Shmap "Adem Kastrati" - Gjilan

• Drejtori i shkollës, Roland Masurica, pjesë e panelit të debatit publik mbi Hapësirat e Përbashkëta Kreative

Drejtori i shkollës sonë, Roland Masurica, mori pjesë si panelist në debatin publik kushtuar zhvillimit të Hapësirave të Përbashkëta Kreative, një iniciativë që synon të fuqizojë bashkëpunimin ndërmjet institucioneve arsimore, organizatave, profesionistëve dhe komunitetit në mbështetje të të rinjve.

Gjatë diskutimit u trajtuan çështje të rëndësishme që lidhen me qasjen e të rinjve në hapësira kreative, pajisje, mentorim dhe mundësi për zhvillimin e aftësive praktike përtej procesit të rregullt mësimor. Vëmendje e veçantë iu kushtua rolit të shkollave si partnerë aktivë në krijimin e mjediseve që nxisin kreativitetin, inovacionin dhe lidhjen e arsimit me praktikën reale.

Në fjalën e tij, drejtori Roland Masurica theksoi se të rinjtë kanë potencial, ide dhe vullnet për të krijuar, por shpesh u mungojnë hapësirat dhe mundësitë për t’i zhvilluar ato. Ai nënvizoi rëndësinë e partneriteteve ndërmjet shkollave, institucioneve publike dhe organizatave, duke theksuar se investimi në hapësira kreative është investim në të ardhmen e të rinjve dhe të komunitetit.

Shkolla jonë mbetet e përkushtuar në mbështetjen e iniciativave që promovojnë kreativitetin, inovacionin dhe zhvillimin profesional të nxënësve, duke krijuar ura bashkëpunimi që i ndihmojnë ata të shndërrojnë idetë në projekte konkrete.

🤝 Falënderojmë organizatorët për ftesën dhe mundësinë për të kontribuar në këtë diskutim të rëndësishëm për zhvillimin e ekosistemit kreativ në vend.

PENSIONOHET PROFESORI LUAN SHAHIQI
GJILAN, 09 QERSHOR
Pas shumë vitesh pune në arsim, profesori dhe piktori Luan Shahiqi është pensionuar, ndërsa kolegët, familjarët dhe miqtë e kanë vlerësuar lart kontributin e tij gjatë një ceremonie të organizuar me këtë rast.
Drejtori i shkollës, Roland Masurica, duke përshëndetur të pranishmit, tha se profesori Luan Shahiqi gjatë gjithë angazhimit të tij në shkollë është dalluar për përkushtim, korrektësi dhe profesionalizëm në punë.
“Pas dekadash të tëra pune, krijimtarie dhe përkushtimi, profesori ynë po mbyll një kapitull të rëndësishëm të jetës profesionale dhe po nis një rrugëtim të ri – atë të pensionimit. Ky është një moment krenarie për arritjet e tij, por edhe emocionesh për të gjithë ne që kemi pasur fatin të bashkëpunojmë me të”, u shpreh Masurica.
Ai vlerësoi gjithashtu kontributin e profesor Shahiqit në artin pamor, duke theksuar se ai ka ndërtuar një krijimtari të pasur artistike dhe ka prezantuar veprat e tij në ekspozita të shumta brenda dhe jashtë vendit.
Më pas folën edhe profesorët Nijazi Haziri, Rexhep Bunjaku, Agim Kajtazi dhe Bajram Fejzullahu, të cilët, nga përvoja të ndryshme bashkëpunimi, vlerësuan jo vetëm anën profesionale, por edhe dimensionin njerëzor të profesor Shahiqit. Sipas tyre, ai është shquar gjithmonë për thjeshtësi, korrektësi dhe respekt në raport me kolegët dhe nxënësit.
Në emër të familjes, foli Kujtim Shahiqi, i cili çmoi kolektivin e shkollës për organizimin e ceremonisë dhe për vlerësimin e treguar ndaj profesorit.
Në fund, profesori Luan Shahiqi falënderoi të pranishmit për respektin dhe emocionet që i dhuruan në këtë ditë të veçantë.
“Në këto momente po e kuptoj se ka ardhur koha për të pushuar, por nuk po e kuptoj sa shpejt ka ardhur ajo. Megjithatë, për sa kohë do ta kem shëndetin, nuk do të ndalem së krijuari. Në art, fatmirësisht, nuk ka pensionim”, tha ai.
Në fund, për kontributin e dhënë në edukimin e shumë gjeneratave, profesorit Luan Shahiqi i është ndarë mirënjohje nga drejtoria e shkollës dhe Drejtoria Komunale e Arsimit në Gjilan.

