Tərtər Rayon S.Zeynalov adına Kəngərli kənd tam orta məktəbi

08/25/2026

26 Avqust – Laçın Şəhəri Günü: İşğaldan Böyük Qayıdışa və Yaşıl İntibaha Doğru
26 Avqust Azərbaycan Respublikasının təqvimində sadəcə bir gün deyil, milli qürurumuzun, tarixi ədalətin və dirçəlişin təcəssümüdür. Azərbaycan Respublikasının Prezidenti cənab İlham Əliyevin 31 iyul 2023-cü il tarixli Sərəncamına əsasən təsis edilən Laçın Şəhəri Günü, 30 ilə yaxın davam edən həsrətin son bulduğu və zəfərin təntənəsinin yaşandığı xüsusi bir tarixdir.
Tarixə nəzər salsaq, 1923-cü ildə Abdallar kəndi Laçın adlandırılaraq şəhər statusu almış, 1930-cu il avqustun 8-də isə mərkəzi Laçın şəhəri olan Laçın rayonu inzibati ərazi vahidi kimi təşkil edilmişdir. Şimaldan Kəlbəcər, cənubdan Qubadlı, şərqdən Xocalı, Şuşa və Xocavənd rayonları, qərbdən isə Ermənistanla həmsərhəd olan, 1 şəhər, 1 qəsəbə və 125 kənddən ibarət Laçının ümumi sahəsi 1835 kvadratkilometrdir. Rayon 72 min hektar yaylaq sahəsinə və 34 min hektar zəngin meşə massivinə malikdir.
Lakin böyük strateji əhəmiyyətə malik Laçın rayonu 1992-ci il mayın 18-də AXC-Müsavat cütlüyünün hakimiyyət hərisliyi və çirkin siyasi oyunları nəticəsində Ermənistan silahlı qüvvələri tərəfindən işğal olundu. Laçının işğalı coğrafi baxımdan Ermənistanla keçmiş Dağlıq Qarabağ Muxtar Vilayəti arasında əlaqə yaradaraq sonrakı itkilərimizin əsasını qoydu. İşğal nəticəsində rayon əhalisi etnik təmizləməyə məruz qaldı, 300-dən artıq hərbi və mülki şəxs həlak oldu və itkin düşdü. Təcavüzkar tərəfindən 217 mədəniyyət, 101 təhsil, 142 səhiyyə müəssisəsi, 462 ticarət obyektı, 5 musiqi məktəbi, 133 idarə, 54 dünya və 200-dən çox yerli əhəmiyyətli tarixi abidə vandalizmə məruz qalaraq talan və məhv edildi. Rəsmi İrəvan Cenevrə konvensiyaları üzrə öhdəliklərini kobud şəkildə pozaraq coğrafi adları dəyişdirdi, təbii resursları taladı və Suriyadan olan erməniləri qanunsuz məskunlaşdıraraq demoqrafik tərkibi dəyişməyə cəhd göstərdi.
Müzəffər Ali Baş Komandan İlham Əliyevin rəhbərliyi ilə Vətən müharibəsində əldə edilən şanlı Qələbə nəticəsində imzalanmış üçtərəfli bəyanata əsasən 2020-ci il 1 dekabr tarixində Laçın rayonu Azərbaycana təhvil verildi. 2022-ci il avqustun 26-da isə Laçın şəhəri, Zabux və Sus kəndləri tam nəzarətə götürüldü. Laçının işğaldan azad edilməsi uğrunda aparılmış döyüş əməliyyatlarında şücaət nümayiş etdirmiş Azərbaycan Respublikası Silahlı Qüvvələrinin 8418 hərbi qulluqçusu “Laçının azad olunmasına görə” medalı ilə təltif olundu.
Prezident İlham Əliyevin qeyd etdiyi kimi: “Biz öz doğma torpaqlarımızı işğalçılardan azad edəndən sonra mən demişdim ki, Qarabağı və Şərqi Zəngəzuru cənnətə çevirəcəyik. Cənnətin əgər təsviri varsa, bu gün bax, budur. Gözəl təbiət, əzəmətli dağlar, gözəl binalar, evlər – hər şey çox böyük zövqlə yaradılır ki, həm insanlar burada rahat yaşasınlar, həm də Laçın şəhərinin müasir siması Azərbaycanın əldə etdiyi uğurları ilə eyni səviyyədə olsun.”
