Universiteti i Prishtinës

„Scena Juvenis” — një mbrëmje kushtuar talenteve të reja të Universitetit të Prishtinës në ChopinPianoFEST Prishtina

Në kuadër të edicionit të 16-të të ChopinPianoFEST Prishtina u mbajt koncerti tradicional „Scena Juvenis”, një mbrëmje e veçantë artistike që solli para publikut studentë dhe alumni të Fakultetit të Arteve të Universitetit të Prishtinës.

Ky koncert dëshmoi rolin e rëndësishëm që Universiteti i Prishtinës ka në formimin e gjeneratave të reja të muzikantëve dhe artistëve, duke prezantuar talentet që përfaqësojnë të tashmen dhe të ardhmen e jetës muzikore në Kosovë. Nëpërmjet interpretimeve solistike dhe të muzikës së dhomës, pjesëmarrësit shpalosën nivelin e tyre artistik, profesionalizmin dhe përkushtimin ndaj artit muzikor.

„Scena Juvenis” është një nga aktivitetet më domethënëse të festivalit, pasi krijon një urë lidhëse ndërmjet arsimit të lartë artistik dhe jetës profesionale koncertale. Duke performuar në një festival ndërkombëtar përkrah artistëve të njohur nga vendi dhe bota, studentët dhe të diplomuarit e Fakultetit të Arteve fitojnë një hapësirë të çmuar për promovimin e punës së tyre artistike dhe për komunikim të drejtpërdrejtë me publikun.

Ky bashkëpunim ndërmjet ChopinPianoFEST Prishtina dhe Universitetit të Prishtinës pasqyron një vizion të përbashkët për mbështetjen e artistëve të rinj dhe për fuqizimin e rolit të institucioneve të arsimit të lartë në zhvillimin kulturor të vendit. Shumë nga emrat që sot kontribuojnë në skenën muzikore dhe kulturore të Kosovës kanë nisur rrugëtimin e tyre pikërisht në auditorët dhe sallat e Fakultetit të Arteve, duke dëshmuar rëndësinë e investimit në edukimin artistik.

Pritja e ngrohtë dhe duartrokitjet e publikut dëshmuan vlerësimin për përkushtimin dhe talentin e interpretuesve të rinj. Me anë të aktiviteteve si „Scena Juvenis”, ChopinPianoFEST Prishtina vazhdon të promovojë ekselencën artistike, të mbështesë gjeneratat e reja të muzikantëve dhe të forcojë lidhjen ndërmjet arsimit, kulturës dhe shoqërisë.

https://uni-pr.edu/page.aspx?id=1,37,3915

Ndahen 100 mijë euro për veprimtarinë botuese të UP-së dhe miratohet logoja e këtyre botimeve

Në mbledhjen e Këshillit Botues të Universitetit të Prishtinës u miratua logoja e Botimeve të UP-së, e dizajnuar nga prof. Zeni Ballazhi dhe u dha lajmi i mirë që Këshilli Drejtues ka ndarë 100 mijë euro për veprimtarinë botuese, në varësi nga nevojat e njësive akademike.

Gjatë mbledhjes, u bë e ditur se më 4 qershor 2026 është marrë vendimi për themelimin e Zyrës së Botimeve të Universitetit të Prishtinës (BUP). Botimet që do të dalin nga kjo zyrë, do të organizohen, ruhen e publikohen në një platformë elektronike me qasje të hapur, e ngritur dhe konfiguruar nga z. Hajrullah Hajrullahu, drejtor i Departamentit të Teknologjisë së Informacionit. Para anëtarëve të Këshillit Botues u prezantua sot edhe versioni fillestar i kësaj platforme.

Kryetari i Këshillit Botues, prorektori për mësimdhënie, çështje të personelit akademik dhe botime, prof. Adem Beha, tha se platforma e botimeve të Universitetit të Prishtinës dhe vetë këto botime do ta kenë jetën e vet dhe do të zhvillohen shumë shpejt.

