3ich English

قالك القسم تمهيدي مش موجود منه و مش قانوني
و في نفس الوقت دولة عاملة برنامج صغير لازم في سنة اولى مطالب يكتب و يقرا و ينتج. كيفاش شيء هذا باش يصير من غير التمهيدي يا وزارة المراة و طفولة. بنتي عمرها عام نخمم في دمار الي يستنى فيها في الابتدائي من توة ندعي لربي تصيرش معجزة و يتبدل البرنامج و الا تحلش مدرسة انترناشيونال فينلندية في قابس نقيد فيها بنتي خاطر عارفة روحي باش نلقى روحي زايد على واجباتي كام و ربة بيت و صاحبة مشروع، مطالبة نقري بنتي …. حاجة مانيش مطالبة نعملها و مافما حتى ام اوروبية و الا اسيوية تعمل فيها. كان همنا احنا . انا هذا نشوفوا انتهاك لحقوق الطفل و المراة خاطر الي قاعد يخلص في فاتورة البرنامج هذا المراة. الامهات … الصغير مرهون في ام متفاضية و قارية. يطيح عند ام مريضة و الا مسكينة ما تفهمش البرنامج و الا تاعبة ماعندهاش وقت و الا تخدم يمشي فيها

باهي جماعة فيديوهات فترة جاية
كلها كيفاش تجيب اعداد باهية في امتحان الباك
راني هبطت عمناول اربعطاش فيديو فقط للباك تلقوهم في highlights متاع انستغرام
Abir abdelmalek
و انا توة نعاود نهبطهم بطريقة محتلفة

كل عام نهبط راني ديجا فيديوهاتي في تيك توك متاع مراجعة و تحضير للامتحان الاعلى نسبة مشاهدة في العالم مش العالم العربي، العالم كله، ادخل للcreator insight و اكتب اي موضوع تحب تفهمه توة تلقاني.

البكالوريوس هي bachelor degree
و bachelor degree هي الشهادة الجامعية و ليست البكالوريا الي عنا في تونس

شهادة البكالويا و الي هي ختم الثانوية هي high school diploma

اي شهادة مش جامعية عادة اسمها diploma
شهادة جامعية degree
شهادة حضور او تربص او اي تكوين قصير certificate

اي شهادة ماقبل ماجستير هي undergraduate
اي شهادة ما بعد bachelor degree هي postgraduate

الشعبة هي track في امريكا و stream في بريطانية

في جامعة نحكوا على field of study و الا major التخصص

التخصص في ماجستير اسمه minor
و الي متخصص في البيولوجيا نقولوا they majored in biology
يعني عنده شهادة جامعية في هذا الاختصاص

مفردات مهمة للناس الي تحب تشارك في منح دراسة البرا من توة عذم كلمات لازم تعرفوهم

باك سبور مشيت صباح لابسة survet حمرة و بيضة نتفكرها ، علم تونس، جاني واحد يبزنس قدام ليسي قالي بنت "كليب" قتله ما ولد كلب كان انت … مافهمتوش اش يحكي. منطق عادم عصباح قايمة متنرفزة دنيا مطر و طقس يعيف و زيد مش عاجبتني tenue تقول جماعة هلال الاحمر بابا قالي البسي حاجة ترمز الي حب الوطن، مشيت عاد و انا لياقتي البدنية منعدمة و ما احترمتش روحي و عملت ديسبونسي بصحة رقعة ماشية نلعب. دنيا بدت تمطر ما مشا معايا حد امي قتلي بنيتي دنيا مطر بابا وصلني للمحطة عطاني دبوزة ماء و قالي اسمعي بنتي نحبك تلعبي على درابو، يستخايلني المساكني و انا اخر مرة جريت فيها خاطر جرا ورايا كلب.