Azərbaycan Respublikasının Nazirlər Kabinetinin 2025-ci il 13 iyun tarixli Qərarı ilə “Laçın şəhərinin 2040-cı ilədək inkişafına dair Baş Planı” təsdiq edilmişdir. Planda tətbiq edilən “15 dəqiqəlik şəhər” prinsipi sakinlərin və qonaqların rahat hərəkətini təmin edir. Bütövlükdə Laçında 1000-dən çox yaşayış evi tikilib və bərpa edilib. Şəhərdə yeni yaşayış məhəllələri, 510 şagird yerlik 2 nömrəli tam orta məktəb, uşaq bağçaları, xəstəxana və sosial obyektlər istifadəyə verilib.
2023-cü ilin 28 may tarixindən başlayan Büyük Qayıdış çərçivəsində 2026-cı ilin iyul ayına olan məlumata əsasən Laçın şəhərinə 614 ailə (2264 nəfər), Zabux kəndinə 217 ailə (823 nəfər), Sus kəndinə 59 ailə (215 nəfər), Bəylik kəndinə isə 89 ailə (363 nəfər) daimi məskunlaşıb. Köçürülən kəndlərdə müasir evlər, məktəblər, bağçalar inşa edilib, küçələrin işıqlandırılmasında günəş panellərindən və yaşıl energidən geniş istifadə olunur.
Laçın rayonu zəngin yaşıl enerji potensialına malikdir. Rayonda Güləbird, Mişni, Alxaslı, Zabux, Qarıqışlaq, Aşağı Malıbəyli, Mirik, Ağbulaq-1, Ağbulaq-2 və Şeylanlı su elektrik stansiyaları istismara verilib. Ümumi gücü 65,5 MVt olan 9 SES ilə rayonun mövcud elektrik tələbatı 100% yaşıl enerji hesabına ödənilir, artıq qalan enerji ölkə sisteminə ötürülür.
Rayonun nəqliyyat və loqistika infrastrukturu sürətlə yenilənir. 75,8 kilometrlik Kəlbəcər-Laçın avtomobil yolunda 17 tunel və 23 körpü inşa olunur. 2021-ci ildə təməli qoyulan və dəniz səviyyəsindən 1700 metr hündürlükdə yerləşən ölkəmizin ən hündür aeroportu – Laçın Beynəlxalq Hava Limanı 28 may 2025-ci ildə istifadəyə verilib.
Məşğulluğun təmin edilməsi məqsədilə yaradılan “Laçın Aqro-Sənaye Parkı”nda mebel fabriki, prefabrik modul evlər müəssisəsi, “PIRSHAGHI” ayaqqabı fabrikinin filialı, “LATIFA” tikiş fabriki, heyvan kəsimi məntəqəsi və digər müəssisələr fəaliyyət göstərir. Qarabağ zonasında ilk nərəyetişdirmə təsərrüfatı olan “Həkəri Balıq Təsərrüfatı” və regional audiovizual mərkəz kimi fəaliyyət göstərən “Hoçazfilm” yaradıcılıq studiyası da istifadəyə verilib.
Turizm sahəsində Zerti kəndində 120 otaqlı “Laçın” İstirahət Kompleksi açılıb, Həkəri çayı sahilində bulvar, çimərlik, əyləncə mərkəzi və saatda 800 sərnişinə xidmət edəcək kanat yolunun inşası həyata keçirilir. 11 iyul 2026-cı ildə isə 700 min nəfəri içməli su ilə təmin edəcək 100 milyon kubmetrlik “Həkəriçay” su anbarının təməli qoyulub.
MDB Humanitar Əməkdaşlıq Şurasının qərarı ilə Laçın şəhəri “MDB-nin mədəniyyət paytaxtı – 2025” elan olunmuş və 3 iyun 2025-ci ildə bununla bağlı rəsmi açılış mərasimi keçirilmişdir. Dövlət başçısının azad olunmuş Laçına ardıcıl səfərləri, beynəlxalq zirvə görüşlərinin məhz burada təşkil edilməsi bölgənin strateji və mədəni əhəmiyyətini nümayiş etdirir. Bu gün Laçın öz doğma sakinləri ilə birlikdə yenidən dirçəlir və cənnət məkana çevrilir.

