SHFMU "Mihal Grameno" Aneksi 1 - Fushë Kosovë

Pas një rrugëtimi të bukur dhe të mbushur me kujtime të paharruara, klasat e pesta përmbyllën një etapë të rëndësishme të shkollimit 🎓.
Me plot emocione dhe krenari, i përshëndesim nxënësit tanë 👩‍🎓👨‍🎓 dhe u urojmë rrugëtim të mbarë në hapat e rinj të dijes. Ju dëshirojmë suksese të shumta dhe një të ardhme të ndritur !
Njëkohësisht, shprehim mirënjohjen tonë të thellë për Shtëpinë Botuese Dukagjini 📖 për mbështetjen dhe kontributin e dhënë për shkollën tonë 🏫, përmes sigurimit të fotokopjeve 📄, dëftesave për nxënësit 📜 dhe banerit të përdorur gjatë realizimit të programit përmbyllës . Mbështetja juaj ishte me rëndësi të veçantë dhe kontribuoi në organizimin sa më të suksesshëm të këtij aktiviteti.
Falënderim i veçantë shkon për Sefedin Gashin 👏, i cili mundësoi pagesën e zërimit 🔊 për programin, si dhe për kompaninë AL Trade 🏢, e cila siguroi kornizën dekorative , duke i dhënë skenës një pamje më të bukur dhe festive . Kontributi, përkrahja dhe gatishmëria juaj për të ndihmuar janë shumë të vlerësuara dhe kanë ndikuar në realizimin me sukses të këtij aktiviteti.
Faleminderit për kujdesin dhe mbështetjen e vazhdueshme ndaj nxënësve dhe komunitetit tonë shkollor.

🌳 E premtja në natyrë ☀️

Më 05.06.2026, nxënësit e klasave të treta, së bashku me mësueset e tyre, kaluan një ditë të bukur në Parkun e Pishave në Sllatinë.

Natyra e bukur, ajri i pastër dhe ambienti i gjelbëruar krijuan kushte të shkëlqyera që nxënësit të argëtohen, të socializohen dhe të kalojnë kohë cilësore së bashku.
Përmes lojërave dhe aktiviteteve në grup, ata zhvilluan bashkëpunimin, respektin ndaj njëri-tjetrit dhe dashurinë për natyrën.

Momente të shumta buzëqeshjesh, lojërash dhe shoqërimi e bënë këtë vizitë një përvojë të veçantë dhe të paharrueshme për secilin nxënës. 🌿✨

🎈Gëzuar 1 Qershorin nga klasat e treta!

Me rastin e Ditës Ndërkombëtare të Fëmijëve, nxënësit e klasave të treta kaluan një ditë të mbushur me hare, kreativitet dhe momente të këndshme së bashku.

Përmes aktiviteteve të ndryshme, ata festuan botën e tyre të bukur, plot ëndrra, energji dhe buzëqeshje. Këto çaste të veçanta na rikujtojnë rëndësinë e fëmijërisë dhe lumturinë e çdo fëmije.

🌈 Urojmë që çdo ditë e tyre të jetë e mbushur me dashuri, sukses dhe gëzim.

🎉 Gëzuar 1 Qershorin!

🌈 1 Qershori – Dita Ndërkombëtare e Fëmijëve 🌈

Sot festojmë 1 Qershorin, ditën më të bukur për të gjithë fëmijët. Kjo ditë na kujton se fëmijët janë gëzimi, shpresa dhe e ardhmja e shoqërisë sonë.

Nxënësit e klasave të para e shënuan këtë ditë me buzëqeshje, lojëra, këngë dhe aktivitete argëtuese. Gjatë festës u krijua një atmosferë e ngrohtë dhe plot hare, ku secili fëmijë pati mundësinë të shprehë talentin dhe kreativitetin e tij.

Urojmë që çdo ditë e fëmijëve të jetë e mbushur me dashuri, kujdes, shëndet dhe lumturi. Gëzuar 1 Qershorin të gjithë fëmijëve!

🌸 Gëzuar Ditën e Fëmijëve! 🌸

🌲🎉 1 Qershori në natyrë 🎉🌲
Sot, nxënësit e klasave të katërta, kaluan një ditë të mrekullueshme në pishat e Sllatinës për të festuar 1 Qershorin – Ditën Ndërkombëtare të Fëmijëve.
Nxënësit u argëtuan me aktivitete të ndryshme sportive dhe lojëra në natyrë, si lojë me top, litar, vrapim dhe shumë aktivitete të tjera që sollën gëzim, energji dhe buzëqeshje gjatë gjithë ditës.
Ishte një përvojë e bukur që forcoi shoqërinë, bashkëpunimin dhe dashurinë për natyrën.

Urime 1 Qershori të gjithë fëmijëve! ❤️

“Fëmijët janë buzëqeshja e botës dhe e ardhmja jonë më e bukur.”

