Uzbekistan State Institute of Arts and Culture

Ertaga O‘zbekiston milliy terma jamoasi FIFA Jahon chempionati doirasidagi ilk uchrashuvini Kolumbiya terma jamoasiga qarshi o‘tkazadi.

Bu nafaqat futbol, balki mamlakatimiz sporti tarixidagi eng muhim voqealardan biridir. Mustaqillikning 35 yillik davrida millionlab yurtdoshlarimiz orzu qilgan natija — O‘zbekistonning Jahon chempionatidagi ishtiroki bugun tarixga aylanmoqda.

O‘zbekiston davlat san’at va madaniyat instituti jamoasi ushbu tarixiy musobaqada milliy terma jamoamizga ulkan muvaffaqiyatlar tilaydi.

Ishonamizki, futbolchilarimiz yuksak mahorat, matonat va Vatanga sadoqat namunalarini namoyon etib, xalqimizga unutilmas lahzalarni tuhfa etadilar.

Bugun butun O‘zbekiston bir maqsad atrofida birlashgan — milliy terma jamoamizning muvaffaqiyati. Maydondagi har bir harakat, har bir g‘alaba millionlab yurtdoshlarimiz qalbida g‘urur va faxr tuyg‘ularini yanada mustahkamlaydi.

Olg‘a, O‘zbekiston! Tarixiy mundialdagi yurishing muborak bo‘lsin!

Nodirbek Sayfullayev,
O‘zbekiston davlat san’at va madaniyat instituti rektori, professor

⚡️ Yodgor Sa’diyevning 80 yoshi munosabati bilan ma’naviy-ma’rifiy kecha bo‘lib o‘tdi

O‘zbek milliy akademik drama teatrida O‘zbekiston, Qoraqalpog‘iston va Tojikiston xalq artisti, taniqli kino hamda teatr aktyori Yodgor Sa’diyevning 80 yoshi munosabati bilan ma’naviy-ma’rifiy kecha bo‘lib o‘tdi.

Sana munosabati bilan O‘zbek milliy akademik drama teatrida "Adolat fasli" spektakli namoyish etildi. Spektakl tomoshabinlar tomonidan katta qiziqish va iliq taassurotlar bilan kutib olindi.

Namoyishdan so‘ng tadbir ishtirokchilari Yodgor Sa’diyevni qutlug‘ 80 yosh bilan muborakbod etib, unga mustahkam sog‘lik, uzoq umr va ijodiy muvaffaqiyatlar tiladilar.

Mazkur ma’naviy-ma’rifiy kecha san’at ahlining fidokorona mehnatini qadrlash, milliy teatr san’ati an’analarini ulug‘lash hamda yosh avlodni buyuk ustozlar hayoti va ijodi bilan yaqindan tanishtirishga xizmat qildi.

O‘zbekiston davlat san’at va madaniyat instituti jamoasi Yodgor Sa’diyevni tavallud ayyomi munosabati bilan samimiy muborakbod etadi.

🎓 QABUL–2026: O‘ZDSMI

Abituriyentlar diqqatiga!!!

2026/2027 o‘quv yili uchun qabul jarayonlari boshlandi.

📌 Arizalarni my.uzbmb.uz platformasi orqali topshirishingiz mumkin.

🌐 Qabul masalalari bo'yicha yangiliklar bilan O‘zDSMI rasmiy sayti hamda ijtimoiy tarmoqlardagi sahifalari orqali tanishib borishingiz mumkin.

☎️ Qabul masalalari bo‘yicha Call Center:
📞 +998 71 230 28 40
📞 +998 71 230 28 42
📞 +998 71 230 28 48

📍 Manzil: Toshkent shahri, Yalang‘och dahasi, 127-a uy.

✨ Kelajagingizni san’at va madaniyat bilan bog‘lashni istasangiz, O‘zbekiston davlat san’at va madaniyat institutini tanlang!

Bugun O‘zbekiston davlat san’at va madaniyat instituti rektori, professor Nodirbek Sayfullayev rahbarligida barcha prorektorlar, ijtimoiy–ma’naviy muhit barqarorligini ta’minlash bo‘yicha rektor maslahatchisi, Ishlar boshqarmasi boshlig'i, bo‘lim boshliqlari, fakultet dekanlari va kafedra mudirlari ishtirokida navbatdagi yig‘ilish bo‘lib o‘tdi.

