Gjimnazi "Kuvendi i Arbërit" - Faqja Zyrtare

Gjimnazi "Kuvendi i Arbërit" - Zëri i nxënësve, rruga drejt të ardhmes së sigurtë ✔️ Did you subscribe to ATV's Official channel? 👇🏼 ► https://www....

Nis zyrtarisht projekti “Green Schools Initiative” në Ferizaj – Shkolla “Kuvendi i Arbërit” përfituese e investimeve në efikasitet energjetik

Komuna e Ferizajt ka nisur zyrtarisht implementimin e projektit “Green Schools Initiative” (GSI), i cili financohet nga Bashkimi Evropian në kuadër të Programit IPA III të Bashkëpunimit Ndërkufitar Kosovë – Maqedonia e Veriut. Projekti ka filluar më 1 qershor 2026 dhe synon përmirësimin e efikasitetit energjetik dhe promovimin e praktikave të qëndrueshme në institucionet arsimore.

Komuna e Ferizajt është përfituese direkte e këtij projekti, ndërsa shkolla “Kuvendi i Arbërit” është njëra nga tri shkollat e përzgjedhura për realizimin e aktiviteteve të planifikuara.

Në kuadër të projektit, në shkollën “Kuvendi i Arbërit” do të realizohen disa investime dhe aktivitete të rëndësishme, përfshirë instalimin e sistemit të ngrohjes me pompë termike, ndërrimin e dritareve të dëmtuara, organizimin e aktiviteteve edukative ndërkufitare “Green School Fair” dhe “Student Challenge” për nxënësit, si dhe trajnime për stafin mësimdhënës në fushën e qëndrueshmërisë dhe efikasitetit energjetik.

Ky projekt pritet të kontribuojë në përmirësimin e kushteve mësimore, uljen e konsumit të energjisë dhe rritjen e ndërgjegjësimit të nxënësve dhe stafit shkollor për rëndësinë e mbrojtjes së mjedisit dhe përdorimit të qëndrueshëm të burimeve energjetike.

CEREMONIA E DIPLOMIMIT 2026 🎓

Në një atmosferë të mbushur me emocion, krenari dhe gëzim, Gjimnazi ynë organizoi Ceremoninë Solemne të Diplomimit për maturantët tanë, të cilët kurorëzuan me sukses një etapë shumë të rëndësishme të jetës së tyre. 🌟

Salla “Bill Clinton” ishte e mbushur përplot me prindër, familjarë, mysafirë, bashkëpunëtorë dhe miq të shkollës, të cilët ndanë së bashku emocionet e kësaj dite të veçantë. Prania dhe mbështetja e tyre e bëri këtë ceremoni edhe më madhështore dhe më kuptimplotë.
Një falënderim i veçantë shkon për institucionet dhe bashkëpunëtorët tanë, si Drejtoria Komunale e Arsimit, Policia e Kosovës, KFOR-i, FSK dhe shumë partnerë të tjerë, të cilët u nderuan me mirënjohje për kontributin dhe mbështetjen e vazhdueshme për zhvillimin e gjimnazit dhe realizimin e vizionit tonë. 🤝

Gjatë ceremonisë u shpërblyen edhe nxënësit e dalluar, të cilët me përkushtimin, talentin dhe sukseset e tyre në aktivitete shkollore, kulturore dhe sportive, e bënë shkollën tonë krenare. 🏆📚⚽

Të dashur maturantë,
Ju nuk po merrni vetëm një diplomë — po merrni me vete kujtime, miqësi, sfida të kapërcyera dhe ëndrra të reja për të ardhmen. Rruga përpara jush është e hapur dhe plot mundësi. Besoni në veten tuaj, mos hiqni dorë nga ëndrrat dhe ecni gjithmonë përpara me guxim, dije dhe dinjitet.

Suksesi nuk është fundi i rrugëtimit, por fillimi i një kapitulli të ri. Urime diplomimin dhe shumë suksese në çdo hap të jetës suaj! 🎓❤️

STORIE SUKSESI👏

Me krenari dhe kënaqësi ju njoftojmë se nxënësi ynë Diell Sahiti, i klasës XI-1, ka arritur sukses të shkëlqyer në Garat Republikane nga lënda e Kimisë.

Ky rezultat i lartë është dëshmi e përkushtimit, punës së palodhshme dhe talentit të Diellit, si dhe e angazhimit të vazhdueshëm të profesorëve tanë në përgatitjen dhe mbështetjen e nxënësve drejt arritjeve të tilla.

Në emër të shkollës, e përgëzojmë Diellin për këtë sukses të merituar dhe i urojmë shumë suksese të tjera në rrugëtimin e tij arsimor e shkencor.

Urime, Diell! 🔬🏆

Pas shqyrtimit të ofertave nga Komisioni për Ekskursionin njëditor në relacionin Ferizaj - Burimi i Drinit të Bardhë - Gjakovë - Ferizaj, sipas Ftesës për Ofertë me nr. protokolli 148, të datës 27.04.2026; Komisioni ka vendosur se kompania më e favorshme dhe që i plotëson kërkesat e kësaj Ftese për Ofertë, dhe që është shpallur fituese është "Dili Commerce".