Më pas, anëtarët e Këshillit Botues diskutuan edhe për Strategjinë e Botimeve të UP-së 2026 -2030, me të cilën është paraparë veprimtaria botuese e UP-së brenda katër vjetësh. U propozua që botimet e UP-së të fokusohen aktualisht te tekstet mësimore, monografitë dhe doracakët për studentë, për t’u zgjeruar pastaj edhe me forma tjera të publikimeve akademike.

Strategjia ishte bazuar në një hulumtim të profesorit Canolli, anëtar i Këshilli Botues, të kryer me lejen dhe për nevojat e Këshillit Botues, në të cilin ishin përfshirë sugjerimet e 133 profesorëve dhe 366 studentëve në lidhje me botimet dhe format e botimit që i duhen Universitetit të Prishtinës. Përfundimi kryesor i këtij hulumtimi ishte kërkesa e të anketuarve për një bibliotekë digjitale universitare me qasje të hapur.

Së shpejti do të hapet edhe thirrja për botime për stafin e UP-së.

Anëtarët e Këshillit Botues u pajtuan që në mbledhjen e radhës të diskutojnë mes tjerash edhe për standardizimin e procesit të aplikimit për botime nga personeli akademik i UP-së.

https://uni-pr.edu/page.aspx?id=1,38,3913

UP-ja nënshkruan memorandum mirëkuptimi me Ministrinë e Industrisë, Ndërmarrësisë, Tregtisë dhe Inovacionit

Universiteti i Prishtinës nënshkroi një memorandum mirëkuptimi me Ministrinë e Industrisë, Ndërmarrësisë, Tregtisë dhe Inovacionit (MINTI) për bashkëpunim ndërinstitucional dhe krijim të një ekosistemi të inovacionit.

UP-ja dhe ministria, sipas memorandumit, do të angazhohen për zhvillimin e programeve të përbashkëta në fushat e inovacionit, transformimit digjital dhe transferit të teknologjisë mes akademisë dhe industrisë.

Universiteti i Prishtinës me ekspertizën profesionale të personelit akademik dhe punën praktike të studentëve, do t’i ndihmojë ministrisë për projektet zhvillimore. Të dy palët do të përkrahin bizneset në fillimet e tyre, ndërmarrjet e vogla dhe nismat me potencial kreativ.

Memorandumi u nënshkrua nga rektori i Universitetit të Prishtinës, prof. Arben Hajrullahu dhe ministrja në detyrë e Industrisë, Ndërmarrësisë, Tregtisë dhe Inovacionit, znj. Mimoza Kusari-Lila.

Rektori Hajrullahu u zotua që dija e krijuar në Universitetin e Prishtinës do të jetë në shërbim të projekteve të institucioneve lokale dhe qendrore të vendit.

Ministrja Kusari-Lila tha se institucionit që drejton i duhet sa më parë fillimi i bashkëpunimit aktiv me Universitetin e Prishtinës dhe disa njësi të tij akademike në mënyrë që projektet publike të kenë më shumë cilësi.

Universiteti i Prishtinës gjatë këtij viti ka nënshkruar marrëveshje me Ministrinë e Drejtësisë, Ministrinë e Mjedisit dhe Planifikimit Hapësinor dhe Agjencinë Kadastrale të Kosovës për të qenë në shërbim të së mirës publike.

https://uni-pr.edu/page.aspx?id=1,37,3912

UP-ja nënshkruan memorandum mirëkuptimi me CIHEAM Montpellier dhe CIHEAM Zaragosa

Në kuadër të përpjekjeve për zgjerimin e bashkëpunimit ndërkombëtar, Universiteti i Prishtinës ka nënshkruar dy memorandume mirëkuptimi me CIHEAM Montpellier dhe CIHEAM Zaragosa, institute të Qendrës Ndërkombëtare për Avancimin e Studimeve Agronomike Mesdhetare (CIHEAM).

Këto memorandume synojnë forcimin e bashkëpunimit në fushën e trajnimeve, hulumtimeve shkencore, aktiviteteve të përbashkëta ndërkombëtare, si dhe zhvillimin e nismave dhe projekteve të veçanta me interes të përbashkët.