08/24/2026

AZƏRBAYCAN-ÖZBƏKİSTAN ƏLAQƏLƏRİ YENİ TƏRİXİ MƏRHƏLƏDƏ
Azərbaycan Respublikasının Prezidenti cənab İlham Əliyevin Özbəkistanın Milli İnformasiya Agentliyinə (UzA) verdiyi hərtərəfli və məzmunlu müsahibə iki qardaş ölkə arasında günü-gündən möhkəmlənən strateji tərəfdaşlığın, sarsılmaz müttəfiqliyin aydın təzahürüdür. Dərin tarixi köklərə, ortaq mədəniyyətə, dil və mənəvi dəyərlərə söykənən Azərbaycan-Özbəkistan əlaqələri bu gün özünün ən yüksək inkişaf mərhələsini yaşayır.
Dövlət başçımızın vurğuladığı kimi, iki ölkə arasında siyasi dialoq müstəsna dərəcədə yüksək səviyyədədir. Son beş ildə reallaşan 15 qarşılıqlı ali səfər bu dinamikanın bariz göstəricisidir. Azərbaycan Prezidenti cənab İlham Əliyev və Özbəkistan Prezidenti cənab Şavkat Mirziyoyev arasındakı səmimi dostluq, qarşılıqlı etimad və hörmət dövlətlərarası münasibətlərin müttəfiqlik səviyyəsinə yüksəlməsində müstəsna rol oynayır. İmzalanan “Strateji tərəfdaşlığın dərinləşdirilməsi haqqında Bəyannamə” və “Müttəfiqlik münasibətləri haqqında Müqavilə”, eləcə də Ali Dövlətlərarası Şuranın səmərəli fəaliyyəti bu birliyin hüquqi və institusional təməlini daha da bərkitmişdir.
İqtisadi, ticari və investisiya sahələrində qazanılan nailiyyətlər də böyük qürur hissi doğurur. 2025-ci ildə ticarət dövriyyəsinin 3 dəfədən çox artaraq 795 milyon dollara çatması, 2026-cı ilin ilk aylarında da bu artım dinamikasının uğurla davam etməsi həyata keçirilən məqsədyönlü siyasətin nəticəsidir. 500 milyon dollar nizamnamə kapitalı olan Azərbaycan-Özbəkistan İnvestisiya Şirkəti, 15 iclası keçirilmiş Hökumətlərarası Komissiya, neft-qaz və yaşıl enerji layihələri (“Yaşıl Dəhliz Birliyi” MMC) iqtisadi potensialımızı birləşdirir.
İşğaldan azad edilmiş Füzuli rayonunda 100 hektarlıq “Dostluq bağı”nın salınması, Özbəkistanın təşəbbüsü ilə inşa edilən Mirzə Uluqbəy adına modern məktəb, “Chevrolet” və “Isuzu” avtomobillərinin birgə istehsalı, eləcə də Daşkənddə “PASHA Holding” tərəfindən inşa edilən “The Ritz-Carlton” hoteli və “Sea Breeze Uzbekistan” kompleksi qardaşlığımızın əməli sübutudur.
Mədəni-humanitar sahədə, media, təhsil və regional əməkdaşlıq istiqamətində atılan addımlar xalqlarımızı daha da yaxınlaşdırır. Bakının mərkəzində “Özbəkistan” parkının təməlinin qoyulması, 10-dan çox şəhərimizin qardaşlaşması və 2026-cı ildə QHT-lər üçün ilk dəfə birgə qrant müsabiqəsinin elan edilməsi bu əlaqələri yeni məzmunla zənginləşdirir. Eyni zamanda, Türk Dövlətləri Təşkilatı çərçivəsində sıx inteqrasiya və Azərbaycanın Mərkəzi Asiya Dövlət Başçılarının Məşvərət görüşlərində tamhüquqlu iştirakı ilə formatın “C6”ya çevrilməsi regionda sülhün, sabitliyin və davamlı tərəqqinin təmin olunmasına böyük töhfə verir.
Azərbaycan və Özbəkistan sarsılmaz qardaşlıq iradəsi ilə parlaq gələcəyə doğru birgə addımlamaqda devam edir!