شفت صحابي الي قبلي يتكربسوا و ينقزوا
بنات شعر مجبود و ماكياج و تينيات تهبل و انا تقول قرن فلفل و لامة شعري وقتها مازلت مابديتش نولهى بروحي حواجبي تقول rock lee و نوزن ميتين غرام

جا دوري ، سالني واحد من لجنة قلي شيقربلك نور دين عبد الملك، قتله خويا ملخر كان يقلي شيقربلك ناتنياهو باش نقله خويا. المفيد نسلكها

قالي اعمل enchaînement بديت نعمل في حركات علاء ولي دين في عبود على الحدود
بعد جيت نتكربش قعدت واحلة فوق راسي و طحت على جنب، جا خدي على حجرة طحت نتسكك. قالولي قومي اعملي اي حاجة تثبتلنا الي انت في باك سبور ، اعملي saut de chat مافهمتش نمعوك و الا شنوة. المفيد قالي c bon الي بعده عملت salut متاع جماعة يابان طبست و تعديت.

بعد قالي كورس و الا كرة حديدية انا نوزن ميتين غرام اخترت كورة حديدية الي هي ارزن مني، رميتها جات ورايا. نسمع فيهم يستغفروا في مولاهم .. قتلهم اعطوني فرصة ثانية قالولي برا ربي معاك.

كملت دنيا شدت بعضها بالمطر، عطيت خمسة الاف حق دخلة لولاد كلاسي قالوا باش يجيبوا فرقة ولاد فيالة و تينيات ماعملوا شيء مشاو بلعوا بيهم في كورنيش بلا سماح … مشيت للبحر مع ستة تلامذة صورنا ضربنا ريح و مطر روحت مريضة في حالة كالفلوس

في نتيجة متاع باك نلقى روحي جبت 12 ،بابا قالي ياخي تجري بتوالي و الا دمغتيه الاستاذ بالكورة حديدية. بابا سيب السبعة متاع الماط و كبش في ام 12 متاع سبور. قتله بابا راني جبت سبعة في ماط قالي على اساس انت جبتي خير منها من قبل. زايد ماجيتيش سبورتيفا كي بوك، بابا هذا جاه فتق في كرشه خاطر مشا مرة بزربة.

المفيد مانيش مسامحتهم على 12, ايه حقى نوردين عبد الملك طلع هذا واحد طردوه من جميع معاهد عامين قبلي و انا قلت الي هو خويا، لا تربحك يا نوردين

باك سبور جبت فيها 12
تقول دمغت اللجنة بالكرة حديدية

المفيد كيما كل عام حبيت نفكركم الي انا جبت 19,5 في الانجليزية
باش ماتنسوش و برا قلت نفكركم … و الي يسالني قداش جبت في الماط باش نبلوكيه

Actually
لا علاقة لها ب
Actuellement
و شكرا

Actually فعلا
Actuellement حاليا

Actual حالي

لكن actually مش حاليا

مثل hard صعب

Hardly ليس بصعوبة

Hardly = no

يحبوا يقصوا علينا تيك توك و يرزونا في فريزيتا … توة زعمة باش تعرس بالبانانينو 🍌و الا كيفاش؟ حتى هي اش من بلعوطة لا خلتها سفرجل لا سبناخ . ربي يهدي سرهم و برا . جماعة فايسبوك فايتكم شطر عمركم

