SHFMU "Shkolla e Gjelbër" Prishtinë

13/09/2026

Në Shkollën e Gjelbër është realizuar dezinfektimi dhe deratizimi i të gjitha hapësirave të shkollës, me qëllim krijimin e një mjedisi sa më të pastër, të sigurt dhe të përshtatshëm për nxënësit dhe stafin.

Falënderojmë Komunën e Prishtinës për mbështetjen dhe kujdesin e vazhdueshëm ndaj institucioneve arsimore dhe mirëqenies së nxënësve tanë.

Së bashku për një shkollë më të pastër, më të sigurt dhe më të shëndetshme!

10/09/2026

Për një fillim të mbarë të vitit shkollor

Shkolla e Gjelbër pati kënaqësinë të mirëpresë Drejtorin e Arsimit, z. Arianit Elshani, dhe ud. Shefen për Shkollat Fillore, znj. Ardiana Hyseni.

Të pranishmit u pritën nga drejtori i shkollës, z. Besart Ismajli, me të cilin zhvilluan një bashkëbisedim të hapur rreth punës së përditshme në shkollë, zhvillimeve të fundit, si dhe çështjeve që kërkojnë vëmendje dhe mbështetje të mëtejshme.

Gjatë vizitës u diskutua edhe për përvojën e shkollës në zbatimin e mësimit tërëditor, mënyrën e organizimit të aktiviteteve dhe angazhimin e stafit për krijimin e një mjedisi sa më të përshtatshëm dhe funksional për nxënësit.

Vizita ishte një mundësi e mirë për të parë nga afër punën dhe përkushtimin e stafit të Shkollës së Gjelbër, si dhe për të shkëmbyer ide e përvoja që kontribuojnë në përmirësimin e vazhdueshëm të procesit edukativo-arsimor.

Falënderojmë z. Elshani dhe znj. Hyseni për vizitën, interesimin dhe mbështetjen e tyre. Vlerësimi dhe bashkëpunimi institucional janë një shtysë e rëndësishme për të vazhduar përpara me përgjegjësi, përkushtim dhe në funksion të nxënësve tanë.

01/09/2026

Dita e parë e shkollës 📚📖

Sot ka qenë një ditë e veçantë për të gjithë nxënësit e shkollës sonë, pasi ka filluar një vit i ri shkollor.
Pas pushimeve verore, nxënësit janë rikthyer në bankat e shkollës me shumë gëzim, emocion dhe entuziazëm.
Oborri i shkollës është mbushur me buzëqeshje, biseda dhe përqafime. Mësuesit i kanë mirëpritur nxënësit me ngrohtësi dhe përkushtim, ndërsa ata kanë shprehur dëshirën për të mësuar dhe për të arritur rezultate të mira.

Kjo ditë ka shënuar fillimin e një kapitulli të ri, të mbushur me dije, miqësi dhe kujtime të bukura. Të gjithë nxënësit kanë nisur këtë vit shkollor me shpresën për të pasur sa më shumë suksese dhe momente të paharrueshme.

Urime viti i ri shkollor!

31/08/2026

Nesër fillon një kapitull i ri për vogëlushët tanë të klasave parafillore dhe nxënësit e klasave të parë.
Me shumë emocion dhe gëzim, nesër fillon mësimi për vogëlushët tanë.

Një ditë e veçantë, e mbushur me buzëqeshje, emocione, miqësi të reja dhe hapa të parë drejt botës së dijes.

Urojmë që dita e parë në shkollë të jetë e paharrueshme dhe ky vit shkollor të sjellë shumë suksese, dashuri, mësime të bukura dhe momente të lumtura!

Mirë se vini, vogëlushë!
Nesër ju pret një aventurë e re!
Suksese në hapat tuaj të parë drejt dijes!

22/08/2026

Njoftim

Të dashur prindër,
Të bashkangjitur gjeni listat e fëmijëve të regjistruar në grupet parafillore për vitin shkollor 2026–2027.

Ju urojmë fëmijëve tanë të vegjël një fillim të mbarë, plot gëzim, mësime dhe suksese në hapin e tyre të parë drejt shkollës! 🌈📚🎒

Me respekt,
Drejtoria e shkollës

22/08/2026

Njoftim

Të dashur prindër,
Ju njoftojmë se janë publikuar listat e nxënësve të regjistruar në klasën e parë për vitin shkollor 2026–2027.

Ju urojmë nxënësve tanë të rinj shumë suksese dhe një fillim të mbarë në rrugëtimin e tyre shkollor! 🎒📚

Me respekt,
Drejtoria e shkollës

27/07/2026

NJOFTIM PËR PRINDËR

Të nderuar prindër,
Ju njoftojmë se nga data 27 korrik deri më 9 gusht 2026 është i hapur aplikimi për subvencionimin e teksteve dhe materialeve shkollore për nxënësit e klasave 1–9, përmes platformës eKosova.
Ju lutemi që aplikimin ta bëni brenda afatit të përcaktuar dhe të siguroheni që të dhënat personale dhe xhirollogaria bankare të jenë të sakta.