08/22/2026

📢 Məktəbəhazırlıq qrupları üzrə məktəb seçiminə başlanılır!

2026–2027-ci tədris ili üzrə məktəbəhazırlıq qruplarına qəbul üzrə məktəb seçiminə başlanılır. Valideynlər 21 iyul saat 11:00-dan başlayaraq Bakı şəhəri istisna olmaqla, ölkənin digər rayon və şəhərlərində məktəb seçimini həyata keçirə bilərlər. Bakı şəhəri üzrə seçim prosesi 21 iyul saat 15:00-da, tədris digər dillərdə aparılan bölmələr üzrə isə 22 iyul saat 11:00-da başlayacaq.

📅 Qeydiyyat mektebeqebul.edu.az portalı üzərindən həyata keçirilir və 14 sentyabr saat 18:00-dək davam edəcək.
📌 Qeyd edək ki, məktəbəhazırlıq qruplarına yalnız 2021-ci il təvəllüdlü, yəni cari ildə 5 yaşı tamam olan uşaqlar qəbul olunur.

08/14/2026

Naxçıvanda həyata keçirilən strateji layihələr Muxtar Respublikanı regionun əvəzolunmaz nəqliyyat və enerji mərkəzinə çevirir
Azərbaycan Respublikasının Prezidenti cənab İlham Əliyevin 11 avqust 2026-cı il tarixdə Naxçıvan Muxtar Respublikasına növbəti – 17-ci səfəri və səfər çərçivəsində Azərbaycan Televiziyasına verdiyi geniş müsahibə ölkəmizin dayanıqlı inkişafının, artan hərbi qüdrətinin və strateji hədəflərinin nümayişi baxımından müstəsna əhəmiyyət kəsb edir. Müzəffər Ali Baş Komandanın Naxçıvana hər bir səfəri böyük mənaya və gözəl nəticələrə malik olmaqla yanaşı, Muxtar Respublikanın hərtərəfli tərəqqisinə yeni təkan verir.
Dövlətimizin başçısı müsahibəsində Naxçıvanın müdafiə potensialının gücləndirilməsinin hər zaman prioritet məsələ olduğunu xüsusi vurğulamışdır. Ölkə rəhbərinin Sərəncamı ilə yaradılmış Əlahiddə Ordu və son vaxtlar formalaşdırılan yeni Komando qüvvələri ən müasir hərbi texnika ilə təchiz edilərək Azərbaycan Silahlı Qüvvələrinin ayrılmaz və qüdrətli tərkib hissəsinə çevrilmişdir. Naxçıvanın spesifik coğrafi yerləşməsi və təhlükəsizlik amilləri nəzərə alınaraq atılan bu addımlar göstərir ki, Azərbaycan Silahlı Qüvvələri bölgədə əsas söz sahibidir və Muxtar Respublikanın hərbi potensialı gündən-günə möhkəmləndirilir.
Müsahibədə xüsusi diqqət çəkən əsas məqamlardan biri də Zəngəzur dəhlizinin reallaşması və Naxçıvanın strateji nəqliyyat-logistika mərkəzinə çevrilməsidir. Prezident İlham Əliyev qeyd etmişdir ki, Azərbaycanın əsas hissəsini Naxçıvanla birləşdirəcək bu dəhlizin açılması ölkəmizin tarixi təşəbbüsüdür. İkinci Qarabağ müharibəsindən dərhal sonra başlanılan infrastruktur layihələri çərçivəsində Horadiz–Ağbənd