SHFMU''Dardania''Rakaj-Ferizaj

Krenarë me arritjet e nxënësve tanë! 🌟

Nxënësi ynë, Arison Terziu, është testuar në Garat e Institutit Atom për inteligjencë, ku ka rezultuar me inteligjencë superiore dhe aftësi të spikatura. Ky vlerësim është arritur me referim nga psikologia e shkollës, Jetmire Beqiri ,e cila ka identifikuar potencialin e tij të veçantë.

Mësuesja Shpresa Beqiri e ka mbështetur dhe përgëzuar nxënësin për suksesin e arritur, duke theksuar përkushtimin dhe sjelljen e tij shembullore në shkollë.

Në këtë takim ishte e pranishme edhe nëna e nxënësit, e cila ka shprehur krenari për arritjet e djalit të saj.

Po ashtu, drejtori i shkollës e ka përgëzuar Arisonin dhe i ka ndarë një mirënjohje zyrtare për këtë arritje të rëndësishme, e cila përbën krenari për shkollën tonë.

Shkolla jonë mbetet krenare për nxënës të tillë të dalluar dhe të përkushtuar, duke i uruar Arison Terziut suksese të mëtejshme në rrugëtimin e tij arsimor.

Urime Arison Terziu!

Në ambientet e shkollës, në zyrën e drejtorit u zhvillua një takim me nxënësen Eriona Curroja, së bashku me prindin e saj dhe mësuesen Shukrije Ilazi.

Gjatë këtij takimi, Eriona u përgëzua për suksesin e saj të veçantë të arritur pas testimit në Institutin Atom, referuar nga psikologia e shkollës, znj. Jetmire Beqiri, ku ajo është vlerësuar me inteligjencë superiore dhe aftësi të spikatura. Ky rezultat u konsiderua një arritje me rëndësi dhe krenari për shkollën tonë.

Po ashtu, drejtori e përgëzoi psikologen e shkollës, znj. Jetmire Beqiri, për profesionalizmin, përkushtimin dhe punën e saj në identifikimin dhe mbështetjen e nxënësve me potencial të veçantë.

Mësuesja Shukrije Ilazi shprehu krenari dhe mbështetje për nxënësen, duke theksuar përkushtimin, sjelljen e mirë dhe punën e saj të vazhdueshme në mësime.

Në shenjë vlerësimi për rezultatet dhe angazhimin e saj, Erionës iu nda një mirënjohje nga drejtoria e shkollës.

Shkolla jonë mbetet krenare për nxënës të tillë të dalluar dhe të përkushtuar, duke i uruar Erionës shumë suksese të mëtejshme në rrugëtimin e saj arsimor.

Urime Eriona Curroja!

Sot, drejtori i shkollës priti në zyrën e tij nxënësin Rion Shora, së bashku me prindin e tij dhe mësuesen e tij, Teuta Ismani.

Gjatë këtij takimi, drejtori e përgëzoi Rionin për arritjen e tij të jashtëzakonshme, pas testimit të kryer në Institutin Atom, me referim nga psikologia e shkollës, znj. Jetmire Beqiri, të cilën drejtori e falënderoi për përkushtimin dhe punën profesionale në identifikimin dhe mbështetjen e nxënësit. Testimi ka rezultuar me vlerësim të lartë të inteligjencës, duke e cilësuar Rionin si nxënës me potencial të veçantë dhe aftësi të spikatura.

Në takim ishte e pranishme edhe mësuesja Teuta Ismani, e cila u shpreh shumë mbështetëse dhe krenare për Rionin, duke theksuar përkushtimin, sjelljen shembullore dhe rezultatet e tij të vazhdueshme në mësime.

Në shenjë mirënjohjeje për suksesin e arritur dhe për sjelljen e tij të shkëlqyer në shkollë, Rionit iu nda një mirënjohje zyrtare nga drejtoria e shkollës.

Shkolla jonë shpreh krenari për nxënës të tillë të dalluar, të sjellshëm dhe të përkushtuar, duke i uruar Rionit suksese të mëtejshme në rrugëtimin e tij arsimor.

Urime nxënësit,Rion Shora!

Sukseset e nxënësve tanë nuk kanë të ndalur. Me krenari dhe kënaqësi të veçantë ndajmë edhe një tjetër arritje të jashtëzakonshme nga shkolla jonë.

Nxënësi ynë, Endrit Imeri, klasa VIII, pas identifikimit dhe referimit nga psikologia e shkollës, Jetmire Beqiri, në bashkëpunim me kujdestaren e klasës, Zejnie Idrizi, si dhe me mbështetjen e vazhdueshme të prindërve, iu nënshtrua testimeve në Institutin Atomi dhe rezultoi me inteligjencë (IQ) të jashtëzakonshme.

Endriti ka qenë gjithmonë një nxënës i dalluar, me përkushtim të lartë dhe rezultate të shkëlqyera në procesin mësimor. Ai ka treguar aftësi të veçanta në lëndën e matematikës, ku ndër vite ka arritur suksese të rëndësishme, përfshirë vendin e dytë në garat komunale të matematikës, si dhe pjesëmarrje dhe rezultate të tjera të dalluara në gara dhe aktivitete të ndryshme shkollore.

Një kontribut të veçantë në zhvillimin e tij akademik ka dhënë edhe arsimtarja e matematikës, Lendita Imeri, e cila me përkushtim dhe profesionalizëm ka ndikuar në nxitjen dhe përkrahjen e talentit të tij.

Pas kalimit me sukses të tri fazave të vlerësimit, Endriti u përzgjodh zyrtarisht Atomist i Institutit Atomi, duke dëshmuar potencialin e tij të lartë intelektual dhe përkushtimin ndaj arritjeve akademike.

