台語文手摺簿仔

26/08/2026

#課程記錄 「台語腔調面面觀、腔調應用練習」

台語毋是干焦南部腔、北部腔、海口腔遮爾仔簡單；咱做戲若是好好仔運用腔口，干焦一句台詞，這个角色對佗位來凡勢就隨知影。

見若咱學會曉台文、認捌台語腔口的精差，就有才調靠家己「田野調查」，和母語人開講，那聽那記錄，對方的字字句句所接載的跤跡，咱都有通聽甲明明明。

多數的腔口阮課程攏有講著：宜蘭北海岸桃園腔、台北腔、新派老派同安風、新派老派泉風、西部海口腔、鹿港腔、中南部漳山風、粵漳風、中彰投內山飄、南高屏透濫腔、台南關廟腔、高雄茄萣腔⋯⋯阮通台灣行透透，共百百款的第八調、入歸柳、入歸語、出歸時、央元音、展脣音等等的款勢紹介一遍，對做戲人來講，智識量是飽水飽水，絕對有夠用矣。

認捌台語的腔口差，就是多元文化的實踐，若規工想欲統一腔口，排斥家己生份的呼音，按呢就有影是華頭華腦，戇甲袂抓癢囉！

·······················

社長的台語文演員班、編導班當咧紡
育專業台語文做戲人是阮注心的事工
Stay tuned.

·······················

主辦單位：台語文手摺簿仔
協辦單位：陳千武文學協會
課程講師：黃郁盛（社長）
客座講師：簡嵩恩
影像記錄：楊曜禎
上課空間：桴駱自由空間、二條通讀劇匯
特別感謝：台語文創意園區

12/08/2026

古典音樂Ｘ台語講古Ｘ動物保育
感謝公視台語台記者楊舒晴採訪報導
《半線樹林仔鬧猜猜》拜五暗時登台
社長總算欲轉來去故鄉員林表演矣！
位賰無偌濟，中部的鄉親緊來喔～～

法國作曲家聖桑的《動物狂歡節》是真出名的古典音樂，彰化在地的半線室內樂樂團重新改編，共原本的動物角色換做臺灣石虎，閣加入台語講古佮囡仔創作的圖像，透過音樂講出環境開發、動物保育佮語言傳承等議題，創作出屬於臺灣家己的《半線樹林仔鬧猜猜》。

完整報導》https://youtu.be/OW3-whWUgGg
-
🔔注文（訂閱）公視台語新聞 YouTube 頻道，關心生活大細事
https://youtube.com/?si=BfhXetbYytvqZ1fF

#動物狂歡節 #石虎 #動物保育 #語言傳承

31/07/2026

台中的朋友歡迎來上課！
（保證金納了才算是報名成功喔）

27/07/2026

台語台共《阿松佮阿暖》的腔口差鉸做一塊Reel，線頂的討論就一下仔湠開矣。

拄仔好這齣嘛做超過一半矣，我看我差不多愛來分享我當初時是按怎替𪜶設計腔口，中間有搪著啥物姑不二三將的情形矣🍵

好玄的朋友下跤留話（？

#幕後大公開

22/07/2026

#課程記錄 「聲調探索＆拼音入門（二）」

第3禮拜咱起手學台語的7聲8調佮各種變調（連讀、仔前、隨前）。Taⁿ台語是「聲調語言」，音懸一下徙位，意思是天差甲地。

為著莫予學生頭殼𢯾咧燒，社長專工設計「7方陣」（逐个聲調有7字，攏總49字），學生仔著愛靠耳仔聽、目睭相，閣有雙手搜揣詞典，按呢來判斷逐个字屬於第幾調。透過多感官的肉身體驗，閣有同學同齊討論、查證，來加強7聲8調的印象。

阮的課程毋是「衝刺班」，是為著予做戲人有初初的感受，上無莫搪著台語case就拍生驚，走甲若飛；抑是過頭自信，捎咧烏白舞。咱學語言愛開時間粒積，用語言來做戲，更加愛沓沓仔磨，袂使得著急。

·······················

社長的台語文演員班、編導班當咧紡
育專業台語文做戲人是阮注心的事工
Stay tuned.

·······················

主辦單位：台語文手摺簿仔
協辦單位：陳千武文學協會
課程講師：黃郁盛（社長）
客座講師：簡嵩恩
影像記錄：楊曜禎
上課空間：桴駱自由空間、二條通讀劇匯
特別感謝：台語文創意園區

21/07/2026

（為著一寡毋成代閣欲來「堪浮輪」矣😮‍💨）

這站仔當咧教學生腔口，漳風的、同安風的、老泉風的⋯⋯百百款我攏總教，逐項都無落勾，因為腔口的多元是偌仔爾仔要緊。

往擺去TFAI看古早的台語片，猶閣有這陣台語台的影展，凊彩一齣電影都有泉風的腔口通好聽，現此時伊顛倒是戲齣內底，甚至是咱日常生活的弱勢。

所致講，我見若翻譯抑是家己做戲，百面會共腔口徛予明，根據故事的背景、角色對佗位來，腔口該當啥款勢，咱上好就按怎行。

逐家嘛著愛認捌一層代誌，華語侵台進前，咱社會的言語本底就是五花十色、花巴哩貓，啊咱人嘛是按呢過甲好勢好勢。

總講一句，一齣戲幾若个角色現現對無仝地頭來的，今腔口嘛教落去矣，演員嘛講出喙矣，戲嘛拍煞矣，頂頭煞愛阮「統一腔口」，共一寡詞彙重頭錄做普通腔的呼音，這是我透底無才調認同的。