avtomobil yolu demək olar ki, tam hazırdır. Eyni zamanda, Naxçıvan ərazisində 194 kilometrlik dəmir yolu xəttinin yenidən qurulması nəzərdə tutulur. Bu infrastruktur yeniləndikdən sonra yolun yükaşırma qabiliyyəti 15 milyon tona çatdırılacaqdır. Bununla da Naxçıvan həm Şərq-Qərb, həm də Şimal-Cənub nəqliyyat dəhlizlərinin mərkəzində yerləşən, Avrasiya məkanında əvəzolunmaz tranzit habına çevriləcəkdir.
Səfər çərçivəsində Muxtar Respublikanın sosial-iqtisadi tərəqqisi və iş yerlərinin yaradılması istiqamətində də böyük miqyaslı layihələrin təməli qoyulmuşdur. Ərazi nöqteyi-nəzərindən Sumqayıtdan sonra ölkəmizdə ikinci böyük sənaye parkı olan Naxçıvan Sənaye Parkının və 300 meqavat gücündə yeni İstilik Elektrik Stansiyasının inşasına start verilmişdir. Artıq uzun illərdir qazlaşdırmanın 100 faiz təmin olunduğu Naxçıvanda mövcud generasiya güclərinin artırılması, yeni Günəş və su elektrik stansiyalarının tikintisi, habelə 100 meqavatlıq batareya saxlanc qurğusunun quraşdırılması bölgənin daxili tələbatını tam ödəyəcək və böyük həcmdə "yaşıl enerji"nin ixracına imkan yaradacaqdır.
Dövlət başçısı qeyd etmişdir ki, görülən bütün böyük quruculuq işlərinin təməlində milli kimliyimiz, tariximiz və mənəvi dəyərlərimiz dayanır. Qədim Atabəylər dövlətinin paytaxtı olmuş Naxçıvanda dahi memar Əcəmi Naxçıvaninin abidəsinin ucaldılması, Möminə xatun məqbərəsinin və digər tarixi-mədəni abidələrin bərpası bu diyarın zəngin irsinə verilen yüksək dəyərin bariz nümunəsidir. Bununla yanaşı, Naxçıvan şəhərinin yeni Baş planının hazırlanması, nəqliyyat sisteminin ekoloji təmiz elektrik avtobusları ilə yenilənməsi, 26 yaşayış məntəqəsini əhatə edən 420 kilometrlik yol şəbəkəsinin təmiri və kənd təsərrüfatı üçün suvarma layihələrinin icrası əhalinin rifahını daha da yüksəldəcəkdir.
Prezident İlham Əliyev vurğulamışdır ki, Naxçıvan, Şərqi Zəngəzur və Qarabağ vahid inkişaf konsepsiyası və müasir idarəetmə modeli əsasında qurulur. İşğaldan azad olunmuş torpaqlarımızda özünü doğruldan Prezidentin Xüsusi Nümayəndəliyi institutunun və kadr-struktur islahatlarının Naxçıvanda tətbiq edilməsi bu qədim diyarın təhlükəsizliyini, idarəetmənin təkmilləşməsini və firavan gələcəyini tam təmin edəcəkdir.

08/09/2026

Azərbaycan Respublikası Nazirlər Kabinetinin 17 mart 2022-ci il tarixli qərarına əsasən, dövlət ümumi təhsil müəssisələrində vahid məktəbli geyim forması tətbiq edilir.