𝐅𝐓𝐄𝐒Ë 𝐏Ë𝐑 𝐎𝐅𝐄𝐑𝐓Ë

Gjimnazi “Kuvendi i Arbërit’’ organizon ekskursionin për maturantët e vitit shkollor 2025/2026 në relacionin Ferizaj - Burimi i Drinit të Bardhë - Gjakovë - Ferizaj. Ftohen operatorët ekonomikë për parashtrimin e ofertave përkatëse (transport), duke ju përmbajtur kushteve të kësaj oferte.

Linku: https://drive.google.com/file/d/1p-Fad9CXJJ1xWnW0akcM8FRGKmEDrxb-/view?usp=sharing

TELEGRAM NGUSHËLLIMI

Me dhembje e pikëllim të thellë, morëm lajmin për ndarjen nga jeta të veteranit të arsimit, profesorit ferizajas, Ruzhdi Esati.

Me këtë rast, Kryetari i Komunës së Ferizajt, Agim Aliu përmes telegramit i shpreh ngushëllime të sinqerta familjes Esati, kolegëve të arsimit, miqve e të njohurve të të ndjerit.

"Me dhembje e pikëllim, mora lajmin për ndarjen nga jeta të profesorit të respektuar, veteranit të arsimit, Prof. Ruzhdi Esati. Vepra e kontributi i tij për arsimin ferizajas do të mbeten gjurmë e pashlyeshme në mbamendjen e shoqërisë. Ngushëllime të sinqerta familjes Esati, kolegëve të arsimit, miqve e të njohurve të të ndjerit. Shpirti i tij pushoftë në paqe" mbyllet telegrami i ngushëllimit.

🕯️ Homazh për Orges Bajramin

Sot, Gjimnazi “Kuvendi i Arbërit” organizoi homazhe në ambientet e shkollës në kujtim të nxënësit tonë të dashur, Orges Bajrami.

Nxënësit vendosën lule në nderim të tij, duke shprehur dashurinë dhe respektin për një shok që do të mbetet gjithmonë në zemrat tona.

Të pranishëm në këtë moment të rëndë ishin familjarët e Orgesit, përfaqësues nga Komuna dhe Drejtoria Komunale e Arsimit, si dhe drejtorë, mësimdhënës dhe nxënës nga shkollat e mesme “Elena Gjika”, “Dr. Shaban Hashani” dhe “Zenel Hajdini”, bashkë me gjithë komunitetin e Gjimnazit “Kuvendi i Arbërit”.

Fjalë rasti mbajtën përfaqësuesi i familjes Bajrami, drejtori i shkollës Bajram Rexhepi, Kryetarja e Këshillit të Nxënësve dhe nxënësi Roni Shahini të cilët ndanë dhimbjen dhe kujtimet për Orgesin.

Gjimnazi “Kuvendi i Arbërit” shpreh mirënjohje të thellë për të gjitha institucionet që qëndruan pranë familjes Bajrami dhe shkollës sonë në këto momente të vështira. Falënderojmë stafin mjekësor të Emergjencës në Ferizaj për përkushtimin e tyre, Kryetarin e Komunës dhe Drejtorinë Komunale të Arsimit për mbështetjen institucionale, si dhe mediat për qasjen profesionale dhe të ndjeshme ndaj këtij rasti.

Në këto momente të rënda, le të jemi më pranë njëri-tjetrit, të vlerësojmë jetën dhe të kujdesemi për njëri-tjetrin më shumë se kurrë. Kujtimi i Orgesit do të jetojë gjithmonë në zemrat tona dhe do të mbetet pjesë e pandarë e komunitetit tonë shkollor.

U prehtë në paqe. 🕊️

NJOFTIM ZYRTAR

Me pikëllim të madh ju njoftojmë se ceremonia e varrimit të nxënësit tonë të dashur Orges Bajrami; mbahet sot, në orën 17:00, në varrezat e fshatit Tërrn.

Humbja e tij është një plagë e rëndë për familjen, miqtë dhe për të gjithë ne që patëm fatin ta njohim. Orgesi do të kujtohet gjithmonë si një i ri i urtë, i respektuar dhe me vlera të larta njerëzore, i dashur për shokët dhe mësimdhënësit.

Në këto momente të rënda dhe të papërshkrueshme, Drejtoria e Gjimnazit, mësimdhënësit dhe nxënësit qëndrojnë pranë familjes Bajrami, duke ndarë dhimbjen dhe pikëllimin e madh.

U prehtë në paqe shpirti i tij.

Drejtoria e shkollës, mësimdhënësit dhe të gjithë nxënësit e gjimnazit janë thellësisht të pikëlluar për ndarjen nga jeta të nxënësit tonë të dashur.

Kjo humbje e rëndë na ka prekur thellë të gjithëve, pasi u shua në moshë të re një djalë plot jetë, ëndrra dhe shpresë. Ai do të kujtohet gjithmonë për karakterin e tij gazmor dhe sjelljen e tij të ngrohtë e miqësore me të gjithë në shkollë.

Në këto momente të vështira, ndajmë dhimbjen me familjen e të ndjerit dhe shprehim ngushëllimet tona më të sinqerta për familjen, të afërmit, shokët dhe shoqet.

U prehtë në paqe shpirti i tij i bardhë! 🕊️