Arte dhe Arkitekturë - AAB

Monografia kushtuar piktorit monumental Fatmir Haxhiu u prezantua në kuadër të PAAF 2026

Në kuadër të “Prishtina Arts and Architecture Festival – PAAF 2026”, Fakulteti i Arteve organizoi një ligjëratë tematike kushtuar jetës dhe veprës së piktorit Fatmir Haxhiu. I ftuar në këtë aktivitet ishte Artan Haxhiu, djali i artistit, i cili para studentëve dhe stafit akademik prezantoi një vështrim të gjerë mbi krijimtarinë dhe trashëgiminë artistike të të atit.

Gjatë ligjëratës, iu kushtua ciklit të pikturave monumentale të Fatmir Haxhiut kushtuar figurës së Gjergj Kastrioti Skenderbeut dhe epokës së tij. Artan Haxhiu shpjegoi procesin krijues dhe frymëzimin historik që qëndron pas këtyre veprave, si dhe në studime të tjera që trajtojnë luftërat dhe veprimtarinë e heroit kombëtar shqiptar.

Pjesëmarrësit patën mundësinë të njihen nga afër me disa prej krijimeve më përfaqësuese të artistit, ndër to “Beteja e Albulenës”, “Me shpatë në dorë” dhe “Bashkimi i principatave shqiptare” etj. Këto vepra konsiderohen ndër realizimet më të rëndësishme të pikturës historike dhe monumentale shqiptare, duke e renditur Fatmir Haxhiun ndër autorët më të spikatur të këtij zhanri në artin shqiptar.

Gjatë aktivitetit, Artan Haxhiu i dhuroi fakultetit në fjalë monografinë "Fatmir Haxhiu”, të hartuar nga studiuesja Suzana Varvarica Kuka.

Në këtë kuadër, studiuesi dhe profesori, Luan Tashi ka bashkëpunuar me të në realizimin e botimit të tretë “Portrete të Skënderbeut gjatë shekujve”, një vepër që trajton paraqitjet ikonografike të heroit kombëtar në periudha të ndryshme historike.

Ligjërata ngjalli interesim të pjesëmarrësit, duke ofruar një mundësi të vlefshme për njohjen më të thellë të krijimtarisë së njërit prej emrave më të rëndësishëm të pikturës historike dhe monumentale shqiptare.

Blerina Rexha, alumni e Dizajnit të Modës në AAB, e suksesshme në industrinë kreative

Të diplomuarit e Fakultetit të Dizajnit të Modës në Kolegjin AAB po integrohen me sukses në tregun e punës. Njëra prej tyre është Blerina Rexha, e cila ka përfunduar studimet bachelor në Dizajn Mode dhe master në Dizajn Grafik dhe Multimedia në Kolegjin AAB.

Sot, Blerina punon si piktore dhe ilustratore, duke realizuar dhe sh*tur veprat e saj artistike përmes platformave online dhe uebfaqes personale; https://blerinarexha.com

Ajo gjithashtu zhvillon kurse të ilustrimit digjital të modës dhe menaxhon një biznes kreativ të fokusuar në produkte të punuara me dorë, veshje, aksesorë etj..

Sipas saj, studimet në Kolegjin AAB kanë luajtur rol të rëndësishëm në zhvillimin profesional dhe kreativ.

U mbajt “Art Colony” në kuadër të PAAF 2026

Në kuadër të edicionit të shtatë të “Prishtina Arts and Architecture Festival – PAAF 2026”, Fakulteti i Arteve i Kolegjit AAB organizoi aktivitetin “Art Colony”, i cili mblodhi dhjetëra studentë, artistë dhe krijues nga Kosova dhe rajoni. Të vendosur pranë telajove të tyre në ambientet e fakultetit, pjesëmarrësit e shndërruan hapësirën në një studio të hapur krijimtarie, duke i dhënë asaj një pamje të veçantë përmes veprave të realizuara.