毋過體制就是按呢，頂頭若決定按呢做，我一个食頭路的按怎苦勸嘛是無較縒。

（泉風台詞-1）

13/07/2026

舊年通人呵咾的戲劇導覽轉來矣🎉

《時間來的車》這禮拜六15:00起鼓
07/18到09/20攏總8場予恁看甲飽

「1滴水都無摻」全台語戲劇導覽
那看戲那熟似咱日本時代的歷史
那欣賞大稻埕佮宜蘭風的台灣話

今年歇熱毋知欲去佗位仔？
來臺灣新文化運動紀念館就著矣
會記得來下跤留話區登記留票👇

······················

有「培育台語家庭計畫」
來1場就有通抾1點喔🔴

······················

藝術總監｜張嘉路
專案經理｜詹佩瑄
節目編導｜李沛彤
演出人員｜黃郁盛、李佳勳、沈宥齊
台語顧問｜賴欣宜
文史顧問｜劉秀美
美術佮道具設計｜朱芷君
主視覺概念｜張嘉路
視覺設計｜蘇湘尹
排練場地支持｜財團法人數位藝術基金會
主辦單位｜台北市文化局
執行單位｜移動故事屋

11/07/2026

#課程記錄 「聲調探索＆拼音入門」

樹頭徛予在，就毋驚樹尾做風颱 🌀

第2禮拜𤆬學生認捌台文歷史，嘛掰會一寡觀念，比論講：「羅馬字≠英文」、「毋是干焦唐人字是字」等等。

閣來阮窸倏起手學台羅，逐家頭殼pháng是燒燙燙強欲袂轉踅，總是久來若學在手，伊百面是上讚的家私頭仔。

是按怎著學羅馬字咧？Taⁿ編劇愛寫字，導演、演員愛看字，搜揣資料嘛愛拍字，學拼音當然嘛袂走閃得。就親像和1支鎖匙，正確的門1下開，台語文的世界就明明明。

佳哉逐家攏真綿爛，猶未慣勢煞嘛是拚勢學。社長嘛有共挐氅氅的內容捋ho͘較金滑，1个研究台語戲劇產業的研究人員來綴課，嘛對課程的安排真呵咾：

（紲laih是中文）

「今天聽了拼音課，覺得龐雜的知識設計的比自己想像中的好入口。

一開始關於『何謂台語文字』這些部分蠻厲害的，這其實是很複雜的知識，但有精挑幾個重點（歷史背景、文字特色、背後的意識型態⋯⋯），讓學生能輕鬆進入台語讀寫的世界。老師感覺讀了很多資料，解釋時的用字遣詞時經過思量，很精確，不會拖泥帶水。

進入拼音課程時，聲韻母編排方式、學習單設計，會從『完全不會台語』的初學者需求出發，分別『哪些和英文一樣，所以好記』、『哪些是容易記錯搞混』，也多次提醒學生不要想一次記完，希望初學者能不要害怕。

我不是初學者，或許無法替學生代言，說這樣的方式到底好學不好學。但以熟悉這套拼音的人、曾經教過別人的人來說，我覺得是我目前看過最初學者友善的拼音教學方式。」

·······················

社長的台語文演員班、編導班當咧紡
育專業台語文做戲人是阮注心的事工
Stay tuned.

·······················

主辦單位：台語文手摺簿仔
協辦單位：陳千武文學協會
課程講師：黃郁盛（社長）
客座講師：簡嵩恩
影像記錄：楊曜禎
上課空間：桴駱自由空間、二條通讀劇匯
特別感謝：台語文創意園區

01/05/2026

社長做顧問指導的新戲欲來矣！
請各位鄉親朋友準時收看喔～～

這齣的語言設定較趣（ngē）味（táu），一定有好嘛有欠點，總是逐家攏真拍拚，所以請觀眾朋友大力呵咾、理性批評heh！

勞力🙇🙇

準備和大家見面了 🤍
一段「松溫暖」的故事，即將悄悄展開

📺 播出資訊
▸ 民視無線台｜6/8起 週一至週五21:15
▸ 公視台語台｜6/9起 週一至週五18:00
▸ 緯來綜合台｜6/9起 週一至週五20:00
▸ 中華電信MOD、Hami Video影劇館+ （全網獨家首播）｜6/8起 週一至週五 22:30
▸ Astro歡喜台（馬來西亞）｜6/9起 週一至週五18:30

準時鎖定，
一起走進 阿松與阿暖 的故事裡 ✨
-
出品方丨民視、公視台語台、中華電信
製作單位丨映畫製作
總製作人｜郭建宏
導演丨郭春暉
編劇統籌丨張文樑