IAAP "Hasan Prishtina" - Mitrovicё

Sot shënuam pensionimin e kolegut tonë të nderuar, Fatmir Dragaj. Pas shumë vitesh pune, përkushtimi dhe kontributi të çmuar, ai mbyll një kapitull të rëndësishëm të jetës profesionale dhe nis një etapë të re.
Me këtë rast, në praninë e kolektivit dhe familjarëve, u organizua një koktej rasti, ku shprehëm mirënjohjen dhe respektin për punën, profesionalizmin dhe bashkëpunimin e tij ndër vite.
Fatmirit i urojmë shëndet të mirë, lumturi, qetësi dhe shumë momente të bukura në pension. Faleminderit për gjithçka dhe suksese në rrugëtimin e ri të jetës!

Në një atmosferë festive dhe plot emocione, maturantët e gjeneratës 2025/2026 të IAAP ,,Hasan Prishtina” shënuan përmbylljen e një etape të rëndësishme të jetës së tyre shkollore dhe fillimin e rrugëtimeve të reja drejt suksesit.

Ceremonia u zhvillua në ambientet e UM “Isa Boletini” në Mitrovicë, në praninë e familjarëve, mësimdhënësve dhe mysafirëve të shumtë.

Urime të gjithë maturantëve për këtë arritje dhe suksese në sfidat e ardhshme!

Sot në ndërmarrjet “Interex” dhe “Viva Fresh” në Mitrovicë, me përkrahjen e vazhdueshme të MASHT-it, organizatës “TED”, menaxhereve Egzona Voca dhe Fitore Salihu, si dhe me ndihmën e vazhdueshme të stafit të shkollës, nxënësit e klasës XII/9 të IAAP “Hasan Prishtina”, me kujdestare Fatmire Topallin, të drejtimit Tregtar me shumicë dhe pakicë – mësimi dual, iu nënshtruan vlerësimit të punës praktike, të cilën e realizuan me sukses.
Një falënderim i veçantë për gjithë këtë proces, për tri vjet rresht, shkon për profesoreshën Dëshira Mustafaj.
Procesin e vlerësimit e ndihmuan edhe mësimdhënëset Almira Selmani dhe Sevdije Bekteshi.
Suksese për nxënësit gjatë rrugëtimit të tyre!

Aktivitet edukativ – Edukimi Financiar

Në IAAP “Hasan Prishtina” u realizua me sukses aktiviteti me temën: “Edukimi Financiar – Konceptet dhe aplikimi në tregun financiar”, nën udhëheqjen e ligjëruesit Besnik Kelmendi.

Gjatë ligjëratës, nxënësit patën mundësinë t’i zgjerojnë njohuritë e tyre rreth edukimit financiar, investimeve dhe rëndësisë së vendimmarrjes së mençur financiare në jetën reale.

Aktiviteti u karakterizua nga serioziteti, disiplina dhe pjesëmarrja aktive e nxënësve, duke dëshmuar edhe një herë përkushtimin e shkollës sonë në përgatitjen profesionale dhe edukative të të rinjve.

Falënderojmë ligjëruesin dhe nxënësit për angazhimin dhe bashkëpunimin.

Shkolla jonë “IAAP Hasan Prishtina” u shpërblye me vendin e katërt në mesin e 36 shkollave nga e gjithë Kosova, në kuadër të projekteve të Kryqit të Kuq të Kosovës për promovimin e vlerave humane tek të rinjtë.

Gjatë gjithë kësaj kohe, nxënësit tanë janë mbështetur dhe udhëhequr me përkushtim nga pedagogia Arberina Hajzeri dhe profesoresha Elidiana Budini Haziri.

Urime për këtë sukses të merituar dhe falënderime për angazhimin e vazhdueshëm në kultivimin e vlerave humane, solidaritetit dhe frymës së bashkëpunimit tek të rinjtë!

Insitituti Demokraci për Zhvillim (D4D) para nxënësve tanë ka realizuar prezantimin e platformës për edukim medial, “Verifiko.info”.

Ky aktivitet synon të informojë rreth platformës “Verifiko” si një mjet praktik për zhvillimin e mendimit kritik dhe edukimit medial, si dhe ta zhvillojë një diskutim interaktiv mbi mediet online, dezinformimin dhe sigurinë në internet. Përmes këtij sesioni, nxënësit kanë pasur mundësi të diskutojnë mbi sfidat digjitale me të cilat përballen dhe të mësojnë mënyra konkrete për verifikimin e informacionit dhe përdorimin e përgjegjshëm të medieve sociale.

📢 Datat për Provimin e Maturës Shtetërore janë si vijon:

📝 1 – 12 qershor
Paraqitja e Provimit të Maturës përmes platformës E-Kosova

📚 20 qershor
Mbajtja e Provimit të Maturës Shtetërore

📊 29 qershor
Shpallja e rezultateve

✍️ 30 qershor – 2 korrik
Afati për ankesa

📢 6 korrik
Shpallja e rezultateve të ankesave

🌟 Suksese për të gjithë nxënësit! 💪📖✨

Për nder të Ditës së Librit, 23 Prillit, në shkollën tonë u organizua dhe u zhvillua me shumë entuziazëm një Kuiz letrar, i cili mblodhi nxënësit në këtë garë dijeje. Atmosfera ishte frymëzuese, ku nxënësit treguan njohuri të gjera për veprat dhe autorët më të rëndësishëm të letërsisë, si dhe aftësi të shkëlqyera analitike dhe interpretative.

Pas një gare të fortë dhe mjaft konkurruese, rezultatet përfundimtare ishin:
Vendi III – Klasa X/2 🥉
Vendi II – Klasa X/1 🥈
Vendi I – Klasa XI/2 🥇

Urime të përzemërta për të gjithë nxënësit pjesëmarrës, të cilët dëshmuan se leximi mbetet një nga rrugët më të sigurta drejt zhvillimit personal dhe akademik.

“Mësimdhënësi i mirë nuk u jep nxënësve vetëm dije, por i frymëzon ata të bëhen kërkues të dijes gjatë gjithë jetës.”

Me 16 prill në qytetin Suharekës u mbajtën Garat e radhës Ekonomi e Ndërmarrësisë me cilën shkolla jonë fitoj vendin e dytë.

Në garat nacionale të zhvilluara në qytetin e Pejës, shkolla jonë u shpall nënkampione e Republikës së Kosovës në futsall për djem.🥈
Djelmoshat tanë treguan se me punë, përkushtim dhe bashkëpunim mund të arrihen suksese të mëdha, edhe kur rruga nuk është e lehtë. Ata garuan me dinjitet dhe krenari, duke përfaqësuar shkollën tonë në mënyrën më të mirë të mundshme. Ky sukses merr edhe më shumë vlerë duke ditur sfidat me të cilat janë përballuar, por që nuk i ndalën aspak në rrugën drejt këtij rezultati të shkëlqyer.
Jemi thellësisht krenarë për secilin prej tyre, për energjinë, përkushtimin dhe shembullin frymëzues që po japin. 👏
Urime djelmosha, ky është vetëm fillimi! 🏆