Subvencionimi përfshin blerjen e teksteve dhe materialeve shkollore për nxënësit e arsimit fillor të ulët dhe të mesëm të ulët (klasat 1–9).

Mjetet financiare do të transferohen drejtpërdrejt në xhirollogarinë bankare të prindit/aplikuesit.

Para se të aplikoni, ju lutemi sigurohuni që:
– xhirollogaria juaj bankare është aktive dhe e saktë;
– të dhënat tuaja në eKosova janë të përditësuara.

Aplikimi do t’u mundësohet edhe shtetasve të huaj me leje qëndrimi të përkohshme ose të përhershme në Republikën e Kosovës, fëmijët e të cilëve vijojnë mësimin në institucionet arsimore të Republikës së Kosovës.

Për shtetasit e huaj që ende nuk posedojnë leje qëndrimi, por kanë fëmijë të regjistruar në shkolla të Republikës së Kosovës, MASH do t’ia dorëzojë ASHI-së listën e këtyre rasteve me qëllim të krijimit të qasjes në eKosova për aplikim.

Dokumentet për këtë kategori do të dorëzohen me email në adresën: [email protected]

Linku për aplikim:
1. https://rks-gov.net/469 – APLIKIM – (Klasat 1 deri 5)
2. https://rks-gov.net/471 – APLIKIM – (Klasat 6 deri 9)

Shënim i rëndësishëm: Në përputhje me Udhëzimin Administrativ të MASH-it nr. 13/2016 për pajisjen e nxënësve me tekste shkollore, përdorimin dhe ruajtjen e tyre, nxënësit dhe prindërit janë përgjegjës për ruajtjen e teksteve shkollore. Në përfundim të vitit mësimor, tekstet duhet të kthehen në shkollë në gjendje të rregullt.

Në rast se tekstet dëmtohen me dashje, nga pakujdesia ose humbin, prindi është i obliguar t’i zëvendësojë ose t’i kompensojë ato. Dorëzimi i teksteve bëhet te kujdestari i klasës në fund të vitit mësimor.

Të gjitha aplikimet do të verifikohen nga shkollat përkatëse përmes koordinatorëve të autorizuar.

Për çdo paqartësi lidhur me aplikimin, të interesuarit mund të drejtohen në adresën e emailit ose në numrin e telefonit të paraqitur më poshtë:

[email protected]
Tel: +383 (0) 38 200 65 049

Ju urojmë pushime të këndshme verore!
Ju presim në shtator, me plot energji për vitin e ri shkollor.

09/07/2026

07.07.2025 🎓
Me këtë datë u zhvillua ceremonia e përfundimit të klasës së 9-të, një moment i rëndësishëm që shënon përmbylljen e një etape të rëndësishme në jetën shkollore të nxënësve tanë.
Kjo ceremoni ishte një rast për të vlerësuar përkushtimin, punën dhe sukseset e arritura gjatë viteve të arsimit të mesëm të ulët, si dhe për të falënderuar drejtorin, mësimdhënësit, prindërit dhe të gjithë ata që kanë kontribuar në këtë rrugëtim.

Urojmë të gjithë nxënësve shumë suksese në hapat e ardhshëm të arsimimit dhe realizimin e ëndrrave e synimeve të tyre.
Urime për këtë arritje të rëndësishme!

26/06/2026

Faleminderit nga AMC dhe doktoreshës Florina Ushaku Grezda!

Sot patëm kënaqësinë të jemi në Shkollën e Gjelbër, ku u organizua ligjërata vetëdijësuese për Skriningun e Kancerit të Qafës së Mitrës - PAP test, në kuadër të programit të Ministrisë së Shëndetësisë, me asistencë teknike të AMC-së.

Ky program shënon këtë vit 10-vjetorin e implementimit në Kujdesin Parësor Shëndetësor (KPSH) në Prishtinë, Prizren, Pejë, Mitrovicë, Obiliq dhe Gjilan duke dëshmuar rëndësinë e vazhdueshme të parandalimit dhe zbulimit të hershëm të kancerit të qafës së mitrës.

AMC, në bashkëpunim me Shkollën e Gjelbër, organizoi këtë ligjëratë vetëdijësuese, e cila u facilitua nga Dr. Florina Ushaku Grezda - Specialiste e Mjekësisë Familjare.

Në ligjëratë morën pjesë vajza dhe gra të moshave të ndryshme, stafi i Shkollës së Gjelbër, të cilët treguan interesim dhe angazhim të madh për këtë temë me rëndësi për shëndetin e grave.

Falënderojmë drejtorin z..Besart Ismajli dhe stafin e Shkollës së Gjelbër për mikpritjen, bashkëpunimin dhe përkushtimin në organizimin e kësaj ligjërate vetëdijësuese.

Programi i Skriningut të Kancerit të Qafës së Mitrës mbështetet nga Fondi për Popullsinë i Kombeve të Bashkuara (UNFPA) UNFPA in Kosovo