18/12/2022
و نكمل معاكم رحلتنا في المدن التركية تحت هاشتج 🇹🇷🇹🇷🇹🇷🇹🇷
هناخدكم النهاردة فى رحلة فى واحدة من أجمل المدن السياحية فى تركيا , مدينة عاش فيها اليونان قبل 3000 سنة.
📍 مدينة موغلا و إن كان حقّ لمدينة إنها تنافس إزمير على لقب عروس بحر 🌊 إيجة فهتكون هي الوحيدة. المدينة بتقع فى جنوب غرب تركيا على ساحل بحر إيجه , المدينة بتضم على مدن سياحية تانية زي بودروم و فتحية و مرميس تحت اسم ولاية موغلا عشان تشكل تكتل مزارات و أماكن سياحية رهيب جدا و متنوع ما بين خلجان و بحور فيروزية 🌊🌊🌊 و جزر منعزلة 🏝️ و بحيرات بتطل على مناظر طبيعية فوق الخرافة. فوق كل ده جوه الجميل المعتدل فى الصيف المائل لكونه حار أما فى الشتاء فالمناخ بيكون بار جدا و الأمطار بتكون بشكل دائم مابتقفش الا قليل.
تعالو في رحلة لطيفة فى بعض الأماكن اللى لازم تزوروها لو جات الفرصة إنكم تزوروا موغلا:
1- بودروم : من أعرق المدن فى ولاية موغلا و المليئة بعبق التاريخ
أول مكان تزوره لازم يكون قلعة بودروم 🏰 العريقة اللى من القرن الخامس عشر الميلادي اللى اتبنت فى فترة الحروب الصليبية لحد ما فتحها العثمانيين و حولوها لمسجد. القلعة ليها برج عالى و بتطل على البحر فى منظر ياخد القلب و القلعة حاليا مدرجة فى قائمة التراث العالمي التابع لليونسكو و مزار سياحي تاريخي مهم للكثير من السياح.
متحف بوردروم للآثار البحرية ايوة للآثار , المتحف ده بيضم كل التحف و الآثار اللى طلعوها من البحر فى بودروم من تحف و مجوهرات و فلوس و اسلحة حتي و طبعا قسموها لفئات مختلفة حسب الفترة الومنية اللى بترجع ليها. بمجرد ما تاخد جولة فى المتحف كأنك بتسافر فى الزمن و بتاخد جولة لتاريخ المدينة دي و بتعيش كل اللى عدي عليها و عدي على الناس اللى عاشو فيها فى أزمنة مختلفة. المتحف يستحق الزيارة طبعا و كمان ميزته إنه قريب من القلعة فتقدر تعتبرها جولة واحدة.
تالت مكان هو مدرج بودروم (( Bodrum Amphitheater )) و ده من غير كلام كتير عنه ده مدرج مبني على الطراز الروماني القديم بيرجع للقرن الرابع قبل الميلاد. المدرج بيضم مسرح و منصة للعروض المسرحية و لغاية النهاردة بيقدموا عروض عليه.
رابع مكان هلى بوابة ميندوس ((Myndos Gate البوابة دي تعتبر من أقدم الأماكن السياحية التاريخية فى بودروم و هي الوحيدة اللى اتبقت من بوابتين كانوا جزء من سور طول 7 كيلو متر كان بيحمي المدينة من أي غزو خارجي.
طبعا أنا حبيت اخدكم لفة على الأماكن التاريخية عشان ناس كتير ماتعرفش غير الشواطئ و السواحل و المطاعم وكدة لكن ده ماينمعش إننا نقولكم أشهر و أجمل الشواطئ فى بودروم : شاطئ الجمل , شاطئ جومبيت Gumbet beach المشهور بالرياضات المائية , شاطئ فنك .yahsi beach,bardakci cove
2- فتحية :
أول مكان لازم تزوره هي مقبرة تلموسوس 🪦 واللى اتبنت ربعمائة سنة قبل الميلاد
و طبعا فتحية يعني البحر و الشواطئ فأول حاجة طبعا مكان هتشوفوه هو ال ulu deniz يعني البحر اللي لونه تركواز من كتر صفائها كأنها بتبص للسما و ده غير المناطيد الهوائية إللى بتقدر تركبها في البحر اللى من أمتع الرياضات البحرية , كمان لازم تجرب تاخد رحلة بسفينة لأن البحر مليان أماكن أكثر من روعة تستحق الزيارة زي Soğuk soyu köy و Camil Ada اللى يرجع عمرها ل 5000 سنة قبل الميلاد و برضه بتعدوا على kelebekler vadisi وادي الفراشات الشاطئ اللى مياهه اشبه بحجر الفيروز من نقائها و صفائها واللي يعتبر من أجمل الأودية على مستوي تركيا.
كمان فيه مكان لطيف جدا اسمه yakapark و ده عبارة عن مزار سياحي فيه مطاعم و كافيهات لكن اللى بيميزه إنه إن المطاعم و الكافيهات دي جوة الطبيعة حرفيا بمعني إنها على ضفاف جداول صغيرة و شلالات صناعية صغيرة معمولة ب شجر أو غيره هسيبلكم الصور تشرح نفسها , كمان فيه مكان اكتر من روعة جنبه و هو شلال جيزلي كنت Gizlikent Şelalesi و ده حاجة فوق الخيال.
كمان فيه مكان روعة اسمه Saklıkent و ده حرفيا المطاعم على الشاطئ و بيقي فيه زي عوامات صغيرة تبع المطاعم بتقدر تاكل عليها و في نفس الوقت تقدر تمد رجليك في المياة الساقعة حاجة كدة اخر مزاج و كمان تقدر تمارس هناك رياضيات مائية زي التجديف بالقوارب و غيرها.
طبعا ولاية موغلا فيها أماكن كتير صعب إننا نغطيها في منشور واحد لكن نوعدكم إننا في المستقبل نبقي ناخدكم جولة تانية في مزارات موغلا الأخري اللى تستحق الزيارة 😄💙
🇹🇷
💪💯
#تركيا #الهندسة #اسطنبول