Kolonisë iu bashkuan edhe profesorë të Fakultetit të Arteve, si Enver Hoxha, si dhe alumni i fakultetit, Roni Shishka, dhe së bashku me artistë të tjerë realizuan kompozime abstrakte, interpretime figurative dhe vepra të frymëzuara nga tema bashkëkohore.

“Art Colony është një nga aktivitetet që mishëron më së miri frymën e bashkëpunimit, kreativitetit dhe shkëmbimit artistik që promovon PAAF. Jemi të lumtur që këtë vit bashkuam profesorë, alumni, studentë dhe artistë nga vende të ndryshme në një proces të përbashkët krijues”, tha Fitim Aliu, dekan i Fakultetit të Arteve.

Veprat e realizuara gjatë aktivitetit do t’i dhurohen Kolegjit AAB, duke pasuruar hapësirat e tij me krijime origjinale dhe duke lënë një gjurmë të qëndrueshme artistike.

Ky aktivitet dëshmoi edhe një herë përkushtimin e Fakultetit të Arteve dhe të PAAF 2026 për promovimin e artit, mbështetjen e talenteve të reja dhe forcimin e bashkëpunimit ndërmjet artistëve dhe institucioneve akademike.

Alumni i Dizajnit Grafik në AAB, Halil Xhafa; ligjërues dhe artist vizual

Halil Xhafa ka përfunduar studimet Bachelor dhe Master në Dizajn Grafik në Kolegjin AAB. Pas diplomimit, ai ka ndërtuar karrierën e tij si artist vizual, dizajner grafik dhe ligjërues.

Që nga viti 2022, Xhafa është ligjërues në Fakultetin e Arteve në Kolegjin AAB, në drejtimin Dizajn Grafik dhe në Fakultetin e Komunikimit Masiv, në drejtimin Produksion.

Krahas angazhimit akademik, ai është aktiv në fushën e artit dhe dizajnit, me pjesëmarrje në ekspozita dhe projekte të ndryshme vizuale. Puna e tij përfshin dizajn grafik, identitet vizual, fotografi, dizajn librash dhe komunikim vizual për media digjitale.

Sipas tij, studimet në Kolegjin AAB i kanë dhënë bazën për zhvillimin e tij krijues dhe angazhimin në mësimdhënie.

“Në art dhe dizajn, suksesi vjen nga puna e vazhdueshme, kërkimi, eksperimentimi dhe guximi për të krijuar diçka personale”, thekson Xhafa.

Laura Ukshini: Nga studente e Dizajnit të Modës në AAB në ligjëruese dhe themeluese biznesi

Fakulteti i Dizajnit të Modës në Kolegjin AAB ka qenë themeli i zhvillimit profesional të Laura Ukshinit, e cila sot përfaqëson një nga historitë e suksesit të këtij programi.

Si pjesë e gjeneratave të para të studentëve të Dizajnit të Modës në AAB, Laura thekson se njohuritë dhe përvoja e fituar gjatë studimeve kanë luajtur rol kyç në karrierën e saj, si në industrinë e modës ashtu edhe në fushën e arsimit.

Sot, ajo mban dy pozita të rëndësishme profesionale. Laura është ligjëruese në Fakultetin e Dizajnit të Modës në Kolegjin AAB, ku ligjëron lëndën “Pantone”, ndërsa njëkohësisht ka themeluar dhe menaxhon biznesin e saj privat, “LU Fashion”.

Përmes këtij biznesi, ajo ka krijuar edhe vende të reja pune, duke punësuar një numër të konsiderueshëm të punëtorëve.

Laura përcjell një mesazh për studentët e saj: “Në botën e modës, kreativiteti, puna e vazhdueshme dhe përkushtimi janë çelësi i suksesit.”

