09/09/2026
Ditari i një fotografi të luftës
Më 9 shtator 2026, nxënësit e Gjimnazit “Sami Frashëri” në Prishtinë, në kuadër të Klubit të Trashëgimisë Kulturore, të shoqëruar nga profesoresha Hamide Sahiti Beha, vizituan Galerinë e Arteve të Prishtinës për të parë nga afër ekspozitën “Ditari i një fotografi të luftës”, të fotografit Visar Kryeziu, me kuratore Eliza Hoxha.
Ekspozita sjell një përzgjedhje të fotografive të realizuara nga Visar Kryeziu gjatë luftës në Kosovë, në vitet 1998–1999 dhe në periudhën menjëherë pas saj. Përmes objektivit të tij, fotografi ka dokumentuar momente të ndryshme nga lufta, popullata dhe përditshmëria e njerëzve në rrethana të jashtëzakonshme, duke përfshirë edhe pjesëtarë të Ushtrisë Çlirimtare të Kosovës dhe momente nga terreni i luftës.
Fotografitë dëshmojnë edhe për guximin dhe përkushtimin e fotografit, i cili, në rrethana të rrezikshme, ka vënë në rrezik edhe jetën e tij për të dokumentuar dhe ruajtur në fotografi copëza të historisë së luftës dhe të një periudhe vendimtare për Kosovën.
Një nga momentet më të veçanta të kësaj vizite ishte bashkëbisedimi i nxënësve me autorin e ekspozitës, Visar Kryeziu. Nxënësit patën mundësinë të dëgjojnë drejtpërdrejt rrëfimet e tij për përvojat gjatë realizimit të fotografive, rrethanat në të cilat ato janë shkrepur dhe rëndësinë që ka dokumentimi fotografik i ngjarjeve historike.
Për nxënësit, kjo nuk ishte vetëm një vizitë në një galeri arti. Ishte një mundësi për ta parë historinë përmes dëshmive autentike të kohës. Fotografitë ngjallën emocione të forta, reflektim dhe respekt, duke i bërë nxënësit të mendojnë për sakrificën, vështirësitë dhe përjetimet e njerëzve gjatë luftës, por edhe për rëndësinë e ruajtjes së kujtesës historike.
Fotografia dëshmon. Kujtesa mbetet. Brezat e rinj e njohin dhe e përcjellin historinë.
