28/10/2022
Kitob ulashish eng katta yaxshilik!
Bugun Sergeli tumanidagi 33-sonli alohida ta'lim ehtiyoji bo‘lgan bolalar uchun ixtisoslashtirilgan maktabga bolalarni kitobxonlikka qiziqtirish maqsadida tuman Axborot kutubxona markazining xodimlari bir qancha yangi badiiy adabiyotlar bilan tashrif buyurishdi.
"Mehr" kutubxona loyihasi doirasida markaz o‘z hududida joylashgan maxsus maktablar, mehribonlik uylari va qariyalar uylariga yangi kitoblar ulashishni maqsad qilgan. Loyiha doirasida Axborot kutubxona markazi xodimlari har hafta o‘qituvchi va o‘quvchilarga ularni qiziqtirgan kitoblarni olib kelishga kelishishdi.
— Kitob ulashish eng ezgu amallardan biri, — deydi maktab direktorining ma'naviy-ma'rifiy ishlar bo‘yicha o‘rinbosari Roza Imashova. — Biz tuman Axborot kutubxonasi bilan kelishgan holda kitobxon o‘quvchilarimiz uchun maxsus to‘garak mashg‘ulotlari tashkil etishni rejalashtirdik. Ularga "Mehr" kutubxona loyihasi doirasida qilinayotgan xayrli ishlari uchun minnatdorchilik bildiramiz.