📌 2026–2027-ci tədris ilində də əvvəlki illərdə təsdiq edilmiş məktəbli geyim forması qüvvədə qalacaqdır.

Bütün şagirdlərdən məktəbli geyim formasına riayət etmələri xahiş olunur.

08/03/2026

Azərbaycan-Qırğızıstan münasibətlərində tarixi mərhələ: dostluq, müttəfiqlik və yeni strateji uğurlar
Azərbaycan Respublikasının Prezidenti cənab İlham Əliyevin 31 iyul 2026-cı il tarixində Qırğız Respublikasına reallaşan dövlət səfəri iki qardaş ölkə arasındakı strateji tərəfdaşlığın və sarsılmaz dostluq əlaqələrinin yeni müstəviyə yüksəldiyini bir daha nümayiş etdirdi. Səfər çərçivəsində dövlət başçılarının mətbuata bəyanatları, imzalanan mühüm sənədlər və keçirilən təntənəli mərasimlər Azərbaycan ilə Qırğızıstan arasında münasibətlərin ən yüksək zirvəyə çatdığını sübut edir.
Ölkə başçısı bəyanatında xüsusi olaraq vurğulamışdır ki, iki dövlət arasında mövcud olan müttəfiqlik münasibətləri çox böyük məsuliyyət deməkdir və Azərbaycan bu məsuliyyəti şərəflə daşımağa tam hazırdır. Beynəlxalq platformalarda, iqtisadi-ticari sahədə və təhlükəsizlik məsələlərində qarşılıqlı dəstəyin bundan sonra da davam etdiriləcəyi bildirilib. Səfər zamanı imzalanan geniş zərfli sənədlər, xüsusilə Azərbaycan-Mərkəzi Asiya əməkdaşlığında yeni mərhələnin əsasını qoyan Çolpon-Ata Bəyannaməsi ikitərəfli və çoxtərəfli fəaliyyətimizin əhatə dairəsini daha da genişləndirir.
İqtisadi əməkdaşlıq sahəsində əldə olunan mühüm nailiyyətlərdən biri birgə Azərbaycan-Qırğız İnvestisiya Fondunun maliyyə vəsaitinin iki dəfə artırılaraq 200 milyon dollara çatdırılmasıdır. Bu addım yeni iş yerlərinin yaradılmasına, birgə istehsal layihələrinin gerçəkləşməsinə və iqtisadi potensialın güclənməsinə xidmət edəcəkdir. İqtisadi və turizm əlaqələrinin bariz nümunəsi kimi İssık-Kul gölünün sahilində Azərbaycan dövlətinin vəsaiti hesabına inşa edilən ilk beşulduzlu “Bakı” hotelinin (Baku Resort & Spa) açılışı böyük qürur hissi ilə qarşılanmışdır.
İki ölkə arasında humanitar və mədəni əlaqələr də yüksələn xətlə inkişaf edir. Qırğızıstanın işğaldan azad edilmiş Ağdam bölgəsində böyük qırğız epoxasının şərəfinə “Manas” adını daşıyan məktəb inşası dahi xalqlarımızın qardaşlıq rəmzidir. Qarabağın bərpasına göstərilən bu dəstək Azərbaycan xalqı tərəfindən yüksək qiymətləndirilir. Eynilə Bakıda görkəmli yazıçı Çingiz Aytmatovun abidəsinin və onun adını daşıyan parkın, eləcə də Bişkekdə Qırğızıstan-Azərbaycan dostluğu parkının açılması ortaq tarixi-mədəni köklərimizin ayrılmaz parçasıdır.
Səfər çərçivəsində baş tutan ali təltifetmə mərasimi dövlətlərarası ehtiramın ən ali təzahürü oldu. Prezident İlham Əliyev Qırğız Respublikasının ali dövlət mükafatı – 1-ci dərəcəli “Manas” ordeni ilə, Qırğızıstan Respublikasının Prezidenti Sadır Japarov isə Azərbaycanın ən yüksək dövlət təltifi – “Heydər Əliyev” ordeni ilə təltif edildilər. Eyni zamanda Azərbaycanın Mərkəzi Asiya Məşvərət görüşlərinə tamhüquqlu üzv qəbul olunması regional inteqrasiyanı və strateji tərəfdaşlığı daha da möhkəmləndirir. Bu tarixi səfər göstərir ki, ortak köklərə və sarsılmaz dostluğa söykənən Azərbaycan-Qırğızıstan münasibətləri gələcəyə doğru daha inamla addımlayır.

