25/08/2026
KOPF në mbështetje të thirrjes së Action for Mothers and Children (AMC).
Kosova Population Foundation –KOPF i bashkohet shqetësimit të shprehur nga Action for Mothers and Children (AMC) pas humbjes tragjike të jetës së dy grave shtatzëna në Kosovë brenda një periudhe shumë të shkurtër.
Shprehim ngushëllimet tona më të sinqerta për familjet dhe të afërmit e grave që humbën jetën.
Pa paragjykuar rrethanat e rasteve dhe proceset institucionale e hetimore në zhvillim, këto ngjarje na rikujtojnë se shëndeti, siguria dhe dinjiteti i grave gjatë shtatzënisë duhet të jenë prioritet i pakompromis.
Çdo grua ka të drejtë në kujdes shëndetësor cilësor, profesional dhe në kohë, në mbrojtje nga çdo formë e dhunës dhe në një sistem që garanton siguri gjatë shtatzënisë, lindjes dhe amësisë.
Si organizatë që prej vitesh angazhohet në fushën e shëndetit riprodhues dhe të drejtave, KOPF mbështet thirrjen për vëmendje të shtuar institucionale, transparencë dhe forcim të mekanizmave që mbrojnë shëndetin dhe jetën e grave.
Asnjë grua nuk duhet të ndihet e pambrojtur gjatë shtatzënisë. Mbrojtja e shëndetit dhe jetës së nënës është përgjegjësi e përbashkët institucionale dhe shoqërore.
🤝 KOPF solidarizohet me AMC dhe me të gjitha organizatat dhe profesionistët që punojnë për shëndetin, sigurinë dhe të drejtat e grave në Kosovë.
Action for Mothers and Children (AMC) shpreh shqetësim të thellë pas humbjes së jetës së dy grave shtatzëna në Kosovë brenda një periudhe shumë të shkurtër kohore.
Bëhet fjalë për dy raste me rrethana të ndryshme, të cilat kërkojnë trajtim dhe vlerësim të veçantë nga institucionet kompetente. Duke respektuar proceset institucionale dhe hetimore në zhvillim, AMC nuk paragjykon përfundimet e hetimeve apo rrethanat përfundimtare të asnjërit rast.
Megjithatë, humbja e jetës së dy grave gjatë shtatzënisë brenda pak ditësh është thellësisht shqetësuese dhe kërkon vëmendjen e të gjithë shoqërisë dhe institucioneve.
Shtatzënia duhet të jetë një periudhë në të cilën çdo grua ndihet e sigurt, e mbrojtur dhe e mbështetur. Mbrojtja e jetës dhe shëndetit të grave gjatë shtatzënisë kërkon jo vetëm kujdes shëndetësor cilësor dhe në kohë, por edhe një mjedis të sigurt, të lirë nga çdo formë e dhunës.
AMC u shpreh ngushëllimet më të sinqerta familjeve dhe të afërmve të grave që humbën jetën.
Si organizatë e përkushtuar për shëndetin dhe mirëqenien e nënave dhe fëmijëve, do të vazhdojmë të angazhohemi që çdo grua në Kosovë të ketë qasje në kujdes, mbrojtje dhe mbështetje gjatë shtatzënisë dhe amësisë.