Yig‘ilishda dastlab joriy yilning 1 iyun kuni O‘zbekiston Respublikasi Prezidenti Shavkat Mirziyoyev raisligida o‘tkazilgan madaniyat va san’at xodimlari bilan sohani yanada rivojlantirish bo‘yicha kelgusidagi ustuvor vazifalarga bag‘ishlangan uchrashuvda belgilab berilgan vaziflarning institutda amalga oshirilishi muhokama qilindi.

Ushbu masala yuzasidan so‘zga chiqqan rektor Prezidentimiz tomonidan madaniyat va san’at sohasi vakillari bilan o‘tkazilgan tarixiy uchrashuvda sohani yangi bosqichga olib chiqishga qaratilgan muhim vazifalar belgilab berilganini ta’kidladi.

Xususan, yosh iste’dodlarni qo‘llab-quvvatlash, har bir talabaning shaxsiy brendini shakllantirish, ijodiy mahsulotlarini tijoratlashtirish, dual ta’lim tizimini keng joriy etish, taniqli ijodkorlarni ta’lim jarayoniga jalb qilish hamda “Art-menejment”, “Kreativ industriya” kabi zamonaviy yo‘nalishlarni o‘quv dasturlariga kiritish bo‘yicha aniq topshiriqlar berilganini qayd etdi.

Shuningdek, madaniyat va san’at sohasi mamlakat ma’naviy taraqqiyoti, yoshlar tarbiyasi va milliy qadriyatlarni mustahkamlashning muhim omili sifatida alohida e’tirof etilganini ta’kidladi.

Rektor mazkur vazifalar O‘zbekiston davlat san’at va madaniyat instituti faoliyatida ham ustuvor yo‘nalish sifatida amalga oshirilishini, institutda talabalarning ijodiy va kasbiy salohiyatini ro‘yobga chiqarish, ustoz-shogird an’analarini mustahkamlash, ta’lim, ilm-fan va amaliyot integratsiyasini kuchaytirish, xorijiy hamkorlik aloqalarini kengaytirish hamda zamonaviy kreativ industriya talablariga javob beradigan raqobatbardosh kadrlarni tayyorlash bo‘yicha tizimli ishlar davom ettirilishini alohida ta’kidlab o‘tdi.

Bu esa Prezident tomonidan bildirilgan yuksak ishonchni oqlash va madaniyat hamda san’at ta’limini yanada rivojlantirishga xizmat qilishini qayd etdi.

Shundan so’ng masala yuzasidan ma’sullarning axborotlari tinglandi.

Shuningdek, 2026-2027 о‘quv yili qabul jarayonlarini qonunchilik talablari asosida adolatli, shaffof, xolis va yuqori saviyada tashkil etish va о‘tkazish masalasi ham ko’rib chiqildi.

Nodirbek Sayfullayev mamlakatimizda korrupsiyaga qarshi kurashish davlat siyosatining ustuvor yo‘nalishlaridan biri ekanini ta’kidlab, ta’lim tizimida adolat, shaffoflik va qonun ustuvorligini ta’minlash masalalariga alohida to‘xtaldi. Xususan, yangi o‘quv yili uchun qabul jarayonlari arafasida kasbiy (ijodiy) imtihonlarni adolatli, xolis va yuqori tashkiliy darajada o‘tkazish institut oldidagi eng muhim vazifalardan biri ekanini qayd etdi. Shu maqsadda barcha zarur tashkiliy-huquqiy va nazorat mexanizmlari ishga solinayotgani, imtihon jarayonlarining ochiqligi va shaffofligini ta’minlash bo‘yicha aniq choralar belgilanganini ta’kidladi.

Rektor, shuningdek, abituriyentlarning ijodiy va amaliy ishlari taniqli san’atkorlar hamda mustaqil mutaxassislar ishtirokida baholanishi, imtihon natijalari har kuni institutning rasmiy veb-sayti orqali e’lon qilinishi, korrupsiya va tanish-bilishchilikka mutlaqo yo‘l qo‘yilmasligi bo‘yicha qat’iy talablar qo‘yilganini qayd etdi. Shu bilan birga, abituriyentlar va ularning ota-onalari uchun qulay sharoitlar yaratish, videokuzatuv hamda onlayn translyatsiya tizimlaridan samarali foydalanish orqali qabul jarayonlarining yanada ochiq va shaffof o‘tishi ta’minlanishini alohida ta’kidlab o‘tdi.