07/31/2026

Ana dilimizi qorumaq üçün böyük addımlar atan Ümummilli Liderin siyasi xətti Prezident İlham Əliyev tərəfindən inamla davam etdirilir

Ana dili hər bir xalqın milli kimliyini, mənəvi varlığını və tarixi yaddaşını yaşadan, onu müstəqil millət kimi formalaşdıran ən mühüm sütundur. Azərbaycan dilinin dövlət dili kimi təşəkkül tapması, zənginləşməsi və beynəlxalq aləmdə layiqli mövqe tutması xalqımızın keçdiyi çətin, lakin şərəfli tarixi mübarizə yolunun məntiqi nəticəsidir. Hər il avqust ayının 1-də ölkəmizdə qeyd edilən Azərbaycan əlifbası və Azərbaycan dili günü bu müqəddəs irsə cavabdehlik və milli qürur hissinin təcəssümünə çevrilmişdir.

Tarixə nəzər salsaq görərik ki, Sovet imperiyası dövründə milli dillərin sıxışdırılması və rus dilinin hakim mövqeyə gətirilməsi siyasəti xüsusilə güclənmişdi. Belə bir mürəkkəb və təhlükəli şəraitdə ana dili məsələsini gündəmə gətirmək böyük siyasi cəsarət və qətiyyət tələb edirdi. Bütün süni məhdudiyyətlərə və təzyiqlərə rəğmən, Ümummilli Lider Heydər Əliyev hələ 1970-ci illərdən başlayaraq Azərbaycan dilinin dövlət dili kimi yaşamaq hüququ uğrunda ardıcıl mübarizə aparmış, ziyalıları və bütövlüklə xalqı bu ideya ətrafında səfərbər etmişdir. Bu mübarizənin tarixi nəticəsi kimi 1978-ci il aprelin 2-də Heydər Əliyevin bilavasitə təşəbbüsü və təklifi ilə Azərbaycan SSR Konstitusiyasına "Azərbaycan Sovet Sosialist Respublikasının dövlət dili Azərbaycan dilidir" maddəsi daxil edildi. Bu, həmin dövr üçün misilsiz bir tarixi qələbə idi.

Müstəqillik dövründə də Ulu Öndər dövlət dili siyasətini prioritet sahə kimi diqqətdə saxlamışdır. 1995-ci ildə ümumxalq səsverməsi yolu ilə qəbul edilən müstəqil Azərbaycan Respublikasının Konstitusiyasında Azərbaycan dilinin dövlət dili statusu hüquqi olaraq möhkəmləndirildi. Daha sonra, 2001-ci il iyunun 18-də imzalanmış “Dövlət dilinin tətbiqi işinin təkmilləşdirilməsi haqqında” Fərman və həmin il avqustun 9-da təsis edilən “Azərbaycan əlifbası və Azərbaycan dili gününün təsbit edilməsi haqqında” Fərman ölkədə dil siyasətinin zəfər mərhələsi oldu. 2002-ci ildə qəbul edilən "Azərbaycan Respublikasında dövlət dili haqqında" Qanun isə dilimizin tətbiqi, qorunması və inkişaf etdirilməsi üçün möhkəm qanunvericilik bazası yaratdı.

