SHFMU "Fan Noli", Dujakë

Në kuadër të Festës së Shkollës, sot në shkollën tonë u organizua një program edukativo-arsimor me rastin e 1 Qershorit, Ditës së Fëmijëve dhe Festës së Abetares. Përmes këngëve, valleve, recitimeve dhe aktiviteteve të ndryshme, nxënësit tanë sollën atmosferë të ngrohtë festive dhe emocione të veçanta për të gjithë të pranishmit. Urime të gjithë fëmijëve këtë ditë të bukur!

Ambient i gjelbëruar dhe i mirëmbajtur, që krijon hapësirë të këndshme dhe frymëzuese për nxënësit tanë.

Në kuadër të aktiviteteve edukative për shënimin e Ditës së Zjarrfikësve, nxënësit e ciklit 1–5 realizuan një vizitë në stacionin e zjarrfikësve, ku patën mundësinë të njihen nga afër me punën, përkushtimin dhe rëndësinë e zjarrfikësve në shërbim të komunitetit.

Nxënësit u informuan rreth pajisjeve dhe mjeteve që përdoren gjatë intervenimeve, duke përfituar një përvojë të vlefshme edukative dhe argëtuese.

Falënderojmë zjarrfikësit për mikpritjen dhe gatishmërinë e tyre për të ndarë njohuri me nxënësit tanë.

Në kuadër të Ditës së Tokës, nxënësit tanë zhvilluan një aktivitet pastrimi në ambientet e shkollës dhe përreth saj. Me përkushtim dhe bashkëpunim, ata kontribuan në ruajtjen e një mjedisi më të pastër dhe më të shëndetshëm për të gjithë.🌏🌳

Në shkollën tonë u realizua një vizitë pune nga Drejtoria e Arsimit Komunal. Gjatë vizitës u diskutua për procesin mësimor dhe bashkëpunimin e mëtejshëm.

Mësimdhënësi Jahë Berisha, së bashku me nxënësit, kanë realizuar rregullimin dhe riparimin e luleve në ambientet e shkollës. Ky aktivitet kontribuon në zbukurimin e hapësirës shkollore dhe në zhvillimin e ndjenjës së përgjegjësisë së nxënësve për kujdesin ndaj mjedisit.

7 Marsi, Dita e mësuesit!

Në shenjë respekti dhe mirënjohjeje për kontributin në arsimimin e brezave, me rastin e 7 Marsit, ditës së mësuesit, mësimdhënësi Jahë Berisha është nderuar me mirënjohje nga Drejtoria Komunale e Arsimit në Gjakovë.

Njëkohësisht, ai është përzgjedhur nga kolektivi i shkollës si mësues i dalluar, për përkushtimin, profesionalizmin dhe punën e palodhshme në edukimin dhe arsimimin e nxënësve.

I urojmë shëndet dhe suksese të mëtejshme në rrugëtimin e tij profesional

Kuiz Diturie për 7 Marsin

Në kuadër të shënimit të 7 Marsit , “Ditës së Mësuesit”, në shkollën tonë u organizua një Kuiz Diturie me pjesëmarrjen e nxënësve nga klasat e ndryshme. Aktiviteti u zhvillua në një atmosferë të bukur garuese dhe kishte për qëllim të nxisë dijen dhe bashkëpunimin mes nxënësve.

Falënderojmë të gjithë nxënësit dhe mësimdhënësit për angazhimin dhe pjesëmarrjen në këtë aktivitet.