SHFMU "Skënderbeu" Hogosht

“Me rastin e Ditës Ndërkombëtare të Fëmijëve, urojmë që çdo fëmijë të rritet me dashuri, dije dhe mundësi për të realizuar ëndrrat e tij. Gëzuar 1 Qershorin!”

Në shkollën tonë u organizua Festa e Abetares, një aktivitet i veçantë kushtuar nxënësve të klasave të para. Përmes recitimeve dhe pikave artistike, nxënësit shënuan me sukses përfundimin e një etape të rëndësishme në rrugëtimin e tyre drejt dijes!


Nxënësve tanë ju urojmë shumë suksese, buzëqeshje dhe hapa të sigurt drejt dijes!

Njoftim për sukses në Gara Komunale!

Shkolla jonë shpreh vlerësim dhe krenari të madhe për nxënëset tona për suksesin e arritur në garat komunale në Kamenicë!

Nxënësja Vesa Sylaj ka zënë vendin e dytë në lëndën e historisë, duke treguar njohuri të shkëlqyera dhe përgatitje të lartë.
Po ashtu, nxënësja Besnike Avdija, është renditur në vendin e tretë në biologji, duke dëshmuar përkushtim dhe rezultate të merituara.
Këto arritje janë një dëshmi e punës së palodhur dhe përkushtimit të tyre, si dhe një motivim i fortë për të gjithë nxënësit e tjerë që të ndjekin shembullin e tyre dhe të synojnë suksese të reja.

Shkolla jonë i përgëzon përzemërsisht dhe u uron edhe më shumë suksese në të ardhmen!

Me lojë, buzëqeshje dhe shumë ngjyra, fëmijët parashkollorë festuan Ditën e Shkollës me gëzim dhe energji të pafund.

“Ndonjëherë mjafton vetëm një hap i vogël, një fjalë e thënë me zemër, për të lënë gjurmë që koha nuk i fshin kurrë.”

🌍 Dita e Tokës në shkollën tonë 🌱

Në kuadër të Ditës së Tokës, nxënësit tanë u angazhuan në aktivitete të ndryshme me qëllim ndërgjegjësimin për mbrojtjen e mjedisit. Ata morën pjesë në pastrimin e hapësirave përreth, duke mbledhur mbeturina dhe duke dhënë një shembull të shkëlqyer për kujdesin ndaj natyrës.
Përveç kësaj, u zhvilluan aktivitete kreative dhe edukative që nxitën dashurinë dhe përgjegjësinë për planetin tonë.

Në shkollën tonë u zhvilluan aktivitete të shumta në kuadër të 21 Marsit – Ditës Botërore të Personave me Sindromën Down.

Nxënësit dhe mësimdhënësit u angazhuan në organizimin e aktiviteteve të ndryshme, duke përfshirë vizatime kreative, lojëra ndërvepruese dhe diskutime të hapura që promovojnë ndërgjegjësimin, pranimin dhe respektin për diversitetin.
Një vend të veçantë pati edhe ligjërata dhe debati i organizuar nga stafi pedagogjik në bashkëpunim me klubin e debatit. Tema e debatit ishte: “Cili është mjedisi më i përshtatshëm për edukimin e fëmijëve me Sindromën Down: shkollat gjithëpërfshirëse apo shkollat speciale?”, ku nxënësit shprehën mendime të argumentuara dhe reflektime të thella mbi rëndësinë e përfshirjes dhe barazisë në arsim.

Së bashku ndërtojmë një shoqëri më gjithëpërfshirëse!

Klubi i Ndërmjetësimit zhvilloi një aktivitet informues duke shpërndarë fletëpalosje për nxënësit e shkollës sonë. Qëllimi i këtij aktiviteti ishte t’i njohë ata me rolin dhe rëndësinë e ndërmjetësimit në zgjidhjen paqësore të konflikteve dhe në krijimin e një ambienti më të sigurt e bashkëpunues në shkollë.
Përmes këtij angazhimi, nxënësit patën mundësinë të mësojnë më shumë rreth mënyrës se si funksionon klubi, si mund të kërkojnë ndihmë dhe si mund të bëhen pjesë e tij.

Ne vazhdojmë të promovojmë dialogun, mirëkuptimin dhe respektin mes njëri-tjetrit!

🇽🇰 Në shkollën tonë festuam 17 Shkurtin me shumë gëzim dhe aktivitete patriotike! Nxënësit recituan poezi, interpretuan skica historike, kënduan këngë dhe vallëzuan valle kombëtare.

Një ditë e mbushur me krenari dhe dashuri për atdheun! 💙💛