Në kuadër të bashkëpunimit me CIHEAM Zaragoza dhe CIHEAM Montpellier, Universiteti i Prishtinës do të angazhohet në identifikimin e programeve dhe mundësive të financimit për projekte kërkimore brenda kornizave evropiane të bashkëpunimit. Po ashtu, palët do të bashkëpunojnë në ngritjen e kapaciteteve në fushat e bujqësisë, sigurisë ushqimore, zhvillimit rural dhe adaptimit ndaj ndryshimeve klimatike.

Memorandumet u nënshkruan nga rektori i Universitetit të Prishtinës, prof. Arben Hajrullahu, drejtori i CIHEAM Zaragosa, z. Raúl Compés López dhe drejtori i CIHEAM, Montpellier z.Thierry Dupeuble.

Gjatë takimit, rektori Hajrullahu u prezantoi mysafirëve historinë, strukturën organizative dhe zhvillimet aktuale në Universitetin e Prishtinës. Ndërkaq, drejtorët López dhe Dupeuble ndanë informacione mbi aktivitetet dhe prioritetet e CIHEAM Zaragoza dhe CIHEAM Montpellier. Rektori Hajrullahu theksoi se qëllimi i këtyre marrëveshjeve është ndërlidhja e njerëzve dhe institucioneve me interesa të përbashkëta akademike e hulumtuese.

Në ceremoninë solemne morën pjesë edhe prorektorja për ndërkombëtarizim dhe shkëmbime akademike, prof. Rozafa Basha, profesoresha në Fakultetin e Bujqësisë dhe Veterinarisë, prof. Blerta Mehmedi-Kastrati dhe profesori i Fakultetit të Inxhinierisë së Ndërtimit, prof. Përparim Ameti.

CIHEAM-i është organizatë ndërqeveritare mesdhetare, në të cilën bëjnë pjesë 13 shtete anëtare nga rajoni i Mesdheut. Organizata vepron nëpërmjet katër instituteve të vendosura në Itali, Greqi, Francë dhe Spanjë, ndërsa selinë e ka në Paris.

Rritja e pranisë dhe bashkëpunimit ndërkombëtar mbetet një nga prioritetet kryesore të Universitetit të Prishtinës, krahas angazhimit të vazhdueshëm për të mirën e përgjithshme publike.

https://uni-pr.edu/page.aspx?id=1,37,3911

UP-ja dhe kompania „Cacttus” lidhin marrëveshje për transformim digjital dhe inovacion

Universiteti i Prishtinës dhe kompania „Cacttus” nënshkruan sot një memorandum mirëkuptimi që lidhet me ndërveprimin strategjik për zhvillim akademik, transformim digjital dhe inovacion.

Me memorandum është paraparë bashkëpunimi i ndërsjellë në fushat e digjitalizimit, qëndrueshmërisë digjitale, teknologjive inteligjente dhe të avancuara gjithnjë në zhvillim, inteligjencës artificiale dhe sistemeve të bazuara në të dhëna, sigurisë kibernetike, inovacionit, kërkimit shkencor dhe ndërmarrësisë.

Bashkëpunimi do të jetë multidisiplinar dhe në të do të përfshihen disa nga njësitë akademike të UP-së, ndërsa qëllimi kryesor është forcimi i kompetencave digjitale dhe kapaciteteve inovative të mësimdhënies e kërkimit shkencor. Memorandumi u nënshkrua nga rektori i Universitetit të Prishtinës, prof. Arben Hajrullahu dhe kryesuesi i Bordit të „Cacttus”-it, z. Armend Malazogu.

Rektori Hajrullahu uroi që mes palëve të rritet partneriteti e të bashkohen forcat për të ofruar shërbime ndaj institucioneve lokale e qendrore, duke aplikuar me projekte edhe në fondet zhvillimore të BE-së, ndërsa z. Malazogu paralajmëroi që bashkëpunimi do të jetë intensiv, i frytshëm dhe i kohës në të cilën jetojmë.

U përmend mundësia e bashkëpunimit të kompanisë „Cacttus” me Qendrën për Inteligjencë Artificiale në Universitetin e Prishtinës (AIUP) që u themelua në mars të vitit 2025 dhe përdorimi i teknologjive inteligjente me ekspertë të Fakultetit të Bujqësisë dhe Veterinarisë për identifikimin e dëmtuesve të kulturave bujqësore në Kosovë.

