SHFMU “Jeronim de Rada” - Ferizaj

01/09/2026

Filloi mbarë viti i ri shkollor

Sot, në ShFMU “Jeronim de Rada”, filloi një kapitull i ri për nxënësit e të gjitha niveleve , por kësaj dite iu gëzuan më së shumti ata që u ulën për herë të parë në bankat shkollore.

Me shumë gëzim, buzëqeshje dhe emocione, 6 paralelet e klasës së parë nisën rrugëtimin e tyre të parë në botën e dijes, së bashku me mësueset e tyre .

Drejtoria e shkollës u ka uruar të gjithë nxënësve të klasave të para mirëseardhje, shumë suksese, shëndet dhe një vit të mbarë shkollor.

Mirë se erdhët, vogëlushë!
Qofshi të suksesshëm gjithmonë dhe paçi mbarësi më tutje!📚📓

01/09/2026

Të dashur nxënës, prindër dhe mësimdhënës të ShFMU “Jeronim de Rada”

Me rastin e fillimit të vitit të ri shkollor, ju përcjellim urimet më të përzemërta për një vit të mbushur me suksese, dije, përkushtim, gëzim dhe arritje të reja.

Sot hapen edhe një herë dyert e shkollës sonë, duke sjellë me vete emocione, takime të reja, miqësi, sfida dhe shumë mundësi për të mësuar e për t’u zhvilluar.
Çdo vit shkollor është një kapitull i ri, në të cilin secili nxënës ka mundësinë të zbulojë aftësitë e veta, të realizojë synimet dhe të bëjë një hap më pranë ëndrrave të tij.
Në këtë fillimvit shkollor janë bërë punë mjaft të rëndësishme teknike në mënyrë që ambientet e mësimit e hapësirat e tjera në ShFMU “Jeronim de Rada “ të jenë sa më të përshtatshme e të pastërta për nxënësit dhe mësimdhënësit.

Një mirëseardhje e veçantë për nxënësit tanë më të rinj fatosat dhe yllkat e klasëve të para të cilët sot nisin një rrugëtim të ri në bankat shkollore.
Urojmë që shkolla të jetë për ju një vend ku do të ndiheni të dashur, të sigurt dhe të motivuar për të mësuar çdo ditë diçka të re.

Të dashur nxënës, mos kini frikë nga sfidat.
Besoni në veten tuaj, punoni me përkushtim, respektoni njëri-tjetrin dhe mos u dorëzoni asnjëherë.
Çdo përpjekje e juaja është një hap drejt suksesit.

Falënderojmë edhe mësimdhënësit tanë për përkushtimin, profesionalizmin dhe dashurinë që tregojnë çdo ditë në edukimin dhe arsimimin e brezave të rinj. Po ashtu, falënderojmë prindërit për mbështetjen dhe bashkëpunimin e vazhdueshëm.

Le të jetë ky vit shkollor një vit i punës, bashkëpunimit, respektit dhe rezultateve të shkëlqyera.

Orari mësimor në shkollën tonë nuk ka ndonjë ndryshim nga viti i kaluar
Niveli I-V e zhvillon mësimin pasdite nga ora 13:30.
Ndërkaq niveli VI-IX vijon paradite nga ora 08:00.

🌟 Suksese të gjithë nxënësve!
📚 Mësim të mbarë!
🍀 Një vit shkollor të lumtur, të begatë dhe plot arritje!

Mirë se vini përsëri në ShFMU “Jeronim de Rada”! 🏫

18/06/2026

Më të mirët shpërblehen në ShFMU “Jeronim de Rada”

Nxënësit e dalluar, ata që sollën tituj e kupa të shumta dhe klasa që u kujdes gjatë tërë vitit shkollor të ketë klasën e pastërt u shpërblyen sot me një shëtitje një ditore me karakter mësimor në gjithë Kosovën.
Kjo shëtitje u realizua sot dhe nxënësit vizituan disa monumente natyrore e historike.
Klasa VII-2 gjatë këtij viti e fitoi garën si klasa më e pastër, ndërkaq sot mori edhe shpërblimin e ekskursionit bashkë me nxënësit e dalluar nga klasët e tjera.
Për Drejtorinë e shkollës dhe mësimdhënësit, kjo mënyrë e motivimit të nxënësve është inkurajim për më shumë rezultate e punë të dobishme edhe në të ardhmen.