Ulu Öndər Heydər Əliyev həmişə vurğulayırdı ki, "Müxtəlif dillərə mənsub olan insanlar Azərbaycan dilini sadəcə eşidərək onun nə qədər şeirə bənzədiyini, xoş ahəngli olduğunu dəfələrlə qeyd ediblər. Biz dilimizlə fəxr etməliyik. Dil hər bir millətin milliliyinin əsasıdır. Xalqı xalq edən, milləti millət edən onun ana dilidir." Ulu Öndərin fikrincə, öz dilini bilməyən və sevməyən insan öz tarixini də yaxşı bilə bilməz, bu səbəbdən hər bir gənc ana dilini ən incəliklərinə qədər öyrənməli və ondan qürurla istifadə etməlidir.
Ana dilimizin saflığının qorunması və tətbiq sahələrinin genişləndirilməsi istiqamətində Ümummilli Liderin əsasını qoyduğu bu strategiya hazırda Azərbaycan Respublikasının Prezidenti cənab İlham Əliyev tərəfindən uğurla davam etdirilir. Dövlət başçısının imzaladığı "Azərbaycan dilində latın qrafikası ilə kütləvi nəşrlərin həyata keçirilməsi haqqında", "Azərbaycan Milli Ensiklopediyasının nəşri haqqında" və "Dünya ədəbiyyatının görkəmli nümayəndələrinin Azərbaycan dilində nəşri haqqında" sərəncamlar ana dilimizin zənginləşməsinə və onun həyatımızın bütün sahələrində geniş tətbiqinə böyük təkan vermişdir.

Qloballaşma dövründə dilimizin saflığının qorunması Prezident İlham Əliyevin xüsusi diqqət yetirdiyi strateji məsələlərdəndir. Dövlət başçısının "Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı"nı, həmçinin elektron məkanda dilin istifadəsi və saflığının qorunması ilə bağlı imzaladığı fərmanlar bu sahəyə dövlət qayğısının bariz nümunəsidir. Prezident İlham Əliyev Azərbaycan Milli Elmlər Akademiyasının yubiley tədbirindəki çıxışında bu məsələnin vacibliyini belə ifadə etmişdir: "Azərbaycan dilinin saflığının qorunması hər bir Azərbaycan vətəndaşının işi olmalıdır. Dövlət, alimlər, yazıçılar, jurnalistlər bu məsələyə çox böyük diqqət verməlidirlər. Biz xalq kimi, millət kimi öz dilimizi qorumasaq, onda yavaş-yavaş bizim milli kimliyimiz də sarsıla bilər. Azərbaycan dili o qədər zəngindir ki, heç bir xarici kəlməyə ehtiyac yoxdur."

Aparılan məqsədyönlü siyasət, qəbul edilən normativ-hüquqi aktlar və orfoqrafiya normalarının təkmilləşdirilməsi nəticəsində Azərbaycan dili bu gün mürəkkəb və dərin fikir çalarlarını aydın ifadə etmək qüdrətinə malik, dünya dilləri arasında özünəməxsus yeri olan kamil bir dildir. Müstəqil dövlətin olmadığı zamanlarda belə bizi bir xalq kimi qoruyub saflığını saxlayan ana dilimizi göz bəbəyi kimi qorumaq, onu gələcək nəsillərə təmiz və zəngin şəkildə ötürmək hər bir Azərbaycan vətəndaşının müqəddəs borcudur.

07/28/2026

Peşə təhsili müəssisələrinə 2026–2027-ci tədris ili üzrə tələbə qəbuluna başlanılıb.

Bu gün peşə təhsili əmək bazarının tələblərinə cavab verən ixtisaslara yiyələnmək və uğurlu karyera qurmaq üçün mühüm imkanlar yaradır.

Gənclərimizi maraq və bacarıqlarına uyğun peşə seçməyə, müasir təhsil imkanlarından yararlanmağa dəvət edir və onlara uğurlar arzulayıram.

Peşə Təhsili üzrə Dövlət Agentliyi

07/28/2026

07/28/2026