17/08/2026
Në përkujtim të mësuesit dhe atdhetarit
Fazli Graiçevci
Sot, më 17 gusht, 62 vjet më parë, kujtojmë me respekt dhe krenari ish-mësimdhënësin e shkollës sonë, mësuesin dhe atdhetarin e shquar Fazli Graiçevci, i cili dha jetën për çështjen kombëtare.
Më 17 gusht të vitit 1964, UDB-ja jugosllave e mbyti nën tortura, në Burgun e Prishtinës, mësuesin atdhetar Fazli Graiçevci.
Ai u lind në prill të vitit 1935, në fshatin Sankoc të Drenicës. Shkollën fillore e kreu në Komoran, ndërsa në vitin shkollor 1953/1954 u regjistrua në Shkollën Normale të Prishtinës.
Gjatë viteve të shkollimit ishte bashkëmoshatar dhe shok klase me figura të njohura të arsimit dhe të jetës publike, ndër ta Rexhep Qosjen, Ismail Dumoshin, Qamil Hasanin dhe normalistë të tjerë. Vitin e fundit të shkollimit e përfundoi në Prizren.
Gjatë viteve 1960, Fazli Graiçevci punoi si mësues në shkollën tonë „Rilindja“ në Dritan (ish-Dobroshec), si dhe në disa fshatra të Drenicës.
Për një periudhë punoi edhe në NGB „Rilindja“, një organizatë kulturore në Prishtinë.
Krahas punës së tij arsimore, Graiçevci ishte i përkushtuar edhe ndaj çështjes kombëtare. Ai mbante kontakte me atdhetarë e veprimtarë të kohës, ndër ta Zeqir Gërvallën, Azem Beqirin, si dhe veprimtarin e hershëm të çështjes kombëtare, Adem Demaçin, e të tjerë.
Fazli Graiçevci ishte pjesëmarrës në mbledhjen e shtatorit të vitit 1963, në të cilën u mor vendimi për themelimin e organizatës së fshehtë atdhetare „Lëvizja Revolucionare për Bashkimin e Shqiptarëve“.
Mbytja mizore e tij në burg, më 17 gusht 1964, si dhe përpjekjet e pasuksesshme të UDB-së për ta fshehur krimin dhe për ta paraqitur vdekjen e tij si pasojë të një sëmundjeje, bënë që figura e mësuesit martir, Fazli Graiçevcit, të shndërrohej në një simbol të qëndresës dhe në burim frymëzimi për breza të tërë shqiptarësh.
Emri dhe vepra e Fazli Graiçevcit ishin burim frymëzimi edhe për shumë luftëtarë të Ushtrisë Çlirimtare të Kosovës, ndër ta edhe për ish-nxënësin e tij, të burgosurin politik dhe komandantin e UÇK-së në Drenicë, He**in e Kombit Fehmi Lladrovci, si dhe për shumë të tjerë që vazhduan rrugën e tij të përkushtimit ndaj atdheut.
Sot, me krenari, emrin e Fazli Graiçevcit e mbajnë shumë institucione shkollore dhe rrugë në Republikën e Kosovës.
Lavdi e përjetshme mësuesit, atdhetarit dhe heroit të shkollës sonë, Fazli Graiçevcit!
Emri dhe vepra e tij do të mbeten të paharruara në kujtesën e shkollës sonë dhe të brezave që mësojnë e rriten në të.
