim në ENQA dhe pozitën e saj në EQAR. Ndërhyrjet politike, mungesa e transparencës dhe shkeljet procedurale janë pikërisht arsyet që në të kaluarën kanë çuar në përjashtimin e agjencisë nga këto mekanizma ndërkombëtarë të sigurimit të cilësisë. Nëse ky proces vazhdon në këtë formë, ekziston rreziku real që të vihet në pikëpyetje kredibiliteti ndërkombëtar i AKA-së dhe, rrjedhimisht, njohja e diplomave dhe cilësia e arsimit të lartë në Kosovë.

ORCA kërkon që ky proces i komprometuar të anulohet menjëherë dhe të nisë një procedurë e re, e bazuar në transparencë, meritë dhe respektim të plotë të standardeve ligjore. Në të njëjtën kohë, ORCA fton organet e rendit që të hetojnë këtë çështje deri në fund, për të garantuar llogaridhënie apo edhe përgjegjësi penale eventuale, e gjithë kjo për të parandaluar dëmtimin e mëtejshëm të një institucioni jetik për cilësinë e arsimit të lartë në Kosovë.

ORCA përkrahet nga programi i Fondacionit Kosovar për Shoqëri Civile (KCSF) ‘EJA Kosovë’, bashkëfinancuar nga Agjencia Zvicerane për Zhvillim dhe Bashkëpunim (SDC) dhe Suedia.