Shkolla "Akademia ORA"

Udhëtim nëpër Sistemin Diellor! 🌎🪐☀️

Gjatë orëve mësimore, nxënësit e klasave të dyta kanë mësuan për Sistemin Diellor dhe planetët që e përbëjnë atë. Për të thelluar njohuritë e tyre, ata realizuan punime kreative dhe përgatitën prezantime interesante.

Me shumë entuziazëm dhe vetëbesim, nxënësit prezantuan punimet e tyre para mësueses, shokëve dhe shoqeve të klasës, duke ndarë njohuritë e fituara dhe duke treguar aftësitë e tyre komunikuese.

Jemi krenarë për përkushtimin, kreativitetin dhe angazhimin e tyre!

Dje, e gjithë dita kaloi mes aktiviteteve rekreative në Parkun e Gërmisë. Të gjitha klasat u bënë pjesë e një programi të larmishëm, duke kaluar nëpër stacione të ndryshme me lojëra dhe sfida të përgatitura me shumë përkushtim nga teacher Kelly dhe arsimtarja Albesa.

Çdo aktivitet ishte një mundësi për të lëvizur, bashkëpunuar, menduar e argëtuar, duke e kthyer ditën në një përvojë të veçantë për secilin nxënës. Në fund, ajo që mbeti nuk ishin vetëm lojërat e zhvilluara, por edhe kujtimet e bukura të një dite të kaluar ndryshe, në natyrë dhe në shoqërinë e njëri-tjetrit.

Klasat e pesta mbyllën një kapitull të rëndësishëm të rrugëtimit të tyre shkollor!

Ata u përshëndetën me mësueset e tyre, të cilat i kanë udhëhequr, mbështetur dhe shoqëruar gjatë këtij rrugëtimi.

Klasa 5-b shfrytëzoi rastin t’u rikthehej kujtimeve të pesë viteve të përbashkëta me mësuesen Albona, e cila i ka shoqëruar që nga dita e parë e shkollës. Ndërkaq, klasa 5-a zgjodhi ta përmbyllte këtë vit me dedikime dhe fjalë mirënjohjeje për mësuesen Beyza.

Tashmë ata janë gati të hedhin hapin drejt një etape të re të shkollimit, me sfida, përvoja dhe suksese të reja. U urojmë rrugëtim të mbarë! 🌷

Dje, pak pica, pak akullore, pije të freskëta dhe shumë buzëqeshje te klasat e treta! 🍕🍦😊

Një befasi e vogël për nxënësit tanë të mrekullueshëm, si falënderim për gjithë punën dhe përkushtimin gjatë këtij viti shkollor. 💝

Një cirk plot ngjyra, buzëqeshje dhe duartrokitje u bë skena ku nxënësit e klasave të para festuan një nga arritjet e tyre më të bukura – përfundimin e Abetares.

Nën përkujdesjen e mësueses Lule dhe mësueses Merisa, fëmijët na treguan se pas çdo shkronje të mësuar fshihet shumë punë, përkushtim dhe rritje. Nga shkronjat e para, te rrokjet, fjalët e deri te leximi me vetëbesim, ata kanë kaluar një hap të madh në rrugëtimin e tyre shkollor.

Ashtu si cirku, edhe kjo festë ishte plot llojllojshmëri, energji, kreativitet dhe surpriza. Çdo fëmijë solli diçka të veçantë në skenë, duke na kujtuar se secili ka talentin, ritmin dhe mënyrën e vet për të shkëlqyer.

Urime vogëlushëve tanë për këtë sukses të rëndësishëm dhe falënderime mësueseve Lule dhe Merisa, të cilat i udhëhoqën me durim e përkushtim në hapat e tyre të parë drejt botës së dijes. Ky është vetëm fillimi i një rrugëtimi të gjatë e të bukur. 🌟📚🎪

Kanë përfunduar edhe finalet e Kuizit të Diturisë për klasat 6–8!

Përveç rëndësisë që ka për përmbledhjen e njohurive të fituara gjatë vitit shkollor, kjo garë nxjerr në pah përkushtimin, këmbënguljen, emocionet dhe dëshirën për të dhënë më të mirën deri në fund.

Mbi të gjitha, edhe në finale u dëshmua se fitorja ka më shumë vlerë kur shoqërohet me respekt për kundërshtarin dhe urime të sinqerta për më të suksesshmit.

Urime të gjithë finalistëve për angazhimin dhe sukseset e tyre! 👏📚🏆

Në vizitë i kishim parashkollorët e Kopshti i femijeve "Nje Dy Tre"

Ata u pritën nga nxënësit e klasave të treta, të cilët, bashkë me mësueset Beyza, Lina dhe Artesa, kishin përgatitur aktivitete që ata të zbaviteshin teksa njiheshin me jetën shkollore.

Gjithsesi, nuk i lëshuam pa një ëmbëlsirë dhe një dhuratë të vogël, ndonëse ëmbëlsira ishin ata vetë!

Kuizi i Diturisë për klasat 3, 4 dhe 5 është një nga garat më të veçanta të vitit!

Përveç rëndësisë që ka në përmbledhjen e njohurive dhe mësimeve më të rëndësishme të gjysmëvjetorit, ai në vete përmbledh edhe këmbënguljen, përkushtimin, emocionet dhe mosdorëzimin deri në fund.

E natyrisht, po aq i rëndësishëm është edhe urimi i fitores nga finalistët e tjerë, sepse edukimi nuk matet vetëm me fitore, por edhe me aftësinë për ta pranuar rezultatin dhe për ta uruar më të suksesshmin.🏆

U realizua me sukses gara mes finalistëve të klasave të dyta në lëndën e matematikës.🧮

Nxënësit treguan njohuri të shkëlqyera, përkushtim dhe shpirt garues, duke e bërë këtë aktivitet jo vetëm sfidues, por edhe shumë motivues. Të gjithë pjesëmarrësit u dalluan për angazhimin dhe gatishmërinë e tyre për të dhënë më të mirën.

Urime finalistëve për arritjet e tyre dhe përfaqësim të denjë të klasave!
Ky aktivitet dëshmoi edhe një herë se matematika mund të jetë argëtuese dhe frymëzuese kur shoqërohet me garë dhe bashkëpunim.🏆

Përcillet gjenerata me të cilën filloi klasa e parë në shkollën tonë!

Me shumë emocione, përqafime, kujtime dhe mesazhe të bukura, në praninë e prindërve, stafit dhe themeluesit të shkollës, u mbajt ceremonia e përfundimit të klasës së 9-të.

Pas nëntë vitesh rrugëtim të përbashkët, i përcjellim me krenari dhe mall nxënësit tanë, duke u uruar suksese në çdo hap të jetës dhe vetëm të mira në të ardhmen.