SHFMU "Tefik Çanga" - Ferizaj

Libra kujtimesh të nxënësve të shkollës "Tefik Çanga" mora dhuratë sot, nga mësimdhënëset Violeta Avdiu-Rexha, Diana Marevci dhe Naile Miftari, prirë nga drejtorja e shkollës, Sueda Jusufi Hashani, ku ndamë bisedë mbi punën e angazhimet e kolektivit të kësaj shkolle në dobi të procesit arsimor e nxënësve të kësaj shkolle.

Në përmbyllje të vitit shkollor, u majtën mbledhjet me Aktivet Profesionale për muajin Qershor 2026, të udhëhequra nga pedagogia e shkollës.

Edhe sot në shkollën tonë vazhdoi programi përmbyllës i klasave të pesta, i organizuar me përkushtim nga mësueset Hanife Mehmeti, Qëndresa Sylejmani dhe Vjollca Berisha.

Programi ishte i pasur me këngë, valle, poezi, skeqe humoristike, interpretime instrumentale dhe aktivitete të tjera artistike, duke sjellë emocione të veçanta te nxënësit, prindërit dhe të pranishmit. Krahas gëzimit dhe krenarisë për arritjet e nxënësve, nuk munguan as lotët e ndarjes nga vitet e bukura të fëmijërisë me mësuesen.

Ky program u prezantua para prindërve, mësimdhënësve dhe stafit të shkollës, të cilët e duartrokitën dhe vlerësuan punën e palodhshme të nxënësve dhe mësueseve.

Në shenjë mirënjohjeje dhe vlerësimi për kontributin e tyre të çmuar në edukimin dhe formimin e brezave të rinj, mësueset u nderuan me lavdata nga shkolla.

Urime nxënësve për këtë etapë të përfunduar me sukses dhe suksese në rrugëtimin e tyre të mëtejshëm!

Sot, në shkollën tonë u mbajt programi përmbyllës i tri klasave të pesta, i organizuar nga mësueset: Diana Marevci, Violeta Avdiu dhe Naile Miftari. Të gjithë mbetëm të mahnitur nga organizimi dhe realizimi i këtij programi, i cili shënoi mbarimin e ciklit të arsimit fillor për nxënësit tanë.

Patëm kënaqësinë të shohim nxënës të përgatitur mirë për çdo sfidë, të edukuar dhe me talente të padiskutueshme. Pas sukseseve të tyre qëndrojnë prindër të përkushtuar dhe mësuese që kanë punuar me dashuri e profesionalizëm gjatë këtyre viteve.

Në fund të programit u bë edhe promovimi i librave të klasës, i realizuar me shumë përkushtim nga mësueset. Ky libër përmbledh poezi të bukura të shkruara nga vetë nxënësit, si dhe fotografi e aktivitete që pasqyrojnë rrugëtimin e tyre pesëvjeçar në arsimin fillor.

Nxënësve tanë u urojmë suksese të pafundme në rrugën e dijes, realizim të ëndrrave dhe arritje të reja në çdo hap të jetës së tyre!

Urime për këtë përmbyllje të suksesshme dhe shumë fat në kapitullin e ri që i pret!