Urime Endritit, familjes së tij dhe stafit arsimor për këtë arritje të veçantë! I urojmë suksese të mëtejshme në rrugëtimin e tij drejt ekselencës.

Me krenari dhe gëzim të veçantë ndajmë suksesin e nxënëseve tona në Olimpiadën e Gjuhës Shqipe, të organizuar nga Komuna e Ferizajt.

Nxënësja Erina Aliu u vlerësua me Mirënjohje për Vendin e Parë, duke dëshmuar njohuri të shkëlqyera, përkushtim dhe aftësi të larta në fushën e gjuhës shqipe.

Po ashtu, nxënësja Alea Sinani u nderua me Mirënjohje për Pjesëmarrje, duke treguar angazhim, vullnet dhe përfaqësim dinjitoz në këtë garë.

Këto arritje janë rezultat i punës së palodhshme, përkushtimit dhe dashurisë për dijen. I përgëzojmë nxënëset për suksesin e arritur dhe u dëshirojmë edhe shumë suksese në të ardhmen.

Falënderime të veçanta për mësimdhënësen e gjuhës shqipe, Zejnie Idrizi, për punën profesionale, përkushtimin dhe mbështetjen e vazhdueshme në përgatitjen e nxënëseve, duke kontribuar në arritjen e këtyre rezultateve të shkëlqyera.

Urime të gjithëve për këtë sukses që na bën krenarë!

Njoftim

Njoftohen prindërit se regjistrimi për nxënësit në klasën përgatitore dhe klasën e parë fillon më 15.05.2026 dhe përfundon më 15.06.2026.

NJOFTIM

Me kënaqësi të veçantë ju njoftojmë se nxënësja e shkollës sonë, Erina Aliu, ka arritur një sukses të jashtëzakonshëm duke u renditur në vendin e dytë (me pikë të barabarta me vendin e parë) në Olimpiadën e Gjuhës Shqipe.

Ky rezultat është dëshmi e përkushtimit, talentit dhe punës së palodhur të Erinës, e cila na bën të gjithëve jashtëzakonisht krenarë si shkollë. Suksese të tilla janë frymëzim për të gjithë nxënësit tanë dhe një shembull i shkëlqyer i arritjeve që vijnë nga puna dhe vullneti.

Një falënderim i veçantë shkon edhe për mësimdhënësen Zejnije Idrizi, për përkushtimin, profesionalizmin dhe angazhimin e saj të vazhdueshëm ndër vite në përgatitjen dhe udhëheqjen e nxënësve drejt sukseseve të tilla.

Jemi shumë të lumtur dhe krenarë për këtë arritje të përbashkët!

Urime të përzemërta dhe suksese të mëtejshme!

Me krenari ju njoftojmë se nxënësi i klasës së tretë, Arison Terzija, u rendit i pari në kategorinë e tij (Kategoria 1) në garat e gjuhës angleze “Spelling Bee 2026”, të zhvilluara në nivel komunal, mes mbi 100 pjesëmarrësve.

Falë këtij suksesi ai do të vazhdoj garën në finale në nivel republike që do të mbahet në Prishtinë.

Përgëzojmë Arisonin për arritjen dhe i urojmë suksese në finale!

Mësimdhënësja e matematikës, Lendita Imeri, shpallet mësimdhënëse e dalluar për vitin shkollor 2025–2026 🎉📐

Në bazë të kritereve të përcaktuara nga MAShT dhe udhëzimeve nga Drejtoria Komunale e Arsimit, Këshilli i mësimdhënësve të shkollës “Dardania” ka zgjedhur mësimdhënësen e matematikës, Lendita Imeri, si mësimdhënëse të dalluar.

Me mbi 20 vite përvojë pune, ajo ka dëshmuar profesionalizëm, përkushtim dhe rezultate të shkëlqyera me nxënësit e saj. Edhe në rolin e koordinatores së cilësisë ka bërë një punë të shkëlqyer, ndërsa në aspektin profesional ka ndjekur trajnime të shumta, duke kontribuar vazhdimisht në ngritjen e cilësisë në shkollë.

Me rastin e 7 Marsit – Ditës së Mësuesit, i shprehim mirënjohje të thellë për punën, përkushtimin dhe shembullin që jep çdo ditë. Urime dhe suksese të mëtejshme!

Po ashtu uroj të gjithë mësimdhënësit për punën e tyre fisnike, që kanë bërë dhe vazhdojnë ta bëjnë me vite. Gëzuar 7 Marsin!

Me respekt,
Drejtori i shkollës
Zekir Burrniku

Në shkollën tonë u mbajt një takim informues me prindërit, në bashkëpunim me psikologen e shkollës Jetmira Beqiri, ku u diskutua për përdorimin e sigurt dhe të shëndetshëm të teknologjisë në fëmijërinë e hershme.
Gjatë takimit u theksua se roli i prindit mbetet kyç në:
• menaxhimin e kohës që fëmijët kalojnë para ekranit;
• përzgjedhjen dhe sigurinë e përmbajtjeve që ata ndjekin;
• krijimin e një ekuilibri të shëndetshëm mes botës digjitale dhe aktiviteteve/terapive zhvilluese.

Prindërit patën mundësinë të ndajnë përvojat e tyre, sfidat e përditshme, por edhe sukseset e vogla që kontribuojnë në zhvillimin e shëndetshëm të fëmijëve.

Përmes bashkëpunimit të vazhdueshëm mes familjes dhe shkollës, ne punojmë së bashku për mirëqenien dhe zhvillimin e fëmijëve tanë.

Faleminderit prindërve për besimin dhe pjesëmarrjen aktive.