𝐑𝐫𝐮𝐠ë𝐭𝐢𝐦𝐢 𝐢 𝐋𝐢𝐫𝐢𝐝𝐨𝐧𝐚 𝐀𝐛𝐝𝐮𝐥𝐥𝐚𝐡𝐮𝐭 𝐧𝐠𝐚 𝐊𝐨𝐥𝐞𝐠𝐣𝐢 𝐀𝐀𝐁 𝐭𝐞𝐤 𝐬𝐮𝐤𝐬𝐞𝐬𝐞𝐭 𝐧ë 𝐧𝐢𝐯𝐞𝐥 𝐧𝐝ë𝐫𝐤𝐨𝐦𝐛ë𝐭𝐚𝐫 🌎📚

Rrugëtimi i Liridonës në Kolegjin AAB ishte një kombinim i përkushtimit akademik dhe përvojës praktike. Angazhimi i saj gjatë studimeve në role akademike si tutore dhe asistente e kanë ndihmuar të ndërtojë aftësi të forta profesionale, të cilat sot i aplikon me sukses edhe në nivel ndërkombëtar si Automation Engineer.

Storia e Liridonës dëshmon se përkushtimi gjatë studimeve mund të shndërrohet në sukses të dyfishtë profesional, duke inspiruar çdo student që të synojë më lart.

Profesorë ndërkombëtarë dhe vendorë mbajtën ligjërata dhe workshope në kuadër të PAAF 2026

Në kuadër të “Prishtina Arts and Architecture Festival – PAAF 2026”, Fakulteti i Arteve në Kolegjin AAB organizoi një seri ligjëratash të hapura dhe workshopesh me profesorë ndërkombëtarë dhe vendorë, të cilët për studentët dhe stafin akademik të Kolegjit AAB sollën tema bashkëkohore nga fusha e artit, dizajnit dhe arkitekturës.

Profesorët nga Spanja, Eduardo Cuerda Correa dhe Awf Al-Kassir, nga Universiteti i Extremadurës, mbajtën ligjërata të veçanta. Eduardo Cuerda Correa ligjëroi me temën “Cork Beyond the Bottle: Përdorime të Reja Arkitekturore për një Material Tradicional”, ku trajtoi përdorimin inovativ të tapës në arkitekturën moderne.

Ndërkaq, Awf Al-Kassir prezantoi temën “Aplikimet e Termografisë Infra të Kuqe në Ndërtesa dhe Struktura Arkitekturore për Inspektim dhe Performancë Energjetike”, duke diskutuar përdorimin e teknologjive të avancuara në analizimin dhe rritjen e efikasitetit energjetik të objekteve.

Po ashtu, dizenjatorja dhe ligjëruesja ndërkombëtare Bernadette Coughlan mbajti workshopin dhe ligjëratën me temën “Threads of Identity: Culture, Memory, and Meaning in Fashion”, ku trajtoi lidhjen ndërmjet modës, identitetit kulturor dhe kujtesës kolektive.

Ndërsa Visar Spanca, ligjërues në Kolegjin AAB, mbajti një workshop praktik me temën “The 3D Revolution in Fashion”, ku studentët u njohën me mundësitë që ofron softueri CLO 3D për dizajnimin, vizualizimin dhe simulimin virtual të veshjeve, duke eksploruar mënyrat se si teknologjia po transformon industrinë moderne të modës dhe procesin kreativ të dizajnit.

Ligjëratat dhe punëtoritë zgjuan interesim te të pranishmit, duke ofruar njohuri bashkëkohore nga ekspertë vendorë dhe ndërkombëtarë.

Vazhdon të jetë i hapur edicioni i shtatë i Prishtina Arts and Architecture Festival – PAAF 2026, një nga ngjarjet më të rëndësishme artistike dhe akademike

Me të hyrë në ambientet e Fakultetit të Arteve dhe Arkitekturës të Kolegjit AAB, vërehet menjëherë fryma kreative, artistike dhe shkencore që kultivohet çdo ditë në këtë institucion. Megjithatë, kjo atmosferë mori një dimension edhe më të gjallë gjatë Prishtina Arts and Architecture Festival – PAAF 2026, ku studentët prezantuan veprat dhe projektet e tyre artistike para publikut.