Yig’ilishda shuningdek, 2025-2026-о‘quv yili bitiruvchilarini ish bilan ta’minlash holati, Yakuniy davlat attestatsiyasining natijalari va ijro intizomi kabi muhim masalalar muhokama qilindi.

❗️Ushbu masalalar yuzasidan mutasaddilarning axborotlari tinglandi hamda barcha mas’ullarga tegishli topshiriqlar berildi.

Bugun O‘zbekiston davlat san’at va madaniyat institida o’tkazilgan “Hozirgi zamon о‘zbek teatr san’atida milliy qadriyatlar va innovatsiyalar uyg‘unligi” nomli Respublika ilmiy-amaliy anjumani doirasida O‘quv teatrida “Sahna nutqi kafedrasi professor-o’qituvchilari tomonidan sahnalashtirilgan “Imon” spektaklining namoyishi bo’lib o‘tdi.

Ushbu namoyishda institut rektori, professor Nodirbek Sayfullayev va institut jamoasi ishtirok etdi.

Izzat Sultonning "Imon" dramasi o‘zbek dramaturgiyasida inson ruhiyati va vijdon erkinligi masalasini falsafiy teranlikda yoritgan nodir asarlardan biri hisoblanadi.

Asar markazida turgan professor Komilov obrazi orqali muallif ilm va hayotdagi haqiqat, sadoqat hamda ma’naviy poklik tushunchalarini kishi irodasi sinovdan o‘tadigan murakkab vaziyatlar bilan bog‘lab ko‘rsatadi.

Pyesa jamiyatdagi loqaydlik va munofiqlikka qarshi kurashib, tomoshabinni botiniy poklanishga va har bir qadamni vijdon tarozisiga qo‘yib bosishga chorlaydi.

Kafedra v.b professori Ramz Qodirov tomonidan sahnalashtirilgan ushbu spektakldagi har bir obraz mohir pedagoglar va yosh izlanuvchilar tomonidan yuksak professional darajada, o‘ziga xos mahorat bilan talqin etildi.

Ayniqsa, tajribali ustozlarning sahnadagi plastikasi va nutq madaniyati asarning dramatik yukini tomoshabinga to‘laqonli yetkazib berishga xizmat qildi. Mazkur ijrolar to‘plami institutning ijodiy salohiyati naqadar yuqori ekanligidan dalolat beradi.

Spektaklning aynan kafedra professor-o‘qituvchilari tomonidan sahnalashtirilgani ushbu ijodiy loyihaning eng muhim jihatlaridan biri bo‘ldi. Zero, ko‘p yillik tajriba, ilmiy-nazariy bilim va amaliy mahorat uyg‘unligi sahna asarining g‘oyaviy-badiiy qimmatini yanada yuksaltirdi. Bu kabi tashabbuslar nafaqat tomoshabinlarga yuksak estetik zavq bag‘ishlaydi, balki yosh avlod uchun mahorat maktabi vazifasini ham o‘taydi. Eng muhimi, ustozlarning sahnadagi bevosita ijodiy ishtiroki ta’lim va amaliyot uyg‘unligini ta’minlab, institutda shakllangan kuchli teatr maktabi va ijodiy muhitning yorqin namunasini namoyon etdi.

Bugun O‘zbekiston davlat san’at va madaniyat institutida “Hozirgi zamon о‘zbek teatr san’atida milliy qadriyatlar va innovatsiyalar uyg‘unligi” nomli Respublika ilmiy-amaliy anjumani bo‘lib o‘tdi.

Anjumanning yalpi majlisini ochib berar ekan, institut rektori, professor Nodirbek Sayfullayev bugun yurtimizda san’at va madaniyat rivojiga berilayotgan e’tibor, milliy teatr san’atini rivojlantirish, uning zamonaviy taraqqiyot tendensiyalari, milliy qadriyatlarga tayangan holda innovatsion yondashuvlarni keng joriy etish masalalariga alohida to‘xtalib o‘tdi.

