Shfmu "Muharrem Shemsedini" - Faqja zyrtare

Sot përfunduam me sukses trajnimin me bazë në shkollë me temën “Aparatura didaktike në materialet mësimore dhe përdorimi i saj në klasë”, të udhëhequr nga prof. Osman Buleshkaj dhe prof. Bekim Morina.
Ky trajnim është i pari i këtij lloji në Kosovë që u realizua në shkollën tonë, ndaj jemi shumë mirënjohës.

Gjatë këtij trajnimi patëm mundësinë të zgjerojmë njohuritë dhe të avancojmë praktikat tona profesionale për përdorimin sa më efektiv të aparaturës didaktike në procesin mësimor.
Në përfundim të trajnimit, pjesëmarrësit u pajisën me certifikata.

Shprehim mirënjohjen tonë të veçantë për Kryetarin e Këshillit të Prindërve, z. Fidan Bibaj, i cili financoi këtë trajnim dhe vazhdon të japë kontribut të çmuar për shkollën tonë. Falënderojmë gjithashtu prof. Osman Buleshkaj dhe prof. Bekim Morinën për angazhimin dhe profesionalizmin e treguar gjatë realizimit të trajnimit.

Me rastin e Ditës Ndërkombëtare të Fëmijëve, më 1 Qershor, të dy klasat e para ishin të ftuara nga Qendra Rekreative për Fëmijë “Arbi” SH.P.K., ku kaluan momente të gëzueshme dhe të paharrueshme përmes aktiviteteve të ndryshme argëtuese dhe rekreative.

Më 21.05.2026, nxënësit e klasëve të para mbajtën Festën e Abetares.

Me një program të bukur, së bashku me mësueset e tyre, Pranvera Hysiqi dhe Valentina Osmani, ata u paraqitën para prindërve dhe të ftuarve, duke shënuar një moment të veçantë dhe kujtim të paharruar.

Shëndet dhe suksese në vijim, nxënës të dashur! 🫶🏻📚

1 Qershori- Dita Ndërkombëtare e Fëmijëve

Me rastin e Ditës Ndërkombëtare të Fëmijëve, 1 Qershorit, 2 klasat Përgatitore organizuan një sërë aktivitetesh argëtuese për fëmijët. Gjatë kësaj dite u zhvilluan gara të ndryshme, të cilat sollën gëzim, entuziazëm dhe momente të paharrueshme për të gjithë pjesëmarrësit.

Në përfundim të aktiviteteve u bë edhe ndarja e medaljeve për fëmijët, si vlerësim për pjesëmarrjen dhe angazhimin e tyre.

Ideja dhe planifikimi i këtyre aktiviteteve u realizuan nga edukatorja Fitnete Provoliu në bashkëpunim me arsimtarin Fatlum Hajrullahu, të cilin e falënderojmë për kontributin dhe mbështetjen e tij. Gjithashtu, edukatorja Dashurie Sefa e mirëpriti këtë iniciativë dhe mori pjesë në realizimin e aktiviteteve.
Falënderojmë edhe drejtorin z. Gazmend Fazliun, i cili e përkrahu dhe e mirëpriti këtë bashkëpunim në të mirë të nxënësve.
Gëzuar 1 Qershori!🎉

Nxënësit e klasës përgatitore të edukatores Fitnete Provoliu realizuan vizitë edukative dhe humanitare në kuadër të programit për bamirësi dhe të drejtat e fëmijëve. Fillimisht vizituan Kryqin e Kuq, ku dorëzuan dhurata për shoqatën “Unë Mundem”, duke mësuar rëndësinë e solidaritetit dhe se të gjithë fëmijët duhet të trajtohen të barabartë. Zyrtarët e Kryqit të Kuq na pritën me shumë dashuri dhe ligjëruan për rëndësinë e ndihmës dhe mbështetjes ndaj atyre që kanë nevojë.
Më pas, vizita vazhdoi në Muzeun e Qytetit, ku nxënësit u njohën me historinë dhe kulturën e vendit. Në fund, ata vizituan Bifurkacionin e Lumit Nerodime, ku panë nga afër lumin që ndahet në dy degë dhe rrjedh drejt Detit të Zi dhe Detit Egje.
Kjo vizitë ishte një përvojë e vlefshme edukative, kulturore dhe humanitare për nxënësit.
Këto aktivitete jashtëkurrikulare u mbështetën nga Këshilli i Prindërve të kësaj klase. Po ashtu, falënderojmë drejtorin që aprovoi këto kërkesa dhe mbështeti realizimin e këtyre aktiviteteve.

Shkolla jonë ka filluar dje trajnimin me bazë në shkollë, të udhëhequr nga Osman Buleshkaj, me temën: “Aparatura didaktike në materialet mësimore dhe përdorimi i saj në klasë”.

Ky trajnim është financuar nga Kryetari i Këshillit të Prindërve, Fidan Bibaj, të cilin e falënderojmë për përkrahjen dhe kontributin e vazhdueshëm ndaj shkollës sonë.

Në kuadër të programit edukativo-arsimor jashtëkurrikular, nxënësit e dy klasave Përgatitore realizuan vizita në disa institucione të rëndësishme të komunës sonë, me qëllim njohjen nga afër me rolin dhe shërbimet që ato ofrojnë për qytetarët.

Gjatë këtyre vizitave, nxënësit patën mundësinë të vizitojnë Policinë, ku u njohën me punën dhe përgjegjësitë e policëve për ruajtjen e rendit dhe sigurisë.
Në QKMF – Stomatologji, fëmijët mësuan për rëndësinë e higjienës orale dhe kujdesit ndaj dhëmbëve.

Vizita në Stacionin e Zjarrfikësve ishte mjaft interesante dhe argëtuese për nxënësit, pasi ata panë nga afër pajisjet dhe automjetet që përdorin zjarrfikësit gjatë intervenimeve.

Në fund, nxënësit vizituan edhe Bibliotekën e qytetit, ku u njohën me librat, rregullat e leximit dhe rëndësinë që ka libri në zhvillimin e dijes dhe imagjinatës së tyre.

Këto aktivitete u realizuan nën përkujdesjen dhe angazhimin e edukatoreve Fitnete Provoliu dhe Dashurie Sefa.

Falënderojmë përzemërsisht të gjithë përgjegjësit e këtyre institucioneve për pritjen dhe bashkëpunimin e tyre!

Krosi Pranveror
Në kuadër të aktiviteteve sportive u mbajt Krosi Pranveror në Strazhë. Në garat e vrapimit në 100m, rezultatet ishin këto:
Klasat VI–VII
Femra:
🥇 Vendi i parë – Liana Arifi
🥈 Vendi i dytë – Fazile Shabani
Meshkuj:
🥇 Vendi i parë – Enis Krivanjeva
🥈 Vendi i dytë – Dior Rekaja
🥉 Vendi i tretë – Arjanit Uruçi
Klasat VIII
Femra:
🥇 Vendi i parë – Melisa Aliu
🥈 Vendi i dytë – Arbëresha Aliu
Meshkuj:
🥇 Vendi i parë – Ergys Zenuni
🥈 Vendi i dytë – Rion Hyseni
🥉 Vendi i tretë – Diar Muharremi
Nxënësit fitues u shpërblyen me medalje.
Falënderojmë të gjithë nxënësit për pjesëmarrjen në këtë aktivitet sportiv dhe mësimdhënësit për ndihmën në realizimin e këtij aktiviteti të rëndësishëm për nxënësit tanë.