Gjenerata e Semimaturantëve 2025/ 2026🫶

Sot në shkollën tonë u shënua një nga momentet më të veçanta dhe më prekëse të këtij viti shkollor, ceremonia e diplomimit të nxënësve të klasave të IX-ta.
Me zemra të mbushura me krenari dhe emocione, përcollëm një gjeneratë që për nëntë vite me radhë u rrit, mësoi, ëndërroi dhe krijoi kujtime të paharrueshme brenda mureve të shkollës sonë. Çdo buzëqeshje, çdo lot gëzimi dhe çdo duartrokitje ishte dëshmi e një rruge të mbushur me përkushtim, sakrificë dhe sukses.
Falënderim i veçantë për mësimdhënësit, kujdestarët, prindërit dhe të gjithë ata që me punën dhe mbështetjen e tyre kontribuuan në formimin e këtyre të rinjve. Mirënjohje edhe për të gjithë ata që ndihmuan në organizimin e kësaj ceremonie të bukur, duke e bërë këtë mbrëmje një kujtim të paharrueshëm.
Të dashur maturantë të vegjël, sot mbyllni një kapitull të rëndësishëm të jetës suaj dhe hapni një derë të re drejt së ardhmes. Ju urojmë që rruga juaj të jetë e mbushur me dije, guxim, suksese dhe ëndrra të realizuara.
Shkolla do të mbetet gjithmonë shtëpia juaj e dytë, ndërsa kujtimet që krijuat këtu do t’ju shoqërojnë kudo që të shkoni.
Urime diplomimin dhe shumë suksese në çdo hap të jetës!

Dje dhe sot në shkollën tonë u organizua me shumë sukses Festa e Abetares, një ngjarje e veçantë që shënon përmbylljen e një etape të rëndësishme në rrugëtimin arsimor të nxënësve të klasave të para.

Nën përkujdesjen e mësueseve Kaltrina Ratkoceri, Magbule Berisha, Lendita Bejta, Luljeta Hoxha, Zyhrije Shabani dhe Ibadete Sylejmani, nxënësit prezantuan një program të pasur artistik me këngë për fëmijë, vallëzime dhe recitime të ndryshme, duke dëshmuar talentin, përkushtimin dhe gëzimin e tyre për njohuritë e fituara gjatë këtij viti shkollor.

Në një atmosferë festive dhe plot emocion, të pranishëm ishin stafi i shkollës dhe prindërit, të cilët i duartrokitën me krenari paraqitjet e fëmijëve. Programi solli momente të bukura dhe mbresëlënëse, duke reflektuar punën e palodhur të nxënësve dhe përkushtimin e mësueseve të tyre.

Shkronjat u mësuan, dija nisi rrugëtimin. Urime vogëlushëve tanë për hapin e parë drejt një bote plot njohuri dhe suksese!

Në garën e këndimit për nder të Ditës Botërore të Fëmijëve, që organizoi Qendra Tregtare ETC, nxënësja e klasës IV-5, ENESA VISHI, fitoi çmimin e parë.

Sot, në shkollën tonë, u zhvillua një aktivitet i veçantë me rastin e 1 Qershorit – Ditës Ndërkombëtare të Fëmijëve, i përgatitur me përkushtim nga mësimdhënëset Laura Brahimi, Adelina Kallaba dhe Shpresa Musa.
Ky aktivitet solli gëzim, kreativitet dhe mesazhe të rëndësishme për fëmijët, duke vënë në pah rolin e tyre të çmuar në shoqëri. Përmes pikave të ndryshme artistike dhe pikturave, u promovuan të drejtat themelore të fëmijëve, si e drejta për arsim, mbrojtje, barazi, shprehje të lirë dhe një fëmijëri të lumtur e të sigurt. Çdo fëmijë meriton të dëgjohet, të respektohet dhe të ketë mundësi të zhvillojë potencialin e tij në një mjedis të dashur dhe mbështetës.

Në këtë aktivitet morën pjesë mysafirë nga DKA-ja, përfaqësues të OJQ-së IPEDU “Të Drejtat Tona”, si dhe përfaqësues të tjerë të ftuar. Një kontribut të rëndësishëm dhanë edhe mësimdhënësit dhe nxënësit, të cilët me angazhimin dhe përkushtimin e tyre mundësuan mbarëvajtjen e aktivitetit, duke mbështetur njëri-tjetrin dhe duke përfaqësuar denjësisht shkollën tonë.

Kjo ditë shërbeu si një kujtesë e bukur se fëmijët janë e tashmja dhe e ardhmja jonë, prandaj mbrojtja dhe respektimi i të drejtave të tyre mbetet përgjegjësi e përbashkët e të gjithëve.