“Barchamizga ma’lumki, joriy yilning 1-iyun kuni Hurmatli Prezidentimiz madaniyat va san’at sohasi vakillari bilan uchrashuv о‘tkazdi. Mazkur tarixiy uchrashuv davomida Davlatimiz Rahbari tomonidan madaniyat va san’at sohasining istiqboldagi taraqqiyotini ta’minlashga qaratilgan qator muhim tashabbuslar ilgari surildi, tizimni yangi bosqichga olib chiqishga xizmat qiladigan amaliy vazifalar belgilab berildi.

Xususan, milliy madaniyatimiz va san’atimizni asrab-avaylash, uni xalqaro miqyosda keng targ‘ib etish, yosh iste’dodlarni qо‘llab-quvvatlash, ijodkorlar uchun yanada qulay shart-sharoitlar yaratish hamda madaniyat muassasalari faoliyatini takomillashtirish masalalariga alohida e’tibor qaratildi. –dedi rektor.

Shuningdek, rektor institutda ilmiy salohiyatni oshirish, professor-o‘qituvchilar va tadqiqotchilarning ilmiy faoliyatini qo‘llab-quvvatlash, ilmiy tadqiqotlar sifatini yuksaltirish hamda ularning natijalarini amaliyotga samarali joriy etish masalalariga alohida to‘xtaldi.

Ta’kidlanganidek, so‘nggi yillarda institutda ilmiy salohiyatni mustahkamlash, yosh olimlarni qo‘llab-quvvatlash, xalqaro ilmiy hamkorlikni kengaytirish va nufuzli ilmiy nashrlarda maqolalar chop etish borasida tizimli ishlar amalga oshirilmoqda. Bu esa ta’lim, ilm-fan va amaliyot integratsiyasini ta’minlash, soha rivojiga xizmat qiladigan zamonaviy ilmiy maktablarni shakllantirishda muhim omil bo‘lib xizmat qilmoqda.

Anjuman yalpi majlisida quyidagi ma’ruzalar tinglandi hamda muhokama qilindi.

“ZAMONAVIY O‘ZBEK DRAMATURGIYASINING TEATR REPERTUARLARIDAGI O‘RNI: AN’ANA VA YANGI TAMOYILLAR”

Abdurasulov Shohrux Abdunaimovich

O‘zbekiston Respublikasi Fanlar akademiyasi
San’atshunoslik instituti yetakchi ilmiy xodimi,
san’atshunoslik fanlari bo‘yicha falsafa doktori (PhD),
katta ilmiy xodim


“ZAMONAVIY О‘ZBEK TEATRIDA MILLIY QADRIYATLAR VA INNOVATSIYALAR UYG‘UNLIGI”

Maxmudova Hamida Axyulovna

O‘zbekiston davlat san’at va madaniyat instituti professori,
О‘zbekistonda xizmat kо‘rsatgan yoshlar murabbiysi

“QО‘G‘IRCHOQ TEATRI REJISSYORLARINI TAYYORLASH JARAYONIDA «USTOZ–SHOGIRD» AMALIY MODELI”

Shomurod Yusupov

О‘zbek Milliy qо‘g‘irchoq teatri bosh rejissyori,
О‘zbekistonda xizmat kо‘rsatgan artist, dotsent


“ZAMONAVIY О‘ZBEK TEATRIDA YANGI BADIIY IFODA VOSITALARI VA MULTIMEDIA TEXNOLOGIYALARI”

Sodiqov Ilhom Yakubovich

O‘zbekiston davlat san’at va madaniyat instituti dotsenti


Anjumanda respublikamizdagi yetakchi teatr rejissyorlari va vakillari, taniqli olimlar, professor-o‘qituvchilar, tadqiqotchilar hamda soha mutaxassislari ishtirok etdilar. Tadbir davomida teatr san’atining dolzarb muammolari, milliy sahna madaniyatining bugungi holati va uni yanada rivojlantirish istiqbollari yuzasidan fikr-mulohazalar almashildi.

✅Yalpi majlis yakunida ishtirokchilar sertifikatlar bilan taqdirlandi.

Shuningdek, konferensiya “Rejissura va aktyorlik san’atida yangi tendensiyalar: an’ana va innovatsiyalar uyg‘unligi” hamda “Yangi davr о‘zbek teatrida transformatsion jarayonlar: san’atlar sintezi kontekstida” nomli sho‘balarda davom ettirildi.

✅Konferensiya ma’ruzlari to‘plam sifatida nashr etildi.