Profesorët dhe ekspertët nga ky fakultet janë të përfshirë edhe në një projekt me KFOR-in amerikan për identifikimin e rriqrave dhe parazitëve të rrezikshëm në zonën e bazës ushtarake „Bondsteel”. Po sot UP-ja nënshkroi memorandume bashkëpunimi edhe me CIHEAM Zaragosa dhe CIHEAM Montpellier për ngritje të kapaciteteve në fushat e bujqësisë, sigurisë ushqimore, zhvillimit rural dhe adaptimit ndaj ndryshimeve klimatike.

https://uni-pr.edu/page.aspx?id=1,37,3910

Universiteti i Prishtinës shpall konkurse për pozita drejtuese dhe profesionale në financa dhe prokurim

Universiteti i Prishtinës njofton se ka shpallur konkurse për plotësimin e disa pozitave të rëndësishme në administratën qendrore dhe njësitë akademike.

Këto pozita kanë rëndësi të veçantë për forcimin e menaxhimit financiar, buxhetor dhe të prokurimit në Universitet, si dhe për përmirësimin e shërbimeve administrative në mbështetje të punës akademike dhe institucionale.

Pozitat e shpallura janë:

Drejtor i Departamentit për Buxhet dhe Financa – një (1) pozitë;
Zyrtar i lartë për financa dhe kontabilitet – tri (3) pozita;
Drejtor i Departamentit të Prokurimit – një (1) pozitë;
Zyrtar i Prokurimit – një (1) pozitë.
Afati për aplikim është i hapur nga data 04.06.2026 deri më 03.07.2026, në orën 16:00.

Kandidatët e interesuar ftohen të aplikojnë duke dorëzuar dokumentacionin e kompletuar fizikisht në Zyrën për Arkiv dhe Protokoll, nr. 18, kati përdhesë, në objektin e Rektoratit të Universitetit të Prishtinës, nga ora 08:00 deri në 16:00.

Formulari i aplikimit (Kërkesa për punësim) mund të shkarkohet nga uebfaqja zyrtare: https://dokumente.uni-pr.edu/tjera ose të merret në Zyrën për Arkiv dhe Protokoll.

Universiteti i Prishtinës është një punëdhënës i drejtë dhe i përgjegjshëm që garanton përzgjedhje të kandidatëve më meritorë, në bazë të transparencës, meritokracisë dhe duke zbatuar legjislacionin në fuqi në të gjitha fazat e konkursit publik.

https://uni-pr.edu/page.aspx?id=1,39,3908

Takim mëngjesi në rektorat me pjesëmarrësit ndërkombëtarë të Konferencës për Zbatimin e Algjebrës Kompjuterike

Pjesëmarrësit e edicionit të 31-të të Konferencës Ndërkombëtare për Zbatimin e Algjebrës Kompjuterike nga vende të ndryshme të botës vizituan sot Rektoratin e Universitetit të Prishtinës.

Konferenca që lidh përdorimin praktik të matematikës në algoritmet dhe aplikacionet kompjuterike, organizohet sivjet nga Departamenti i Matematikës i Fakultetit të Shkencave Matematike Natyrore në Universitetin e Prishtinës dhe tradicionalisht bën bashkë profesionistë e profesorë të aplikimeve të algjebrës kompjuterike.

Të shoqëruar nga dekani i FShMN-së, prof. Kajtaz Bllaca dhe prof. Qëndrim Gashi, mysafirët nga 12 shtete të botës u pritën nga rektori i Universitetit të Prishtinës, prof. Arben Hajrullahu.

Para të pranishmëve, me të cilët e piu kafenë e mëngjesit në oborrin e rektoratit, rektori Hajrullahu tregoi historinë e Universitetit të Prishtinës që nga themelimi në fund të viteve ’60 e deri në ditët e sotme. Tha se mëton rritjen e bashkëpunimit të brendshëm mes njësive akademike të UP-së, rritjen e bashkëpunimit ndërkombëtar dhe digjitalizimin e të gjitha proceseve. Synimi është ardhja e botës në UP dhe dërgimi i UP-së në botë, theksoi rektori Hajrullahu.

