Ideja e hapjes së Qendrës “Don Bosko” në Prishtinë buron nga dëshira për të vazhduar aktivitetet e përkrahjes dhe ndihmës së dhënë të shpërngulurve kosovarë, pas përvojës së dhimbshme të pritjes së 1.200 refugjatëve kosovar në qendrën “Don Bosko” në Tiranë, në luftën e pranverës së vitit 1999 dhe intervenimit të NATO-s. Gjithashtu buron nga prirja e Salezianëve për rritjen e mundësive dhe ruajtjen e dinjitetit të pjesës më të varfër të rinisë, prirje që trashëgohet nga themeluesi i tyre shën Gjon Bosko si dhe nga pervoja e gjatë në mëse 130 shtete të botës më reth 2000 qendra edukativo-shkollore dhe sociale. Me përfundimin e luftës ne vitin 1999, salezianët së bashku me VIS-in vendosën të hyjnë në Kosovë dhe të vazhdojnë punën që tashmë kishin filluar në Tiranë dhe Shkodër. Projekti u pranua nga autoritetet vendore dhe UNMIK-u gjatë vitit 2000 dhe me 28 Nëntor 2001 u vu gurthememeli i QSE “Don Bosko” dhe u përurua në tetor të vitit 2003, si rezultat i një bashkëpunimi të gjatë e të frytshëm ndërmjet subjekteve të ndryshme lokale dhe ndërkombëtare dhe Kongregatës Saleziane. Kjo qendër ofron përkrahje edukative dhe kulturore për të rinjtë e Kosovës dhe tregon një kujdes të veçant si për formimin njerëzor ashtu edhe për aftësimin profesional të tyre në një realitet që karakterizohet nga një nivel i lartë i papunësisë dhe me një zhvillim të ngadalshëm ekonomik. Qendra është e hapur për të gjithë, pa dallim gjinie, feje dhe etnie apo kategorie sociale dhe ka këtë mision:
Të rinjtë dhe qytetarët e Kosovës pa dallim, të bëhen protagonist të një të ardhmeje më të mirë për veten dhe për vendin e tyre, përmes edukimit integral të lidhur me formimin human dhe teknik, të nevojshëm për krijimin dhe mbajtjen e një pune, për të mirën e përbashkët dhe që angazhohen të jenë në qendër të progresit social dhe ekonomik të vendit si dhe të përgatitur për të mësuar gjatë gjithë jetës. Realizimi i deritanishëm i qendrës është mundësuar, falë ndihmës së madhe të grupit të donatorëve ndërkombëtarë me ndihmën e VIS-it që është OJQ italiane e Kongregatës Saleziane:
Qeveria italiane, përmes Ministrisë së Punëve të Jashtme, Rajonet e Lombardisë dhe Toskanës
Qeveria Gjermane përmes Ministrisë për Bashkëpunim Ekonomik dhe Zhvillim, GTZ dhe OJQ-s Gjermane Jugend Dritte Welt
OJQ Austriake "Jugend Eine Welt"
Qeveria Spanjolle, përmes Rajonit Autonom të Valencias, nëpërmjet OJQ-së spanjolle Jovenes del Tercer Mundo
Qeveria e Luksemburgut në bashkëpunim me MPMS
CEI-Konferenca Ipeshkvnore Italiane
Kongregata Saleziane
Rotary Clubs Arnsberg (Holland ) dhe Drachten ( Gjermani)
Kontribut shumë të vlefshëm për realizimin e projetktit ka dhënë edhe Komuna e Prishtinës, që ka dhënë në shfrytëzim një teren prej 3 hektarësh për Fondacionin Qendra Social-Edukative “Don Bosko”. Përvoja e gjatë e salezianëve në mbarë botën nënvizon domosdoshmërinë e këtyre qendrave, në mënyrë që t’u sigurojë të rinjëve një hapësirë të përbashkët, ku ata mund të mësojnë dhe jetojn bashkarisht, e gjithashtu të krijojnë lidhje miqësie dhe dialogu të sinqert. I tërë projekti përfshinë Qendrën e Formimit Profesional, Liceun, Qendrën Rinore, bibliotekën dhe hapësirat për aktivitete sociale dhe kulturore. Gjithashtu posedon fusha sportive dhe ambiente të gjelbërta për aktivitete të ndryshme. Salezianët e Don Boskos janë banorë të përhershëm të Qendrës, përgjegjës për të gjitha aktivitetet dhe strukturat, si dhe do të sigurojnë qëndrueshmërinë e saj.