Me rastin e 1 Qershorit – Ditës Ndërkombëtare të Fëmijëve, në oborrin e shkollës sonë u organizuan aktivitete të ndryshme argëtuese për nxënësit e klasave të dyta.
Fëmijët e kaluan këtë ditë në një atmosferë të gëzueshme dhe plot jetë, duke marrë pjesë në vallëzim, lojëra me maskota dhe aktivitete të ndryshme në grupe. Në fund, u organizua edhe një piknik i improvizuar në oborrin e shkollës, ku nxënësit patën mundësinë të shijojnë ushqime të lehta dhe të kalojnë kohë të këndshme së bashku.
Kjo ditë u shndërrua në një përvojë të bukur dhe të paharrueshme për ta, duke sjellë buzëqeshje dhe momente të veçanta në një mjedis të sigurt dhe miqësor.

Shprehim falënderim të sinqertë për Nora Market për mbështetjen dhe kontributin e dhënë, që bëri të mundur realizimin e kësaj dite të veçantë për nxënësit tanë.

Gëzuar 1 Qershorin të gjithë fëmijëve! 🎉

✨Festa e Abetares✨

Me shumë gëzim dhe emocione u organizua Festa e Abetares, një ngjarje e veçantë që shënon përfundimin e hapit të parë të nxënësve në botën e dijes. Përmes recitimeve, këngëve dhe aktiviteteve të ndryshme, nxënësit treguan njohuritë dhe aftësitë që kanë fituar gjatë vitit shkollor.

Kjo festë ishte një dëshmi e punës, përkushtimit dhe suksesit të tyre në mësimin e shkronjave, leximit dhe shkrimit. Me buzëqeshje dhe entuziazëm, ata festuan një arritje të rëndësishme në rrugëtimin e tyre arsimor.

Urime të gjithë nxënësve për suksesin e arritur!
Ju dëshirojmë shumë suksese në hapat e ardhshëm të shkollimit.

❤️ “Duart që ndihmojnë janë zemra që edukojnë.”

Me rastin e festës së 1 Qershorit - Ditës së Fëmijëve dhe Kurban Bajramit, nxënësit e klasave të dyta dhe të treta realizuan aktivitetin humanitar “Nxënësit në Veprim”, në bashkëpunim me SOS Fshatrat e Kosovës.

Ky aktivitet u organizua me përkrahjen e Komunës së Fushë Kosovës dhe kishte për qëllim të sjellë gëzim dhe mbështetje për familjet dhe fëmijët në nevojë.
Me shumë dashuri, përkushtim dhe shpirt solidariteti, nxënësit tanë, së bashku me prindërit dhe mësimdhënësit, përgatitën pako ushqimore, duke dhuruar jo vetëm ndihmë materiale, por edhe kujdes, empati dhe humanizëm.

Përmes aktiviteteve të tilla, nxënësit mësojnë rëndësinë e solidaritetit, bashkëpunimit dhe kujdesit për të tjerët, duke u rritur jo vetëm si nxënës të mirë, por edhe si njerëz me zemër të madhe.

Falënderojmë nga zemra të gjithë prindërit, nxënësit, mësimdhënësit dhe bashkëpunëtorët që kontribuan në realizimin e këtij aktiviteti kaq domethënës.

Një falënderim i veçantë për mësuesen Ermira Kajtazi dhe mësuesen Florije Mehaj, organizatoret e aktivitetit, si dhe për Filloreta Musaj, asambleiste e Kuvendit Komunal në Fushë Kosovë, për përkrahjen e vazhdueshme, sigurimin e transportit dhe bashkëpunimin në realizimin e këtij aktiviteti humanitar.
Falënderojmë gjithashtu edhe Komunën e Fushë Kosovës për mbështetjen dhe përkrahjen në realizimin e kësaj iniciative humane.

Nxënësit e klasave të katërta, realizuan një vizitë edukative në Aeroportin “Adem Jashari”.

Kjo vizitë ishte një përvojë shumë interesante dhe e veçantë për nxënësit, të cilët patën mundësinë të njihen nga afër me funksionimin e aeroportit dhe punën e stafit që kujdeset për sigurinë dhe organizimin e fluturimeve.
Gjatë vizitës, nxënësit panë ambientet e aeroportit, pistën e fluturimeve dhe u informuan për procedurat që ndjekin udhëtarët para nisjes së avionëve. Ata dëgjuan me shumë kureshtje shpjegimet e punonjësve të aeroportit dhe bënë pyetje të ndryshme rreth avionëve, udhëtimeve ajrore dhe kontrollit të sigurisë.

Kjo vizitë ndikoi pozitivisht tek nxënësit, duke zgjeruar njohuritë e tyre dhe duke nxitur interesimin për profesionet që lidhen me aviacionin. Në fund të aktivitetit, nxënësit u larguan të lumtur dhe me përshtypje të bukura nga kjo eksperiencë e paharrueshme.

Të enjten, më 14.05.2026, nxënësit e klasave të treta realizuan vizita mësimore në Kuvendin Komunal të Fushë Kosovës dhe në Qendrën Kryesore të Mjekësisë Familjare.

Në Kuvendin Komunal, nxënësit u njohën me funksionimin, organizimin e punës dhe rëndësinë e vendimmarrjes në nivel lokal.
Ndërsa, në Qendrën Kryesore të Mjekësisë Familjare, ata u informuan për shërbimet shëndetësore dhe rëndësinë e kujdesit për shëndetin.

Këto vizita ishin një përvojë e vlefshme edukative për nxënësit.