Ai foli me profesorët ndërkombëtarë edhe për historinë e Kosovës dhe Ballkanit si një hapësirë gjeografike mes perandorive dhe interesave të ndryshëm.

Në emër të pjesëmarrësve të Konferencës Ndërkombëtare për Zbatimin e Algjebrës Kompjuterike për mikpritjen në rektorat dhe praninë në Kosovë, falënderoi, profesori i Shkollës së Shkencave Kompjuterike „David R. Cheriton” në Universitetin e Vaterlosë së Kanadasë, prof. Stephen Watt.

Gjatë konferencës që do të zhvillohet nga 1 deri më 5 qershor 2026 në Universitetin e Prishtinës, në sesione të ndryshme do të diskutohet, mes tjerash, për zbatimin e algjebrës kompjuterike në mësimdhënie dhe shkencat e natyrës, për teoritë e kodimit, algoritmeve dhe grupeve kombinatorike dhe aplikacionet e tyre.

https://uni-pr.edu/page.aspx?id=1,37,3907

Studentët e Universitetit VIVES prezantojnë rezultatet e hulumtimit të tyre në Universitetin e Prishtinës

Prorektorja për ndërkombëtarizim dhe shkëmbim akademik, prof. asst. dr. Rozafa Basha, priti në takim gjashtë studentë ndërkombëtarë nga VIVES University of Applied Sciences, nga Belgjika, të cilët po realizojnë praktikën profesionale dhe hulumtimin për temën e diplomës në fushën e kujdesit dhe shërbimeve për personat e moshuar në Kosovë.

Ky aktivitet zhvillohet në kuadër të programit Erasmus+, në bashkëpunim me Departamentin e Punës Sociale të Universitetit të Prishtinës, nën mentorimin e prof. asoc. dr. Njomza Llullaku dhe dr. asst. Rita Selimi.

Gjatë takimit, studentët prezantuan para prorektores Basha një pjesë të punës së tyre kërkimore dhe gjetjet paraprake të projektit “Wellbeing and Safety of Elderly People: Practical Suggestions for High-Quality Care Services in Kosovo”, i cili synon të kontribuojë në kuptimin më të mirë për nevojat e personave të moshuar dhe të ofrojë rekomandime konkrete për avancimin e shërbimeve sociale dhe të kujdesit për të moshuarit në Kosovë.

Në kuadër të këtij projekti, studentët kanë realizuar vizita në Shtëpinë e të Moshuarve në Prishtinë dhe në qendra ditore për të moshuarit, ku janë njohur nga afër me praktikat profesionale, programet mbështetëse dhe përvojat e përfituesve të këtyre shërbimeve.

Me këtë rast, prorektorja Basha i përgëzoi studentët për cilësinë e punës së tyre, përkushtimin dhe rezultatet e arritura gjatë angazhimit të tyre në Kosovë. Ajo gjithashtu vlerësoi lart punën e prof. asoc. dr. Njomza Llullaku dhe dr. asst. Rita Selimi për mentorimin e studentëve ndërkombëtarë dhe për angazhimin e vazhdueshëm në bashkëpunimin me akademikë e institucione ndërkombëtare. Sipas saj, këto iniciativa përfaqësojnë një kontribut të rëndësishëm në procesin e ndërkombëtarizimit të Universitetit të Prishtinës dhe në forcimin e profilit të tij ndërkombëtar.

Universiteti i Prishtinës mbetet i përkushtuar ndaj promovimit të bashkëpunimit akademik ndërkombëtar, shkëmbimit të njohurive dhe praktikave më të mira, si dhe krijimit të mundësive për studentë dhe personel akademik që të kontribuojnë për zhvillimin e arsimit, kërkimit shkencor dhe shërbimit ndaj komunitetit.

https://uni-pr.edu/page.aspx?id=1,37,3906

Universiteti i Prishtinës vazhdon të hapë vende të reja pune për personel akademik

Universiteti i Prishtinës ka shpallur edhe një konkurs tjetër për personel akademik, profesorë e asistentë.

