Përmbledhje për Shkollën
- Historiku i SHMLM "Shaqir Hoxha" në Shalë
Çdo skaj i vendit tonë ka një ngjajshmëri-analogji në rrugëtimin për dituri, në rrugën e gjatë të njohjes, edukimit, deri te finalizimi. Gjatë viteve të okupimit klasik të decenjës së fundit të shekullit të kaluar , siç dihet në tërë territorin e Republikës së Kosovës u bë mbyllja e objekteve shkollore, e sidomos në vendet me nacionalitet të përzier me serb, siç ishte shkolla e mesme në Lipjan që rezultoi me mbylljen e dyerve të shkollës për nxënësit shqiptar. Populli ynë e sidomos elita intelektuale në këtë rast gjeti alternativë dhe në muajin prill të vitit 1991 organizoi mësimin në shkolla tjera të regjionit, në këtë rast për komunën e Lipjanit mësimi për nxënësit e shkollës së mesme u organizua në fshatrat apo punktet siç i thoshim atëherë: Gadime, Banullë, Rufc, Dobrajë, Babush dhe në Shalë të Drenicës që është regjioni më i largët nga komuna e Lipjanit më se njëzetepesë kilometra. Në këtë fshat vijonin mësimin një numër i konsiderueshëm i nxënësve nga fshatrat për rreth siç janë: Krojmiri, Baica, Resinovci, Fushtica e Ulët, Fushtica e Lartë, Mirena, Pjetershtica, Kleçka, Divjaka, si dhe nga fshati Nekoc. Mësimi zhvillohej në dy ndërrime dhe në gjashtë drejtime; Gjimnaz matematikor, gjuhësor; drejtimet teknike: maqineri,automekanik, saldues, elektroteknik. Pasi që objekti ishte i ngushtë për një numër të tillë të nxënësve (I ndërtuar me 1927) populli me vetkontribut adaptoi edhe një dhomë mësimi. Këtë shkollë-paralele e udhëheqte profesori veteran Hazir Rizani i cili disa herë merret në bisedë informative nga policia serbe. E njejta gjë ishte edhe për profesorët tjerë të Lipjanit që udhtonin për të zhvilluar mësimin në këtë shkollë, ndalje bastisje etj. Edhe gjatë periudhës së UÇK-së shkolla vazhdoi mësimin, ku disa nga mësimdhënësit ishin angazhuar në UÇK siç ishin :Elez Durmishi, Selatin Rizani, bibliotekisti Mustafë Shamolli, si dhe Ali Shamolli i cili edhe tani është drejtor i shkollës. Gjat ofanzivës së parë , korrik -1998 shkolla vetëm u granatua, ndërsa në ofanzivën e dytë prill 1999 iu vu zjarri ku u dogjën dyert dhe disa banka. Shkolla shpëtoi pa u djegur tërsisht falë disa ushtarëve me disa profesorë,Nexhmedin Xheladini, Ali Shamolli, Agim Kadriolli, Ilir Shala, dhe Xhevat Pajaziti të cilët pasi që e fikin zjarrin e tërheqin dokumentacionin. Duke parë rëndësinë si dhe historikun e kësaj shkolle të ndërtuar me 1927, nga iniciativa e patriotit të shquar të kësaj ane Banush Sedllarit i cili atëherë kishte dhënë pronën e tij bashk me Jetë Shamollin, ndërsa pas lufte përgjegjësi i kësaj shkolle Ali Shamolli së bashku me kolektivin e shkollës kontaktojnë me agjensi të ndryshme të cilat ndërtonin në Kosovë, por organizata qeveritare Amerikane USAID është ajo e cila e financon ndërtimin e këtij objekti të ri shkollor me sipërfaqe 1080 m, në sipërfaqën e oborrit prej 50 ari, dhe në mars të vitit 2003 shkolla inaugurohët nga shefi USAID-it amerikan Dell Fajfer. Me vendimin e MASHT në shtator të vitit 2008 shkolla mëvetsohët si shkollë e mesme e lartë-Mikse. Në këtë shkollë mësimin vijojnë 260 nxënës në drejtimet, gjimnaz i shkencave të natyrës, gjimnaz i shkencave shoqërore, drejtimi ekonomik si dhe drejtimi teknik i maqinerisë.