NJË BIOGRAFI E SHKURTËR
Luan Shahiqi u lind më 19 korrik 1961 në Gjilan. Shkollën fillore dhe të mesme e kreu në Gjilan, ndërsa në vitin shkollor 1979/1980 regjistroi Akademinë e Arteve, në degën e Pikturës, ku më vonë diplomoi dhe fitoi gradën Magjistër i Arteve. Karrierën profesionale e filloi në vitin 1983 në fabrikën e tekstilit “INTEGJ” në Gjilan, ku deri në vitin 1990 punoi si dizajner i perdeve. Nga viti 1990 deri në vitin 2012 ushtroi profesionin e dizajnerit të enteriereve, duke realizuar projekte të shumta. Në vitin 2012 iu bashkua Shkollës së Arteve Pamore “Adem Kastrati” në Gjilan, ku punoi si mësimdhënës i vizatimit, duke edukuar dhe frymëzuar breza të tërë nxënësish në fushën e artit pamor.
Përveç angazhimit të tij në mësimdhënie dhe krijimtari artistike, prof. Luan Shahiqi për disa mandate ishte kryetar i Shoqatës së Artistëve Pamorë të Gjilanit. Ai ishte gjithashtu pjesë e nismës kolektive për themelimin e Shkollës së Arteve në Gjilan, duke dhënë një kontribut të rëndësishëm në zhvillimin e arsimit artistik në qytetin tonë. Krijimtaria e tij artistike, si piktor, është prezantuar në shumë ekspozita kolektive dhe individuale, brenda dhe jashtë vendit.
Ndër ekspozitat individuale më të njohura veçojmë:
• Gjilan (1984);
• Gjakovë, Kroaci (1986);
• Beograd, Serbi (1986);
• Cyrih, Zvicër (1991);
• Prishtinë (2011);
si dhe shumë ekspozita të tjera që dëshmojnë përkushtimin dhe aktivitetin e tij të vazhdueshëm artistik.

MATURANTËT PËRMBYLLËN EKSKURSIONIN TREDITOR
Maturantët e shkollës sonë kanë përfunduar ekskursionin treditor në Shqipëri, duke i dhënë kështu një përmbyllje simbolike viteve të shkollimit të mesëm të lartë, me përjetime dhe kujtime mbresëlënëse nga ky udhëtim.
Ditën e parë, gjatë rrugëtimit drejt Durrësit, ata ndaluan në qytetin historik të Krujës. Përveç vizitës në Pazarin e Vjetër, maturantët patën mundësi të vizitonin edhe Muzeun Kombëtar “Gjergj Kastrioti Skënderbeu”, ku u njohën më nga afër me ngjarje dhe figura të rëndësishme të historisë kombëtare.
Më pas, udhëtimi vazhdoi drejt qytetit bregdetar të Durrësit, një nga qytetet më të vjetra dhe më të njohura turistike në Shqipëri, ku edhe u akomoduan. Atmosfera pranë detit, shëtitorja dhe pamjet e bregdetit krijuan çaste relaksi dhe mundësi për të shijuar bukuritë e qytetit.
Gjatë ditës së dytë, në orët e paradites, maturantët shijuan plazhin, rrezet e diellit dhe notin në det, ndërsa pasdite vizituan pjesën historike të Durrësit, duke u njohur me vlerat kulturore dhe historike të qytetit.
Ditën e tretë dhe të fundit të ekskursionit, ata qëndruan për disa orë në kryeqytetin shqiptar, Tiranë, ku edhe u përmbyll ky udhëtim treditor.
Organizatore e këtij ekskursioni ishte Drejtoria Komunale e Arsimit, e mbështetur nga Komuna e Gjilanit, e cila, edhe këtë vit, ka mbuluar shpenzimet e udhëtimit, akomodimit dhe ushqimit për nxënës.