Kandidatët që aplikojnë për këto pozita duhet të plotësojnë kërkesën për aplikim, të kenë të përgatitur CV-në e plotë me të gjitha arritjet akademike, diplomat e të gjitha niveleve të studimit, dëshmitë për publikimet shkencore e profesionale dhe dëshmitë për përvojën dhe aftësinë në mësimdhënie, duke paraqitur një portfolio të punës profesionale dhe një deklaratë të filozofisë së mësimdhënies. Ata gjithashtu këtyre dokumenteve duhet t’ua bashkojnë edhe certifikatën e lindjes dhe dëshminë nga gjykata që nuk janë të dënuar.

Aplikimi duhet të bëhet fillimisht online në vegëzën zyrtare:
https://stafiakademik.uni-pr.edu/.

Më pas, dokumentet e njëjta, sikurse ato online, duhet dorëzuar edhe në formë fizike në njësinë akademike gjegjëse.

Konkursi është i hapur nga 2 deri më 16 qershor 2026, në orën 16:00. Konkursin e plotë me të gjitha detajet për pozitat e hapura, mund ta gjeni këtu.

Universiteti i Prishtinës fton profesionistët dhe shkencëtarët nga vendi, rajoni dhe e gjithë bota që të aplikojnë dhe të futen në garë për këto vende të lira për personel akademik, profesorë e asistentë.

Universiteti i Prishtinës është një punëdhënës i drejtë dhe i përgjegjshëm që garanton përzgjedhje të kandidatëve më meritorë, në bazë të transparencës, meritokracisë dhe duke zbatuar legjislacionin në fuqi në të gjitha fazat e konkursit publik. Në këtë frymë, duke garantuar ligjshmëri dhe meritokraci, Universiteti i Prishtinës mirëpret sa në shumë aplikantë.

https://uni-pr.edu/page.aspx?id=1,35,3905

UP-ja hap thirrjen publike për profesorë dhe asistentë të angazhuar

Universiteti i Prishtinës ka hapur thirrjen publike për angazhimin e profesorëve dhe asistentëve për vitin akademik 2026/'27, sipas nevojave të njësive akademike.

Kandidatët për mësimdhënës duhet të kenë gradën shkencore master, ndërsa përparësi do të kenë të interesuarit për këto pozita me studime të kryera të doktoratës. Aplikantët gjithashtu kërkohet të kenë një punim shkencor në revista ndërkombëtare. Kandidatët për asistentë duhet të kenë të përfunduara studimet master dhe notë mesatare jo më të vogël se tetë në të dy nivelet e studimit.

Aplikimi për pozitat e hapura të profesorëve dhe asistentëve të angazhuar bëhet në mënyrë elektronike në vegëzën https://stafiakademik.uni-pr.edu. Të interesuarit duhet të plotësojnë në këtë vegëz kërkesën për aplikim dhe të ngarkojnë CV-në, certifikatën e lindjes, kopjen e diplomës së noterizuar, certifikatën e notave të studimeve master (pozitat për asistentë), dëshmitë për punime shkencore e profesionale dhe dëshminë nga gjykata se nuk janë të dënuar. Konkursi është i hapur nga 1 deri më 10 qershor 2026.

Pozitat për profesorë dhe asistentë të angazhuar janë hapur në Fakultetin Filozofik, Fakultetin e Shkencave Matematike Natyrore, Fakultetin e Filologjisë, Fakultetin e Inxhinierisë së Ndërtimit, Fakultetin e Inxhinierisë Elektrike dhe Kompjuterike, Fakultetin e Inxhinierisë Mekanike, Fakultetin e Mjekësisë, Fakultetin e Arteve, Fakultetin e Edukimit Fizik dhe Sportit, Fakultetin e Bujqësisë dhe Veterinarisë dhe Fakultetin e Edukimit.

Universiteti i Prtishtinës është një punëdhënës i drejtë dhe i përgjegjshëm që garanton përzgjedhje të kandidatëve në të gjitha fazat e konkursit, në bazë të transparencës, meritokracisë dhe legjislacionit në fuqi.

Konkursin e plotë me të gjitha detajet e konkurrimit dhe dokumentet e nevojshme, mund ta gjeni në këtë vegëz: https://uni-pr.edu/page.aspx?id=1,39,3904