10/09/2026
Kids Academy 15 vjet!🎈
Këtë vit shënojmë 15 vite të një rrugëtimi të ndërtuar mbi një përkushtim të qartë ndaj edukimit të hershëm dhe zhvillimit të gjithanshëm të fëmijëve, duke krijuar që në vitet e para bazat për të ardhmen e tyre.
Që nga fillimi, kemi punuar për të ndërtuar një qasje të edukimit të hershëm që i vendos fëmijët në qendër të procesit, duke i mbështetur të mësojnë, të eksplorojnë, të zhvillojnë aftësitë e tyre dhe të ndërtojnë themelet për hapat e ardhshëm në edukim.
Gjatë këtyre 15 viteve, gjenerata fëmijësh kanë nisur rrugëtimin e tyre në Kids Academy. Sot, është kënaqësi dhe krenari t’i shohim shumë prej tyre duke vazhduar me sukses në etapat e tyre të mëtejshme edukative dhe duke u zhvilluar në drejtime të ndryshme. Secila gjeneratë ka sjellë përvojën e saj në Kids Academy dhe ka lënë pjesën e vet në historinë e institucionit tonë.
Në këtë rrugëtim, besimi i familjeve dhe bashkëpunimi me prindërit kanë qenë një pjesë e rëndësishme e punës sonë. I vlerësojmë thellësisht të gjitha familjet për bashkëpunimin dhe për besimin që na kanë dhënë, duke na mundësuar të kontribuojmë në edukimin dhe zhvillimin e fëmijëve të tyre.
Kids Academy, ndër vite, ka pasur kënaqësinë të bashkëpunojë me shumë kolegë të jashtëzakonshëm, me aftësi, profesionalizëm dhe entuziazëm për punën me fëmijët. Përgjegjësia e tyre në punën e përditshme, përkushtimi ndaj fëmijëve dhe gatishmëria për zhvillim të vazhdueshëm profesional kanë kontribuar në zhvillimin e programit, në ruajtjen e cilësisë dhe në ndërtimin e kulturës që Kids Academy ka sot.
15-vjetori është një moment për të vlerësuar atë që kemi ndërtuar deri tani dhe, mbi të gjitha, për të përcaktuar hapat e mëtejshëm të zhvillimit.
Kids Academy mbetet e përkushtuar të vazhdojë me zhvillimin e programeve dhe shërbimeve të reja, përmirësimin e vazhdueshëm të standardeve dhe sjelljen e qasjeve bashkëkohore në edukimin e hershëm, gjithmonë me synimin për të ofruar më të mirën për fëmijët dhe për të kontribuar në zhvillimin e edukimit të hershëm në vendin tonë.