“NGA ERRËSIRA NË DRITË” – ekspozitë sensibilizuese
GJILAN, 22 maj
Në kuadër të bashkëpunimit ndërmjet shkollës sonë dhe Policisë së Kosovës është hapur ekspozita me temën “Nga errësira në dritë”, e cila përmes artit përcjell mesazhe kundër përdorimit të drogave dhe pasojave që ato sjellin për shëndetin dhe shoqërinë.
Punimet e realizuara nga nxënësit trajtojnë dukurinë e varësisë, duke reflektuar përmes gjuhës artistike rrezikun që paraqesin substancat narkotike dhe rëndësinë e zgjedhjeve të shëndetshme në jetën e të rinjve.
Në ceremoninë e hapjes morën pjesë përfaqësues të Policisë së Kosovës, pjesëtarë të KFOR-it, prindër, nxënës dhe mësimdhënës.
Drejtori i shkollës, Roland Masurica, tha se ekspozita tejkalon dimensionin artistik dhe shërben si mesazh ndërgjegjësues për shoqërinë. Sipas tij, përmes kreativitetit dhe talentit të tyre, nxënësit kanë paraqitur pasojat e errëta të varësisë dhe rëndësinë e zgjedhjes së rrugës së dijes, shëndetit dhe zhvillimit personal. Ai falënderoi Policinë e Kosovës për bashkëpunimin dhe angazhimin e vazhdueshëm në edukimin dhe mbrojtjen e të rinjve.
Para të pranishmëve foli edhe kolonel Agron Rukiqi, drejtor i Policisë së Kosovës për rajonin e Gjilanit, i cili vlerësoi përkushtimin dhe kreativitetin e nxënësve në realizimin e punimeve dhe mesazhet sensibilizuese që ato përcjellin. Ai ftoi nxënësit që më 26 qershor, në Ditën Ndërkombëtare Kundër Drogave, ta prezantojnë ekspozitën edhe në qendër të Prishtinës, me qëllim që mesazhi i saj të arrijë te një audiencë më e gjerë.
Në këtë aktivitet morën pjesë edhe Qëndresa Ramadani, zyrtare në Policinë e Kosovës dhe ideatore e projektit “Nga errësira në dritë”, major Ramadan Ahmeti, drejtor i Drejtorisë së Policisë në Bashkësi dhe Parandalim në Prishtinë, si dhe toger Fatos Latifi, koordinator për Komunitet dhe Parandalim në Drejtorinë Rajonale të Policisë në Gjilan.
Në përmbyllje të ekspozitës, për tri vendet e para, Policia e Kosovës, ndau mirënjohje dhe dhurata simbolike.

NGJYRAT TASHMË FLASIN
GJILAN, 21 MAJ
Pas disa ditësh pune me përkushtim, imagjinatë dhe ndjenjë artistike, ka marrë formë murali që tashmë i jep një frymë të re vizuale ambienteve të shkollës së Artit Pamor dhe asaj të Muzikës. Ngjyrat, format dhe energjia krijuese e këtij realizimi e kanë shndërruar hapësirën shkollore në një vend më frymëzues dhe më të gjallë.
Në këtë realizim, duke dëshmuar talentin, pasionin dhe dashurinë për artin, kanë kontribuar nxënësit e shkollës sonë: Rejhane Abazi, Florenta Spahiu, Atik Mehmeti, Valdrin Ajeti e të tjerë, nën udhëheqjen e profesorit Ramadan Arifi.
Vlen të theksohet se ideja për këtë mural u iniciua nga studentët e Fakultetit të Arteve të Kolegjit AAB, disa prej tyre ish-nxënës të shkollës sonë. Ata, së bashku me profesorët e tyre, javë më parë, vizituan shkollën tonë në kuadër të prezantimit të programeve të studimit para maturantëve dhe më pas, për disa orë, punuan në fazën nismëtare të tij.