Po ua rikujtojmë se me rastin e hapjes zyrtare të Prishtina Arts and Architecture Festival – PAAF 2026, këto hapësira morën një dimension tjetër, duke u mbushur me qindra artdashës dhe vizitorë që lëviznin nga kati në kat për të parë krijimet dhe projektet e studentëve.

Nën tingujt e pianos, çdo qoshe ishte e mbushur me piktura, instalacione artistike dhe projekte arkitekturore, ndërsa studentët zhvillonin provat e fundit për performancat e tyre, duke i dhënë festivalit një atmosferë të gjallë dhe emocionale.

Në këtë atmosferë ishte i pranishëm edhe Kryeministri i Kosovës, Albin Kurti, i cili vizitoi nga afër ekspozitat dhe ambientet e festivalit, i shoqëruar nga rektori i Kolegjit AAB Blerim Olluri dhe dekani Fitim Aliu.

Kryeministri Kurti u shpreh i impresionuar nga puna dhe kreativiteti i studentëve. Ai bashkëbisedoi me disa prej tyre për procesin e realizimit të projekteve dhe i përgëzoi studentët dhe profesorët mentorues për nivelin artistik të prezantuar. Ndërkohë, dekani Fitim Aliu prezantoi procesin e realizimit të punimeve dhe disiplinat artistike të përfshira.

Në hapjen zyrtare të festivalit, rektori i Kolegjit AAB, Blerim Olluri, theksoi rëndësinë e këtij aktiviteti tradicional dhe mbështetjen e vazhdueshme të menaxhmentit për studentët dhe stafin akademik.

Profesori Hajrush Fazliu vlerësoi talentin e studentëve, duke theksuar se këto krijime përfaqësojnë Kosovën dhe rajonin më gjerë.

Studentët e Muzikologjisë sollën një program artistik me këndim koral, interpretime solo dhe performanca baleti, duke krijuar një paraqitje të harmonizuar artistike në kuadër të festivalit.

Ndërsa dekani i Fakultetit të Arteve, Fitim Aliu, falënderoi studentët dhe profesorët për kontributin e tyre dhe shpalli zyrtarisht të hapur festivalin dhe ekspozitën e PAAF 2026.

Festivali do të zgjasë deri më 30 maj dhe do të sjellë një program të pasur aktivitetesh, përfshirë sfilata mode, konferenca shkencore të arkitekturës dhe ligjërata nga profesorë vendorë e ndërkombëtarë.

Studentët e Dizajnit të Modës në Kolegjin AAB prezantuan koleksionet e tyre në një Sfilatë Mode

Në prani të një audience të madhe, studentët e Fakultetit të Arteve, programi Dizajn i Modës në Kolegji AAB prezantuan koleksionet e tyre në një Sfilatë Mode. Përmes një qasjeje artistike dhe konceptuale, studentët sollën krijime të realizuara gjatë vitit akademik, nën udhëheqjen e dizajnereve dhe profesoreshave të tyre, Krenare Rugova dhe Laura Ukshini.

Sipas profesoreshave në fjalë secili koleksion paraqiti një narrativë unike artistike, të ndërtuar mbi kujtesën, identitetin, emocionin, arkitekturën, teknologjinë dhe kulturën vizuale bashkëkohore.

Koleksionet e prezantuara:

Edonisa Shala – “Kujtime dhe trashëgimi familjare”
Doruntina Rama – “The Dress She Never Wore”
Fazile Murati – “Përtej Pëlhurës”
Erinda Shabani – “Harmonizimi i ngjyrave në siluetën bashkëkohore”
Erona Gashi – “Nënlëkurë”
Aulona Pepaj – “The 70’s”
Anise Azizi – “Rewoven Echoes”
Erza Shala – “GeoFlow”
Drilona Robelli – “Fragmented Balance”
Eltiona Asllanaj – “Elegancë e Frakturuar”
Sera Hashani – “When Art Meets Fashion”
Lori Lajqi – “Silent Chaos”
Lorena Jerliu – “Në Rrjetën e Krijimit”
Erisa Morina – “Constructed Silence”
Alma Krasniqi – “Prizëm Urban F/W”
Oltiona Morina – “Modern Baroque”
Marigone Isufi – “Reflections of Movement”
Anjeza Sinani – “L’Essence”
Qendresa Vrenezi – “Silent Chaos”
Fjolla Selmani Imeri – “Dreamscape”
Bardha Kallaba – “Kulay in Motion”
Jeta Ajvazi – “Infinity Ruffle”
Sara Xhylani – “Inner Glow”
Florijeta Haxhosaj – “Një histori e ngurtë”
Ereza Koci – “Digital Chains”
Jasin Shaljani- ““My purple city”
· Ima Haxha- “Zhveshje e bukur”.

Vlen të theksohet se Fakulteti i Arteve në Kolegji AAB, përmes mbështetjes akademike u ofron studentëve studime të mirëfillta në fushën e artit dhe dizajnit.

U mbajt Konferenca Ndërkombëtare Shkencore e Arkitekturës “ARCHIKOMB – Shared Vision” në kuadër të PAAF 2026

Fakulteti i Arkitekturës i Kolegjit AAB, në bashkëpunim me Asociacionin e Arkitektëve të Kosovës, ka organizuar Konferencën Ndërkombëtare Shkencore e Arkitekturës “ARCHIKOMB – Shared Vision / Vizioni i Përbashkët”, në kuadër të “Prishtina Arts and Architecture Festival – PAAF 2026”.

Në hapje të konferencës, të pranishmit i përshëndetën zëvëndryetari i Këshillit Drejtues të Kolegjit AAB, Prof. Dr. Sc. Bujar Demjaha, dekani i Fakultetit të Arteve dhe Arkitekturë, Fitim Aliu, Kryetari i Asociacionit të Arkitektëve të Kosovës, z. Blerim Bajraktari, të cilët theksuan rëndësinë e bashkëpunimit akademik dhe profesional në zhvillimin e arkitekturës bashkëkohore.

Konferenca mblodhi studiues dhe arkitektë të fushës, me një numër të madh pjesëmarrësish nga Kosova, Shqipëria, Mali i Zi dhe Italia. Nga Shqipëria morën pjesë Ervin Taci dhe Brunilda Basha, nga Mali i Zi Muho Uruçi, ndërsa Italia u përfaqësua nga arkitektja e njohur Erika Ruiz. Një pjesëmarrje e veçantë, ishte edhe interesimi i madh i studentëve të Fakultetit të Arkitekturës, të cilët, përveç se ishin pjesë e sesioneve, në ambientet e këtij fakulteti prezantuan edhe punimet e tyre, të lidhura drejtpërdrejt me temën kryesore të konferencës.

Punimet e konferencës u zhvilluan në disa sesione ku u diskutua gjerësisht për marrëdhënien ndërmjet kujtesës, hapësirës, identitetit urban dhe dimensionit njerëzor të arkitekturës. Një ndër temat qendrore ishte mënyra se si hapësira arkitektonike krijon përvojë dhe narrativë përmes dizajnit, perceptimit dhe angazhimit ndijor.

Po ashtu, konferenca vuri në fokus qytetin si strukturë hibride dhe dinamike, duke trajtuar transformimin urban, evolucionin e mënyrave të jetesës dhe praktikat e qëndrueshme në arkitekturë. Pjesë e diskutimeve ishin edhe qasjet inovative dhe eksperimentale për habitatet emergjente modulare dhe ekologjitë hibride.

Në përmbyllje, konferenca “ARCHIKOMB – Shared Vision” u vlerësua si një platformë e rëndësishme ndërkombëtare për shkëmbimin e ideve dhe hulumtimeve shkencore në fushën e arkitekturës dhe urbanizmit bashkëkohor.