SHFMU "Liria" - Pogragjë

Sot, më 10 qershor, në kuadër të fushatës vetëdijësuese për parandalimin e zjarreve në territorin e Komunës së Gjilanit, në shkollën tonë u zhvillua një aktivitet informues me nxënësit.

Kjo fushatë organizohet nga Drejtoria për Mbrojtje dhe Shpëtim e Komunës së Gjilanit, në bashkëpunim me Stacionin Policor në Gjilan, Njësinë e Zjarrfikësve dhe Shpëtimit në Gjilan dhe Kryqin e Kuq të Kosovës – Dega Gjilan, me qëllim të ngritjes së vetëdijes për rreziqet që shkaktohen nga zjarret dhe rëndësinë e parandalimit të tyre.

Gjatë ligjëratës, nxënësit u njohën nga afër me shkaqet dhe pasojat e zjarreve, masat parandaluese dhe mënyrat e reagimit në raste emergjente.
Po ashtu, u shpërndanë materiale informuese për mbrojtjen e jetës, pronës dhe mjedisit.
Falënderojmë Drejtorinë për Mbrojtje dhe Shpëtim, Policinë e Kosovës, Njësinë e Zjarrfikësve dhe Shpëtimit, si dhe Kryqin e Kuq të Kosovës – Dega Gjilan, për bashkëpunimin dhe kontributin e tyre në edukimin dhe vetëdijesimin e nxënësve tanë.

Një falënderim i veçantë shkon për drejtorin e Drejtorisë për Mbrojtje dhe Shpëtim, z. Enver Shabani, bashkëvendasin tonë, për angazhimin dhe përkushtimin e tij të vazhdueshëm në shërbim të sigurisë dhe mirëqenies së qytetarëve, si dhe për kujdesin e treguar në edukimin e brezave të rinj për parandalimin e zjarreve.

Sot nxënësit e klasave të III-ta dhe V-ta realizuan një aktivitet jashtëshkollor në kuadër të temave Edukata Fizike dhe Ndotja e Mjedisit. Së bashku me mësimdhënësit Hysen Fejzullahu dhe Armend Rexhepi, nxënësit udhëtuan me biçikleta 🚴deri në fshatin Miresh.
Gjatë aktivitetit ata u ndalën te çeshmja e bashkëvendësit tonë Selim Duraku, ku pushuan dhe zhvilluan biseda rreth rëndësisë së aktivitetit fizik, mbrojtjes së mjedisit dhe ruajtjes së natyrës. Aktiviteti u zhvillua në një atmosferë të këndshme dhe edukative, duke i motivuar nxënësit për një mënyrë jetese më të shëndetshme dhe më të përgjegjshme ndaj mjedisit.
Falënderojmë mësimdhënësit dhe nxënësit për angazhimin dhe pjesëmarrjen në këtë aktivitet të dobishëm.

Sot nxënësit e klasës së IX realizuan ekskursionin e tyre, një aktivitet me vlera edukative, kulturore dhe rekreative.
Gjatë ekskursionit vizituam qytetin e Istogut, burimin e Drinit të Bardhë, Shpellën e Radavcit dhe qytetin historik të Prizrenit, duke shijuar trashëgiminë e pasur kulturore e historike të këtij qyteti.
Falënderojmë kujdestarët e klasave dhe mësimdhënësit pjesëmarrës për përkushtimin dhe kujdesin e treguar gjatë realizimit të këtij aktiviteti, si dhe drejtorin e shkollës për mbështetjen dhe angazhimin e tij në organizimin e ekskursionit.

Nxënësit tanë edhe kësaj radhe dëshmuan edukatë, disiplinë dhe sjellje shembullore, duke përfaqësuar denjësisht shkollën tonë.
Urojmë që kjo ditë të mbetet një kujtim i bukur dhe i veçantë për të gjithë pjesëmarrësit.

Sot në shkollën tonë u shënua 1 Qershori – Dita Ndërkombëtare e Fëmijëve, me aktivitete të ndryshme argëtuese, edukative dhe sportive.

Nxënësit morën pjesë në lojëra, punime kreative dhe aktivitete të shumta, duke kaluar çaste të bukura të mbushura me gëzim, buzëqeshje dhe entuziazëm.

Me këtë rast, falënderojmë të gjithë mësimdhënësit e shkollës sonë për përkushtimin, angazhimin dhe organizimin e këtyre aktiviteteve, të cilat e bënë këtë ditë edhe më të veçantë për nxënësit tanë.

Gëzuar 1 Qershorin të gjithë fëmijëve! Ju urojmë një fëmijëri të lumtur, të shëndetshme dhe plot suksese.

Mbrëmë u mbajt mbrëmja e semimaturës për nxënësit e klasës së IX të shkollës sonë.
Me këtë rast, falënderojmë prindërit për bashkëpunimin dhe mbështetjen e vazhdueshme, udhëheqësinë e shkollës për përkushtimin në krijimin e kushteve sa më të mira për nxënësit, kujdestarët e klasave dhe të gjithë mësimdhënësit që me punën, angazhimin dhe përkushtimin e tyre kanë ndikuar në formimin dhe edukimin e kësaj gjenerate.
Nxënësit tanë kanë qenë shembull i edukatës, respektit dhe sjelljes së mirë gjatë gjithë viteve të shkollimit, e veçanërisht gjatë klasës së IX.
Ata na kanë bërë krenarë me kulturën dhe vlerat që kanë treguar, duke dëshmuar se suksesi nuk matet vetëm me dije, por edhe me karakter.
Të dashur nxënës, ju urojmë shumë suksese në rrugëtimin tuaj të mëtejmë dhe ju falënderojmë për gjithçka që i keni dhënë shkollës sonë.

Sot nxënësit e shkollës sonë shijuan natyrën e bukur të fshatit dhe fushën sportive për disa aktivitete të organizuara me kujdes.
Këto aktivitete u realizuan si shenjë mirënjohjeje për nxënësit tanë, të cilët çdo ditë po tregojnë edukatë dhe sjellje të lartë.
Kjo u dëshmua edhe në Ditën e Shkollës, ku ata u dalluan për sjelljen dhe paraqitjen e tyre të mrekullueshme.