EKSPOZITË
BOTA NË SYTË NXËNËSVE
Gjilan, 6 MAJ
Sot, në ambientet e shkollës sonë, është hapur ekspozita përmbyllëse e këtij viti shkollor, me punime të nxënësve tanë, të cilët kanë ekspozuar punime në skulpturë, pikturë instalacione, video dhe një perfomancë.
Të pranishmit e shumtë, në hapje të saj, patën mundësi të shohin nga afër, talentin dhe zhvillimin artistik të nxënësve tanë gjatë gjithë vitit. Gjithashtu, në punimet e ekspozuara u pa një përkushtim serioz dhe një mënyrë unike e të shprehurit të botës së tyre të brendshme. Kjo bëri që edhe komentet, përshtypjet të ishin vlerësime inkurajuese në këtë rrugëtim në të cilin janë futur.
Në fund, duhet shtuar që për përgatitjen e kësaj ekspozite dhe hapjen e saj, kanë kontribuar profesorët e Aktivit të pikturës.

Një kapitull mbyllet, një rrugëtim i ri fillon.

Suksese të dashur maturantë! 🎓

Në kuadër të bashkëpunimit dhe marrëveshjes së realizuar ditë më parë, sot në shkollën tonë ishte e pranishme Policia e Kosovës, e cila zhvilloi një ligjëratë vetëdijësuese për nxënësit.

Gjatë këtij aktiviteti, u trajtuan rreziqet dhe pasojat e përdorimit të drogave, duke u fokusuar në rëndësinë e zgjedhjeve të shëndetshme dhe përgjegjësinë personale. Nxënësit patën mundësinë të bashkëbisedojnë, të shtrojnë pyetje dhe të përfshihen në një aktivitet ndërgjegjësues kundër kësaj dukurie negative.

Aktivitete të tilla janë shumë të rëndësishme për edukimin dhe mbrojtjen e të rinjve, duke i orientuar ata drejt një të ardhmeje më të sigurt dhe më të shëndetshme.

Ky aktivitet do të vazhdojë edhe në ditët në vijim.

Sot u hap Ekspozita e Dytë Vjetore e profilit të Dizajnit të Enterierit në ambientet e Shkollës së Artit Pamor “Adem Kastrati”, në Sallën e Korit.

Në këtë ekspozitë u prezantuan arritjet dhe punimet e nxënësve të këtij profili gjatë vitit shkollor, ku u shfaqën projekte kreative dhe inovative, duke reflektuar përkushtimin e tyre në zhvillimin profesional dhe artistik.
Para të pranishmëve foli drejtori i shkollës, Roland Masurica, i cili u uroi mirëseardhje të gjithëve, në veçanti nxënësve për arritjet e tyre, të cilat, siç theksoi ai, janë në nivel të kënaqshëm akademik. Ai gjithashtu u shpreh se kjo ekspozitë, tashmë tradicionale dhe që organizohet në fund të çdo viti shkollor, do të vazhdojë edhe në të ardhmen. Drejtori përshëndeti edhe profesorët dhe aktivin profesional të dizajnit të enterierit: Muhamed Sadriu, Reshat Alidema dhe Klodina Krasniqi Berisha.
Më pas, fjalën e mori profesori Reshat Alidema, i cili theksoi se kjo është ekspozita e dytë vjetore ku nxënësit demonstrojnë aftësitë e tyre si individë dhe si ekip. Ai përmendi gjithashtu se kjo ditë përkon me Ditën Botërore të Dizajnit, e cila shërben për të promovuar vlerat e dizajnit, për të ndikuar në përmirësimin e botës dhe për të krijuar zgjidhje inovative. Në fund, ai falënderoi kolegët për angazhimin maksimal dhe përkushtimin ndaj zhvillimit të nxënësve.
Më pas foli profesoresha Klodina Krasniqi Berisha, e cila theksoi se arkitektët flasin më shumë me vija dhe më pak me fjalë, dhe se pikërisht këto “vija” sot tregojnë punën dhe përkushtimin e nxënësve në këtë ekspozitë. Ajo vlerësoi bashkëpunimin e ngushtë mes profesorëve dhe nxënësve, duke shtuar se rrugëtimi i tyre akademik tashmë ka filluar seriozisht.
Në fund, fjalën e mori edhe përfaqësuesja e nxënësve, Diora Dervodeli, e cila falënderoi profesorët për mbështetjen e vazhdueshme gjatë gjithë vitit shkollor. Ajo theksoi se ky bashkëpunim i ka përgatitur ata për sfidat e jetës profesionale.