المشكلة مش لا في التلفزة و لا تيك توك و لا انستغرام و لا الفايسبوك ، المشكلة فينا احنا، اي منصة ندخلولها نخيبوها. اكثرش من موقع لينكدين ناس كل تخدم بيه تدبر في خدم و خرجات و فرص كان احنا عاملينه ركن تعارف و تبزنيس حليت حساب باش ندبر بيه خدمة في ماضي نلقى روحي كل مرة في مكالمة وهمية مع صاحب عرض شغل جاي يضيع في الوقت و يسيب في البلادة، تيك توك في امريكا انا نتبع فيهم اصلا تيك توك تونسي ما يخرجليش ، تيك توك برا كل بلاد نسافرلها يطلعلي محتوى البلاد تركيا اسبانيا بريطانيا لا حروبات لا سبان مابين بلدان لا عرك لا فضايح. جوه احلى جو خاطر في امريكا تيك توك يخلص على المشاهدات فتلقى ناس تجتهد في المحتوى و ما تحلش لايفوهات جملة و تلقى مواضيع كل انا بنتي عمرها عام ربيتها على يدين اخصائيات التربية و قابلات و طبيبات نساء التيك توك. موسوعة تيك توك غادي، تعلمت منه مونتاج، كتب كل الي قريتهم من عادي، نتبع الالعاب اولمبية عليه، سياسة، اخبار عالم كل تقرا تعليقات تفهم عالم كيفاش يخمم. محتوى البرا في قمة الجدية الي يخرجلي. ما نحكوش على مستوايا في الانجلش ما شاء الله تحسن برشا وليت نحكي كيفهم من كثر الاستماع و توة نتبع في قنوات البيزنس و مشاكلي كل نحل فيها من تيك توك سوى علاقتها بصناعة المحتوى تي بابا مرض نقرص الي عنده عرفته من طبيبة على تيك توك. راهوا العيب مش في تيك توك فينا احنا، في تيليقرام ولادنا تتبادل في تصاور البنات العرايا، في فايسبوك يسبوا في طوب الارض لا سلم صغير لا كبير، في انستغرام حروبات على كولابوراسيونات ماريتهاش في حتى بلاد كان عنا ، في اي منصة باش تطلع في المستقبل باش يخرج منها شعب هذا كان السلبي خاطر مشكلة في شعب . الفقر يخلي لعباد تتعامل مع كل منصات كفرصة باش ينطر فلوس، الجهل يمنع مستخدمين انهم يفيدوا ناس و مايدعموش محتوى مفيد، و الاخلاق منعدمة تخلي المنصات هذه تتحول لمكان متاع تنمر و عنصرية و عنف و ارهاب الكتروني.

اكثر تلميذ كارثة 😂 تلميذ هذاكا الي كي يجيك المتفقد و يبدا يحب يفرح بيك و يثبت انك استاذة باهي عن دافع حب عمره لا شارك يبدا يشارك يهز في صبعوا و يجاوب ، مرة جاني متفقد فما تلميذ يا ولدي ما عمره ما يعبرها اللغة الانجليزية ديجا يحب يولي مغني راب نهار الكل يكلاشي في صحابه و في اخر الجملة يقول oh yeah المفيد جاني متفقد باش يتعرف عليا كيما يقولوا بعد ما نقلت و يقيمني، طاح تلميذ هذا يشارك يا ولدي ديما غايب مايحبش اللغة الانجليزية و تلامذة كل تشارك قلبوها دنيا مخهم قالهم الي انا باش نترقى لرتبة وزير و الا كيفاش😅 ما يعرفوش الي زيارة المتفقد حاجة عادية بنسبة ليا مادام كراسة كاملة الباقي عااادي حتى كان بلبزت درس و الله لا يهمني ، عاد شدني ميص ميص ميص يشارك، قتله tell me Ahmed, how do you deal with stress
عارفته مش باش يعرف يجاوب، قام قالي by thinking positive and controlling my workload

سيد حال التشات جيبيتي في القسم، و انا نحكي و هو يحكي بلغة شكسبير

Yes miss this is absolutely correct

I find it quite questionable that young people struggle alone

يكتب و يجاوب😂

جيته على حنب متفقد يكتب في كراسة قكيتله تاليفون، بعد درج ولا يجاوب this are very space
My mother is very potato

كلام حد مافاهمهم

متفقد مخه تضرب يقول شبيه كان ماشي مريقل

على مرتين باش نرجعله تاليفون 😂

المفيد فك تاليفون صاحبه ورحع تحول لامريكاني و يقول

The issue is very concerning
I believe we should address it to the government

ظاهرة كونكسيون رجعت

انا حصة هاكي كل ما نتفكرها يجيني كريز متاع ضحك لتوة، ربي يعلم بحالي كيفاش كملت درس باش نموت ديجا صحابه زرقوا شدين الضحكة.

تلميذ من الحصة هاكي مارجعش بطل من القراية . نحب نقلك يا احمد راني مانسيتكش 😂 ان شاء الله تكون برك ما تجاوبنيش بكلاش و ان شاء الله حققت حلمتك ووليت رابور

نحسد الاساتذة و تلامذة على عطلة و الا فيشطة و انا العام كله فيشطة فهمتش الحسد الي انا فيه هذا شنوة حكايته. شكون كيفي يحسد ناس على العطل و هو معطل العام كامل 😅 ة