17/06/2026

Nxënësja Reina Shatrolli me sukses të shkëlqyer në garat e “Atomit”

Pas një rrugëtimi 10-mujor dhe tri raundeve sfiduese të garës "Atomi" me ç'rast përzgjedhen nxënësit me intelegjencë të jashtëzakonshme në lëndën e matematikës, nxënësja e shkollës sonë Reina Shatrolli kl.VIII-5, shënoi një sukses të shkëlqyer duke arritur shkallë të lartë të intelegjencës 149.
Nxënsja Reina Shatrolli është njëra nga nxënëset e përzgjedhura në mesin e 30 nxënësve më të mirë nga mbarë Republika e Kosovës.
Urime për këtë sukses të merituar Reina!
Të lumte!
Suksese tutje!

11/06/2026

11/06/2026

Linku për të shikuar festën e Abetares

11/06/2026

Festat me shumë ngjyra janë traditë e bukur e shkollës “Jeronim de Rada”

Festa e Abetares dhe programi i përfundimit të klasëve të V-ta janë dy nga festat e bukura të cilat i përjetuan fëmijët tanë këto ditë.

Kontributi i mësuesve në krijimin e emocioneve të veçanta dhe në nxitjen e kreativitetit ishte i madh në mënyrë që ata të ndihen të lumtur e të përmbushur në përfundim të këtij viti shkollor.
ShFMU “Jeronim de Rada” e ka traditë që në
bazë të punës së mrekullueshme që bëhet gjatë tërë vitit, të kurorëzohet me pamje kaq të bukura që i kanë kënaqur mësimdhënësit, prindërit e më së shumti vet nxënësit.

Këto festa janë organizuar edhe për nder të festës 12 qershorit Ditës së Çlirimit si mirënjohje për sakrificën dhe kontributin e çlirimtarëve për lirinë e atdheut🇦🇱🇽🇰

03/06/2026

Rregullohet oborri i ShFMU “Jeronim de Rada”

Oborri i ShFMU “Jeronim de Rada” po merr një pamje tjetër duke iu falënderuar mbështetjes nga komuna e Ferizajt.
Nxënësit tanë tani e tutje do të kenë fusha moderne futbolli, basketbolli , volejbolli si dhe hapësira të tjera për lojë e kreativitet.
Ndërkaq po planifikohet të ketë investime edhe në pjesën mbrapa shkollës për të lehtësuar qasjen e prindërve dhe nxënësve në shkollë.
Ky projekt është inicuar nga Këshilli Drejtues i shkollës, Këshilli i Prindërve si dhe komunitetet e tjera shkollore me dëshirën që nxënësit të kenë hapësira sa më të përshtatshme.
Drejtoria e shkollës shpreh falënderim të thellë ndaj Komunës së Ferizajt dhe të bashkëpuntorëve të tjerë të cilët kanë kontribuar që ky projekt kaq i dobishëm të realizohet.

25/05/2026

Filloi regjistrimi i fëmijëve në nivelin parafillor

Në kuadër të përgatitjeve për vitin e ri shkollor, sot ka nisur regjistrimi i fëmijve për nivelin parafillor në ShFMU “Jeronim de Rada”.
Interesimi i prindërve për t’i regjistruar fëmijët e tyre në këtë nivel, ishte mjaft i madh edhe sivjet.
Ndërkaq janë 4 edukatore të cilat do t’i presin këta fëmijë në muajin shtator.